Unaha ang Dios sa Pagkabuhi sang Inyo Pamilya!

SANDAY Bob kag Jean—ang mag-asawa nga ginpakilala sa nagligad nga artikulo​—⁠wala magbulagay. Sa baylo, ginpakighambal nila ang ila mga problema upod sa isa ka Cristianong ministro. Nahantop niya sang ulihi nga ang ila problema resulta gali sang ila magkatuhay nga ginhalinan.

Halimbawa, bangod kay si Bob naghalin sa pamilya sang mga tindero kag mga trabahador kag mismo nga amo ang nagabuhat sang mabug-at nga obra, luyag niya ang makabulusog nga pamahaw kada aga. Si Jean, nga naghalin sa pamilya sang mga empleyado sa opisina, nagserbe sa iya sang kape kag tinapay lamang. Gani pag-inaway ini nga nag-umpisa sa pamahaw kag nagdaku lamang!

Kinahanglan nga pauswagon ni Bob kag ni Jean ang ila komunikasyon. Walay sapayan, ang tunay nga kabangdanan sang ila problema labi pa sa sina. “Ginatamod bala ninyo ang kada isa sa kapawa sang 1 Corinto 13:​4?” pamangkot sang ministro. Ina nga teksto sa Biblia mabasa: “Ang gugma mapailubon kag malulo. Ang gugma wala nagakahisa ukon nagapabugal, wala ini nagapahabok.” Ang masunod nga bersikulo nagasiling nga ang gugma “wala nagagawi sing dinagakaigo, wala nagapangita sang iya kaugalingon, indi ini mainakigon. Wala ini nagasapak sa kalautan.” Handa si Bob kag si Jean nga iaplikar ining mga pulong sa ila kaangtanan.

Ang problema sini nga mag-asawa nagakinahanglan una sing espirituwal nga solusyon. Bangod kay luyag ni Bob kag ni Jean nga mahuptan ang maayo nga kaangtanan upod sa Dios, labaw sa tanan ginakinahanglan nila nga iaplikar ang mga prinsipio sa Biblia kag hibaluon nga “kon indi si Jehova magpatindog sang balay, nagapangabudlay sa wala sing pulos ang mga nagapatindog sini.” (Salmo 127:1) Ang bersikulo 3 tubtob 5 nagahinun-anon nahanungod sa pagpalig-on sang pamilya. Kag ang labing daku nga kadalag-an sa pagpauswag sang kalipay sa balay nagahalin sa pag-una sa Dios sa pagkabuhi sang pamilya.​—⁠Efeso 3:​14, 15.

Kon Ano ang Nalakip sa Pag-una sa Dios

Ang pag-una sa Dios sa pagkabuhi sang imo pamilya nagalabaw pa sa hulubaton, “Ang pamilya nga nagapangamuyo sing tingob nagapabilin sing tingob.” Suno sa balasahon nga Family Relations, madamo ang nagapati nga “ang relihion nagabulig sa positibo kag mapagros nga impluensia sa pamilya kag nagapasangkad sa kaayawan sa kabuhi sang mga katapo sini.” Apang ang pagpraktis sing relihion indi pareho sang pag-una sa Dios. Madamo ang pormal nga nagatuman sa isa ka relihion bangod lamang sang batasan, tradisyon sang pamilya, ukon sosyal nga bentaha. Ang Dios may diutay nga impluensia sa ila matag-adlaw nga pagkabuhi. Importante pa, indi tanan nga relihion may “dagway sang pagsimba nga matinlo kag walay dagta sa atubangan sang aton Dios.”​—⁠Santiago 1:⁠27.

Sa pag-una sa Dios sa pagkabuhi sang aton pamilya, kita kag ang aton mga hinigugma dapat magsimba kay Jehova, “ang Labing Mataas sa ibabaw sang bug-os nga duta,” suno sa iya mga kinahanglanon. (Salmo 83:18) Ang Anak sang Dios, si Jesucristo, nagsiling: “Ang takna nagaabot, kag karon amo na, nga ang matuod nga mga manugsimba magasimba sa Amay sa espiritu kag kamatuoran, kay ang Amay nagapangita sing subong nga mga manugsimba sa iya. Ang Dios Espiritu, kag ang nagasimba sa iya kinahanglan magsimba sa espiritu kag kamatuoran.” (Juan 4:​23, 24) Agod masimba si Jehova nga Dios “sa espiritu,” ang aton balaan nga pag-alagad sa iya dapat ginapahulag sang tagipusuon nga puno sang gugma kag pagtuo. (Marcos 12:​28-31; Galacia 2:16) Ang pagsimba kay Jehova sa “kamatuoran” nagakinahanglan nga isikway naton ang relihioso nga mga kabutigan kag sundon sing bug-os ang iya kabubut-on subong sang ginapakita sa Biblia. Indi naton mauna si Jehova nga Dios kon ang aton relihion indi nagahisanto sa iya mga talaksan.a Ano ang iban sini? Kag paano makabenepisyo ang imo pamilya sa pag-aplikar sini?

Pag-una sa Dios Subong Bana

Sa 1 Corinto 11:​3, ang Biblia nagasiling: “Ang ulo sang tagsa ka tawo amo si Cristo; ang ulo sang babayi amo ang iya bana; kag ang ulo ni Cristo amo ang Dios.” Kon ikaw isa ka bana, may ginhatag ang Dios nga responsabilidad sa imo nga mangin ang pangunang manugdesisyon sa inyo pamilya. Apang wala ini nagahatag sa bana sing lisensya nga mangin mapiguson ukon diktador.

Ang Biblia nagalaygay sa mga bana nga patugsilingan ang mga balatyagon sang ila mga asawa kon nagahimo sing mga desisyon nga nagaapektar sa ila. (Ipaanggid ang Genesis 21:​9-14.) Sa pagkamatuod, ang Biblia nagalaygay sa aton tanan nga ‘dili tamdon sang tagsa sa aton ang iya kaugalingon lamang nga mga butang, kundi man ang mga butang sang iban.’ (Filipos 2:​2-4) Kon wala sing nadalahig nga prinsipio sa Biblia, ang Cristianong bana masunson nga magasunod sa luyag sang iya asawa. Bangod personal nga interesado sa iya, siguraduhon niya nga wala sia ginapabug-atan sing mga responsabilidad. Halimbawa, mahimo buligan sang bana ang iya asawa sa mga hilikuton sa balay, labi na kon ang asawa may sekular nga obra.

Si apostol Pablo nagsulat: “Ang mga bana dapat maghigugma sang ila mga asawa subong sang ila kaugalingon nga mga lawas. Ang nagahigugma sang iya asawa nagahigugma sang iya kaugalingon, kay walay tawo nga nagadumot sang iya kaugalingon nga unod; kundi nagasagud kag nagaamlig sini, subong nga si Cristo man sang kongregasyon.” (Efeso 5:​28, 29) Si Jesucristo nagapakig-angot sa mga katapo sang kongregasyon sing mahigugmaon.

Talalupangdon man ang laygay ni apostol Pedro: “Kamo nga mga bana, padayon nga magkabuhi nga may patugsiling kaupod sang [inyo mga asawa] suno sa ihibalo, nga nagahatag sing dungog sa babayi subong nga maluya nga suludlan, sanglit nga masigkamanunubli kamo sang dibagay nga kahamuot sang kabuhi, sa katuyuan nga indi masablagan ang inyo mga pangamuyo.” (1 Pedro 3:7) Indi bala makasulubo mahibaluan nga ang dimahigugmaon nga pagtrato sa asawa nagasablag sang mga pangamuyo sang bana? Huo, dapat pakig-angutan sang bana ang iya asawa sing mahigugmaon agod ang iya mga pangamuyo pagapamatian kag pagasabton sang Dios.

Ang pag-una sa Dios nagaapektar man sang kaangtanan sang amay sa iya mga kabataan. Dapat sia mabalaka sing daku nahanungod sa ila espirituwal nga kaayuhan. Apang, sa isa ka surbey sa E.U., katunga lamang sang mga lalaki ang nagsiling nga “ang pagpakigbahin sa pagtuon kag paghinun-anon sang grupo sa Kasulatan” amo ang ‘labing importante sa espirituwal nga pagtubo sang ila pamilya.’ Ang iban naghatag sang mga butang subong sang “pagtan-aw ukon pagpamati sa ginapalayag nga serbisyo sa relihion” ukon ‘pagbinagbinag sa kahulugan sang kabuhi.’

Apang, ang Biblia nagasugo sa mga amay: “Dili ninyo pagpaakiga ang inyo mga anak, kundi sagura sila sa disiplina kag panghunahuna ni Jehova.” (Efeso 6:4) Sa tunga sang mga Saksi ni Jehova, ang mga amay ginapaabot nga magapanguna sa pagsimba sang pamilya. Paagi sa pagdumala sing tayuyon sang mga pagtuon sa Biblia sang pamilya, pagtambong sa Cristianong mga miting, kag pagsunod sa iban pa nga mga kinahanglanon sang Kasulatan, ginauna nila ang Dios sa pagkabuhi sang pamilya.

Pag-una sa Dios Subong Asawa

Kon ikaw isa ka asawa, ginauna mo ang Dios paagi sa pagsakdag sa imo bana sa iya katungdanan subong ulo sang pamilya. Siling sang Biblia: “Mga asawa, magpasakop sa inyo mga bana, subong nga nagakaigo sa Ginuo.” (Colosas 3:18) Mabudlay ini kon ang bana indi palasugilanon ukon maluya sa pagpanguna sa pagsimba sang pamilya. Sa bisan ano nga hitabo, ang pirme nga pagpadaku sang iya mga sayop ukon, sing malain pa, pagbatu sa iya nagadugang lamang sang kahuol sang pamilya.

Ang Hulubaton 14:1 nagasiling: “Ang tagsa ka babayi nga maalam nagapatindog sang iya balay, apang ang buangbuang nagaguba sini sa iya kaugalingon nga mga kamot.” Ang isa ka paagi nga mauna sang babayi nga maalam ang Dios kag ‘mapatindog ang iya balay’ amo ang paagi sa pagpasakop sa iya bana. (1 Corinto 11:3) Upod ang ‘kasuguan sang mahigugmaon nga kalulo sa iya dila,’ ginalikawan niya ang dinagakaigo nga paghikay sa iya bana. (Hulubaton 31:​26) Nagapangabudlay man sia sing lakas sa paghi­mo sa desisyon sang iya bana nga magmadina­lag-on.

Ang isa pa ka paagi para mauna sang minyo nga babayi ang Dios amo ang mangin mapisan nga asawa. Siempre pa, kon dapat sia mag-obra sing sekular, mahimo nga wala na sia sing tion ukon enerhiya sa pagmentinar sang iya balay subong sang luyag niya. Makapanikasog gihapon sia nga mangin kaangay sang “sangkol nga asawa” nga sa iya ang Biblia nagasiling: “Nagatatap sia sing maayo sa mga pagginawi sang iya panimalay, kag wala nagakaon sang kalan-on sang katamad.”​—⁠Hulubaton 31:​10, 27.

Labaw sa tanan, dapat unahon sang asawa sa iya kabuhi ang pagsimba sa Dios. Madamo sang nakaduaw sa Kingdom Hall sang mga Saksi ni Jehova sa nahauna nga tion ang nagakomento sa mahipid nga hitsura sang mga kabataan. Nahanungod sini, hamili gid ang hilikuton sang asawa. Apang dapat man sia magpangabudlay nga huptan ang iya espirituwalidad paagi sa pagpangamuyo, pagtuon, kag pag-alagad sa Dios.

Pag-una sa Dios Subong mga Pamatan-on

Ang isa ka artikulo sa Adolescent Counselor nagasiling: “Ang mga kabataan nagapalambo sang mga panimuot kag mga pilosopiya nga nagtugot sa ila nga makontrol ang ila mga ginikanan. . . . Bangod nadayag sa katilingban nga nagapadaku kag nagahimaya sang gilayon nga kaayawan kag materyal nga manggad, ang mga pamatan-on nagapalambo sang panimuot nga ‘luyag ko ini karon gid nga daan.’ ” Kon ikaw ­isa ka pamatan-on, amo bala sina ang imo panimuot?

Ang Colosas 3:20 nagasiling: “Mga kabataan, tumana ninyo ang inyo mga ginikanan sa tanan nga butang, kay ini kalahamut-an sa Ginuo.” Ang pamatan-on nga nagatamod sang pagkamatinumanon nga sugo sang Dios magakooperar sa iya mga ginikanan. Halimbawa, indi sia magabatu sing tago sa ila paagi sa pagpakig-upod sa iya mga kabutho nga indi luyag sang iya mga ginikanan; ukon malimbungon niya nga impluensiahan ang ginikanan agod makuha ang luyag niya. (Hulubaton 3:32) Sa baylo, ang pamatan-on nga nagauna sang Dios sa kabuhi magapadakop sa mahigugmaon nga pagtuytoy sang ginikanan.

Pirme nga Unaha ang Dios!

Bisan ano man ang aton bahin sa pamilya, dapat naton unahon ang Dios sa kabuhi kag palambuon ang suod nga kaangtanan upod sa iya. Ginahimo bala nimo kag sang imo pamilya ina?

Sa sining “katapusan nga mga adlaw,” kita tanan nagaatubang sang “ital-ital nga mga tion.” (2 Timoteo 3:​1-5) Apang, posible ang mag-uswag sa espirituwal kag makalampuwas sa katapusan sining sistema sang mga butang. (Mateo 24:​3-14) Paagi sa pagpanghikot nahisuno sa sibu nga ihibalo sang Biblia, ikaw kag ang imo pamilya may paglaum sang kabuhi nga dayon sa paraiso nga duta. (Lucas 23:​43; Juan 17:​3; Bugna 21:​3, 4) Huo, mangin amo sina kon ginauna mo ang Dios sa pagkabuhi sang imo pamilya.

[Footnote]

[Laragway sa pahina 5]

Ang sangkol nga asawa ginaapresyar sing daku

[Laragway sa pahina 7]

Ginapalig-on sang Biblia ang mga bana nga magpanguna sa pagsimba sang pamilya