Mga Pamangkot Gikan sa mga Bumalasa

◼ Sa Mateo 10:21, nagapaandam bala si Jesus sa aton nga madamong mga kauturan sa kongregasyon ang magatalikod sa ila espirituwal nga mga kauturan?

Indi, indi amo sina ang punto sa paandam ni Jesus, nga mabasa: “Ang utod magatugyan sang utod sa kamatayon, kag ang amay sang iya anak, kag ang mga anak magabato sa mga ginikanan kag magapapatay sa ila.”—Mateo 10:21.

Ginapakita sang konteksto nga ginsiling ini ni Jesus sa 12 ka apostoles sang ginpalakat niya sila agod magbantala sa Israel. Ang kalabanan sang ginsiling niya may pangunang kahulugan para sa mga apostoles. Halimbawa, nagsiling sia nga ginhatagan sila sing gahom sa paghimo sing milagruso nga pagpang-ayo, pagpaguwa sang espiritu, kag bisan sang pagbanhaw. (Mateo 10:​1, 8; 11:1) Ginapamatud-an sang maragtas nga indi tanan nga mga Cristiano nakabaton sang milagruso nga mga gahom, nagalig-on nga ginapatuhuyan diri ni Jesus ang isa ka pat-od nga grupo​—⁠ang iya mga apostoles.

Apang, ang iban sang ginsiling ni Jesus nagalabaw pa sa nagalakbay nga pagbantala sang mga apostoles. Nagsiling sia sa ila: “Mag-andam sa mga tawo; . . . dalhon kamo sa atubangan sang mga pangulo-puud kag sang mga hari bangod sa akon, sa pagpanaksi sa ila kag sa mga pungsod.” (Mateo 10:​17, 18) Sa sina nga paglakbay, ang 12 mahimo nga nag-atubang sing pagpamatok, apang wala sing pamatuod nga gindala sila sa “atubangan sang mga pangulo-puud kag sang mga hari” sa pagpanaksi sa “mga pungsod.”⁠a Sang ulihi nga mga tuig, ang mga apostoles nag-atubang sa mga gumalahom, kaangay nanday Hari Herodes Agrippa I kag II, Sergio Paulo, Gallio, kag bisan kay Emperador Nero. (Binuhatan 12:​1, 2; 13:​6, 7; 18:​12; 25:​8-12, 21; 26:​1-3) Gani ang mga pinamulong ni Jesus may aplikasyon sang ulihi.

Ang masunod nga laygay ni Jesus nagpadayon paagi sa paandam: “Ang utod magatugyan sang utod sa kamatayon.” Wala niya ginapatuhuyan ang espirituwal nga mga kauturan subong nga wala man niya ginapatuhuyan ang espirituwal nga mga amay ukon mga anak sa iya masunod nga pinamulong sa bersikulo 21: “Ang amay [magatugyan] sang iya anak, kag ang mga anak magabato sa mga ginikanan kag magapapatay sa ila.” Buot silingon ni Jesus nga ang mga apostoles makapaabot sang kapintas ukon pagpamatok halin sa mga paryente.​—⁠Mateo 10:​35, 36.

Ang mga apostoles magakinahanglan sing pagbatas sa sinang paglakbay sa pagbantala. Si Jesus nagpadayon: “Dumtan kamo sang tanan nga tawo bangod sa akon ngalan; apang ang nagapadayon tubtob sa katapusan maluwas.”​—⁠Mateo 10:⁠22.

Ang iban sang ginsiling ni Jesus sadto nga okasyon may importansia para sa aton subong mga Saksi ni Jehova sa karon. Ang ginapadaku sa aton pagbantala amo ang Ginharian. Ginabuhat naton ang aton ministeryo nga wala sing bayad kag ginapangita ang mga tawo nga interesado sa mensahe ukon takus sini. Kinahanglan ang paghalong. Madamo ang nagapamatok. Kon kaisa ang mga paryente, mga kaingod, ukon mga kaupod sa trabaho nagahatag sing daku nga problema, labi na para sa mga sinsero nga nagasugod sa pagsunod sa dalanon sang matuod nga Cristianismo. Ginsulit ni Jesus ang paandam nahanungod sina nga pagpaandam sang nagalaragway sang “tanda” sang iya presensia. (Mateo 24:​3, 9, 10; Lucas 21:​16, 17) Ginsulit man niya ang pagkinahanglan naton sang ‘pagbatas tubtob sa katapusan agod maluwas.’ Huo, dapat kita magbatas tubtob sa katapusan sang aton karon nga kabuhi ukon tubtob matapos ining sistema sang mga butang kag makasulod kita sa bag-ong kalibutan.​—⁠Mateo 24:⁠13.

[Footnote]