Ang Kabuhi kag Ministeryo ni Jesus
ANG artikulo nga “Gintapos ni Jesus ang Tanan nga Ginpahimo sang Dios,” sa masunod nga mga pahina, amo ang katapusan nga bahin sang amon malaba nga serye nga “Ang Kabuhi kag ministeryo ni Jesus.” Ini nga bahin nagguwa sa Ang Lalantawan sa kapin sa anom ka tuig, sa 149 ka pasunod nga mga guwa, sugod sang Abril 1, 1985, nga guwa.
Ginalauman namon nga ining serye sa Ang Lalantawan nakabulig sa inyo sa pagsunod sang laygay ni apostol Pablo nga ‘magtulok sing hanuot kay Jesus’ kag pamatian ang sugo sang Dios nga ‘mamati sa iya.’ (Hebreo 12:2, 3; Mateo 17:5) Sa sulod sang mga tinuig, madamo ang nagsulat agod isiling nga nabuligan sila sa paghimo sini. “Daw subong nga didto ako nga nagapamati sa iya kag nagatan-aw sang iya ginahimo,” sulat sang isa ka bumalasa. “Ginhigugma ko sia sing kapin bangod sining mga artikulo.”
Ang isa pa ka bumalasa nagsulat: “Ang tagsa ka guwa daw nagaunod sing isa ka punto nga wala ko matalupangdi sang ginbasa ko ang rekord sang Biblia. Nalipay ako nga handurawon ang nanuhaytuhay nga mga hitabo sa kabuhi ni Jesus sa mas maayo nga kronolohiko nga paagisod paagi sa pagbasa sang tagsa ka artikulo.” Madamo ang nagpabutyag sing kaanggid nga apresasyon sa pagtuon kon san-o kag kon sa diin si Jesus nagpanudlo kag naghimo sang mga butang sa tion sang iya ministeryo.
Ang isa ka babayi sa Espanya nagsiling: “Gintago ko ang tanan nga artikulo sugod sa umpisa. Makatudlo gid ini para sa mga adulto subong man sa mga kabataan. Kuwarentay-kuwatro anyos ako, kag nalipay ako kon ginabasa ko ining mga kasaysayan. Daw subong bala nga didto ako sa tagsa ka maragtason nga hitabo.”
Ang isa ka iloy sa Estados Unidos nagsulat: “Bangod sang pagkasimple sang mga artikulo kag sang simple nga pagpabutyag sini, ang akon bana nagbuylog sa amon pagtuon sang pamilya. Ginpangabay ako sang akon otso-anyos nga anak nga lalaki nga sulatan kamo agod pasalamatan kamo nga ang iya amay nagatuon na karon sang Biblia. Nagapangabay sia nga kon makompleto na ining mga serye ang mga artikulo ibalhag ini nga isa ka libro agod nga mapaambit niya ini sa iya mga kaklase.”
Ayhan kaangay ka sa bumalasa nga nagpanalabiton kasan-o lang: “Daw ginsubuan ako nga ang mga serye malapit na matapos kay ginabinagbinag na ang hingapusan nga mga adlaw sang kabuhi ni Cristo. Mingawon gid ako sa sini sa Ang Lalantawan.” Ginalauman namon nga malipay kamo sa sining hingapusan nga bahin sang amon serye nga, “Ang Kabuhi kag Ministeryo ni Jesus.”