Ang mga Gradwado sang Gilead Nagsugod sa Isa ka Makapaladya nga Dalanon sang Kabuhi

“DAW ano ka makalilipay nga okasyon ini, ang gradwasyon sang ika-90 nga klase sang Gilead!” Paagi sa sining mga pulong, ginpakilala sang tsirman, nga si Karl F. Klein sang Nagadumala nga Hubon, ang programa sang gradwasyon. Sa pag-asoy sang ginsuguran sang Watchtower Bible School of Gilead, nagdugang sia: “Sin-o ang nagdumdom nga, sadto sang 1943, sang maggradwar ang nahauna nga klase sang Gilead nga pagligad sang 48 ka tuig magatipon gihapon kita para sa gradwasyon sang isa pa ka klase​—⁠ang ika-90?”

Apang, sang Marso 3, 1991, isa ka mainit-init nga adlaw sa New Jersey, kapin sa 4,000 ka imbitado nga mga bisita kag mga katapo sang pamilya Bethel ang nagtipon sa Jersey City Assembly Hall, sa pihak sang suba gikan sa Siudad sang Nueva York, para sa gradwasyon sining bag-ong mga misyonero. Antes magsugod sa kabuhi subong misyonero, ang mga gradwado magabaton sing nagapaalam nga laygay tuhoy sa sini sa ila adlaw sang gradwasyon.

Ang programa nagbukas paagi sa isa ka ambahanon. Pagkatapos, ang tanan nga nagtambong natandog gid sang si Frederick W. Franz, ang 97-anyos nga presidente sang Watchtower Bible School of Gilead, naghatag sing nagabukas nga pangamuyo. Nian, sa tapos sang nagabukas nga pamulongpulong sang tsirman, ang mga gradwado​—⁠kag ang tanan nga tumalambong​—⁠namati sa isa ka serye sang malip-ot, praktikal nga mga pamulongpulong.

Si Max H.Larson sang Komite sang Pabrika una nga naghambal, sa tema nga “Mga Masigkamanugpangabudlay Upod kay Jehova.” Sa tapos mapatalupangod ang arka sang kaluwasan nga gintukod ni Noe kag sang iya pamilya, sia nagsiling: ‘Ginatipon karon ni Jehova ang isa ka bug-os kalibutan nga pamilya sang minilyon, kag tuyo niya nga luwason ining daku nga pamilya sa dakung kapipit-an.’ Paano? Ti, paagi sa modernong-adlaw nga arka​—⁠ang espirituwal nga paraiso! ‘Kamo,’ pahanumdom niya sa mga gradwado, ‘magakadto sa nanuhaytuhay nga mga bahin sang duta, nga sa diin mangin mga masigkamanugpangabudlay kamo ni Jehova sa pagtukod sing modernong-adlaw nga arka.’ Sa paghanda sa ila sa palaabuton, sia nagsiling: ‘Kinahanglan kamo magpangabudlay. Kinahanglan magpailob kamo. Makasumalang kamo sing mga balagbag. Diri ninyo kinahanglanon ang mga kalantip nga nahatag sang inyo paghanas.’

Si Daniel Sydlik, isa ka katapo sang Nagadumala nga Hubon, bag-o lang makaduaw sa madugay na nga mga misyonero sa Hapon kag Costa Rica. Sa pagpaathag sang tema nga “Isa ka Makapaladya nga Dalanon sang Kabuhi ang Inyo,” ginpaambit niya ang pila sang mabuligon nga mga panugda nga natipon niya gikan sa sining madinalag-on nga mga misyonero. Ang isa ka utod nga babayi, paathag niya, nagpaalinton sang laygay nga ginhatag sa iya sang iya iloy: ‘Higugmaa ang pag-alagad sa latagon. Makig-abyan sa mga tawo. Ipaambit ang imo kabuhi sa ila, kag magakahulugan ini sing kalipay para sa imo.’ Ang isa pa ka utod nga babayi nagsiling: ‘Sa sulod sang mga tinuig, nahangpan namon nga kon indi sobra ang paabuton mo sa iban, indi kita madali nga mapaslawan. Ang bisan ano nga buhat sang kaluoy kag pagkamahunahunaon nga mahimo naton magakahulugan sing kapin sa aton.’ Ang pag-aplikar sining praktikal nga laygay wala sing duhaduha nga magabulig sa mga gradwado nga mangin madinalag-on nga mga misyonero.

“Mangin mainantuson sa tanan,” siling sang 1 Tesalonica 5:⁠14. Si Leon Weaver sang Komite sang Departamento sa Serbisyo nagkomento tuhoy sini nga teksto sang magpamulongpulong sia sa tema nga “Mangin Mapailubon sa Tanan Ninyo nga Hilikuton.” Sin-o ang nalakip sa “tanan” nga dapat mangin mapailubon kita? Ang humalambal nagsabat: ‘Amo sila ang masugata ninyo sa pag-alagad sa latagon. Ang mga utod nga mga lalaki kag mga babayi sa inyo bag-o nga kongregasyon. Ang inyo kaupod nga mga misyonero. Ang mga sa sanga. Ang imo tiayon. Ang imo kaugalingon.’ Ngaa dapat mangin mapailubon sa tanan naton nga hilikuton? ‘Mga utod nga mga lalaki kag mga babayi,’ paathag sang humalambal, ‘ginabuhinan sang pagpailob ang kahuol kag kabalaka. Ang pagkamapailubon nagaresulta sa paghidait. Ang pagkamapailubon nagahupot sang paglaum nga buhi. Ang pagkamapailubon nagabulig sa aton sa paghupot sang aton kalipay sa pag-alagad.’

Si Albert D. Schroeder, isa ka katapo sang Nagadumala nga Hubon kag amo ang orihinal nga rehistrador sang Gilead School, amo ang masunod nga naghambal. Nagahambal sa tema nga “Padayon nga Sunda ang Inyo Modelo​—⁠si Jesucristo,” ginpasad niya ang iya mga komento sa Filipos kapitulo 2. “Hupti ining panimuot sang hunahuna [“Hupti ining panghunahuna,” footnote] nga yara man kay Cristo Jesus,” siling sang bersikulo 5. ‘Ginapakita sini,’ paathag sang humalambal, ‘nga kinahanglan naton ang balanse nga panghunahuna, subong nga si Jesus mismo may balanse nga panghunahuna.’ Sugod sa bersikulo 6, naghimo sia masunod sing makawiwili nga pag-usisa, nagapakita nga una anay naghatag si Pablo sing mga ebidensia nga si Jesus may balanse nga panghunahuna (bersikulo 6-8) kag dayon ginbalay niya ang mga paagi nga ginpadyaan sia ni Jehova bangod sang iya matinumanon nga dalanon (bersikulo 9-11). ‘Bahin ini sang inyo pribilehiyo,’ hinakop niya, ‘nga ibantala si Ginuong Jesucristo, buligan ang iban sa paghupot sing panimuot sang panghunahuna nga yara man sa iya.’

Anong nagapaalam nga mga pulong ang ginbilin sang mga instruktor sang eskwelahan para sa ila mga estudyante? Si Jack D. Redford naghambal sa tema nga “Ang Ikasarang sa Paghunahuna Magabantay sa Inyo.” (Hulubaton 2:​10, 11) ‘Sa inyo paglakat karon,’ paathag niya, ‘ang inyo kalipay indi nasandig sa kon sin-o kamo ukon kon ano ang yara sa inyo ukon bisan gani sa kamatuoran nga kamo gradwado sa Gilead. Ang inyo kalipay nasandig sa kon paano kamo nagapanghunahuna. Kag kon gamiton ninyo ang inyo ikasarang sa paghunahuna kag iaplikar ang inyo ihibalo, mangin malipayon kamo.’ Sa pagpakita sang pagkaimportante sang ikasarang sa paghunahuna, sia nagpaathag: ‘Ang kinatuhayan sang husto nga buhat kag sang sayop nga buhat amo ang panghunahuna. Ang inyo ginahunahuna amo ang nagadesisyon kon ano ang inyo himuon.’ Si J. D. Redford naghinakop paagi sa sining mga pulong sang pagpalig-on sa mga estudyante: ‘Kadamo sing maalam gid nga mga tawo sa kalibutan nga mapigaw maghunahuna, kag madamo sing mga tawo nga may kasarangan nga kinaalam nga nangin lantip sa paghunahuna. Gani tigayuna ina nga kalantip. Mangin determinado sa paggamit sang inyo hunahuna. Gamita ang inyo ihibalo. Landasa ang mga problema. Makigbagay sa mga tawo. Batuna ang awtoridad. Mangin mabungahon sa inyo hilikuton. Magbatas sa inyo asaynment.’

Ginpili ni Ulysses V. Glass, rehistrador sang eskwelahan, ang tema nga “Ginasakdag Kita ni Jehova,” pasad sa Salmo 37:​23, 24. ‘Ginadayaw ko ining klase,’ siling niya, ‘sa ila interes sa pagtuon.’ Ginpahanumdom niya sila sang pila ka bulig nga gin-aman ni Jehova sa pagsakdag sa ila​—⁠ang Pulong sang Dios, ang matutom kag mainandamon nga ulipon sa idalom sang pagtuytoy ni Jesus sa paghatag sing kahulugan kag paghangop sa Kasulatan, ang nanuhaytuhay nga mga publikasyon, ang mga miting, kag ang mga kombension. ‘Ang mga bulig nga gingamit ninyo sa inyo pagtuon,’ padayon niya, ‘kaangay sang espirituwal nga sungkod kag bilugon. Kinahanglan naton ini sa pagsakdag sa aton sa espirituwal, kag nagabulig man ini sa aton sa paghambal nga may awtoridad sa pagpaalinton sang Pulong sang Dios sa iban.’ Bilang paghinakop, ginlaygayan niya ang mga estudyante sing subong sini: ‘Kon ang inyo tagipusuon puno sing gugma para sa mga tawo, ang bunayag nga mga tagipusuon magasabat. Magamadinalag-on kamo sa inyo ministeryo, kag mahibaluan ninyo nga ginasakdag kamo ni Jehova.’

Ang katapusan nga humalambal sa programa sang aga amo si Carey W. Barber sang Nagadumala nga Hubon, nga nagpili sang tema nga “Magsulod sa Makitid nga Ganhaan.” Nagakomento sa Lucas 13:​23, 24, sia nagsiling: ‘Madamo ang luyag sang mga pagpakamaayo sang kabuhi, apang pila lamang ang handa sa pagpanikasog sing mabaskog agod matigayon ini.’ Kamusta kita? ‘Maayo nga pamangkuton naton ang aton kaugalingon, “Ano ang kahulugan sa akon mismo sang laragway sang isa ka makitid nga ganhaan?” ’ Ang mga nagakapaslawan sa pagsulod sa makitid nga ganhaan napaslawan, indi bangod imposible ini, kundi bangod indi sila handa sa pagpanikasog sang ila kaugalingon. ‘Si Jehova wala nagapangayo sing sobra sa aton,’ paathag sang humalambal. ‘Sa bulig ni Jehova,’ hinakop niya, ‘kabay nga kita tanan malipayon nga magpanikasog sing nagakaigo nga kusog sa pagpamilit nga makasulod sa makitid nga ganhaan pasulod sa bag-ong kalibutan sang walay katapusan nga kabuhi, paghidait, kalipay, kag kasadya, sa dayon nga himaya ni Jehova!’

Pagkatapos sining mga komento, ginpaalinton sang tsirman ang mga panamyaw nga nabaton gikan sa nanuhaytuhay nga mga bahin sang duta. Nag-abot na karon ang tion nga batunon sang mga gradwado ang ila mga diploma. Ang mga estudyante naghalin sa anom ka pungsod​—⁠Canada, Finland, Alemanya, Gran Britanya, Switzerland, kag Estados Unidos. Apang, ang ila asaynment, magadala sa ila sa mga pungsod subong sang Argentina, Benin, Bolivia, Dominican Republic, Papua New Guinea, Peru, St. Lucia, kag Taiwan. Kag ano ang ginbatyag sang mga gradwado sa ila adlaw sang gradwasyon? Sa isa ka makatalandog nga sulat para sa Nagadumala nga Hubon kag sa pamilya Bethel, nagsiling sila sa bahin: “Nagasalig kami sa pagsakdag sang Nagadumala nga Hubon, sang pamilya Bethel, kag sang bug-os nga organisasyon ni Jehova. Samtang ginaatubang namon ang mga pagtilaw sa palaabuton, ina nga pagsakdag butang nga pakabahandion namon. Ginapasalamatan gid namon ini.”

Sa tapos sang intermisyon, ang programa sang hapon nagsugod paagi sa pinalip-ot nga Pagtinuon sa Lalantawan, nga gindumalahan ni Karl A. Adams. Sa tapos sini, gindrama sang mga estudyante ang ila matuod nga mga eksperiensia sa pagtumod sang tagipusuon sa pagtudlo sang Pulong sang Dios. Bilang katapusan, ang tanan nga tumalambong, lakip ang mga gradwado sang ika-90 nga klase, nagtan-aw sing sibu sa tion nga drama nga natig-uluhan Likawi ang mga Kabalaka sang Kabuhi, nga ginpresentar sang lokal nga mga manugbantala.

Ang tsirman, nga si Karl Klein, naghambal para sa tanan sang magsiling sia sa iya nagahinakop nga mga pulong: “Katahom gid nga yari kita diri sa sining ikatlo nga adlaw sang Marso 1991!” Nian ang makalilipay nga programa nagtakop paagi sa isa ka nagatakop nga ambahanon, nga ginsundan sing pangamuyo ni Harold J. Dies.

[Kahon sa pahina 27]

Estadistika sang Klase

Kadamuon sang pungsod nga gintiglawas: 6

Kadamuon sang pungsod nga ginpadalhan: 10

Kabilugan nga estudyante: 24

Promedyo nga edad: 31.2

Promedyo nga kagulangon sa kamatuoran: 15

Promedyo nga kagulangon sa bug-os-tion nga ministeryo: 11

[Kahon sa pahina 26]

Ika-90 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumerohan gikan sa una pa likod kag ang mga ngalan nalista gikan sa wala pa tuo sa tagsa ka raya.

(1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.