Sa Dili Madugay Wala Na sing Balatian ukon Kamatayon!

WALA sing isa nga maluyag magmasakit, ukon tawo ang maluyag mapatay. Ang isa ka propesor sang sosiolohiya sa medisina nagsiling: “Ang pagpangita para sa malawig pa nga kabuhi halos bug-os uniberso sa bug-os nga maragtas kag sa kalabanan nga mga katilingban. May kaangtanan ini sa sadsaran nga huyog nga amligan ang kaugalingon . . . Si Ponce de Leon amo lamang ang labing bantog sa madamong mga lalaki nga maluyag sa paghinguyang sang ila kabuhi nga nagapangita sang malawig pa nga kabuhi. Ang kalabanan nga siensia sa medisina gindedikar sa pagtipig sa malawig pa nga kabuhi paagi sa pag-away sa balatian kag kamatayon.”

Ang kamatayon nagatuga sing kasakit sa aton nasulod nga kinaugali sa bagay nga kon biktimahon sini ang aton mga abyan kag mga katapo sang pamilya, halos kinaugali nga ginatinguhaan naton nga mapakanay ang epekto sini. Ang libro nga Funeral Customs the World Over nagasiling: “Wala sing grupo, bisan ano man ka karaan ukon sibilisado, nga kon pabay-an lang kag sa masarangan niya ang wala nagalubong sang bangkay sang iya katapo upod ang seremoniya. . . . Nagapaayaw ini sa bug-os uniberso nga huyog. Ang paghimo sini daw ‘husto,’ kag ang indi paghimo sini, labi na para sa mga suod katama bangod sang pamilya, balatyagon, ginpaambitan nga pagkabuhi, pareho nga eksperiensia ukon iban pa nga kaangtanan, daw ‘sala,’ dikinaugali nga paglaktaw, butang nga dapat pangayuan sing patawad ukon ikahuya. . . . Ang [tawo] isa ka persona nga nagalubong sang iya bangkay upod ang seremoniya.”

Ang Ginhalinan sang Balatian kag Kamatayon

Busa ang ideya nga sa pila ka adlaw ang balatian kag kamatayon pagadulaon may makusog nga ganyat, apang may sadsaran bala sa sina nga pagpati? Huo may yara, kag ini makatarunganon, masaligan, kag dimasaypunon. Amo ini ang inspirado nga Pulong sang aton Manunuga​—⁠ang Balaan nga Biblia.

Ginapaathag sing maayo sina nga libro ang ginhalinan sang mga kasubo sang tawo. Ginasugid sini sa aton nga ang unang tawo, si Adan, gintuga sang Dios kag ginbutang sa paraiso nga katamnan nga puluy-an nga nahamtang didto nayon sa Natung-an nga Sidlangan. Si Adan gintuga nga himpit; indi niya kilala ang balatian kag kamatayon. Ginbuylugan sia sang ulihi sang iya himpit man nga asawa, kag gin-agom nila ang palaabuton nga magkabuhi sing dayon sa duta.​—⁠Genesis 2:​15-17, 21-24.

Ining matahom nga kahimtangan wala maglawig. Ngaa? Bangod makagod nga ginpili ni Adan ang dalanon sang kabuhi nga hilway sa Dios. Nagresulta ang lakas nga pagpangabudlay, kasakit, balatian, kag sang ulihi kamatayon. (Genesis 3:​17-19) Ginpanubli sang iya mga kaanakan ang dimalipayon nga pagkabuhi nga ginpili ni Adan. Ang Roma 5:​12 nagapaathag: “Paagi sa isa ka tawo nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala.” Ang Roma 8:​22 nagadugang: “Aton nahibaluan nga ang bug-os nga tinuga nagaugayong sa kasakit sing tingob tubtob karon.”

Sa Duta Ukon sa Langit?

Walay sapayan, ang Biblia nagapasalig sa aton nga sa dili madugay ipasag-uli sang Dios ang matinumanon nga katawhan sa malipayon nga kahimtangan nga nadula nanday Adan kag Eva. Siling sang Bugna 21:​3, 4: “Ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.” Gintagna man sang isa ka manalagna anay ang tion nga “ang pumuluyo indi magsiling: ‘Nagamasakit ako.’ ”​—⁠Isaias 33:⁠24.

Mahanduraw mo bala ang kalibutan nga wala sing mga ospital, mga punerarya, kag mga lulubngan? Mahanduraw mo bala ang magkabuhi sing dayon, nga wala sing pag-antos kag kamatayon? Huo, ang saad sang Dios nagatandog sang mga balatyagon sa sulod gid naton. Apang, paano kita makasiguro nga ining makatilingala nga paglaum para sa aton planeta nga Duta​—⁠indi para sa langit? Talupangda ang konteksto sang ginsambit kaina nga teksto sa Kasulatan. Ang nahaunang bersikulo sang Bugna kapitulo 21 nagasugid nahanungod sa “bag-ong langit kag bag-ong duta.” Maathag nga ginasiling nga ang Dios magaupod sa katawhan kag nga sila mangin iya katawhan. Ang saad sa tolon-an ni Isaias nga wala na sing magamasakit ginsundan sang pagpatuhoy sa “katawhan nga nagapuyo sa duta,” nga “patawaron sang ila kalautan.”

Gani ining makapalig-on nga mga saad nagapatuhoy sa kabuhi sa duta! Kag nahisanto ini sa pangamuyo ni Jesus sa iya Amay: “Paghimuon ang imo kabubut-on sa duta subong sang sa langit.”​—⁠Mateo 6:⁠10.

Ngaa sa Dili Madugay?

Ang mga Saksi ni Jehova nakabulig sa minilyon sa paghibalo nga ining mga saad pagatumanon sa malapit nga palaabuton. Apang, sa anong sadsaran nga sigurado gid sila sa sini? Sa sadsaran sang talalupangdon nga ebidensia nga nagakabuhi kita sa “katapusan nga mga adlaw” sang karon nga sistema, ukon kahimusan, sang mga butang sa duta. (2 Timoteo 3:​1-5) Ang mga disipulo ni Jesus nangabay sing tanda sa kon san-o mahanabo ang konklusion sang sistema sang mga butang. Bilang sabat gintagna ni Jesus sing tul-id ang nagagrabe nga mga hitabo sa kalibutan nga natabo kutob sang nagdabdab ang Inaway Kalibutanon I sang 1914.⁠a Nian sia nagdugang: “Kon makita ninyo tanan ining mga butang, mahibaluan ninyo nga sia malapit sa mga gawang na. Sa pagkamatuod nagasiling ako sa inyo nga ining kaliwatan indi magtaliwan tubtob nga tanan ining butang matuman.” Gani ang iban sang kaliwatan nga nagakabuhi magakabuhi agod makita ang katapusan sang karon nga sistema sang kalibutan.​—⁠Mateo 24:33, 34.

Sa sina nga tion si Jehova nga Dios magasugo sa iya Anak, si Cristo Jesus, sa paglakat kag sa paglaglag sa tanan nga mga kabangdanan sang pag-antos kag kailo gikan sa kadaygan sining matahom nga planetang Duta. Ang Biblia nagasugid nahanungod sa pagdula sang kalautan subong “ang inaway sang dakung adlaw sang Dios nga Labing Gamhanan” sa Armagedon.​—⁠Bugna 16:​14, 16.

Madamong katawhan nga nagakahadlok sa Dios ang makalampuwas sa sining makahalawhaw nga hitabo kag magakabuhi agod makita ang pagsugod sang mahidaiton nga paggahom ni Cristo Jesus. (Bugna 7:​9, 14; 20:4) Bisan pa halin sa langit ang iya paggahom, ang mapuslanon nga mga resulta pagaagumon sang tanan nga nagakabuhi sa duta​—⁠sang mga makalampuwas sa inaway sang Armagedon kag sang minilyonmilyon nga pagabanhawon gikan sa minatay. Nian ang saad mangin katunayan: “Kinahanglan sia [si Cristo] maghari tubtob nga mabutang niya ang iya tanan nga kaaway sa idalom sang iya mga tiil. Ang katapusan nga kaaway nga laglagon amo ang kamatayon.”​—⁠1 Corinto 15:​25, 26.

Busa masaligon nga kita makasiling: “Sa dili madugay wala na sing balatian ukon kamatayon!” Indi ini handurawan ukon dalamguhanon lamang. Sigurado ini nga saad ni Jehova nga Dios, “nga indi makabutig.” Ibutang mo bala ang imo pagsalig sa sining paglaum? Makabenepisyo ka sa walay katapusan!​—⁠Tito 1:⁠2.

[Footnote]

[Laragway sa pahina 7]

Ang balatian kag kamatayon pagabuslan sa dili madugay sang mapagros nga panglawas kag kabuhi nga dayon