“Mga Babayi nga Nagapangabudlay sing Lakas sa Ginuo”
“Abiabiha si Trifena kag si Trifosa, nga nagapangabudlay sing lakas sa Ginuo.”—ROMA 16:12.
1. Sa anong paagi ang dutan-on nga ministeryo ni Jesus nangin isa ka pagpakamaayo para sa mga babayi?
ANG dutan-on nga ministeryo ni Jesus isa gid ka pagpakamaayo para sa Judiyong mga babayi. Ang hilikuton nga iya ginsugdan nagahatag sing paumpaw, paglaum, kag bag-ong dungog sa mga babayi sang tanan nga rasa. Wala niya ginsapak ang mga tradisyon sang Judaismo nga “naghimo sang pulong sang Dios nga walay pulos.” (Mateo 15:6) Ginsikway sang madamo sining mga tradisyon ang sadsaran nga mga kinamatarong nga ginhatag sang Dios sa mga babayi.
Ang Panimuot ni Jesus sa mga Babayi
2. Ngaa masiling nga ang pagpakig-angot ni Jesus sa mga babayi tuhay gid sadtong tion?
2 Daw ano ka daku ang kinatuhayan sang panimuot ni Jesus sa mga babayi kag sang panimuot sang Judiyong relihiosong mga lider! Sa pagbalikwat sang Encyclopaedia Judaica, ginkabig sang naulihi ang mga babayi nga “sakon, nagapamatibati sa ginahambal sang iban, tamaran, kag mahisaon.” Ang pagpakighambal sa isa ka babayi wala ginaugyunan, kag “makahuluya para sa isa ka eskolar nga makighambal sa isa ka babayi sa dalan.” (Jerusalem in the Time of Jesus, ni Joachim Jeremias; ipaanggid ang Juan 4:27.) Kapin pa ang masiling nahanungod sa matinamayon nga panimuot sang mga lider sang Judaismo sa mga babayi. Apang tuman na ang nasambit agod ipakita kon paano ang pagpakig-angot ni Jesus sa mga babayi tuhay gid sadtong tion.
3. Ano nga mga hitabo sa tion sang ministeryo ni Jesus ang nagapakita nga handa sia sa pagtudlo sa mga babayi sing madalom nga espirituwal nga mga kamatuoran?
3 Nagahatag si Jesus sing himpit nga halimbawa kon paano ang mga lalaki makatigayon sing mahigugmaon apang putli nga kaangtanan sa ila. Indi lamang nga nakighambal sia sa mga babayi kundi gintudluan man niya sila sing madalom nga espirituwal nga mga kamatuoran. Sa kamatuoran, ang nahauna gid nga tawo nga gintu-aran niya sang iya pagka-Mesias isa ka babayi, kag isa pa ka Samariahanon nga babayi. (Juan 4:7, 25, 26) Dugang pa, ang mga hitabo nga nagdalahig kay Marta kag kay Maria maathag nga nagapakita nga indi kaangay sang Judiyong relihiosong mga lider, wala ginbatyag ni Jesus nga ang babayi wala sing kinamatarong nga biyaan anay sa makadali ang iya pagdigamo agod dugangan ang iya espirituwal nga ihibalo. Sadto nga okasyon, “ginpili [ni Maria] ang maayong bahin,” kay gin-una niya ang espirituwal nga mga butang. (Lucas 10:38-42) Apang pila ka bulan sang ulihi, sang mapatay ang ila utod, si Marta, indi si Maria, ang nagpakita sing daku nga kalangkag nga sugataon ang Agalon. Daw ano ang kakunyag naton bisan karon kon ginabasa naton yadtong espirituwal nga paghambalanay sa ulot ni Jesus kag ni Marta nahanungod sa paglaum nga pagkabanhaw! (Juan 11:20-27) Daw ano nga pribilehiyo yadto para kay Marta!
Ang mga Babayi nga Nag-alagad kay Jesus
4, 5. Luwas sa mga apostoles, sin-o ang nagsunod kay Jesus sa tion sang pagministeryo sa Galilea, kag paano sila nag-alagad sa iya?
4 Ginbaton man ni Jesus ang pag-alagad sang mga babayi samtang nagalakbay sia. Sa kasaysayan sang iya Ebanghelyo, ginasambit ni Marcos ang “mga babayi . . . nga nag-upod anay sa iya [Jesus] kag nag-alagad sa iya samtang sa Galilea sia.” (Marcos 15:40, 41) Sin-o ining mga babayi, kag paano nila gin-alagaran si Jesus? Indi naton kilala ang mga ngalan nila tanan, apang ginapakilala ni Lucas ang pila sini kag ginapaathag niya kon sa anong paagi nag-alagad sila kay Jesus.
5 Si Lucas nagsulat: “Sa wala madugay naglibot sia sa mga siudad kag mga minuro, nga nagawali kag nagadala sing maayong balita sang ginharian sang Dios. Kag kaupod niya ang napulog-duha, kag pila ka babayi nga nag-ayo sa mga espiritu nga malaut kag mga masakit, si Maria nga gintawag Magdalena, nga sa iya nagguwa ang pito ka yawa, kag si Juana nga asawa ni Chuza nga tulugyanan ni Herodes, kag si Susana, kag iban pa nga madamo, nga nag-alagad sa ila sang mga pagkabutang nila.” (Lucas 8:1-3) Nagsugot si Jesus nga ining mga babayi magsunod sa iya kag gamiton ang ila mga pagkabutang sa pag-atipan sang iya materyal nga mga kinahanglanon kag sang iya mga apostoles.
6. (a) Sin-o ang nag-upod kay Jesus sa tion sang iya katapusan nga paglakbay pa Jerusalem? (b) Sin-o ang nag-unong kay Jesus tubtob sa iya kamatayon, kag paano ang pila sa ila ginpadyaan? (c) Gikan sa pagtamod sang mga tradisyon sang Judaismo, ano ang talalupangdon nahanungod sa kasaysayan sang Juan 20:11-18?
6 Sang ginpatay si Jesus, “may nagatalan-aw gikan sa malayo nga madamo nga babayi, nga nagsunod kay Jesus gikan sa Galilea, nga nagaalagad sa iya; sa ila yara si Maria Magdalena, kag si Maria nga iloy ni Santiago kag ni Jose.” (Mateo 27:55, 56) Sa amo, madamo sang matutom nga mga babayi ang nag-unong kay Jesus sa tion sang iya kamatayon. Talalupangdon man nga ang mga babayi amo ang una nga nakasaksi sang iya pagkabanhaw. (Mateo 28:1-10) Isa ini ka tuk-ap sa Judiyong tradisyon, kay sa sulod sang Judaismo ang mga babayi ginkabig nga indi takus nga mangin legal nga mga saksi. Ginatandaan ini, basaha ang Juan 20:11-18, kag handurawa ang daku nga emosyon nga nabatyagan ni Maria Magdalena sang magpakita sa iya ang nabanhaw nga Agalon, gintawag ang iya ngalan, kag gingamit sia subong iya saksi sa pagpahibalo sa iya mga disipulo nga sia sa pagkamatuod buhi!
Matutom nga Cristianong mga Babayi sa Tapos sang Pentecostes
7, 8. (a) Paano naton nahibaluan nga ang mga babayi yadto didto sang ginbubo ang espiritu sang Pentecostes? (b) Paano ang Cristianong mga babayi nag-ambit sa nahauna nga pagsangkad sang Cristianismo?
7 Sang makakayab si Jesus sa langit, ang diosnon nga mga babayi didto man upod sa matutom nga mga apostoles sa naibabaw nga hulot sa Jerusalem. (Binuhatan 1:12-14) Maathag man nga may mga babayi sa mga ginbubuan sing balaan nga espiritu sang Pentecostes. Ngaa? Bangod sang ginpaathag ni Pedro kon ano ang natabo, ginbalikwat niya ang Joel 2:28-30, nga ispisipiko nga nagasambit sing “mga anak nga babayi” kag “mga suluguon nga babayi,” ukon “mga ulipon nga babayi.” (Binuhatan 2:1, 4, 14-18) Gani ang ginpanganak sang espiritu, hinaplas nga Cristianong mga babayi nangin bahin sang Cristianong kongregasyon sugod gid sang gintukod ini.
8 Ang mga babayi nagdala sing importante, apang indi nagapangibabaw, nga papel sa paglapnag sang Cristianismo. Ginpagamit ni Maria, nga iloy ni Marcos kag tiya ni Bernabe, ang iya daku nga balay sa kongregasyon sang Jerusalem. (Binuhatan 12:12) Kag ginhimo niya ini sa tion nga nag-utwas ang paghingabot batok sa mga Cristiano. (Binuhatan 12:1-5) Ang apat ka anak nga babayi sang ebanghelisador nga si Felipe nakatigayon sing pribilehiyo nga mangin Cristianong mga manalagna.—Binuhatan 21:9; 1 Corinto 12:4, 10.
Ang Panimuot ni Pablo sa mga Babayi
9. Ano ang ginlaygay ni Pablo tuhoy sa Cristianong mga babayi sa iya nahauna nga sulat sa mga taga-Corinto, kag anong balaan nga prinsipio ang ginpalig-on niya sa mga babayi nga tahuron?
9 Kon kaisa si apostol Pablo ginasumbong sing misogyny, buot silingon, may dumot kag wala sing pagsalig sa mga babayi. Matuod, si Pablo ang nag-insister nga dapat huptan sang mga babayi ang ila nagakaigo nga duog sa sulod sang Cristianong kongregasyon. Sa normal nga mga kahimtangan, indi sila dapat magpanudlo sa mga miting sang kongregasyon. (1 Corinto 14:33-35) Kon, bangod wala sing lalaki nga Cristiano ukon bangod nagpanagna sia sa pagtiklod sang balaan nga espiritu, magpamulong ang isa ka Cristianong babayi sa isa ka miting, dapat sia magbutang sing tabon sa ulo. Ining tabon isa ka “tanda sang awtoridad,” isa ka kitaon nga pamatuod nga ginakilala sang babayi ang kahimusan ni Jehova tuhoy sa pagkaulo.—1 Corinto 11:3-6, 10.
10. Ano ang ginsumbong sang iban batok kay apostol Pablo, apang ano ang nagapamatuod nga ining panumbungon indi matuod?
10 Mahimo nasapwan ni Pablo nga dapat pahanumdumon ang nahaunang mga Cristiano sining teokratiko nga mga prinsipio agod nga ang ‘tanan nga butang himuon sing mahusay’ sa mga miting sang kongregasyon. (1 Corinto 14:40) Apang nagakahulugan bala ini nga si Pablo batok sa mga babayi, subong ginapangangkon sang iban? Wala. Indi bala si Pablo sa nagahinakop nga kapitulo sang iya sulat sa mga taga-Roma ang nagpadala sing mainit nga mga pag-abiabi sa siam ka Cristianong mga babayi? Wala bala sia nagpakita sing daku nga apresasyon kay Febe, Prisca (Priscilla), Trifena, kag Trifosa, nga ginatawag ining naulihi nga duha ka “mga babayi nga nagapangabudlay sing lakas sa Ginuo”? (Roma 16:1-4, 6, 12, 13, 15) Kag si Pablo sa idalom sang inspirasyon ang nagsulat: “Kamo tanan nga ginbawtismuhan kay Cristo nagsuklob kay Cristo. Walay Judio ukon Griego, walay ulipon ukon hilway, walay lalaki ukon babayi; kay kamo tanan isa kay Cristo Jesus.” (Galacia 3:27, 28) Maathag nga ginhigugma kag gin-apresyar ni Pablo ang iya Cristianong mga utod nga babayi, lakip si Lidia, nga nagpakita sing huwaran nga pagkamaabiabihon sa tion sang pagtilaw.—Binuhatan 16:12-15, 40; Filipos 4:2, 3.
Lakas Magpangabudlay nga mga Babayi Karon
11, 12. (a) Paano ang Salmo 68:11 literal nga ginatuman karon? (b) Sa anong kahimtangan nasapwan sang madamo sang aton kauturan nga babayi ang ila kaugalingon, kag ngaa kinahanglan nila ang aton gugma kag mga pangamuyo?
11 Sa sulod sang Cristianong kongregasyon karon, may madamo nga Cristianong babayi nga “nagapangabudlay sing lakas sa Ginuo.” Sa kamatuoran, ginapakita sang estadistika nga “ang mga babayi nga nagabantala sing maayong balita isa ka dakung kadam-an,” nga nagahuman sang daku nga bahin sang kadam-an sang mga Saksi nga ginagamit ni Jehova sa sining tion sang katapusan. (Salmo 68:11) Ining lakas magpangabudlay nga Cristianong mga babayi nakatigayon sing maayong ngalan para sa ila kaugalingon samtang nagapanikasog sila sa pagtuman sang ila papel subong mga asawa, mga iloy, mga manug-atipan sang puluy-an, mga manugpakaon sang pamilya, subong man Cristianong mga ministro.
12 Ang pila sining maayong kauturan nga babayi may ditumuluo nga mga bana. Ginaatubang nila ining kahimtangan sa 24 ka oras kada adlaw. Ang iban tinuig na nga nagapanikasog nga mangin maayong mga asawa samtang ginalab-ot nila ang mga kinahanglanon para sa matutom nga mga alagad ni Jehova. Indi ini mahapos, apang nagbatas sila, nagalaum pirme nga ang ila bana “mahimo madaug sa wala sing pulong” paagi sa ila maayong Cristianong paggawi. Kag daw ano nga kalipay ang mabatyagan sang bug-os nga pamilya kon ang bana magbaton! (1 Pedro 3:1, 2) Samtang wala pa ini, kinahanglan gid sining matutom nga mga utod nga babayi ang utudnon nga gugma kag ang mga pangamuyo sang iban nga mga katapo sang kongregasyon. Subong nga ang “malinong kag ang mahim-ong nga espiritu” nga ginatinguhaan nila nga ipakita “may daku nga bili sa mga mata sang Dios,” ang ila malig-on nga integridad hamili man sa aton mga mata.—1 Pedro 3:3-6.
13. Ngaa masiling tuhoy sa aton payunir nga mga utod nga babayi nga sila “mga babayi nga nagapangabudlay sing lakas sa Ginuo,” kag paano sila dapat kabigon sa ila kongregasyon?
13 Ang mga utod nga babayi nga nagaalagad subong mga payunir pat-od gid nga masiling nga “nagapangabudlay sing lakas sa Ginuo.” Madamo sa ila ang may puluy-an, may bana, kag kabataan nga alatipanon, dugang sa ila pagbantala nga hilikuton. Ang iban may part-time nga trabaho agod matigayon nila ang ila materyal nga mga kinahanglanon. Ini tanan nagakinahanglan sing maayong pag-organisar, determinasyon, pagbatas, kag lakas nga pagpangabudlay. Dapat mabatyagan sining Cristianong mga babayi ang gugma kag pagsakdag sang mga utod nga ang ila kahimtangan wala nagatugot sa ila sa paghugod sing mga oras sang payunir sa pagpanaksi nga hilikuton.
14. (a) Anong maayong halimbawa sang pagbatas ang ginasambit? (b) Sin-o pa nga Cristianong mga babayi ang takus sang komendasyon, kag ngaa? Magsambit sing lokal nga mga halimbawa.
14 Ang iban sang Cristianong mga babayi nagpakita sing tumalagsahon nga pag-unong sa pag-alagad subong payunir. Sa Canada, una nga natilawan ni Grace Lounsbury ang pagpayunir sang 1914. Naghalin sia sa listahan sang mga payunir sang 1918 bangod sang balatian, apang sang 1924 nagbalik sia liwat sa bug-os tion nga pag-alagad. Sa tion nga ginsulat ini, yara gihapon sia sa listahan sang mga payunir, bisan pa 104 anyos na sia! Madamo sang mga misyonera nga sang katuigan 1940 ginhanas sa nahauna nga mga klase sang Watchtower Bible School of Gilead ang matutom gihapon nga nagaalagad, sa latagon subong mga misyonera ukon subong mga katapo sang pamilya Bethel sa Brooklyn ukon sa isa sang mga sanga sang Watch Tower Society. Ini tanan nga Cristianong mga babayi, kag sa pagkamatuod tanan nga kauturan nga babayi nga nagagamit sang ila kaugalingon sa pag-alagad sa Bethel, nagapakita sing nagasakripisyo sang kaugalingon nga espiritu kag maayo sila nga mga halimbawa. Ginapahibalo bala naton sila nga ginaapresyar naton sila?
Mga Asawa sang Nagalakbay nga mga Manugtatap
15, 16. Ano pa nga grupo sang Cristianong mga babayi ang ilabi na nga takus sang aton mainit nga komendasyon, kag ngaa?
15 Ang mga asawa sang nagalakbay nga mga manugtatap isa pa ka grupo sang Cristianong mga babayi nga takus sang mainit nga komendasyon kag pagpalig-on. Ining ginahigugma nga mga utod nga babayi handa sa pagsunod sa ila mga bana samtang sila nagaduaw sa lainlain nga kongregasyon, ukon lainlain nga sirkito, agod palig-unon ang kauturan sa espirituwal. Ginpaiway sang kalabanan sa ila ang kasulhay sang isa ka puluy-an; nagatulog sila sa lainlain nga katre kada semana, kag indi sa tanan nga tion isa ka komportable nga katre. Apang malipayon nga ginabaton nila ang bisan ano nga matanyag sang kauturan. Isa sila ka maayong halimbawa para sa ila espirituwal nga kauturan nga babayi.
16 Ining Cristianong mga babayi nagahatag man sing bilidhon nga pagsakdag sa ila mga bana, subong gid sang diosnon nga mga babayi nga nagsunod kay Jesus ‘sa pag-upod sa iya kag sa pag-alagad sa iya.’ (Marcos 15:41) Indi sila makahinguyang sing daku nga tion upod sa ila bana, nga pirme ‘may bugana nga hilimuon sa hilikuton sang Ginuo.’ (1 Corinto 15:58) Ang iban sa ila, kaangay ni Rosa Szumiga sa Pransya, nga nagsulod sa bug-os tion nga pag-alagad sang 1948, nagaempaki sang mga maleta para sa ila bana kag nagalakbay upod sa ila sa 30 ukon 40 ka tuig. Handa sila sa pagsakripisyo para kay Jehova kag para sa ila kauturan nga lalaki kag babayi. Takus sila sang aton apresasyon, gugma, kag mga pangamuyo.
Mga Asawa sang mga Gulang
17, 18. (a) Anong mga kinaiya ang ginakinahanglan sa mga asawa sang mga utod nga lalaki nga may mga katungdanan sa pag-alagad? (b) Anong mga sakripisyo ang ginaugyunan nga himuon sang mga asawa sang mga gulang para kay Jehova kag sa ila kauturan, kag paano ang iban nga mga asawa makabulig sa ila mga bana?
17 Sang ginasambit ang mga kalipikasyon para sa kauturan nga lalaki nga mahimo itangdo subong mga gulang kag ministeryal nga mga alagad, ginsambit man ni apostol Pablo ang mga babayi, nga nagasulat: “Ang mga babayi dapat man mangin serioso, indi mapatupatuon, mahaganhaganon, matutom sa tanan nga butang.” (1 Timoteo 3:11) Matuod, ining kabilugan nga laygay naaplikar sa tanan nga Cristianong babayi. Apang pasad sa konteksto, dapat ini sundon sa isa ka halimbawa nga paagi sang mga asawa sang mga utod nga lalaki nga may mga katungdanan.
18 Sing makalilipay, amo sini ang kahimtangan sa linibolibo nga mga asawa sang Cristianong mga manugtatap. Haganhagan sila sa ila mga batasan kag sa ila pagpamayo, serioso sa Cristianong pagkabuhi, mahalungon sa ila ginahambal, kag sinsero nga nagatinguha sila nga mangin matutom sa tanan nga butang. Nagaugyon man sila sa pagsakripisyo, kay ginahugod sang ila mga bana sa mga butang sang kongregasyon ang tion nga ihinguyang kuntani upod sa ila. Ining matutom nga Cristianong mga babayi takus sang aton mainit nga gugma kag pagpalig-on. Mahimo nga dugang pa nga kauturan nga lalaki ang makatinguha sang mga pribilehiyo sa sulod sang aton madamo nga kongregasyon kon ang ila asawa mapainubuson nga magasugot sa paghimo sina nga mga sakripisyo para sa kaayuhan sang tanan.
Matutom nga “Tigulang nga mga Babayi”
19. Ngaa ginaapresyar sing daku ang madamo sang matutom nga “tigulang nga mga babayi” sa ila kongregasyon, kag ano dapat ang aton balatyagon sa ila?
19 Sa aton pagrepaso sang mga babayi nga ginsambit sa Biblia, nakita naton nga ang edad wala nagapugong sa mga babayi sang pagtuo gikan sa pag-alagad kay Jehova. Ining kamatuoran gin-ilustrar sa bahin ni Sara, ni Elisabet, kag ni Ana. Sa karon, madamo sing Cristianong mga babayi nga tigulang na ang maayong halimbawa sa pagtuo kag pagbatas. Dugang pa, mainandamon nga masakdag nila ang mga gulang paagi sa pagbulig sa mga bataon pa nga mga utod nga babayi. Gikan sa ila malaba nga eksperiensia, makahatag sila sing maalamon nga laygay sa bataon nga mga babayi, subong amo ang ginasugo sa ila sang Kasulatan nga himuon nila. (Tito 2:3-5) Mahimo nga kon kaisa ang tigulang nga utod nga babayi kinahanglan nga laygayan. Kon amo, ang gulang nga magahimo sini dapat ‘makig-angot sa iya subong nga isa ka iloy.’ Ang mga gulang dapat “magpadungog sa balo nga mga babayi” kag, kon kinahanglanon, mag-organisar sing materyal nga bulig para sa ila. (1 Timoteo 5:1-3, 5, 9, 10) Dapag mabatyagan gid sang aton ginahigugma nga tigulang nga mga utod nga babayi nga sila kinahanglan kag ginaapresyar.
Mga Manuggahom Upod kay Cristo
20. Anong supremo nga pribilehiyo ang gintanyag sa madamo nga Cristianong mga babayi, kag ngaa malipay sa sini ang iban nga mga karnero?
20 Maathag gid pasad sa Kasulatan nga “ang Dios walay ginapasulabi” kon tuhoy sa rasa ukon sekso. (Roma 2:10, 11; Galacia 3:28) Kag matuod man ini sa pagpili ni Jehova sang mga makaupod sang iya Anak sa Ginharian nga pangulohan. (Juan 6:44) Daw ano ka mapasalamaton ang dakung kadam-an sang iban nga mga karnero nga ang matutom nga mga babayi, subong sang iloy ni Jesus nga si Maria, si Maria Magdalena, si Priscilla, si Trifena, si Trifosa, kag ang madamo pa sa nahaunang Cristianong kongregasyon, nagaambit karon sa paggahom sa Ginharian, nagapatahom sina nga pangulohan paagi sa ila suod nga paghangop sa mga balatyagon kag mga eksperiensia sang mga kababayinhan! Daw ano ka mahigugmaon nga plano kag kaalam sa bahin ni Jehova!—Roma 11:33-36.
21. Ano ang aton ginabatyag karon sa “mga babayi nga nagapangabudlay sing lakas sa Ginuo”?
21 Kita karon makaambit man sa ginbatyag ni apostol Pablo sang maghambal sia nga may gugma kag apresasyon tuhoy “sining mga babayi nga nagpangabudlay upod sa akon sa maayong balita.” (Filipos 4:3) Ang tanan nga mga Saksi ni Jehova, mga lalaki kag mga babayi, nagaisip sini nga isa ka kalipay kag pribilehiyo ang magpangabudlay upod sa ‘daku nga kadam-an sang mga babayi nga nagawali sing maayong balita,’ huo, “mga babayi nga nagapangabudlay sing lakas sa Ginuo.”—Salmo 68:11;
Repaso nga mga Pamangkot
◻ Paano ginpakita ni Jesus nga indi sia ugyon sa pag-ihig-ihig sang Judiyong relihiosong mga lider sa mga babayi?
◻ Paano ang mahinadlukon sa Dios nga mga babayi nag-alagad kay Jesus, kag anong daku nga pribilehiyo ang nabaton sang pila sa ila?
◻ Anong laygay ang ginhatag ni Pablo tuhoy sa mga babayi sa mga miting sang kongregasyon?
◻ Ano nga mga kategoriya sang mga utod nga babayi ang takus sang aton pinasahi nga gugma kag pagsakdag, kag ngaa?
◻ Ano dapat ang batyagon naton sa tanan karon nga “mga babayi nga nagapangabudlay sing lakas sa Ginuo”?
[Laragway sa pahina 16, 17]
Ang mga babayi nag-alagad kay Jesus kag sa iya mga apostoles
[Mga Laragway sa pahina 18]
Ang nagasakripisyo sang kaugalingon nga mga asawa sang nagalakbay nga mga manugtatap kag sang iban nga mga gulang nagahatag sing bilidhon nga amot sa hilikuton sang Dios