Ang Bag-ong Kalibutan—Malapit Na!

MADAMO na ang ginsiling sang mga estadista nahanungod sa bag-ong kalibutan nga kahimusan nga ginahimo nila. Nagahambal sila nahanungod sa pagdula sang kahadlok kag mga kal-ang sa kalibutan kag sa pagpaluntad sang kooperasyon sa ulot sang mga tawo kag mga estado. Apang nasandig bala sa mga tawo ang pagpaluntad sang bag-ong kalibutan?

Mga siglo na nga ang katawhan may kahigayunan sa pagtukod sang kalibutan nga may paghidait kag kalig-onan. Walay duhaduha, madamo ang hanuot katama sa sinang mga panikasog. Apang, bisan ano man nga sahi sang gobierno ang ginhunahuna sang tawo sa pagtuman sinang mga katuyuan, ang mga pulong sang Biblia napamatud-an nga matuod: “Wala sa tawo nga nagalakat sa pagmando sang iya mga tikang.”​—⁠Jeremias 10:⁠23.

Ang Bag-ong Kalibutan Ginsaad

Apang, ang inspirado nga Pulong sang Dios nagapasalig man nga may yara bag-ong kalibutan. Pagkatapos nga gintagna ang katapusan sang daan nga sistema sang mga butang, ang Cristianong si apostol Pedro nagsiling: “Nagahulat kita sing bag-ong mga langit kag bag-ong duta diin nagapuyo ang pagkamatarong.”​—⁠2 Pedro 3:10-13.

Kay sin-o ini saad? Ginhatag ini sang walay liwan na kundi ni Jehova, “ang Labing Mataas sa bug-os nga duta.” (Salmo 83:18) Himuon niya ang indi masarangan sang tawo. Huo, ipaluntad ni Jehova nga Dios ang bag-ong kalibutan. Apang san-o?

Ang Bag-ong Kalibutan Malapit Na Katama!

Antes ang ginsaad sang Dios nga bag-ong kalibutan mangin bug-os nga katunayan, ang karon nga “kalibutan,” ukon “sistema sang mga butang,” dapat matapos. Nahanungod sini, ang mga disipulo ni Jesucristo namangkot: “Isugid sa amon, san-o bala mahanabo ini? kag ano bala ang tanda sang imo pagkari, kag sang katapusan sang kalibutan?” (Mateo 24:​3, King James Version) Subong sang ginsiling sang labi ka sibu nga New World Translation, ang mga sumulunod ni Jesus namangkot: “Isugid sa amon, san-o bala mahanabo ini, kag ano bala ang tanda sang imo presensia kag sang konklusion sang sistema sang mga butang?”

Sa pagsabat, si Jesus nagtagna sang madamong bahin sang tanda sang iya dikitaon nga presensia subong espiritu nga persona sa kagamhanan sa langitnon nga Ginharian. (1 Pedro 3:18) Halimbawa, sia nagsiling: “Ang pungsod magatindog batok sa pungsod kag ang ginharian batok sa ginharian, kag may mga tiggulutom kag mga linog sa nagakalainlain nga mga duog.” Gikan sa “pamuno sang mga kasakit” sang 1914, “ining kaliwatan” nga gintudlo ni Jesus nakaeksperiensia sing dalayon nga inaway, mga tiggulutom, kag mga linog subong bahin sang tanda sang iya dikitaon nga presensia.​—⁠Mateo 24:​7, 8, 34.

Ang inaway nagsalakay sa sining kaliwatan sa dimatupungan nga paagi kutob sang tuig 1914. Ang Inaway Kalibutanon I nagkutol sang ginabulubanta nga 14 milyones ka kabuhi. Sadtong Inaway Kalibutanon II, 55 milyones ka soldado kag sibilyan ang napatay. Ti, kutob sang 1914 kapin sa 100 milyones ka kabuhi ang nadula sa inaway! Sa pagkamatuod, bahin ini sang tanda sang presensia ni Jesus.

Ang tiggulutom, nga gintagna man ni Cristo, naghalit sa madamong kadutaan pagligad sang kada isa sang duha ka inaway kalibutanon. Walay sapayan sang mga pag-uswag sa siensia, halos ikaapat nga bahin sang kalibutan ang ginagutom sa karon. Kada tuig, minilyon ka kabataan kag iban pa ang nagakapatay bangod sang malnutrisyon. Siling sang The World Book Encyclopedia: “Kalabanan sang nagatin-ad nga mga pungsod sang Aprika, Asia, kag Latin Amerika kulang sing kalan-on para sa ila katawhan. Minilyon sa sining mga pungsod ang ginagutom. Kon ang produksion sang kalan-on ukon importasyon naganubo bangod sang iban nga rason, ang tiggulutom nagasalakay kag linibo ukon minilyon ka tawo ang mahimo nga mapatay.”

Ang mga linog nagkutol sang madamong kabuhi sa sining kalibutan nga nagatanda sang “tion sang katapusan.” (Daniel 12:4) Lainlain ang mga bulubanta sa mga napatay sa linog. Apang kutob sang 1914 ang halit sang mga linog nagdugang sa bug-os nga duta, kag nagkutol ini sang ginatos ka libo ka kabuhi. Nagakomento nahanungod sa duha lamang sini, ang Yorkshire Post sang Oktubre 19, 1989, nagsiling: “Sang 1920 ang linog sa probinsia sang Jiangsu sa Tsina nagpatay sa 180,000, kag sang Hulyo 28, 1976, ang China nag-antos sang pinakagrabe nga linog sa modernong maragtas sini. Sa dimagkubos 240,000 ang napatay sang ang naaminhan-sidlangan nga siudad sang Tangshan halos nagtapan bangod sang linog nga may kabaskugon nga 7.8 sa Richter scale.” Ginlista sang pamantalaan ang kapin sa 30 ka iban pa dalagku nga mga linog sang ika-20 nga siglo.

Ang pagbantala sang Ginharian nga hilikuton gintagna man subong isa sang mga bahin sang tanda sang dikitaon nga presensia ni Jesus. Nagsiling sia sa iya nagapamangkot nga mga disipulo: “Ining maayong balita sang ginharian pagaiwali sa bug-os napuy-an nga duta nga panaksi sa tanan nga kapungsuran; kag ugaling magaabot ang katapusan.” (Mateo 24:14) Subong sang gintagna ni Jesus, ining pagbantala nga hilikuton ginahimo karon sa bug-os nga duta sa 212 ka kadutaan sang kapin sa 4,000,000 ka mga Saksi ni Jehova.

Ang karon nga mga katumanan sini kag sang iban pa nga mga tagna nagapamatuod nga nagakabuhi na gid kita sa “katapusan nga mga adlaw.” (2 Timoteo 3:​1-5) Yara lamang sa unahan naton ang “dakung kapipit-an” nga gintagna man ni Jesucristo. May talipuspusan sa “inaway sang dakung adlaw sang Dios nga Labing Gamhanan” sa Har⁠–​Magedon, tapuson sini ang karon nga malauton nga sistema sang mga butang. (Mateo 24:​21; Bugna 16:​14-16) Nian ang ginsaad sang Dios nga bag-ong kalibutan mangin katunayan.a

Mga Pagpakamaayo nga Indi Mahatag sang mga Tawo

Ginapabugal sang mga estadista ang bag-ong kalibutan nga kahimusan nga ginahimo nila. Apang si Jehova, ang Dios sang langit kag duta, wala gid nagpangabay sa mga tawo nga islan ang karon nga sistema sing bag-ong kalibutan. Sia mismo ang magahimo sini sa adlaw kag oras nga sia lamang ang nakahibalo. (Mateo 24:34, 36) Nakita sing una sang tigulang nga si apostol Juan kon ano ang himuon sang Dios, indi sang tawo:

“Nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat. Kag nakita ko ang siudad nga balaan, ang Bag-ong Jerusalem, nga nagapanaug halin sa langit gikan sa Dios nga naaman subong sang nobya nga napunihan nga sa iya bana. Kag nabatian ko ang mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong masaligan kag matuod.’”​—⁠Bugna 21:​1-5.

Ang “bag-ong langit” amo ang langitnon nga Ginharian ni Jesucristo. Ang “bag-ong duta” indi isa pa ka dutan-on nga globo kundi isa ka bag-ong katilingban sang mga tawo sa sining planeta​—⁠sila tanan matinumanon nga mga sakop sang Ginharian ni Cristo, nga wala sing pagbinahinbahin sa rasa, pungsod, ukon hambal. (Ipaanggid ang Salmo 96:⁠1.) Ang karon nga simbuliko nga langit kag duta​—⁠ang sistema sang mga butang sang Yawa upod ang mga pangulohan sini nga impluwensiado ni Satanas kag sang iya mga demonyo​—⁠laglagon. (1 Juan 5:19) Bisan pa ang literal nga mga dagat magapabilin, ang malaragwayon nga dagat sang magamo kag malauton nga katawhan dulaon. Ang langitnon nga mga gumalahom nga mga kaupod ni Jesus nagahuman sang Bag-ong Jerusalem kag ang nagapakig-upod sa iya nagahuman sang kapital nga organisasyon nga magagahom sa matarong nga katilingban sang tawo. Ang Dios may tiglawas nga ‘magapuyo kaupod’ sang matinumanon nga katawhan samtang bug-os sila nga ginapasag-uli sa iya paagi kay Cristo sa isa ka libo ka tuig nga Adlaw sang Paghukom.​—⁠Bugna 14:​1-4; 20:⁠6.

Sa idalom sang pagginahom sang Ginharian madamo sing mga rason agod magkalipay. Ang kalisud, paghibi, kag kasakit nga resulta sang balatian, kasubo, kag kaanggid nga mga butang mangin mga eksperiensia sang nagligad. Bisan ang kamatayon nga naglapnag sa katawhan kutob sa aton nahaunang ginikanan, ang makasasala nga si Adan, wala na. (Roma 5:12) Daw ano nga kalipay ang magaluntad kon ining bug-os kalibutan nga kabangdanan sang mga luha madula sing dayon!

Indi ang mamalatyon nga mga tawo kundi ang Dios ang nagahatag sing garantiya nahanungod sining mga pagpakamaayo. Sia amo ang Isa nga nagasiling: “Toloka! Ginahimo ko nga bag-o ang tanan nga butang.” Huo, kag si Jehova nga Dios nagsiling kay apostol Juan: “Isulat ini, kay ining mga pulong masaligan kag matuod.”

Sadsaran nga mga Kinahanglanon Bug-os nga Napaayawan

Sa bag-ong kalibutan sang Dios, ang duta mangin isa ka paraiso sa ulihi. Pat-od ini, kay si Jesus nagsaad sa naghinulsol nga malaut nga ginlansang sa tupad niya: “Sa pagkamatuod nagasiling ako sa imo karon nga adlaw, Mangin kaupod ka nakon sa Paraiso.” (Lucas 23:43) Sa tunga sang paraiso nga mga kahimtangan, ang mga kinahanglanon sang tawo subong sang kalan-on kag pasilungan iaman.

Ang tiggulutom nagakutol sang minilyon ka kabuhi karon. Bisan ano man ka dungganon ang panikasog nga pakaunon ang mga gutom, ang kakagod kag iban pa nga mga butang nagapugong sa katawhan nga malubad inang mga problema. Halimbawa, ang Saturday Star, isa ka pamantalaan sa Johan­nes­burg, ­South Africa, nagareport: “Ang mga binais sa politika, nagsaka nga bili sang gatong kag kabilugan nga kakapoy sa daw wala sing katapusan nga inaway sa Aprika nagatingob sa pagpalantang sang lugpay . . . Sa Sudan, isa sang mga pungsod nga apektado katama sang tiggulutom, sa ulot sang 5 milyones kag 6 milyones ka tawo ang gutumon sa 1991.” Apang ang tiggulutom pagakalimtan sa bag-ong kalibutan sang Dios. Sa idalom sang pagginahom sang Ginharian “may bugana nga uyas sa duta; sa putukputukan sang kabukiran magahapayhapay ini.”​—⁠Salmo 72:⁠16.

Ang pasilungan isa pa sang kinahanglanon sang tawo nga indi gid mahatag para sa madamo sa aton adlaw. Minilyon ang nagaistar sa magagmay kag makaluluoy lamang nga mga puluy-an ukon wala gid sing balay. Suno sa The New York Times, sa isa ka pungsod sa Sidlangan, “sa kompaniya sang elektroniks . . . , ang 20-anyos nga empleyado nagakinahanglan sing 73 ka tuig nga paghulat agod makakuha sing puluy-an,” kag ang report sang gobierno nagapakita nga ang iban nga mga tawo nagaistar sa “mga bodega, mga opisina, ukon bisan sa mga kasilyas.” Apang tuhay gid sa bag-ong kalibutan! Sa palaabuton nga Paraiso, “magapatindog sila sing mga balay kag puy-an sila; kag magatanum sila sing mga ulubasan kag magakaon sang bunga nila. Indi sila magpatindog kag iban ang magapuyo; indi sila magtanum kag iban ang magakaon. Kay subong sang mga adlaw sang kahoy mangin amo ang mga adlaw sang akon katawhan; kag ang akon mga pinili magakalipay sing malawig sa binuhatan sang ila mga kamot.”​—⁠Isaias 65:​21, 22.

Wala na sing mga problema sa ekolohiya sa ginsaad sang Dios nga bag-ong kalibutan. Ang makatalagam sa panglawas kag nagahalit sa patubas nga pagdagta sa hangin indi na magaluntad. Ang pagdagta kag paglaglag sa mga puluy-an sang mga sapat nga nagabutang sa katalagman sa karon sa madamong mga espesyi sang tanum kag sapat indi na makapahog. Kag ang mga butang subong sang pagkapierde sang ozone layer indi magahalit sang kabuhi sa duta. Makapat-od kita nga si Jehova nga Dios magalubad sining tanan nga mga problema, kay ang iya Pulong nagapasalig sa aton sa dili madugay “laglagon niya ang mga nagalaglag sang duta.”​—⁠Bugna 11:⁠18.

Sa bag-ong kalibutan, ang inaway mangin butang sang nagligad apang indi bangod ang mga estadista nagmadinalag-on sa pagdis-arma sa mga pungsod. Sa baylo, ang Dios magapanghikot kon diin ang mga gumalahom sa politika napaslawan. Ipaluntad niya ang paghidait sa matinumanon nga katawhan nahisanto sa sining mga pulong sang salmista: “Kari, tan-awa ang mga binuhatan ni Jehova, daw ano nga kahapayan ang nahimo niya sa duta. Sia nagapatunong sang mga inaway tubtob sa ukbong sang duta. Ginabali niya ang pana, kag ginautod niya ang bangkaw; ginasunog niya sa kalayo ang mga kangga.” (Salmo 46:​8, 9) Sa bag-ong kalibutan nga ginsaad sang Dios nga tuman na kalapit, ang katawhan indi na magapakig-away kundi magaagom sang matuod nga paghidait kag kalig-onan.​—⁠Miqueas 4:​2-4.

Didto Ka Bala?

Makasalig ka sa bag-ong kalibutan nga ginsaad ni Jehova nga Dios. Wala sia nagabutig. (Hebreo 6:​17, 18) Ang iya Pulong, ang Biblia, matuod, kag ang ginasaad sini pirme nagakatuman.​—⁠Juan 17:⁠17.

Ang maayong balita sang makalilipay nga mga pagpakamaayo para sa matinumanon nga katawhan amo ang ginapanikasugan sang mga Saksi ni Jehova nga ipaambit sa tanan nga bunayag sing tagipusuon nga katawhan. Dapat ka karon manikasog sa pagtigayon sang ihibalo nahanungod sa balaan nga katuyuan, kag maghulag sa makatilingala nga mga saad nga makita sa Balaan nga Kasulatan. Ining dalanon nagadul-ong sa kabuhi nga walay katapusan, kay si Jesus nagsiling: “Nagakahulugan ini sang kabuhi nga walay katapusan, ang pagkuha nila sing ihibalo nahanungod sa imo, ang lamang matuod nga Dios, kag nahanungod sa isa nga imo ginpadala, si Jesucristo.” (Juan 17:3) Nian may pribilehiyo ikaw nga maagom ang makalilipay nga mga tion sa unahan lamang, kay ang bag-ong kalibutan sang Dios malapit na!

[Footnote]