Pirme Sunda ang Mahigugmaon nga Kalulo
“Ang nagasunod sa pagkamatarong kag mahigugmaon nga kalulo makakita sing kabuhi, pagkamatarong kag himaya.”—HULUBATON 21:21.
1. Ngaa dapat naton paabuton sa mga ginatuytuyan sang espiritu sang Dios nga magpakita sing kalulo?
SI Jehova malulo kag maawaon. Sia “Dios nga maluluy-on kag mainayuhon, makuli sa pagpangakig kag bugana sa mahigugmaon nga kalulo kag kamatuoran.” (Exodo 34:6, 7) Sing halangpunon, nian, ang bunga sang iya balaan nga espiritu nagalakip sang gugma kag kalulo.—Galacia 5:22, 23.
2. Anong mga halimbawa ang binagbinagon naton karon?
2 Ang mga ginatuytuyan sang balaan nga espiritu, ukon aktibo nga puwersa, ni Jehova nagapakita sang bunga sang pagkalulo. Nagapakita sila sing mahigugmaon nga kalulo sa ila mga kaangtanan sa iban. Sa pagkamatuod, ginasunod nila ang halimbawa ni apostol Pablo, nagarekomendar sang ila kaugalingon subong mga ministro sang Dios “paagi sa kalulo” kag sa iban nga mga paagi. (2 Corinto 6:3-10) Ang ila malulo, maawaon, mapatawaron nga espiritu nagahisanto sa personalidad ni Jehova, nga “bugana sa mahigugmaon nga kalulo” kag nga ang Pulong nagaunod sing madamong mga halimbawa sang pagkalulo. (Salmo 86:15; Efeso 4:32) Ano ang matun-an naton gikan sa iban sini?
Ang Pagkalulo Nagahimo sa Aton nga Dimakagod kag Maabiabihon
3. Paano si Abraham huwaran sa pagpakita sing kalulo, kag anong pagpalig-on ang ginhatag ni Pablo may kaangtanan sa sini?
3 Si patriarka Abraham (Abram)—“abyan ni Jehova” kag “amay sang tanan nga may pagtuo”—nagpahamtang sing maayo nga halimbawa sa pagpakita sing kalulo. (Santiago 2:23; Roma 4:11) Sia kag ang iya panimalay, lakip ang iya hinablos nga si Lot, nagbiya sa siudad sang Ur sa Caldea kag nagsulod sa Canaan sa sugo sang Dios. Bisan pa nga si Abraham magulang kag ulo sang pamilya, malulo sia kag dimakagod sa pagtugot kay Lot nga pilion ang pinakamaayo nga mga halalban, samtang ginkuha niya kon ano ang nabilin. (Genesis 13:5-18) Ang kaanggid nga pagkalulo magapahulag sa aton sa pagtugot sa iban nga matigayon ang mga bentaha sa baylo naton. Inang dimakagod nga kalulo nagahisanto sa laygay ni apostol Pablo: “Walay tawo nga magpangita sang iya kaugalingon nga kaayuhan, kundi ang kaayuhan sang iya isigkatawo.” Si Pablo mismo ‘nagpahamuot sa tanan nga tawo sa tanan nga butang, nga wala nagapangita sang iya kaugalingon nga kapuslanan kundi sang kapuslanan sang madamo, agod nga maluwas sila.’—1 Corinto 10:24, 33.
4. Paano ginpadyaan si Abraham kag si Sara bangod sang pagpakita sing kalulo sa dagway sang pagkamaabiabihon?
4 Kon kaisa ang kalulo mapakita sa dagway sang tinagipusuon nga pagkamaabiabihon. Si Abraham kag ang iya asawa, si Sara, malulo kag maabiabihon sa tatlo ka estranghero nga nag-agi isa ka adlaw. Si Abraham nagpalig-on sa ila nga magpabilin sa makadali, samtang sia kag si Sara gilayon nga naghanda sing manamit nga pagkaon para sa mga bisita. Ang mga estranghero mga anghel gali ni Jehova, ang isa sa ila nagpaalinton sang saad nga ang tigulang kag wala sing anak nga si Sara magapanganak sing bata nga lalaki. (Genesis 18:1-15) Daw ano nga padya tungod sang malulo nga pagkamaabiabihon!
5. Sa anong paagi si Gayo nagpakita sing kalulo, kag paano naton mapakita ang amo man?
5 Ang isa ka paagi nga mapakita sang tanan nga mga Cristiano ang kalulo amo ang paagi sa pagkamaabiabihon. (Roma 12:13; 1 Timoteo 3:1, 2) Sing nahisuno, ang mga alagad ni Jehova malulo nga nagapakita sing pagkamaabiabihon sa nagalakbay nga mga manugtatap. Nagapahanumdom ini sa kalulo nga ginpakita sang nahaunang siglo nga Cristiano nga si Gayo. Naghimo sia sing “matutom nga butang” sa pagbaton sa nagaduaw nga mga kauturan sing maabiabihon—kag mga “estranghero” anay sila nga indi niya kilala. (3 Juan 5-8) Sa masami, kilala naton yadtong malulo naton nga mapakitaan sing pagkamaabiabihon. Ayhan matalupangdan naton nga ang isa ka espirituwal nga utod nga babayi masinulub-on. Ang iya tiayon mahimo nga ditumuluo ukon disfellowship. Daw ano nga kahigayunan nga ipakita ang kalulo paagi sa pag-agda sa iya sa isa ka espirituwal nga pagpakig-upod kag pagsalo upod sa aton pamilya sa tion kag tion! Bisan pa indi kita makahiwat sing sinalusalo, pat-od gid nga ang aton pamilya malipay sa pagpakita sing kalulo sa iya. (Ipaanggid ang Hulubaton 15:17.) Kag walay duhaduha nga ipabutyag niya ang iya pasalamat sa sini sa pulong ukon sa malulo nga sulat sang pagpasalamat.
6. Paano ginpakita ni Lidia ang kalulo, kag ngaa importante nga ipakita ang apresasyon para sa malulo nga mga buhat?
6 Sa tapos nga ginbawtismuhan ang debotado nga babayi nga si Lidia, “nagpakiluoy sia sa amon: ‘Kon nagahunahuna kamo [si Pablo kag ang iya mga kaupdanan] nga ako matutom kay Jehova, sulod kamo sa akon balay kag magpabilin didto.’ Kag ginpilit niya kami,” dugang ni Lucas. Sa walay duhaduha, ang kalulo ni Lidia ginpasalamatan. (Binuhatan 16:14, 15, 40) Apang ang indi pagpakita sing apresasyon makahalalit. Sang isa ka okasyon, ang 80-anyos nga utod nga babayi nga may limitado nga kusog kag ikasarang malulo nga nagpangabudlay sa paghanda sing pagkaon para sa pila ka bisita. Daku gid ang iya kasubo sang ang isa ka pamatan-on nga lalaki wala nagpahibalo sa iya nga indi sia makakadto. Sang isa ka pa ka okasyon, nalipatan sang duha ka utod nga babayi ang pagkaon nga ginhanda labi na para sa ila sang isa ka lamharon nga babayi. “Nasubuan gid ako,” siling niya, “kay nalipatan nila ini. . . . Luyag ko kuntani nga mabatian nga nalipatan nila ang panyaga, apang sa baylo wala sing isa ang malulo ukon mahigugmaon nga nagsugid sa akon.” Ang bunga sang balaan nga espiritu nga pagkalulo nagapahulag bala sa imo nga mangin mainapresyahon kag madinumdumon sa kaanggid nga mga sirkunstansia?
Ang Pagkalulo Nagahimo sa Aton nga Mapatugsilingon
7. Anong punto nahanungod sa pagkalulo ang ginailustrar sang panikasog nga ginhimo sa pagsunod sa luyag nga paglubong ni Jacob?
7 Ang pagkalulo dapat nga maghimo sa aton nga mapatugsilingon sa iban kag sa ila nagakaigo nga mga luyag. Sa pag-ilustrar: Ginpangabay ni Jacob (Israel) ang iya anak nga si Jose nga ipakita ang mahigugmaon nga kalulo sa iya paagi sa indi paglubong sa iya sa Egipto. Bisan pa nagkinahanglan ini nga ang bangkay ni Jacob dalhon sa malayo nga kalayuon, si Jose kag ang iban nga mga anak ni Jacob ‘nagdala sa iya sa duta sang Canaan kag ginlubong sia sa lungib sa latagon sang Macpela, nga ginbakal ni Abraham upod sang latagon nga kaugalingon nga lulubngan gikan kay Efron nga Hethanon sa atubangan sang Mamre.’ (Genesis 47:29; 49:29-31; 50:12, 13) Nahisanto sa sinang halimbawa, indi bala dapat nga ang mahigugmaon nga kalulo magapahulag sa aton sa pagsunod sa kalahamut-an sa Kasulatan nga mga kahimusan sa paglubong nga luyag sang isa ka katapo sang Cristianong pamilya?
8. Ano ang ginatudlo sa aton sang kaso ni Rahab nahanungod sa pagbalus sa kalulo?
8 Kon ang iban nagapakita sing mahigugmaon nga kalulo sa aton, indi bala naton dapat ipabutyag ang apresasyon ukon balusan man ini? Sa pagkamatuod dapat gid. Si Rahab nga makihilawason nagpakita sing kalulo paagi sa pagtago sa Israelinhon nga mga espiya. Gani, ang mga Israelinhon nagpakita sing mahigugmaon nga kalulo paagi sa pag-amlig sa iya kag sa iya panimalay sang ginlaglag nila ang siudad sang Jerico. (Josue 2:1-21; 6:20-23) Daw ano katahom nga halimbawa nga nagapakita nga dapat naton balusan ang kalulo nga ginhimo sa aton paagi sa pagkamapatugsilingon kag pagkamalulo mismo!
9. Ngaa makasiling ka nga nagakaigo ang pagpangabay sa isa nga ipakita sa aton ang mahigugmaon nga kalulo?
9 Nahanungod sina, nagakaigo nga pangabayon sa isa nga ipakita ang mahigugmaon nga kalulo sa aton. Amo sini ang ginhimo ni Jonatan, nga anak sang unang hari sang Israel, nga si Saul. Ginpangabay ni Jonatan ang iya hinigugma nga bataon nga abyan nga si David nga ipakita ang mahigugmaon nga kalulo sa iya kag sa iya panimalay. (1 Samuel 20:14, 15; 2 Samuel 9:3-7) Gindumdom ini ni David sang nagtimalus sia sa mga Gibeonhon nga ginhimuan sing sala ni Saul. Nagadumdom sang “sumpa ni Jehova” sa ulot niya kag ni Jonatan, ginpakita ni David ang mahigugmaon nga kalulo paagi sa pag-amlig sa kabuhi sang anak ni Jonatan nga si Mefiboset. (2 Samuel 21:7, 8) Ginahimo man bala naton ang ‘aton Huo nga Huo’? (Santiago 5:12) Kag kon kita mga gulang sa kongregasyon, maawaon man bala kita kon ang mga masigkatumuluo kinahanglan nga pakitaan sing mahigugmaon nga kalulo?
Ang Kalulo Nagapabakud sang Paghiusa
10. Paano ginpakamaayo ang mahigugmaon nga kalulo ni Rut?
10 Ang mahigugmaon nga kalulo nagapabakud sang paghiusa sang pamilya kag nagapauswag sang kalipay. Ginpakita ini sa kaso sang Moabinhon nga si Rut. Nagpanaghaw sia sa uma sang tigulang nga si Boaz malapit sa Betlehem, nagaaman sing pagkaon para sa iya kaugalingon kag sa iya balo kag imol nga ugangan nga babayi, si Noemi. (Rut 2:14-18) Siling ni Boaz kay Rut sang ulihi: “Nakapakita ka sing labi pa nga mahigugmaon nga kalulo sa katapusan sang sa kamunuan, sanglit nga wala ka magsunod sa mga pamatan-on nga lalaki bisan imol ukon manggaranon.” (Rut 3:10) Una, ginpakita ni Rut ang mahigugmaon nga kalulo kay Rut. “Sa katapusan,” ang Moabinhon nagpakita sang mahigugmaon nga kalulo paagi sa pagkahanda nga pamanahon ang tigulang nga si Boaz agod makabangon sing kaliwat para sa iya napatay nga bana kag para sa tigulang nga si Noemi. Paagi kay Boaz, si Rut nangin iloy sang lolo ni David nga si Obed. Kag ginhatagan sia sang Dios sang “himpit nga bayad” subong katigulangan nga babayi ni Jesucristo. (Rut 2:12; 4:13-17; Mateo 1:3-6; 16; Lucas 3:23, 31-33) Daw anong mga pagpakamaayo ang resulta sang mahigugmaon nga kalulo ni Rut para sa iya kag sa iya panimalay! Sa karon, ang mga pagpakamaayo, kalipay, kag pagpabakud sang paghiusa sang pamilya nagakatabo man kon ang mahigugmaon nga kalulo nagabugana sa diosnon nga mga puluy-an.
11. Ano ang epekto sang pagkalulo ni Filemon?
11 Ang kalulo nagapabakud sang paghiusa sa sulod sang mga kongregasyon sang katawhan ni Jehova. Ang Cristianong lalaki nga si Filemon nakilal-an bangod sang iya pagpakita sing mahigugmaon nga kalulo sa iya mga masigkatumuluo. Si Pablo nagsiling sa iya: “Nagapasalamat ako sa akon Dios sa gihapon sang ginadumdom ko ikaw sa akon mga pangamuyo, bangod nga nakabati ako sang imo gugma kag sang imo pagtuo ayon kay Ginuong Jesus kag sa tanan nga balaan . . . May daku ako nga kalipay kag kabakud gikan sa imo gugma, bangod nga ang mga tagipusuon sang mga balaan naumpawan paagi sa imo, utod ko.” (Filemon 4-7) Ang Kasulatan wala nagasiling kon paano napaumpawan ang mahigugmaon nga kalulo sang mga balaan paagi kay Filemon. Apang, mahimo nga ginpakitaan niya sing mahigugmaon nga kalulo ang mga masigka hinaplas sa lainlain nga paagi nga napamatud-an nga makapaumpaw sa ila, kag sa walay duhaduha nagpabakud ini sang paghiusa sa tunga nila. Amo man ang matabo kon ang mga Cristiano nagapakita sing mahigugmaon nga kalulo karon.
12. Ano ang resulta sang kalulo nga ginpakita ni Onesiforo?
12 Ang kalulo ni Onesiforo may maayong epekto man. “Pagkaluoyan sang Ginuo ang panimalay ni Onesiforo,” siling ni Pablo, “kay sa masunson ginapaumpawan niya ako, kag wala sia mahuya sang akon mga talikala. Kundi sang sia nag-abot sa Roma, ginpangita niya ako sing mapisanon kag iya ako nakita. Kabay nga tugutan sia sang Ginuo sa pagdangat sang kaluoy ni Jehova sadtong adlaw. Kag nakahibalo ka sing maayo sang tanan nga pag-alagad nga nahimo niya sa Efeso.” (2 Timoteo 1:16-18) Kon panikasugan naton nga ipakita ang mahigugmaon nga kalulo sa mga masigkasumilimba, mangin malipayon kita kag magapabakud sang paghiusa sang utudnon nga gugma sa sulod sang Cristianong kongregasyon.
13, 14. Paano ang kongregasyon sang Filipos huwaran, kag paano naghulag si Pablo sa pagkalulo sini?
13 Kon ang bug-os nga kongregasyon nagapakita sing mahigugmaon nga kalulo sa mga masigkasumilimba, nagapabakud ini sang paghiusa sa tunga nila. Inang suod nga paghiusa nagluntad sa tunga ni Pablo kag sang kongregasyon sa siudad sang Filipos. Sa katunayan, ang isa ka rason nga nagsulat sia sa mga taga-Filipos amo agod ipabutyag sa ila ang iya pasalamat bangod sang ila kalulo kag materyal nga bulig. Sia nagsulat: “Sa pagpamuno sang maayong balita, sang nagtaliwan ako sa Macedonia, walay kongregasyon nga nagpakigbahin sa akon sa paghatag kag pagbaton, kundi kamo lamang; kay, bisan sa Tesalonica, ginpadalhan ninyo ako sing bulig sing labi pa sa makaisa. . . . Ako nakabaton sang bug-os nga bayad kag labi pa. Puno ako, nga nakabaton kay Epafrodito sang mga dulot nga gikan sa inyo, maamyon nga dulot, halad nga kalahamut-an, kag nahamut-an sang Dios.”—Filipos 4:15-18.
14 Indi katingalahan nga ang malulo nga mga taga-Filipos yara sa mga pangamuyo ni Pablo! Sia nagsiling: “Nagapasalamat ako sa akon Dios sa tanan ko nga pagpanumdom sa inyo, sa gihapon sa tagsa ka pangamuyo nakon tungod sa inyo tanan ginahimo ko ang pangamuyo nga may kalipay, tungod sang pagpakig-ambit ninyo sa pagpauswag sang maayong balita kutob sang nahaunang adlaw tubtob karon.” (Filipos 1:3-5) Inang malulo kag maalwan nga pagsakdag sa pagbantala sang Ginharian nga hilikuton wala gid nagapaimol sa isa ka kongregasyon. Sa tapos ginhimo sang mga taga-Filipos sing malulo kon ano ang masarangan nila nahanungod sini, si Pablo nagpasalig sa ila: “Ang akon Dios magahimuno sang tagsa ka kinahanglan ninyo suno sa iya kamanggaran sa himaya kay Cristo Jesus.” (Filipos 4:19) Huo, ang Dios nagabalus sang kalulo kag kaalwan. Ang iya Pulong nagasiling: “Ang bisan anong maayo nga ginahimo sang tagsatagsa, ang amo batunon niya liwat gikan kay Jehova.”—Efeso 6:8.
Kon ang mga Babayi Nagapakita sing Kalulo
15, 16. (a) Paano gindumdom ang kalulo ni Dorcas, kag ano ang natabo sang napatay sia? (b) Paano ang malulo sing tagipusuon nga Cristianong mga babayi bugana sing maayong mga buhat karon?
15 Ang mahigugmaon nga kalulo ni disipulo Dorcas (Tabita) sang Joppe ginpadyaan. “Sia puno sang maayong mga buhat kag mga pagpanglimos nga ginhimo niya,” kag sang ‘nagmasakit sia kag napatay,’ ginpadala sang mga disipulo si Pedro sa Lida. Pag-abot niya, “gindala nila sia sa hulot nga naibabaw; kag ang tanan nga babaying balo nagtindog sa luyo niya nga nagahibi kag nagapakita sa iya sang mga bayo kag mga kunop nga ginhimo ni Dorcas sang kaupod pa sia nila.” Ilaragway ang danyag: Ang masinulub-on kag nagahibi nga mga balo nagsugid sa apostol kon daw ano kalulo si Dorcas kag ginpakita nila sa iya ang mga bayo subong pamatuod sang iya gugma kag kalulo. Ginpaguwa sila tanan, si Pedro nagluhod sa pagpangamuyo kag nagliso sa bangkay. Pamatii! Sia nagsiling: “Tabita, bangon ka!” Kag toloka! “Ginmuklat niya ang iya mga mata, kag sang pagkakita niya kay Pedro, naglingkod sia. Gindaho ni Pedro sa iya ang iya kamot, ginpatindog sia, kag gintawag niya ang mga balaan kag ang mga babaying balo kag ginpaatubang niya sia nga buhi.” (Binuhatan 9:36-41) Daw ano nga pagpakamaayo gikan sa Dios!
16 Amo ini ang nahaunang ginrekord nga pagkabanhaw nga ginhimo sang isa ka apostol ni Jesucristo. Kag ang mga sirkunstansia nga nagadul-ong sa sining makatilingala nga milagro nagpanggamot sa pagkalulo. Sin-o ang makasiling nga ginbanhaw kuntani si Dorcas kon indi sia bugana sa maayong buhat kag pagpanglimos—kon indi sia bugana sa mahigugmaon nga kalulo? Indi lamang nga si Dorcas kag ang mga balo ginpakamaayo kundi ang milagro tuhoy sa pagbanhaw sa iya naghatag sing panaksi sa himaya sang Dios. Huo, “ini naglapnag sa bug-os nga Joppe, kag madamo ang nagtuo sa Ginuo.” (Binuhatan 9:42) Karon, ang malulo sing tagipusuon nga Cristianong mga babayi bugana man sa maayong mga buhat—ayhan nagatahi sing mga bayo para sa mga masigkatumuluo, nagahanda sing pagkaon para sa mga tigulang sa tunga naton, nagapakita sing pag-abiabi sa iban. (1 Timoteo 5:9, 10) Daw ano ini nga panaksi sa mga nagapanilag! Labaw sa tanan, malipayon gid kita nga ang diosnon nga debosyon kag mahigugmaon nga kalulo nagpahulag sa sining ‘dakung hubon sang mga babayi nga nagbantala sang maayong balita’ sa himaya sang aton Dios, si Jehova!—Salmo 68:11.
Padayon nga Sunda ang Mahigugmaon nga Kalulo
17. Ano ang ginasiling sang Hulubaton 21:21, kag paano maaplikar inang mga pulong sa diosnon nga mga indibiduwal?
17 Ang tanan nga nagahandum sang kahamuot sang Dios dapat magsunod sang mahigugmaon nga kalulo. “Ang nagasunod sa pagkamatarong kag mahigugmaon nga kalulo makakita sing kabuhi, pagkamatarong, kag dungog,” siling sang maalamon nga hulubaton. (Hulubaton 21:21) Ang diosnon nga tawo makugi nga nagasunod sang pagkamatarong sang Dios, pirme ginatuytuyan sang balaan nga mga talaksan. (Mateo 6:33) Padayon niya nga ginapakita ang maunungon nga gugma, ukon mahigugmaon nga kalulo, sa iban sa materyal kag labi na sa espirituwal nga mga paagi. Busa, nasapwan niya ang pagkamatarong, kay ang espiritu ni Jehova nagabulig sa iya nga magkabuhi sa matarong nga paagi. Sa katunayan, sia ‘napanaptan sing pagkamatarong’ subong sang diosnon nga lalaki nga si Job. (Job 29:14) Wala sia nagapangita sang iya kaugalingon nga himaya. (Hulubaton 25:27) Sa baylo, ginatigayon niya ang bisan ano man nga himaya nga ginatugot ni Jehova nga batunon niya, ayhan sa dagway sang pagtahod gikan sa mga isigkatawo nga ginpahulag sang Dios sa pagpakig-angot sing malulo sa iya bangod sang iya kaugalingon nga mahigugmaon nga kalulo sa ila. Dugang pa, ang maunungon nga nagahimo sang kabubut-on sang Dios makasapo sing kabuhi—indi lamang sa nagaligad sing madasig nga mga tuig kundi sing dayon.
18. Ngaa dapat naton sundon ang mahigugmaon nga kalulo?
18 Busa, tuguti ang tanan nga nagahigugma kay Jehova nga Dios nga padayon nga sundon ang mahigugmaon nga kalulo. Ini nga kinaiya nagapamahal sa aton sa Dios kag sa iban. Nagapauswag ini sang pagkamaabiabihon kag nagahimo sa aton nga mapatugsilingon. Ang pagkalulo nagapabakud sang paghiusa sa sulod sang pamilya kag sang Cristianong kongregasyon. Ang mga babayi nga nagapakita sing mahigugmaon nga kalulo ginaapresyar kag ginatahod sing daku. Kag ang tanan nga nagasunod sining matahom nga kinaiya nagadala sing himaya sa Dios sang mahigugmaon nga kalulo, si Jehova.
Paano Mo Sabton?
◻ Paano si Abraham huwaran sa pagpakita sing kalulo?
◻ Ano ang ginatudlo sa aton sang kaso ni Rahab nahanungod sa pagbalus sing kalulo?
◻ Paano ginapakita sang kongregasyon sang Filipos ang kalulo?
◻ Paano ang malulo sing tagipusuon nga Cristianong mga babayi bugana sing maayong mga buhat karon?
◻ Ngaa dapat naton sundon ang mahigugmaon nga kalulo?