Mga Pamangkot Gikan sa mga Bumalasa
◼ Ngaa ginsugdan ni Jesus ang Memoryal upod lamang sa mga apostoles kag indi sa iban pa nga mga disipulo nga pagadal-on pasulod sa bag-ong katipan?
Ining pamangkot daw napasad sa sayop nga panghunahuna nga si Jesus nagtipon upod sa iya mga apostoles sadto nga gab-i agod sugdan ang Panihapon sang Ginuo sa Cristianong kongregasyon sang mga hinaplas nga yara na sa bag-ong katipan. Sa baylo, sang Nisan 14, 33 C.E., ang Cristianong kongregasyon wala pa nahuman, kag si Jesus nagtipon kaupod sang iya mga apostoles para sa tuigan nga Judiyong panihapon sang Paskuwa.
Sa pagkamatuod, si Jesus may iban pa nga mga disipulo luwas sa 12 nga nakilal-an subong mga apostoles. Isa ka tuig antes sang iya kamatayon, ginpadala niya ang 70 ka disipulo sa paglakbay sa pagbantala. Sang nabanhaw sia, “nagpahayag sia sa kapin sa lima ka gatos ka mga kauturan sa isa ka tion.” Kag may yara “isa ka gatos kag duha ka pulo” ka mga disipulo nga nagtipon sang adlaw sang Pentecostes. (1 Corinto 15:6; Binuhatan 1:15, 16, 23; Lucas 10:1-24) Apang binagbinagon naton ang grupo nga kaupod ni Jesus sang ginsugdan niya ang tuigan nga selebrasyon nga nakilal-an subong Panihapon sang Ginuo.
Ginhatag sang Lucas 22:7, 8 ang tion, nga nagasiling: “Ang adlaw sang tinapay nga walay tapay nag-abot, nga kinahanglan ihalad ang kordero sang paskuwa; kag ginpadala niya si Pedro kag si Juan, nga nagasiling: ‘Kadto kamo kag ihanda ninyo sa aton ang paskuwa agod nga magkaon kita sini.’ ” Ang kasaysayan nagapadayon: “Kag magsiling kamo sa agalon sang panimalay, ‘Ang Manunudlo nagasiling sa imo: “Diin bala ang hulot nga kaunan ko sang paskuwa kaupod sang akon mga disipulo?” ’ ” Gani sadto nga gab-i si Jesus kaupod sang 12 para sa isa ka Judiyong selebrasyon. Nagsiling sia sa ila: “Ginhandum ko sing hanuot gid ang pagkaon sining paskuwa kaupod ninyo sa wala pa ako mag-antos.”—Lucas 22:11, 15.
Kutob sang pamuno sini sa Egipto, ang Paskuwa isa ka pamilya nga selebrasyon. Sang ginsugdan ang Paskuwa, ang Dios nagsiling kay Moises nga ang kordero dapat ihawon para sa tagsa ka panimalay. Kon ang pamilya tuman ka diutay nga makaubos sang bug-os nga kordero, ang kaingod nga pamilya sarang maagda sa pagsalo. Busa, makatarunganon nga para sa Paskuwa sang 33 C.E., ang kalabanan sang mga disipulo ni Jesus nagtipon sing normal kaupod sang ila kaugalingon nga mga panimalay para sa sining panihapon.
Apang “ginhandum” ni Jesus nga ipaambit ang katapusan nga importante nga Paskuwa, kag ang katapusan nga gab-i antes sia mapatay, kaupod sang iya pinakasuod nga mga sumulunod, nga naglakbay kaupod niya sa kalabanan sang iya ministeryo. Pagkatapos sadtong panihapon sang Paskuwa, ginsugid sa ila ni Jesus ang nahanungod sa bag-ong selebrasyon nga pagasaulugon sang tanan niya nga mga sumulunod sa palaabuton. Ang alak sinang palaabuton pa nga Cristianong selebrasyon magarepresentar sa dugo sang “bag-ong katipan” nga magatal-us sa Kasuguan nga katipan.—Lucas 22:20.
Apang, sadtong gab-i sang Nisan 14, 33 C.E., ang bag-ong katipan ginpatuman, para sa paghatag sing puwersia sa halad—ni Jesus—nga ginhalad. Ang Kasuguan nga katipan ginapatuman gihapon. Wala pa ini nalansang sa usok. Dugang pa, tubtob lamang sang adlaw sang Pentecostes nga ang daan nga katipan upod ang kinaugali nga Israel makita nga ginbuslan sang bag-ong katipan upod sa espirituwal nga Israel.—Galacia 6:16; Colosas 2:14.
Gani, ang 11 ka matutom nga mga apostoles ukon ang iban pa nga mga disipulo wala sa sinang bag-ong katipan sadto nga gab-i. Kag si Jesus wala nagpakita sing pagkadinahamuot sa iban pa nga Judiyong mga disipulo paagi sa pagpatipon niya sa ila upod sa ila mga panimalay agod saulugon ang Paskuwa.