Mga Pamangkot Gikan sa mga Bumalasa
◼ Anong sadsaran nga laygay ang ginatanyag sang Hulubaton 27:23 sa espirituwal nga mga manugbantala subong man sa mga Cristiano sa kabilugan?
Ang bersikulo nagasiling: “Dapat mo hibaluon ang kahimtangan sang imo mga panong. Ipahamtang ang imo tagipusuon sa imo kabakahan.” (Hulubaton 27:23) Ining teksto masami nga ginagamit anay sa pagpalig-on sa espirituwal nga mga manugbantay nga magpakita sing interes kag mangin pamilyar sa kahimtangan kag mga problema sang mga Cristiano sa kongregasyon. Nagakaigo ina nga pagpalig-on, kay ginapaanggid sang Biblia ang mga gulang sa mga manugbantay kag ang kongregasyon sa isa ka panong sang mga karnero. (Binuhatan 20:28, 29; 1 Pedro 5:2-4) Apang, bisan pa naaplikar sa sina nga paagi ang prinsipio sa ibabaw, ining bersikulo indi nahanungod sa espirituwal nga mga manugbantala.
Ang tulun-an sang mga Hulubaton nagaunod sing madamo nga mga bersikulo nga nagatindog sing isahanon subong malip-ot nga laygay, apang ang Hulubaton 27:23 bahin sang isa ka grupo sang mga bersikulo: “Dapat mo hibaluon ang kahimtangan sang imo mga panong. Ipahamtang ang imo tagipusuon sa imo kabakahan; kay ang bahandi indi dayon, ukon ang diadema para sa tanan nga kaliwatan. Ang berde nga hilamon ginadala, kag ang bag-o nga hilamon nagatubo, kag ang mga gamhon sang kabukiran ginatipon. Ang mga kordero para sa imo panapton, kag ang mga kanding amo ang bili sang latagon. Kag may bugana nga gatas sang mga kanding subong imo kalan-on, subong kalan-on sang imo panimalay, kag inugsakdag sa imo mga dalaga.”—Hulubaton 27:23-27.
Ining inspirado nga dinalan nagadayaw sang isa ka estilo sang pagkabuhi nga may pagkaukod, pagkapisan, pagkasimple, kag pagkilala sa aton pagsandig kay Jehova. Kag ini paagi sa pagpadaku sang kabuhi sang isa ka Israelinhon nga manugbantay, ayhan sa pagpatuhay sa masibod nga pagkabuhi nga napasad sa mga negosyo kag madasig nga pagmanggad.
Ang “bahandi,” ukon manggad nga natigayon sa madasig nga negosyo, upod ang resulta nga pagkabantog (“diadema”), madali madula, subong pamatud-an sang madamo. Sa amo daku ang masiling tuhoy sa simple nga kabuhi, subong sang ginahimo sang dumaan nga mga manugbantay sa pag-atipan sing kasapatan. Ina nga dalanon sang pagkabuhi indi simple sa kahulugan nga wala nagakabalaka. Ang isa ka manugbantay dapat magbantay sang iya panong, ginapat-od nga ang mga karnero naamligan. (Salmo 23:4) Kon, sa pagbantay sa ila, nakakita sia sing nagabalatian ukon nahalitan nga karnero, mahimo niya ini haplasan sing makapasulhay nga lana. (Salmo 23:5; Ezequiel 34:4; Zacarias 11:16) Sa kalabanan nga kaso ang maukod nga manugbantay nga nagapahamtang sang iya tagipusuon sa iya kabakahan makakita sing mga resulta sa iya mga panikasog—ang amat-amat nga pagdamo sang iya panong.
Ang isa ka mapisan kag mahalungon nga manugbantay may masaligan nga tuburan sang bulig—si Jehova. Sa anong paagi? Ti, ang Dios nagaaman sing mga panahon kag mga siklo nga normal nga nagaresulta sa bugana nga hilamon nga mahalab sang panong. (Salmo 145:16) Kon, bangod sang pagbag-o sang panahon, ang berde nga hilamon madula sa naubos nga mga bahin, mahimo nga bugana ini sa mataas nga mga bahin, nga sa diin sarang masaylo sang mabinantayon nga manugbantay ang iya mga sapat.
Ginasambit sang Hulubaton 27:26, 27 ang isa ka resulta sina nga pagpangabudlay—ang pagkaon kag panapton. Matuod, ang ginalaragway indi ang malahalon nga mga kalan-on ukon mga espesyal nga mga kalan-on sang eksperto sa sini, ukon nagahatag ini sa manugpangabudlay sing rason nga magpaabot sing panapton sa pinakabag-o nga estilo sang manugdibuho ukon sing labing maayo nga tela. Apang kon handa sia sa pagpanikasog, ang manugbantay kag ang iya pamilya makatigayon gikan sa panong sing gatas (kag sa amo sing keso), subong man sing bulbol sang karnero para sa paghabol sing mabakod nga mga panapton.
Gani ang laygay: “Dapat mo hibaluon ang kahimtangan sang imo panong” indi una sa tanan para sa espirituwal nga mga manugtatap; para ini sa tanan nga mga Cristiano. Ginapadaku sini ang bili sang aton pagkakontento sa kalan-on kag panapton nga matigayon paagi sa dalayon, maukod nga pagpangabudlay, nga nagasalig nga indi kita pagbiyaan sang Dios. (Salmo 37:25; 2 Tesalonica 3:8, 12; Hebreo 13:5) Sa pagpaanggid sang Hulubaton 27:23-27 sa laygay sa Lucas 12:15-21 kag 1 Timoteo 6:6-11, makita naton kon daw ano ka wala nagabag-o ang laygay sang Dios sa sini nga butang. Gani mahimo nga basahon sang tagsatagsa sa aton ang Hulubaton 27:23-27, nga ginapamangkot ang aton kaugalingon, ‘Ginatamod ko bala ini sing tinagipusuon kag ginaaplikar sa akon adlaw-adlaw nga pagkabuhi?’
[Ginkuhaan sang Laragway sa pahina 31]
Pictorial Archive (Near Eastern History) Est.