Mga Ilustrasyon—Isa ka Paagi sa Paglab-ot sang mga Tagipusuon

SI David nagapalagyo tungod sang iya kabuhi. Ang iya kaaway amo si Saul, ang hinaplas nga hari sang Israel. Apang, si Saul isa ka tawo nga puno sang kaakig kay David, tuga sang kahisa. Sa iya pagpangita agod patyon si David, ang hari nag-upod karon sing 3,000 ka soldado. Mas madamo, si David kag ang iya tinawo nagpanago sa sulod sang isa ka lungib sa kamingawan.

Samtang si David kag ang iya tinawo nagapanago sa dulom, may yara isa ka makakilibot nga natabo. Si Hari Saul nagsulod diri mismo nga lungib agod magpahuway. Si David hinayhinay nga nagpalapit sa iya wala sing mahimo nga kaaway, nga nagauyat sing hinganiban. Apang sa kakibot sang mga tinawo ni David, wala niya pagpatya ang hari. Gingutraban lamang niya ang sidsid sang kunup ni Saul. Ginhinulsulan bisan ini, si David nagsiling: “Indi gid mahunahuna, sa bahin ko, gikan sa pagtamod ni Jehova, nga maghimo ako sining butang sa akon ginuo, ang hinaplas ni Jehova, sa pag-untay sang akon kamot batok sa iya, sa ginatan-aw nga sia hinaplas ni Jehova.”​—⁠1 Samuel 24:​1-6.

Ining kasaysayan sa Biblia nagatudlo sing maalamon nga leksion nahanungod sa pagtahod sa hatag-Dios nga awtoridad. Nagalab-ot man ini sang tagipusuon, ayhan mas epektibo pa sang sa prangka nga laygay. Amo sina ang epekto sang mga kasaysayan nga ginrekord sa Pulong sang Dios para sa pagtudlo sa aton.​—⁠Roma 15:⁠4.

Sing nahisuno, ginapanikasugan sang mga Saksi ni Jehova nga isugid indi lamang ang mga katunayan kon nagabantala sila sang maayong balita, nagadumala sing mga pagtuon sang Biblia sa balay, nagahatag sing Makasulatanhon nga mga pamulongpulong, ukon nagapanaksi sing dipormal. Ginapanikasugan nila nga malab-ot ang tagipusuon paagi sa pagsugid sing mga eksperiensia kag paggamit sing mga ilustrasyon. Ang ila Theocratic Ministry School Guidebook nagasiling: “Ang mga ilustrasyon nagapukaw sang interes kag nagapadaku sang importante nga mga ideya. Nagapukaw ini sang ikasarang sa paghunahuna kag nagapahapos sang paghangop sa bag-ong mga panghunahuna. Ginpili sing maayo nga ilustrasyon ginaupdan ang intelektuwal nga pagganyat sing emosyonal nga puwersa . . . Kon kaisa, ang ilustrasyon sarang magamit sa pagpahigad sang pagdampigdampig ukon pagkamaypinilian.”—Pahina 168.

Sa iya libro nga Essentials of Public Speaking, si Warren DuBois nagsiling: “Tuguti ang manunulat ukon humalambal sa pagpabutyag sang iya mga ideya paagi sa mga buhat ukon mga hambal sang tawo, kag ang pinakamakatalaka nga tema magatigayon sing kabuhi kag duag.” Busa, ang pagdugang sing kabuhi kag duag sa mensahe nga makawiwili na kag nagahatag sing kabuhi pat-od nga magabulig sa Cristianong mga ministro sa paglab-ot sa tagipusuon.

Mga Ilustrasyon nga Nagatudlo

Ano nga sahi sang ilustrasyon ang labing maayo? Sa masami, ang isa nga pasad sa butang nga madali mahangpan sang mga tagpalamati. Si Jesucristo nagpahamtang sing maayong huwaran nahanungod sini. Sa iya Wali sa Bukid, si Jesus nagpamulong nahanungod sa kinaandan nga mga butang subong sang asin, suga, kag pispis. (Mateo 5:​1⁠–​7:29) Halimbawa, ang tanan nakahibalo nahanungod sa suga nga ginapasiga sang lana kag kon kaisa ginabutang ini sa ibabaw sang tulungtungan. Busa, nahangpan sang mga disipulo ni Jesus nga dapat sila mangin mga manugdala sang espirituwal nga kapawa sang ginsugo niya sila: “Wala man ang mga tawo nagasindi sing suga kag nagabutang sini sa idalom sang sulukban, kundi sa ibabaw sang tulungtungan, kag nagaiwag ini sa tanan nga yara sa balay. Sa amo nga bagay ig-iwag ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” (Mateo 5:​15, 16) Ang indi masibud nga mga ilustrasyon nga nagakaigo sa tema nagabulig sa Cristianong mga ministro nga mapaathag ang mga ideya kag mga panudlo sa Biblia.

Ayhan ang labing makusog nga mga ilustrasyon ni Jesus nahugod sa mga tawo. Binagbinaga ang narekord sa Lucas kapitulo 15 kag 16. Ang mga escriba kag mga Fariseo nagmulay kay Jesus bangod sang pag-abiabi sa mga makasasala kag mga manugsukot sing buhis. Sa pagsabat, nagsugid sia sing makatalandog nga mga sugilanon nahanungod sa mga tawo. Nagpamulong sia nahanungod sa isa ka manugbantay nga nakita ang iya nadula nga karnero, isa ka babayi nga nakita ang nadula nga sensilyo, ang buhaha nga anak nga nagpauli, kag ang dimatarong nga tulugyanan.

Ang realistiko nga mga ilustrasyon kag matuod nga mga eksperiensia tuman gid ka mapuslanon sa isa ka Cristianong ministro. Halimbawa, talupangda kon paano ginpaathag ni Alex­ander H. Macmillan, nga naglakbay sa lainlain nga mga lugar subong manugpamulongpulong publiko sa 60 ka tuig, ang kamatuoran sang Biblia nahanungod sa patay. Wala madugay antes mapatay ang iya amay, nga nagpati nga ang kalag wala nagakapatay, nasugilanon sia ni Macmillan sing subong sini:

“Ginpamangkot ako sang akon amay sing direkta nga pamangkot: ‘Anak, magaisahanon bala ako sa lulubngan samtang ginahulat ko ang ginharian nga magsugod sa pagpuno sang duta sing kahimpitan?’

“Isa ina ka pamangkot nga indi sa gilayon masabat sang isa ka lamharon nga lalaki nga magapahamuot sa tigulang nga tawo nga wala gid anay maghunahuna sing amo sina.

“Sa pagsabat ginpamangkot ko sia: ‘Tay, nakatulog ka bala sing maayo kagab-i?’

“Sia nagsabat, ‘Huo, anak ko, nakatulog ako sang ginpainom ako sang doktor sang pildora nga inugpatulog.’

“‘Nagaisahanon ka bala sang nagakatulog ka?’

“‘Indi. Kuntani pirme lamang ako nagatulog, kay wala ako sing nabatyagan nga kasakit.’ ”

Nian ginbasa ni A. H. Macmillan ang Job 14:​13-15 kag 3:​17-19 sa iya amay kag nagsiling: “Ti nakita mo, tay, ang patay nagatulog sa kamatayon kag wala sing nahibaluan samtang yara sa sina nga kahimtangan, gani paano sila nga magaisahanon?”

Daw ano ka epektibo nga pagpanudlo! Kon isa ikaw ka Saksi ni Jehova, magamit man nimo ang mga kasulatan kag mga ilustrasyon sa pagganyat sang hunahuna kag tagipusuon.

Pagpangita sing mga Ilustrasyon

Apang diin ka makakita sing epektibo nga mga ilustrasyon ukon matuod nga mga eksperiensia? Madamo ka sing makuha gikan sa imo bahandi sang personal nga eksperiensia. Halimbawa, kinahanglan mo bala ipakita ang mga pagpakamaayo sang pagtuo, ang gahom sang pangamuyo, ukon ang kalipay sang ministeryo? Kon isa ikaw ka dedikado nga Cristiano, mahimo mo masugid ang madamong mga hitabo sa imo kabuhi. Mahimo nga nakabati ikaw sing matahom nga mga eksperiensia sa miting sa kongregasyon ukon sa pagpakigsugilanon sa mga masigka Cristiano. Ukon mahimo nga nakabasa ikaw sing makapalig-on nga eksperiensia sa Yearbook of Jehovah’s Witnesses. Sa katunayan, ang Watch Tower Publications Index nagabulig sa pagtudlo sa naimprinta nga mga eksperiensia gikan sa palibot sang kalibutan.

Paano mo masugid ang isa ka eksperiensia sing epektibo? Una, ang paghatag sing butang nga paabuton nagabulig sa imo sa pagganyat sang igtalupangod sang imo mga tagpalamati. Ayhan masugdan mo ang isa ka eksperiensia paagi sa pagsiling: “Ang isa ka payunir nakatuon mismo kon paano gid ginapakamaayo ni Jehova ang mga nagasalig sa iya.” Sa gilayon, magapalibog ang imo mga tagpalamati kon anong mga pagpakamaayo ang naagom sang bug-os tion nga manugbantala sang Ginharian. Siguruha nga sugiran mo sila.

Tinguhai nga isugid ang eksperiensia sa imo kaugalingon nga mga tinaga. Ihatag ang mga detalye, kay ini nagadugang sing epekto sa isa ka sugilanon. Paagi sa paglaragway sang maathag nga larawan tuhoy sa mga sirkunstansia nga nadalahig, mas mahapos mo mapahulag ang imo mga tagpalamati. Apang pat-ura nga indi ka madala katama sa pagsugid sing sugilanon sa bagay nga indi nila mahangpan kon ngaa ginasugid mo ang eksperiensia. Subong man, likawi ang sobra, kay bisan pa nagahimo ini sa sugilanon nga mas makawiwili, ginapadiutay sini ang imo pagkamapatihan. Bangod sa amo man nga rason, indi pag-ipaalinton ang sugidsugid ukon pag-iasoy ang mga eksperiensia nga indi mo mapamatud-an.

Paghimo nga Buhi sang Biblia

Ang makatudlo gid nga mga eksperiensia makita sa Biblia mismo. Halimbawa, luyag mo ipakita sa estudyante sang Biblia ukon sa tumalambong nga ang bata sarang makatindog dampig kay Jehova nga Dios. Mahimo mo magamit ang sugilanon sang wala mahingalani nga bata nga babayi nga nakighambal sa asawa ni Naaman nahanungod kay Eliseo nga manalagna ni Jehova. Una, basaha ang kasaysayan sa 2 Hari 5:​1-5. Nian mahimo ka mamangkot: “Daw ano kabudlay sa banta ninyo para sa sining bata nga babayi ang maghupot sing integridad sa Dios sa isa ka pungsod sang butig nga pagsimba? Indi bala nagkinahanglan sing kaisog para sa iya nga isugid sing makahalaylo ang nahanungod kay Jehova kag sa iya manalagna?”

Ang abanse nga panalawsaw makabulig sa imo sa paghimo nga buhi sang kasaysayan. Makita mo ang mapuslanon nga impormasyon sa ubos sang tig-ulo nga NAAMAN, SYRIA, kag ELISHA sa Watch Tower Publications Index. Ang mga cross-reference sa New World Translation of the Holy Scriptures magatudlo sa imo gikan sa kasaysayan sang 2 Hari sa Salmo 148:​12, 13, diin aton mabasa: “Mga pamatan-on nga lalaki kag mga ulay, mga tigulang nga lalaki kag mga bata. Magdayaw sila sang ngalan ni Jehova, kay ang iya ngalan lamang amo ang ginapakataas. Ang iya dignidad yara sa ibabaw sang duta kag sang langit.” Daw ano nga pagpalig-on para sa mga pamatan-on nga ipamulong ang pulong sang Dios nga may kasidla!​—⁠Binuhatan 4:​29-31.

Kon isa ikaw ka Cristianong ministro, ‘hatagi pirme sing igtalupangod ang imo pagpanudlo’ sa sining bahin. (1 Timoteo 4:16) Indi lamang isugid ang kamatuoran​—⁠iilustrar ini. Himua ang mga kasaysayan sang Biblia nga maathag kag makahulugan. Maggamit sing nagakaigo nga mga eksperiensia kag mga ilustrasyon. May mga paagi sa paglab-ot sa tagipusuon.

[Footnote]

Ginbalhag sang Watch­tow­er Bi­ble and Tract So­cie­ty of New York, Inc.

[Laragway sa pahina 29]

Kaangay ni Jesus, ang karon nga Cristianong mga ministro sarang makagamit sang maathag nga mga ilustrasyon sa pagpaalinton sang ila mensahe kag sa paglab-ot sang tagipusuon