Magsalig sa Nagaluwas nga Butkon ni Jehova

“O Jehova, . . . magmangin butkon ka sa amon sa tagsa ka aga, huo, ang amon kaluwasan sa tion sang kalisdanan.”​—⁠ISAIAS 33:⁠2.

1. Sa anong kahulugan nga si Jehova may gamhanan nga butkon?

SI Jehova may gamhanan nga butkon. Sa pagkamatuod, sanglit “ang Dios Espiritu,” indi ini butkon sang unod. (Juan 4:24) Sa Biblia, ang malaragwayon nga butkon nagakahulugan sing ikasarang sa paggamit sing gahom. Sa amo, ginaluwas sang Dios ang katawhan paagi sa iya butkon. Sa pagkamatuod, ‘kaangay sang isa ka manugbantay, ginabantayan sang Dios ang iya panong. Paagi sa iya butkon ginatipon niya ang mga kordero, kag ginakungkong niya sila.’ (Isaias 40:​11; Salmo 23:​1-4) Daw ano nga kalig-unan ang ginabatyag sang katawhan ni Jehova sa iya mahigugmaon nga mga butkon!​—⁠Ipaanggid ang Deuteronomio 3:⁠24.

2. Ano nga mga pamangkot ang takus naton binagbinagon?

² Paano ginluwas sang butkon ni Jehova ang iya katawhan, sang una kag karon? Ano nga bulig ang ginahatag sang Dios sa ila subong kongregasyon? Kag ngaa makasalig ang iya katawhan sa iya nagaluwas nga butkon sa tion sang tanan nila nga kalisdanan?

Ang Nagaluwas nga Butkon sang Dios Nagahikot

3. Sa ano ginapadungog sang mga Kasulatan ang kaluwasan sang Israel gikan sa Egipto?

³ Antes ginluwas ang mga Israelinhon gikan sa pagkaulipon sa Egipto sang nagligad nga 3,500 ka tuig, ginsilingan sang Dios ang iya manalagna nga si Moises: “Isiling sa mga anak sang Israel, ‘Ako si Jehova, kag luwason ko kamo gikan sa idalom sang mga lulan sang mga Egiptohanon kag luwason ko kamo sa kahiulipnan nila, kag tubson ko kamo sa butkon nga inuntay kag sa dalagku nga mga paghukom.’ ” (Exodo 6:6) Suno kay apostol Pablo, ginpaguwa sang Dios ang mga Israelinhon gikan sa Egipto “paagi sa nabayaw nga butkon.” (Binuhatan 13:17) Ginpadungog sang mga anak ni Kore ang pag-agaw sa Ginsaad nga Duta sa Dios, nga nagasiling: “Kay wala nila maangkon ang duta tungod sa ila kaugalingon nga espada, kag wala sila pagluwasa sang ila kaugalingon nga butkon. Kundi sang imo kamot nga tuo, kag sang imo butkon, kag sang kapawa sang imo nawong, bangod nga nahamuot ka sa ila.”​—⁠Salmo 44:⁠3.

4. Paano ang pagsalig sa nagaluwas nga butkon ni Jehova ginpadyaan sang mga adlaw sang pagsalakay sang mga Asirianhon?

⁴ Ang butkon ni Jehova nagtabang man sa iya katawhan sang mga adlaw sang pagpamigos sang Asiria. Sadto si manalagna Isaias nangamuyo: “O Jehova, magmaayuhon ka sa amon. Naghulat kami sa imo. Magmangin butkon ka sa amon sa tagsa ka aga, ang amon kaluwasan sa tion sang kalisdanan.” (Isaias 33:2) Yadto nga pangamuyo ginsabat sang ginpatay sang anghel sang Dios ang 185,000 sa dulugan sang mga Asirianhon, nga nagpapalagyo kay Hari Senaquerib gikan sa Jerusalem “nga may kahuya sa nawong.” (2 Cronica 32:​21; Isaias 37:​33-37) Ang pagsalig sa ­nagaluwas nga butkon ni Jehova pirme ginapad­yaan.

5. Ano ang ginhimo sang gamhanan nga butkon sang Dios para sa ginhingabot nga mga Cristiano sang matapos ang Inaway Kalibutanon I?

⁵ Ginluwas sang gamhanan nga butkon sang Dios ang ginhingabot nga hinaplas nga mga Cristiano sang matapos ang Inaway Kalibutanon I. Sang 1918 ang ulong-talatapan sang Nagadumala nga Hubon ginsalakay sang ila mga kaaway, kag ginbilanggo ang kilala nga mga utod. Hinadlukan sa mga gumalahom sa kalibutan sadto, halos gin-untatan sang mga hinaplas ang ila hilikuton sa pagpanaksi. Apang nangamuyo sila nga ipasag-uli ini kag tinluan sila gikan sa sala sang indi pagpanghikot kag kahigkuan sang kahadlok. Nagsabat ang Dios paagi sa pagpahilway sa ginbilanggo nga mga utod, nga ginsundan wala magdugay sa tapos sadto sang ila pagkaabsuwelto. Subong resulta sang mga kamatuoran nga ginpabutyag sa ila kombension sang 1919 kag sang pagbubo sang nagapahikot nga espiritu sang Dios, ang mga hinaplas ginpapagsik liwat para sa walay kahadlok nga pag-alagad kay Jehova bilang katapusan nga katumanan sang Joel 2:​28-32.​—⁠Bugna 11:​7-12.

Bulig sa Kongregasyon

6. Paano naton mahibaluan nga posible batason ang makatililaw nga kahimtangan sa kongregasyon?

⁶ Samtang ginasakdag sang Dios ang iya organisasyon sa kabilugan, ang iya butkon nagaalay-ay sa mga indibiduwal sa sini. Sa pagkamatuod, ang mga kahimtangan indi himpit sa bisan diin nga kongregasyon bangod ang tanan nga tawo indi himpit. (Roma 5:12) Ang iban nga mga alagad ni Jehova mahimo nga kon kaisa makaeksperiensia sing makatililaw nga kahimtangan sa kongregasyon. Halimbawa, bisan pa si Gayo naghimo sing “matutom nga buhat” sa pag-abiabi sa nagaduaw nga mga kauturan, si Diotrefes wala magbaton sa ila kag nagtinguha pa gani sa pagtabog sang mga maabiabihon gikan sa kongregasyon. (3 Juan 5, 9, 10) Walay sapayan, ginbuligan ni Jehova si Gayo kag ang iban pa nga magpadayon sa pagpakita sing pagkamaabiabihon subong pagsakdag sa pagbantala sang Ginharian nga hilikuton. Ang mapangamuyuon nga pagsalig sa Dios dapat magbulig sa aton nga magpadayon sa paghimo sing matutom nga mga buhat samtang ginahulat naton sia nga tadlungon ang kahimtangan nga mahimo nagatilaw sang aton pagtuo.

7. Walay sapayan sang anong mga kahimtangan sa kongregasyon sang Corinto gintuman sang matutom nga mga Cristiano didto ang ila dedikasyon sa Dios?

⁷ Ibutang ta nga ikaw bahin anay sang kongregasyon sa Corinto sang unang siglo. Sang isa ka tion, ang paghiusa sini nabutang sa katalagman bangod sang mga pagbinahinbahin, kag ang espiritu sini bangod sang pagpabaya sa imoralidad. (1 Corinto 1:​10, 11; 5:​1-5) Ang mga tumuluo nag-akusahay sa kalibutanon nga mga korte, kag ang iban nag-away sa nanuhaytuhay nga mga butang. (1 Corinto 6:​1-8; 8:​1-13) Ang pinuyas, hinisaay, kaakig, kag kagamo naghimo sang kabuhi nga mabudlay. Ginduhaduhaan pa gani sang iban ang awtoridad ni Pablo kag ginpakanubo ang iya ikasarang sa paghambal. (2 Corinto 10:10) Apang, ang mga matutom nga bahin sadtong kongregasyon nagtuman sang ila dedikasyon sa Dios sa tion sadtong pagtilaw.

8, 9. Ano ang dapat naton himuon kon ginaatubang kita sang makatililaw nga kahimtangan sa kongregasyon?

⁸ Kon mag-utwas ang makatililaw nga kahimtangan, dapat kita mag-unong sa katawhan sang Dios. (Ipaanggid ang Juan 6:​66-69.) Magpailob kita sa isa kag isa, kay nahibaluan naton nga mas madugay para sa iban ang pagsuklob sing “bag-ong personalidad” kag pagpanapot sing pagkaluoy, pagkaayo, pagkamapainubuson, pagkalulo, kag pagkamainantuson. Sanglit indi man palareho ang ginhalinan sang mga alagad sang Dios, dapat kita tanan magpakita sing gugma kag mangin mapinatawaron.​—⁠Colosas 3:​10-14.

⁹ Sa tapos sang madamo nga tuig sang pag-alagad kay Jehova, ang isa ka utod nga lalaki nagsiling: “Kon may isa ka butang nga labing importante sa akon, ini amo ang pagpabilin nga malapit sa kitaon nga organisasyon ni Jehova. Ang akon eksperiensia sang bag-uhan pa lang ako nagtudlo sa akon kon daw ano ka makapaluya sa espirituwalidad nga magsandig sa pangatarungan sang tawo. Sang mapat-od ko ini, nagdesisyon ako nga magmatutom sa organisasyon. Sa ano pa nga paagi matigayon sang isa ang kahamuot kag pagpakamaayo ni Jehova?” Ginaapresyar mo man bala ang imo pribilehiyo sang pag-alagad upod sa iya malipayon nga katawhan? (Salmo 100:2) Kon amo, indi mo pagtugutan ang bisan ano nga magpahilayo sa imo gikan sa organisasyon sang Dios ukon laglagon ang imo kaangtanan sa Isa nga ang iya butkon nagaluwas sa tanan nga nagahigugma sa iya.

Bulig Kon Ginaatubang Kita sang Pagsulay

10. (a) Paano ang pangamuyo nagabulig sa katawhan sang Dios sa pag-atubang sang pagsulay? (b) Anong pasalig ang ginhatag ni Pablo sa 1 Corinto 10:​13?

¹⁰ Subong matutom nga mga indibiduwal nga nagapakig-upod sa organisasyon sang Dios, may bulig kita gikan sa iya sa tion sang pagtilaw. Halimbawa, ginabuligan niya kita nga huptan ang aton integridad sa iya kon ginaatubang kita sang pagsulay. Sa pagkamatuod, dapat kita mangamuyo nahisanto sa ginsiling ni Jesus: “Indi kami pagdalha sa pagsulay, kundi luwasa kami gikan sa isa nga malauton,” si Satanas nga Yawa. (Mateo 6:​9-13) Sa epekto, nagapangabay kita sa Dios nga indi kita pagtugutan nga magpadaug kon ginasulay kita sa paglalis sa iya. Ginasabat man niya ang aton mga pangamuyo nga nagapangayo sing kaalam sa paglandas sang mga pagtilaw. (Santiago 1:​5-8) Kag masaligan sang mga alagad ni Jehova ang iya bulig, kay si Pablo nagsiling: “Wala sing pagsulay nga nag-abot sa inyo luwas sa kon ano ang kinaandan sa mga tawo. Apang ang Dios matutom, kag indi magtugot nga sulayon kamo labaw sa inyo masarangan, kag upod sa pagsulay magahatag man sia sing lulutsan agod nga makasarang kamo sa pagbatas sini.” (1 Corinto 10:13) Ano ang ginahalinan sina nga pagsulay, kag paano ang Dios nagahatag sing lulutsan?

11, 12. Sa anong mga pagsulay nagpadaug ang mga Israelinhon, kag paano kita makabenepisyo gikan sa ila mga eksperiensia?

¹¹ Ang pagsulay nagagikan sa mga kahimtangan nga makahaylo sa aton sa paglalis sa Dios. Si Pablo nagsiling: “Ining mga butang nangin mga paandam sa aton, agod nga indi kita mangin mga tawo nga nagahandum sang makahalit nga mga butang, subong sang ginhimo [sang mga Israelinhon.] Dili kamo magsimba sa mga idolo, nga amo ang ginhimo sang iban sa ila; subong sang nasulat na: ‘Naglingkod ang katawhan sa pagkaon kag pag-inom, kag nagtindog sa pagsaot.’ Dili kita magpakighilawas subong sang ginhimo sang iban sa ila, kag sa isa ka adlaw nagkapukan ang duha ka pulo kag tatlo ka libo. Dili ta pagtilawan si Jehova, subong sang pagtilaw sang iban sa iya, kag ginlaglag sang mga man-ug. Dili kita magkumod, subong sang ginhimo sang iban, kag ginlaglag sang manuglaglag.”—1 Corinto 10:​6-10.

¹² Ang mga Israelinhon naghandum sing makahalalit nga mga butang sang magpadaug sila sa pagsulay nga mangin hakugan sa pagtipon kag sa pagkaon sing pitaw nga gin-aman sang Dios sa milagruso nga paagi. (Numeros 11:​19, 20, 31-35) Antes sini, nagsimba sila sa idolo sang ang paglakat ni Moises nagpautwas sing pagsulay nga magsimba sila sa tinday nga baka. (Numeros 32:​1-6) Linibolibo ang nalaglag bangod nagpadaug sila sa pagsulay kag nakighilawas sa Moabinhon nga mga babayi. (Numeros 25:​1-9) Sang magpadaug ang mga Israelinhon sa pagsulay kag nagkumod nahanungod sa pagkalaglag ni Kore, ni Datan, ni Abiram, kag sang ila mga kaupod, 14,700 ang napapas sang kalalat-an nga ginpadala sang Dios. (Numeros 16:​41-49) Makabenepisyo kita gikan sa sining mga eksperiensia kon hangpon naton nga wala sing bisan isa sa sining mga pagsulay ang tuman kadaku nga indi kuntani mapamatukan sang mga Israelinhon. Napamatukan nila kuntani ini kon nagtuo sila, kon nagpasalamat sila sa mahigugmaon nga pag-atipan sang Dios, kag kon gin-apresyar nila ang pagkahusto sang iya Kasuguan. Nian ginluwas kuntani sila sang butkon ni Jehova, subong nga makaluwas ini sa aton.

13, 14. Paano si Jehova nagahimo sing lulutsan kon ang iya mga alagad ginasulay?

¹³ Subong mga Cristiano, nagaatubang kita sing mga pagsulay nga kinaandan sa katawhan. Apang, makapabilin kita nga matutom sa Dios paagi sa pagpangamuyo sa iya nga nagapangayo sing bulig kag sa pagtinguha nga pamatukan ang pagsulay. Ang Dios matutom, kag indi sia magtugot nga sulayon kita labaw sa aton masarangan. Kon matutom kita kay Jehova, indi imposible nga himuon ang iya kabubut-on. Nagahimo sia sing lulutsan paagi sa pagpabakod sa aton nga pamatukan ang pagsulay. Halimbawa, kon ginahingabot, mahimo nga masulay kita sa pagkompromiso sa paglaum nga malikawan ang pagpaantos ukon ang kamatayon. Apang kon nagasalig kita sa gamhanan nga butkon ni Jehova, ang pagsulay indi gid makalab-ot sa punto nga sa diin indi niya mapabakod ang aton pagtuo kag hatagan kita sing bastante nga kusog sa paghupot sing integridad. Subong sang ginsiling ni apostol Pablo: “Ginaipit kami sa tagsa ka luyo, apang wala mapiuti; ginapalibog, apang wala mawad-i sing paglaum; ginahingabot, apang wala mapatumbayai; ginapanglampusan, apang wala malaglag.”​—⁠2 Corinto 4:​8, 9.

¹⁴ Pirme ginasakdag ni Jehova ang iya katawhan paagi sa paggamit sang iya espiritu subong manugpahanumdom kag manunudlo. Ginapahanumdom sini sa aton ang Makasulatanhon nga mga punto kag ginabuligan kita sa paghantop kon paano ini iaplikar agod mapamatukan ang pagsulay. (Juan 14:26) Ang matutom nga mga alagad ni Jehova nakahangop sang mga hulusayon nga nadalahig sa pagsulay kag indi malimbungan sa pagsunod sa sayop nga dalanon. Naghimo ang Dios sing lulutsan paagi sa pagbulig sa ila nga magbatas bisan tubtob sa kamatayon nga wala nagapadaug sa pagsulay. (Bugna 2:10) Luwas sa pagbulig sa iya mga alagad paagi sa iya espiritu, ginagamit ni Jehova ang iya mga anghel para sa iya organisasyon.​—⁠Hebreo 1:14.

Bulig sa Personal nga mga Butang

15. Anong personal nga bulig ang masapwan naton sa Ambahanon ni Solomon?

¹⁵ Ang mga nagapakig-upod sa organisasyon ni Jehova may bulig niya sa personal nga mga butang. Halimbawa, ang iban mahimo nga nagapangayo sing Cristianong tiayon. (1 Corinto 7:39) Kon mapaslawan ang isa, mahimo makabulig nga binagbinagon ang hari sang Israel nga si Solomon. Wala sia ginbaton sang isa ka Sulaminhon nga babayi bangod may ginahigugma na sia nga isa ka kubos nga manugbantay. Ang sinulat sang hari tuhoy sa sini mahimo matawag nga Ang Ambahanon sang Napaslawan nga Gugma ni Solomon. Mahimo nga mahibi kita kon ang mga panikasog sang aton gugma mapaslawan sa pila ka kahimtangan, apang nalandas ni Solomon ang iya kapaslawan, gani amo man kita. Ang espiritu sang Dios makabulig sa aton sa pagpakita sing pagpugong sa kaugalingon kag iban pa nga diosnon nga mga kinaiya. Ang iya Pulong nagabulig sa aton sa pagbaton sang pirme masakit nga kamatuoran nga indi mahimo higugmaon sang isa ka tawo ang bisan sin-o lang. (Ambahanon ni Solomon 2:​7; 3:5) Apang, ginapakita sang Ambahanon ni Solomon nga mahimo posible nga makakita sing masigkatumuluo nga magahigugma sa aton. Kapin ka importante, ining “superlatibo nga ambahanon” natuman sa gugma sang Maayong Manugbantay, nga si Jesucristo, para sa iya “nobya” sang 144,000 ka hinaplas nga mga sumulunod.​—⁠Ambahanon ni Solomon 1:​1; Bugna 14:​1-4; 21:​2, 9; Juan 10:⁠14.

16. Ang “kapipit-an sa ila unod” nga naeksperiensiahan sang minyo nga mga Cristiano mahimo maglakip sa ano?

¹⁶ Bisan ang nagaminyo sing isa nga tumuluo may “kapipit-an sa ila unod.” (1 Corinto 7:28) Magautwas ang mga kabalaka kag kahangawa para sa bana kag asawa kag sa ila kabataan. (1 Corinto 7:​32-35) Ang balatian mahimo magadala sing mga lulan kag kahuol. Bangod sang paghingabot ukon kapigaduhon, mahimo nga mabudlayan ang isa ka Cristianong amay sa pag-aman sang mga kinahanglanon sang kabuhi para sa iya pamilya. Ang mga ginikanan kag mga anak mahimo nga bulagon sang pagkabilanggo, kag ang iban mahimo nga paantuson kag patyon pa gani. Apang sa sini tanan nga mga kahimtangan, mapamatukan naton ang pagsulay nga ipanghiwala ang pagtuo kon nagasalig gid kita sa nagaluwas nga butkon ni Jehova.​—⁠Salmo 145:⁠14.

17. Anong problema sa pamilya ang nabatas ni Isaac kag ni Rebeca sa bulig sang Dios?

¹⁷ Mahimo nga kinahanglan naton batason ang pila ka mga pagtilaw sing madugay. Halimbawa, mahimo nga masubuan ang diosnon nga mga ginikanan sang isa ka anak nga lalaki bangod sang iya pagpangasawa sing isa nga ditumuluo. Natabo ini sa pamilya sang patriarka nga si Isaac kag sang iya asawa nga si Rebeca. Ang ila 40-anyos nga anak nga si Esau nagpangasawa sing duha ka Hethanon nga babayi nga “nangin kapaitan sa espiritu ni Isaac kag ni Rebeca.” Sa kamatuoran, “si Rebeca pirme nga nagsiling kay Isaac: ‘Ginatak-an ako sang akon kabuhi bangod sang mga babayi nga Hethanon. Kon si Jacob magpangasawa sa babayi nga Hethanon subong sini sa ila, isa sang mga babayi sang duta, ano bala ang kaayuhan sang akon kabuhi sa akon?’ ” (Genesis 26:​34, 35; 27:46) Maathag, ang matarong nga kalag ni Rebeca ginpaantos sining nagapadayon nga problema. (Ipaanggid ang 2 Pedro 2:​7, 8.) Apang, ang butkon ni Jehova nagsakdag kay Isaac kag kay Rebeca, kay nabatas nila ining pagtilaw samtang gintipigan ang mabaskog nga kaangtanan sa Iya.

18. Anong personal nga pagtilaw ang nabatas ni C. T. Russell sa bulig sang Dios?

¹⁸ Makapasubo kon ang isa ka bawtismado nga katapo sang pamilya magbugnaw sa pag-alagad sa Dios. (Ipaanggid ang 2 Timoteo 2:15.) Apang, ang iban nagbatas bangod sang pagkadula sang tiayon sa espirituwal nga paagi, subong sang natabo kay Charles T. Russell, ang unang presidente sang Watch Tower Society. Ang iya asawa nagbulag sa Sosiedad kag ginbiyaan sia sang 1897, pagligad sang halos 18 ka tuig nga pag-asawahay. Naghimo sia sing legal nga aksion para sa ila legal nga pagbulagay sang 1903, kag ginhatag ini sang 1908. Maathag ang iya kasubo sang ginsugiran niya ang iya asawa sa sulat nga ginpadala niya sa tapos sila magbulagay: “Nangamuyo ako sing hugot sa Ginuo para sa imo. . . . Indi ko ikaw pagpabug-atan sang akon kasubo, ukon pukawon ang imo simpatiya paagi sa paglaragway sang akon ginabatyag, kay sa tion kag tion makita ko ang imo mga panapton kag ang iban nga mga butang nga nagapahanumdom sa akon sa imo​—⁠puno gid sing gugma kag simpatiya kag pagkamabuligon​—⁠ang espiritu ni Cristo. . . . Binagbinaga sing mapangamuyuon ang akon isiling sa imo. Kag patihi ako nga ang masakit gid sa akon, ang akon ginabakho, indi ang akon kasubo sa nabilin nga bahin sang akon kabuhi, kundi ang imo pagkahulog, palangga ko, ang imo walay katapusan nga pagkadula, tubtob sa makita ko.” Walay sapayan sini nga kalisod, ginbuligan sang Dios si Russell tubtob sa katapusan sang iya dutan-on nga kabuhi. (Salmo 116:​12-15) Pirme ginasakdag ni Jehova ang iya matutom nga mga alagad.

Gikan sa Tanan nga Kalisdanan

19. Ano ang dapat naton dumdumon kon magpadayon ang makapasubo nga mga problema?

¹⁹ Ang katawhan ni Jehova nakakilala sa iya subong “isa ka Dios sang kaluwasan,” Isa nga “nagadala adlaw-adlaw sang aton lulan.” (Salmo 68:​19, 20) Busa, subong dedikado nga mga indibiduwal nga nagapakig-upod sa iya dutan-on nga organisasyon, indi gid kita magpadaug sa kapaslawan kon magpadayon ang makapasubo nga mga palaligban. Dumduma nga ang “Dios aton dalangpan kag kusog, handa gid nga kabulig sa kalisod.” (Salmo 46:1) Ang aton pagsalig sa iya pirme may padya. “Ginpangita ko si Jehova, kag ginsabat niya ako,” siling ni David, “kag ginluwas niya ako sa tanan ko nga kahadlok. . . . Ini nga makaluluoy nga tawo nagtuaw, kag ginpamatian sia ni Jehova. Kag ginluwas Niya sia sa tanan niya nga kagamo.”​—⁠Salmo 34:4-6.

20. Anong pamangkot ang binagbinagon pa?

²⁰ Huo, ginaluwas sang aton langitnon nga Amay ang iya katawhan gikan sa tanan nga kalisdanan. Ginasakdag niya ang iya dutan-on nga organisasyon, nagahatag sing bulig sa kongregasyon kag sa aton kaugalingon. Sa pagkamatuod, “si Jehova indi magsikway sang iya katawhan.” (Salmo 94:14) Apang binagbinagon naton masunod ang iban pa nga mga paagi sang pagbulig ni Jehova sa iya katawhan subong mga indibiduwal. Paano ginapabaskog sang aton langitnon nga Amay ang iya mga alagad nga nagabalatian, ginapung-awan, nagapangasubo bangod namatyan, ukon nagakalisod bangod sang ila nahimo nga sala? Subong matun-an pa naton, may rason kita sa pagsalig sa gamhanan nga butkon ni Jehova sa sini man nga mga butang.

Paano Mo Sabton?

◻ Paano ang butkon ni Jehova nagluwas sang una?

◻ Paano ginabuligan ni Jehova ang iya katawhan sa kongregasyon karon?

◻ Ano nga bulig ang ginahatag sang Dios sa aton kaugalingon?

◻ Ano ang dapat naton himuon kon magpadayon ang makapasubo nga mga problema?

[Laragway sa pahina 8, 9]

Ginpaguwa sang Dios ang mga Israelinhon gikan sa Egipto “paagi sa nabayaw nga butkon”