Ang Mabuot nga Romanong Senturyon
ANG Romanong mga senturyon kilala nga indi mabuot. Nagapanguna sa kabon sang isa ka gatos ka isganan nga mga soldado, ang senturyon dapat nga isa ka estrikto nga instruktor, manugdisiplina, kag, kon kaisa, manugpatay. Apang, ang Biblia nagasugid sa aton nahanungod sa isa ka Romanong senturyon sang kabon ni Augusto nga nagpakita sing tunay nga kaalwan kag kaluoy kay apostol Pablo. Ang iya ngalan? Si Julio.
Ginapakilala sia sa aton sang Biblia sa Binuhatan kapitulo 27. Nangabay si apostol Pablo kay Cesar nga pamatian ang iya apelasyon sa Roma. Busa, si Pablo, kaupod sang madamo pa nga bilanggo, gintugyan sa pag-atipan sang “isa ka kapitan nga ginhingalanan si Julio sa kabon ni Augusto.” Naglayag sila halin sa Cesaria, ang pantalan nga siudad sang aminhan-katundan sang Jerusalem nga amo ang ulong-talatapan sang Romanong hangaway. Siling ni istoryador Lucas: “Sa adlaw nga madason nagdungka kami sa Sidon, kag ginkaluuyan ni Julio si Pablo kag gintugutan sa pagkadto sa iya mga abyan agod makabaton sia sang ila pag-alila.”—Binuhatan 27:1-3.
Wala ginasugid sang Biblia kon ngaa napahulag si Julio nga magpakita sing kaluoy. Mahimo nga ginsugo sia ni Gobernador Festo nga hatagan si Pablo sing pinasahi nga pagtratar. Ukon ayhan bangod pamilyar sia sa mga sirkunstansia sang pagdakop kay Pablo, mahimo nga gindayaw ni Julio ang kaisog kag integridad ni Pablo. Diin man sa duha, mahimo nga ginkabig ni Julio nga si Pablo indi ordinaryo nga bilanggo.
Apang, wala namati si Julio sa paandam ni Pablo nga indi maglayag sa Matahom nga Dulungkaan. Dili madugay ang mamadlos nga hangin nagbutang sini sa katalagman nga basi madas-il sa pasil sang baybayon sang naaminhan nga Aprika. (Binuhatan 27:8-17) Sa tunga sining madlos, si Pablo nagtindog kag nagpasalig sa hinadlukan nga mga pasahero nga “walay kabuhi nga madula sa inyo, kundi lamang ang sakayan.” Apang, ang iban nga mga sakayanon nagtinguha sang ulihi sa pagpalagyo. Nian ginsilingan ni Pablo si Julio: “Kon indi ini sila magpabilin sa sakayan, indi kamo maluwas.”—Binuhatan 27:21, 22, 30, 31.
Sini nga tion, si Julio namati kay Pablo, kag ang pagpalagyo sang mga sakayanon napaslawan. Suno gid sa ginpakot ni Pablo, ang sakayan nadas-il sa manabaw nga lugar kag naguba. Sa kahadlok nga basi magpalayo ang mga bilanggo, buko sang mga soldado nga pamatyon sila tanan. Apang, nagpasilabot sa gilayon si Julio kag ginpunggan ang iya tinawo, busa nagluwas sang kabuhi ni Pablo.—Binuhatan 27:32, 41-44.
Ang Biblia wala nagasugid sa aton kon ano ang natabo sa sining mabuot nga senturyon ukon kon ginbaton niya ang Cristianong pagtuo. Ang ginpakita niya nga kalulo isa ka pamatuod sang pagpanghikot sang hatag-Dios nga konsiensia. (Roma 2:14, 15) Apang, ang mga Cristiano nagahimo sing labi pa sa tawhanon nga kalulo kag nagapakita sing diosnon nga kalulo nga resulta bangod sang pagtigayon sang espiritu sang Dios. (Galacia 5:22) Sa pagkamatuod, kon ang pagano nga soldado nga wala nakakilala sa Dios nagapakita sing kalulo, daw ano pa nga ang katawhan sang Dios dapat magpakita sing kalulo!