Madumduman Mo Bala?

Ginbinagbinag mo bala sing maayo ang ulihi nga mga guwa sang Ang Lalantawan? Kon amo, ayhan mawili ka sa pagdumdom sang masunod:

◻ Paano ang rekord sang Biblia nahanungod sa mga inaway ni Jehova nagahatag sa aton sing pagsalig sa pag-atubang sa “dakung kapipit-an”? (Mateo 24:21)

Pirme nagakontrol, ginpakita ni Jehova nga sarang niya malabawan ang panghunahuna sang iya mga kaaway kag mamaniobra ang mga sirkunstansia para sa kaluwasan sang iya katawhan.​—⁠8/15, pahina 27.

◻ Ano ang dapat handa nga himuon sang mga ginikanan agod mahuptan ang komunikasyon sa ulot nila kag sang ila mga kabataan?

Ang mga ginikanan dapat maghinguyang sing tion kaupod sang ila mga kabataan. Subong man, dapat sila mangin handa sa paghimo sing mga sakripisyo tungod sa ila mga kabataan para sa ila pagtubo sa hunahuna, sa lawas, kag sa espirituwal.​—⁠9/1, pahina 22.

◻ Ano ang kahulugan sang pagbaylo-dagway ni Jesus para sa aton karon? (Marcos 9:​2-4)

Ang pagbaylo-dagway makapalig-on sing pagtuo sa matagnaon nga pulong ni Jehova kag makapabakod sang aton pagtuo kay Jesucristo subong ang Anak sang Dios kag ginsaad nga Mesias. Makapalig-on man ini sang aton pagtuo sa pagbanhaw kay Jesus sa espiritu nga kabuhi kag makadugang sang aton pagtuo sa pangulohan sang Dios.​—⁠9/15, pahina 23.

◻ Ano ang kahulugan sang “makadali” sa Isaias 11:⁠6?

Ang mahalungon nga pagbadbad sini nga bersikulo nagapakita nga ang lobo kag karnero indi pirme nga magkaupod sa bag-ong kalibutan. Mahimo nga may yara sila lainlain nga puluy-an kag gani nalakip sila sa kategoriya sang ‘kahayupan kag kasapatan’ subong sang nagluntad anay sa orihinal nga Paraiso. (Genesis 1:24) Apang, ang mga sapat magahidaitay, magaupdanay nga wala sing halit.​—⁠9/15, pahina 31.

◻ Ano ang yabi sa matuod nga Cristianismo?

Ang gugma amo ang yabi sa matuod nga Cristianismo. Ang pagtuo, mga buhat, kag husto nga kaupdanan kinahanglanon, apang kon wala sing gugma ang ila kabilihanan wala sing pulos. Amo sini bangod si Jehova isa gid ka Dios sang gugma. (1 Corinto 13:​1-3; 1 Juan 4:8)​—⁠10/1, pahina 20.

◻ Ang ekspresyon nga “tion sa pagkatawo kag tion sa pagkapatay” sa Manugwali 3:2 nagasakdag bala sang ideya nga napat-od na nga daan sang Dios ang tion sang aton kamatayon?

Indi. Ginahambalan lamang ni Solomon ang padayon nga siklo sang kabuhi kag kamatayon nga nagahalit sa dihimpit nga katawhan. Ang Manugwali 7:​17 nagasiling: “Dili ka maglakas kalaut, kag dili ka magbinuangbuang. Ngaa bala nga mapatay ka sa wala pa ang imo tion?” Ano ang kahulugan sining laygay kon ang tion sang kamatayon sang isa napat-od na nga daan?​—⁠10/15, pahina 5-6.

◻ Ano ang nagapangatarungan batok sa pagkanahaunang obispo sang Roma ni apostol Pedro?

Wala sing pamatuod nga si Pedro nakaduaw sa siudad sang Roma; ni ginpatuhuyan ni Pedro sing labi pa sang sa isa ka apostol ni Cristo. (2 Pedro 1:1)​—⁠10/15, pahina 8.

◻ Nagakaigo bala sa Cristiano ang magpadala sing bulak sa lubong?

Kon kilala nga ang kinabatasan (ukon desinyo, subong sang krus) sa karon may relihioso nga kahulugan sa imo lugar, dapat ini likawan. Gani ang mga Cristiano indi magapadala sing bulak sa dagway sang krus ukon magagamit sini sa pormal nga paagi nga may yara butig nga relihiosong kahulugan. Apang, sa sining tion sa madamong kadutaan, ang kinabatasan nga ­pagpadala sing bulak nga wala sing labot sa relihion lapnag. Ang iban nga mga Cristiano nagpadala sing bulak agod pahalipayon ang masubo nga okasyon kag agod ipakita ang simpatiya kag kabalaka.​—⁠10/15, pahina 31.

◻ Ano ang ginaathag sang opisyal nga mga depinasyon nahanungod sa Trinidad?

Ginaathag sini nga ang doktrina sang Trinidad indi lamang isa ka simple nga ideya. Sa baylo, isa ini ka masibod nga hubon sang mga ideya nga ginhugpong sang nagligad nga mga siglo kag gintingob. Ginabaton sang madamong mga eskolar, lakip na sang mga Trinitaryano, nga ang Biblia wala gid nagaunod sang doktrina sang Trinidad.​—⁠11/1, pahina 21-2.

◻ Ngaa ang 29 C.⁠E. isa ka importante nga petsa sa maragtas sang Biblia?

Bangod paagi sa pagtingob sang sibu nga impormasyon sa Biblia sa sekular nga pagpetsa sang paghari ni Tiberio, mabulubanta sang mga estudyante sang Biblia nga ang ministeryo ni Juan nagsugod sang tigpamulak sang 29 C.⁠E. kag nga anum ka bulan sang ulihi, sang tigragas sang 29 C.⁠E., ginbawtismuhan ni Juan si Jesus.​—⁠11/15, pahina 31.

◻ Ano ang kahulugan sang “pagsimba” sa nagapamulong sing Hebreo nga katawhan, kag paano ini naaplikar sa mga Saksi ni Jehova karon?

Ang Hebreong katumbas sang tinaga nga “pagsimba” sarang mabadbad nga “pag-alagad.” Busa, sa ­Hebreong panghunahuna, ang pagsimba nagakahulugan sing pag-alagad. Amo ini ang kahulugan sini sa katawhan ni Jehova karon, gani ang tuman ka importante nga tanda sang matuod nga relihion amo ang diosnon nga pag-alagad sang pagbantala.​—⁠12/1, pahina 19.