Pagtipon sa mga Sumilimba

SI APOSTOL Juan ginhatagan sing isa ka palanan-awon tuhoy sa nagatay-ug sang kalibutan nga mga hitabo nga mahanabo “sa adlaw sang Ginuo.” Nakita niya ang langitnon nga si Ginuong Jesucristo nga nagapangabayo padulong sa matarong nga pagpakig-away, nga ginlaragway sang isa ka maputi nga kabayo—“nagadaug kag sa pagtapos sang iya pagpangdaug.” Ang una nga ginhimo niya amo ang pagtagbong sa puno nga kaaway sang Dios, si Satanas, gikan sa langit paidalom sa palibot sining duta. Bilang balos, ginpaantos ni Satanas ang katawhan paagi sa walay tupong nga patyanay, tiggulutom, kag balatian, nga ginlaragway sang malaragwayon nga mga manugkabayo kag sang ila mga kabayo—nga duag pula, itom, kag maluspad. (Bugna 1:10; 6:1-8; 12:9-12) Ining mga kalalat-an una nga naglutaw sang tuig 1914 kag nagdugang pa kutob sadto. Sa dili madugay, magadangat ini sa putukputukan paagi sa ginlaragway ni Jesus nga “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.”—Mateo 24:3-8, 21.

Ano ang matabo sa mga sumilimba ni Jehova sa amo nga tion? Ang Bugna kapitulo 7, bersikulo 1 tubtob 10, nagahambal tuhoy sa puwersa sang mga anghel nga “nagapugong” sa unos sang kalaglagan tubtob matipon ining mga sumilimba. Sa sulod sang panahon kutob sang 1914, ang katapusan nga mga katapo sa duta sang espirituwal nga Israel, nga 144,000 sa kadamuon, natipon. Kag nian “yari karon! isa ka dakung kadam-an, nga wala sing tawo nga makaisip, gikan sa tanan nga pungsod kag mga tribo kag katawhan kag mga hambal.” Minilyon na ang kadamuon sining dakung kadam-an. Nagatindog sila nga nahamut-an sa atubangan sang trono sang Dios bangod sang ila pagpakita sing pagtuo sa nagagawad nga dugo ni Jesus, nga ginpatay kaangay sang inosente nga kordero. “Kag sila padayon nga nagasinggit sa mabaskog nga tingog, nga nagasiling: ‘Utang namon ang kaluwasan sa amon Dios, nga nagalingkod sa trono, kag sa Kordero.’ ” Ining makugi nga mga sumilimba padayon nga nagasiling “Kari kamo!” sa iban pa, nga ginatipon man para sa kaluwasan sa “dakung kapipit-an.”—Bugna 7:14-17; 22:17.

“Sa Bug-os nga Duta”

Tuhoy sa sining debotado nga mga sumilimba, sarang ini masiling: “Ang ila tingog naglapnag sa bug-os nga duta, kag ang ila mga pulong tubtob sa mga ukbong sang napuy-an nga duta.” (Roma 10:18) Ang ila lakas nga pagpangabudlay ginpakamaayo sing talalupangdon nga mga bunga. Halimbawa:

Ang Mexico nagareport karon sing 335,965 ka aktibo nga mga sumilimba ni Jehova, halos isa ka gatos ka libo nga pagdugang pagligad lamang sang tatlo ka tuig! Ngaa tuman ka daku ang pag-uswag? Ang masunod nga kasaysayan mahimo nga makabulig sa pagpaathag. Ang isa ka lamharon nga tawo nga nagahingalan kay Aurelio isa ka sakristan anay sa isa ka Katoliko nga simbahan. Sa kada tion nga magduaw ang mga Saksi ni Jehova sa sadto nga minuro, ginabagting niya ang lingganay sang simbahan agod paluyahon ang bisan sin-o gikan sa pagpamati sa ila. Sang ulihi nagbakal sia sing Katoliko nga Jerusalem Bible kag ginsugdan ang pagbasa sini, apang wala niya mahangpi ini. Nian isa ka adlaw nakita niya ang iya abyan nga nagasipit sing New World Translation. Ginsaway ni Aurelio ang iya abyan kag, sa tapos sia magsiling nga butig ang iya Biblia, ginhagad niya sia sa iya balay agod ipakita sa iya ang “matuod” nga Biblia. Ang iya abyan nagsiling: “Basaha ang Exodo 20,” kag dayon naglakat sia.

Sugod sa kapitulo 1, ginbasa sang sakristan ang Exodo tubtob nakalab-ot sia sa kapitulo 20, bersikulo 4 kag 5. Nakibot sia sa ginsiling sang iya Katoliko nga Biblia tuhoy sa mga imahen. Sa tapos sang Misa sang masunod nga Domingo, ginpakita niya sa pari ang mga teksto tuhoy sa mga imahen. Sang primero nagsiling ang pari nga ginatahod lamang niya ang mga imahen; wala niya ginasimba sila. Sang makita nga wala makontento sa sini si Aurelio, ginbutangbutangan sia sang pari nga nagatuon sia upod sa mga Saksi ni Jehova. Ginpanghiwala ini ni Aurelio apang nagdugang sia, “Karon matuon na ako upod sa ila!”

Sang masunod nga tion nga nagduaw ang mga Saksi sa minuro, ginpangita sila ni Aurelio kag nagsugod sa pagtuon sang Biblia upod sa ila. Nag-untat sia sa pagtrabaho sa simbahan kag pagligad sang tatlo ka bulan nangin kalipikado sia sa pagpakigbahin sa pagministeryo sa publiko upod sa mga Saksi ni Jehova. Ang una nga balay nga ginduaw niya amo ang iya sang pari, nga indi makapati sa iya mga mata sang makita niya ang isa ka sakristan anay nga isa na ka manugbantala sang Ginharian. Namahog ang pari nga silutan sia sing ekskomunikasyon, apang ginsilingan sia ni Aurelio nga indi na ini kinahanglan kay naghalin na sia sa simbahan. Ang iya maisog nga dalanon nagpalig-on sa madamo pa sa minuro nga nagatuon na upod sa mga Saksi ni Jehova. Si Aurelio kag ang 21 pa gikan sa sadto nga minuro ginbawtismuhan sa nagsunod nga distrito nga kombension. Madasig gid ang pag-uswag sa sini nga duog amo kon ngaa isa lamang ka gulang ang mahimo makarepaso sa sini nga grupo sang mga pamangkot para sa mga kandidato sang bawtismo.

“Ang Ila Tingog Naglapnag”

Indi malikawan ang pagbantala sang Ginharian. Ang isa ka Italyano nga Katoliko naugot anay sa kada tion nga magduaw sa iya ang mga Saksi ni Jehova. Gani sang ginsaylo sia sang iya kompanya sa Singapore, ginbatyag niya nga sa katapusan indi na sia pagtublagon nila. Apang sa iya kakibot, didto man ang mga Saksi. Gani nagbakal sia sing duha ka mabaris nga ido agod atakehon ang mga Saksi nga magaduaw. Sang magduaw sa iya balay ang duha ka Saksi, naglumpat yadtong mga ido. Hinadlukan, nagdalagan ang mga babayi para sa ila kabuhi, padulong sa magkatuhay nga direksion sa isa ka likuan sang dalan. Sang maabtan sang isa sang mga ido ang isa ka Saksi nga babayi, ginbutong niya sa iya bag ang duha ka brosyur kag gindasok sa naganganga nga baba sang ido. Bangod sini, nag-untat ang ido sa paglagas sa iya, nagliso, kag nagpauli.

Sang masunod nga semana, ini gihapon nga duha ka Saksi nagahimo sing pagduaw liwat sa isa ka balay sa tabok sang dalan. Ang tag-iya sang ido yara sa iya hardin, kag, sing makapakibot, gintamyaw niya ang mga babayi kag gin-agda sila sa iya balay. Ginsugiran niya sila nga wala pa gid sia makapakighambal sa bisan sin-o nga mga Saksi ni Jehova ukon makabasa sang bisan ano sa ila mga publikasyon. Apang natingala sia sang makita ang mga brosyur sa baba sang isa sang iya mga ido. Sadto nga gab-i ginbasa niya ang mga brosyur kag nahamuot gid sa sini. Bisan pa Katoliko sia sa bug-os niya nga kabuhi, nagpabutyag sia sing handum nga magtuon sang Biblia upod sa mga Saksi ni Jehova.

Sanglit ang tawo ginsaylo liwat sa Italya, ginhimo ang kahimusan nga ang mga Saksi ni Jehova didto magtuon upod sa iya. Sang sia kag ang iya asawa nagsugod sa pagtambong sa mga miting, maakigon nga ginpahog sila sang pari sang parokya. Sang ginsunog ang ila hardin, ginbugto sang mag-asawa ang tanan nila nga kaangtanan sa simbahan. Ining tawo nagasiling karon: “Nagapanaksi na ako sa madamo nga katapo sang akon pamilya bangod luyag ko nga mahibaluan nila nga si Jehova amo lamang ang matuod nga Dios.”

“Tubtob sa mga Ukbong sang Napuy-an nga Duta”

Ang isa pa ka eksperiensia gikan sa isa ka ukbong sang duta nagapakita kon paano ang mensahe sang Ginharian ginaapresyar kag nagabulig sa pagbag-o sang mga kabuhi. Samtang nagatambong sa klase para sa prenatal, nakilala sang isa ka Saksi sa Australia ang isa ka babayi nga madamo sing malain nga bisyo, kag indi pa niya luyag nga untatan ang pagpanigarilyo samtang nagabusong sia. Natublag gid ang Saksi sa iya panimuot. Natabuan nga dungan sila nagbata kag isa sila ka ward, gani nakahambalanay sila. Natukiban nga ang babayi may madamo nga problema sang bata pa sia, kag karon malapit na sila magbulagay sang iya bana. Gani, sang makaguwa sa ospital, ginduaw sang Saksi ang babayi kag ginsugdan ang pagtuon sang Biblia upod sa iya, nga ginagamit ang libro nga Making Your Family Life Happy.

Ang bana sang babayi madugay na nagapangamuyo sa Dios nga masapwan niya ang matuod nga relihion, nga may kondisyon: “Basta indi lamang ang mga Saksi ni Jehova!” Walay sapayan, sang matukiban niya nga ang iya asawa nagatuon upod sa mga Saksi, nagsugod sia sa pagpamangkot sing mga pakiana kag gin-agda sia nga magbuylog sa pagtuon. Nagsugot sia, kag wala madugay nagsugod sia sa pagtambong sa mga miting sang kongregasyon. Karon, ang bana kag ang asawa nabawtismuhan na, kag maathag nga ang ila pag-asawahay nag-uswag sing daku.

Ang mga pagtuon sang Biblia sa puluy-an nga napasad sa sini nga literatura nagresulta sa pagtipon sa madamo nga bag-ong mga sumilimba. Sa mga pungsod nga sa diin ginabatas sang mga Saksi ni Jehova ang mga rebolusyon, inaway sibil, ukon mga pagdumili sang gobierno, ang hilikuton sa pagtuon sang Biblia sa puluy-an nag-uswag. Ang inaway sibil nagadabdab sa Angola sa madamo nga tuig na, kag ang mga Saksi nag-antos sing daku nga paghingabot kag kabudlayan. Sang maaga nga bahin sang nagligad nga tuig, ginpakita sang mga report nga, sa promedyo, ang tagsa ka manugbantala nagadumala sing halos tatlo ka pagtuon sang Biblia sa puluy-an, apang diutay lamang ang literatura sa Biblia sang mga manugbantala. May nagalakbay nga mga manugtatap nga nagaduaw sa isa ka diutay nga grupo kada adlaw, nagahimos sang pag-alagad sa latagon sa adlaw kag sang mga miting kada gab-i. Daw ano nga kalipay sang mag-untat ang kabudlayan kag 42 ka tonilada sang kinahanglanon gid nga literatura sa Biblia ang nag-abot gikan sa Bagatnan nga Aprika! Sa pagkamatuod, ang gugma sining kauturan ‘magabugana sing labi kag labi pa upod ang sibu nga ihibalo kag bug-os nga paghantop,’ kay ila na karon ‘mapat-od ang kapin ka importante nga mga butang.’ (Filipos 1:9,10) Daw ano ini nga pangpapagsik para sa ila nga may bugana nga bulig sa pagtuon sang Biblia nga himuslan sing bug-os ang aman nga maluluy-on nga ginahatag ni Jehova!—1 Timoteo 4:15,16.

Ang kalipay sining matutom nga mga sumilimba nagapahanumdom sa aton sang ginsiling ni Jesus sa Sermon sa Bukid: “Malipayon ang mga mahunahunaon sang ila espirituwal nga kinahanglanon, kay ila ang ginharian sang mga langit. . . . Malipayon ang mga ginahingabot bangod sa pagkamatarong, kay ila ang ginharian sang mga langit. . . . Magkasadya kag maglumpat sa kalipay, kay ang inyo padya daku sa mga langit.” (Mateo 5:3-12) Daw ano nga ani ang ginatipon sa Angola!

Sa iban nga mga bahin sang kalibutan, ang mga pagdumili sa hilikuton sang mga Saksi ni Jehova ginapahugak man ukon ginadula. Si Jesus nagkomento sang iya adlaw: “Huo, ang alanyon bugana, apang pila lamang ang mga mangangani.” (Mateo 9:37) Daw ano ka matuod ini karon! Kinahanglan pirme ang dugang pa nga mga mangangani. Nalipay kita nga ang aton pagsimba nagalakip sang pagtipon sa alanyon. Wala na sing daku pa nga kalipay sa duta karon sang sa aton mabungahon dedikado nga pag-alagad kay Jehova nga Dios.

Apang, ano ang nagapahulag sa mga sumilimba ni Jehova sa pagpakita sina nga kalipay kag kakugi? Tan-awon naton.