Kahadluki si Jehova kag Himayaa ang Iya Balaan nga Ngalan
“Sin-o bala ang indi mahadlok sa imo, Jehova, kag maghimaya sang imo ngalan, kay ikaw lamang ang matutom?”—BUGNA 15:4.
1, 2. (a) Paano ginbuksan ni Jehova ang langitnon nga mga talambuan sang 1991? (b) Anong bug-os kabuhi nga eksperiensia ang nagpahulag sa isa ka matutom nga misyonero sa paghatag sing laygay nga: “Kahadluki si Jehova”? (Tan-awa man ang 1991 Yearbook, pahina 187-9.)
‘GINBUKSAN [ni Jehova] ang mga talambuan sang langit kag gin-ula ang pagpakamaayo tubtob nga wala na sing masudlan.’ Ining mga pulong sarang maaplikar sing liwat kag liwat sa mga Saksi ni Jehova sining karon nga mga tinion. (Malaquias 3:10) Halimbawa, sa tion sang 1991 nga tuig sang pag-alagad, ang kapagsik sang nagaduaw nga mga Saksi kag sang lokal nga mga kombensionista kit-anon gid sa Cristianong paghiliupod sa pinasahi nga mga kombension nga ginhiwat sa bug-os nga duta—halin sa “Putli nga Hambal” nga mga Kombension sa Buenos Aires sa Bagatnan nga Amerika; kag sa Manila, Taipei, kag Bangkok sa Oriente; tubtob sa “Mahigugmaon sang Kahilwayan” nga mga Kombension sa Budapest, Prague, kag Zagreb (Agosto 16-18, 1991) sa Sidlangan nga Europa.
2 Daw ano nga kalipay sang mga delegado gikan sa tabok sang dagat nga makilala ang madugay na matutom nga mga Saksi sa sadto nga mga duog! Halimbawa, sa Bangkok, si Frank Dewar —sang una amo lamang ang manugbantala sang Ginharian sa Thailand—nagsugid sang iya 58 ka tuig nga pag-alagad subong misyonero. Nagpanghikot sia halin sa mga isla sang Pasipiko tubtob sa Bagatnan-sidlangan nga Asia, kag bisan gani sa China. Nakasumalang sia sing mga katalagman gikan sa naguba nga barko, mabangis nga mga sapat sa kagulangan, tropikal nga mga balatian, kag sa mapintas nga pagginahom sang Hapones nga mga opisyal sang militar sa tion sang inaway. Sang ginpamangkot kon ano ang malaygay niya sa mga kombensionista, ang iya sabat simple lamang: “Kahadluki si Jehova!”
3. Ngaa dapat kita magpakita sing diosnon nga kahadlok?
3 “Kahadluki si Jehova!” Daw ano ka importante para sa aton tanan nga palambuon ining mapuslanon nga kahadlok! “Ang kahadlok kay Jehova amo ang pamuno sang kaalam.” (Salmo 111:10) Ining kahadlok indi ang makapakugmat nga kahadlok kay Jehova. Sa baylo, isa ini ka daku nga pagtahod sa iya makapulunaw nga pagkahalangdon kag diosnon nga mga kinaiya, pasad sa paghantop nga nabaton naton paagi sa pagtuon sang Pulong sang Dios. Sa Bugna 15:3,4 ang ambahanon ni Moises kag sang Kordero nagapahayag: “Dalagku kag kalatingalahan ang imo mga binuhatan, Jehova nga Dios, ang Labing Gamhanan. Matarong kag matuod ang imo mga dalanon, Hari nga dayon. Sin-o bala ang indi mahadlok sa imo, Jehova, kag maghimaya sang imo ngalan, Jehova, kay ikaw lamang ang matutom?” Bilang katutom sa iya mga sumilimba, si Jehova may ‘tulun-an sang handumanan nga ginsulat sa atubangan niya para sa mga nagakahadlok kay Jehova kag para sa mga nagapainuino sang iya ngalan.” Ginapadyaan sila sing kabuhi nga wala sing katapusan.—Malaquias 3:16; Bugna 20:12, 15.
Ang Diosnon nga Kahadlok Magadaug
4. Anong pagluwas sang una ang dapat magpalig-on sa aton nga kahadlukan si Jehova?
4 Sang magmartsa ang Israel paguwa sa Egipto ni Paraon, maathag nga ginpakita ni Moises nga si Jehova lamang ang iya ginakahadlukan. Wala madugay, ang mga Israelinhon nakibon sa ulot sang Dagat nga Mapula kag sang gamhanan nga hangaway sang Egipto. Ano ang ila mahimo? “Si Moises nagsiling sa katawhan: ‘Dili kamo magkahadlok. Pahimunong kamo kag tan-awa ang pagluwas ni Jehova, nga himuon niya karon para sa inyo. Kay ang mga Egiptohanon nga inyo nakita karon nga adlaw, indi na ninyo nga mas-a makita liwat. Si Jehova magapakig-away para sa inyo, kag kamo magapahimunong lamang.’ ” Sing milagruso, gintunga ni Jehova ang mga tubig. Ang mga Israelinhon nagmartsa sa tabok sang letso sang dagat. Nian ang mga tubig nag-uli liwat. Ang hangaway ni Paraon napapas. Ginluwas ni Jehova yadtong mahinadlukon sa Dios nga pungsod, samtang sa amo man nga tion ginhukman niya ang nagapakahuya sa Dios nga Egipto. Sa karon man, ipasundayag niya ang iya katutom paagi sa pagluwas sa iya mahinadlukon sa Dios nga mga Saksi gikan sa kalibutan ni Satanas.—Exodo 14:13, 14; Roma 15:4.
5, 6. Anong mga hitabo sang panahon ni Josue ang nagapakita nga dapat naton kahadlukan si Jehova sa baylo sang tawo?
5 Sa tapos sang Exodo (pagguwa) sa Egipto, nagpadala si Moises sing 12 ka espiya sa Ginsaad nga Duta. Hinadlukan ang napulo sang makita ang katulad higante nga mga pumuluyo kag gintinguhaan nila nga hayluhon ang Israel gikan sa pagsulod sa pungsod. Apang ang duha pa, nga sanday Josue kag Caleb, nagreport: “Tama gid ini kaayo nga duta. Kon si Jehova nahamuot sa aton, pasudlon niya kita sa sining duta kag ihatag ini sa aton, duta nga nagailig sing gatas kag dugos. Lamang dili kamo magribok kay Jehova; kag dili kamo magkahadlok sa katawhan sang duta, kay kalan-on sila sa aton. Ang ila panagang ginkuha gikan sa ila, kag si Jehova upod naton. Dili kamo magkahadlok sa ila.”—Numeros 14:7-9.
6 Apang, ang mga Israelinhon nagpadaug sa kahadlok sa tawo. Subong resulta, wala gid sila makalab-ot sa ginsaad nga duta. Apang si Josue kag si Caleb, upod sa bag-o nga kaliwatan sang mga Israelinhon, nakatigayon sing pribilehiyo nga makasulod sa pinili nga duta kag ginkultibar ang mga ulubasan sini kag ang mga olibo. Sa iya nagapaalam nga pamulongpulong sa nagtipon nga katawhan sang Israel, naghatag si Josue sini nga laygay: “Kahadluki si Jehova kag alagda sia sa kabunayag kag sa kamatuoran.” Nagdugang pa si Josue: “Para sa akon kag sa akon panimalay, magaalagad kami kay Jehova.” (Josue 24:14, 15) Daw ano ka makapalig-on nga mga pulong para sa mga ulo sang pamilya kag sa tanan nga iban pa nga kahadlukan si Jehova samtang nagahanda kita sa pagtabok padulong sa matarong nga bag-ong kalibutan sang Dios!
7. Paano ginpadaku ni David ang pagkaimportante sang kahadlok sa Dios?
7 Ang lanubo nga manugbantay sing karnero nga si David nagpakita man sing huwaran nga kahadlok kay Jehova sang ginhangkat niya si Goliat sa ngalan sang Dios. (1 Samuel 17:45, 47) Sang nagatagumatayon sia, si David nakasiling: “Ang espiritu ni Jehova nagpamulong paagi sa akon, kag ang iya pulong yari sa akon dila. Ang Dios sang Israel nagsiling, ang Igang sang Israel nagpamulong sa akon, ‘Kon ang isa nga nagagahom sa katawhan matarong, nagagahom nga may kahadlok sa Dios, nian subong ini sang kasanag sang kaagahon, kon ang adlaw nagasubang, isa ka kaagahon nga wala sing gal-um.’ ” (2 Samuel 23:2-4) Ining kahadlok sa Dios wala gid sa tunga sang mga manuggahom sining kalibutan, kag daw ano ka makapasubo ang resulta! Daw ano ka tuhay kon si Jesus nga, “Anak ni David,” magagahom sa duta nga may kahadlok kay Jehova!—Mateo 21:9.
Paghikot nga May Kahadlok kay Jehova
8. Ngaa nagbugana ang Juda sa idalom ni Josafat, nga nagapakita sing ano para sa karon?
8 Mga isa ka gatos ka tuig sa tapos napatay si David, si Josafat naghari sa Juda. Ini nga hari nag-alagad man nga may kahadlok kay Jehova. Ginpasag-uli niya ang teokratikong kahimusan sa Juda, nagpahamtang sing mga hukom sa bug-os nga duta, kag ginhatagan sila sini nga mga instruksion: “Wala kamo nagahukom para sa tawo kundi para kay Jehova; kag sia kaupod ninyo sa inyo paghukom. Busa karon, mangin sa inyo ang kahadlok kay Jehova. Mag-andam kag maghimo sini, kay wala sing kalautan kay Jehova nga aton Dios ukon pagpasulabi sang mga tawo ukon pagbaton sing mga hamham. . . . Amo ini ang himuon ninyo sa kahadlok kay Jehova nga may katutom kag bug-os nga tagipusuon.” (2 Cronica 19:6-9) Sa amo, nagbugana ang Juda bangod sa kahadlok kay Jehova, subong nga ang katawhan man sa karon nagabenepisyo paagi sa pag-alagad sang maluluy-on nga mga manugtatap.
9, 10. Paano si Josafat nagdaug tungod sa kahadlok kay Jehova?
9 Apang, may mga kaaway ang Juda. Desidido ini sila nga laglagon ang pungsod sang Dios. Ang tingob nga puwersa militar sang Amon, Moab, kag sang Bukid nga Seir nag-abot sa teritoryo sang Juda kag ginpahog ang Jerusalem. Isa yadto ka gamhanan nga hangaway. Nangamuyo si Josafat kay Jehova “samtang ang bug-os nga Juda nagtindog sa atubangan ni Jehova, upod sa ila mga magamay, sang ila mga asawa kag sang ila mga anak.” Nian, bilang sabat sa sadto nga pangamuyo, ang espiritu ni Jehova nag-abot sa Levinhon nga si Jahaziel, nga nagsiling: “Amo ini ang ginsiling ni Jehova sa inyo, ‘Dili kamo magkahadlok ukon magkahangawa bangod sining daku nga kadam-an; kay ang inaway indi inyo kundi iya sang Dios. Buwas dulhog kamo batok sa ila. . . . Dili kinahanglan nga kamo mag-away sa sining inaway. Pahamtang kamo, pahimunong kamo kag tan-awa ang pagluwas ni Jehova para sa inyo. O Juda kag Jerusalem, dili magkahadlok ukon magkahangawa. Buwas guwa kamo batok sa ila, kay si Jehova magaupod sa inyo.’ ”—2 Cronica 20:5-17.
10 Sang masunod nga aga, ang mga lalaki sang Juda nagmata sing aga pa. Samtang matinumanon nga naglakat sila agod sugataon ang kaaway, si Josafat nagtindog kag nagsiling: “Pamatii ako, O Juda kag kamo nga mga pumuluyo sang Jerusalem! Magtuo kamo kay Jehova nga inyo Dios agod nga maglig-on kamo. Tuuhi ang iya mga manalagna agod nga magmadinalag-on kamo.” Nagamartsa sa unahan sang naarmasan nga mga lalaki, ang mga manug-amba kay Jehova nag-amba sa isa ka koro: “Dayawa si Jehova, kay ang iya mahigugmaon nga kaluoy nagapadayon sing dayon.” Ginpabutyag ni Jehova inang mahigugmaon nga kaluoy paagi sa paggumon sa mga kaaway amo kon ngaa sila ang nagpinatyanay. Sang nagkadto ang mga lalaki sang Juda sa lalantawan sa kamingawan, ang nabilin na lamang amo ang mga bangkay sang mga kaaway.—2 Cronica 20:20-24.
11. Tuhoy sa kahadlok, paano ang mga pungsod nagakatuhay sa katawhan sang Dios?
11 Sang mabatian sang kaingod nga mga pungsod ining milagruso nga pagluwas, “ang kahadlok sa Dios” nag-abot sa ila. Sa pihak nga bahin, ang pungsod nga nagtuman nga may kahadlok kay Jehova may “kapahuwayan [karon] sa palibot.” (2 Cronica 20:29, 30) Sing kaanggid, sa paghukom ni Jehova sa Armagedon, ang mga pungsod magakahadlok sa Dios kag sa iya Manuglaglag nga Anak, nga si Jesucristo, kag indi sila makatindog sa dakung adlaw sang balaan nga kaakig.—Bugna 6:15-17.
12. Paano ang kahadlok kay Jehova ginpadyaan sang una nga panahon?
12 Ang mapuslanon nga kahadlok kay Jehova nagadala sing bugana nga mga padya. Si Noe “nagpakita sing diosnon nga kahadlok kag nagtukod sing arka sa pagluwas sang iya panimalay.” (Hebreo 11:7) Kag tuhoy naman sa mga Cristiano sang unang siglo, ginarekord nga, sa tapos sang panahon sang paghingabot, ang kongregasyon “may kalinong kag naglig-on; kag samtang nagalakat ini nga may kahadlok kay Jehova kag sa paglipay sang balaan nga espiritu nagpadayon ini sa pagdugang”—subong gid sang nagakatabo karon sa Sidlangan nga Europa.—Binuhatan 9:31.
Higugmaa ang Maayo,Dumti ang Malain
13. Paano lamang naton maeksperiensiahan ang pagpakamaayo ni Jehova?
13 Si Jehova maayo gid. Busa, “ang kahadlok kay Jehova nagakahulugan sing pagdumot sa malain.” (Hulubaton 8:13) Nasulat na tuhoy kay Jesus: “Ginhigugma mo ang pagkamatarong, kag gindumtan mo ang pagkamalinapason. Busa ang Dios, ang imo Dios, naghaplas sa imo sing lana sang kalipay.” (Hebreo 1:9) Kon kita, kaangay ni Jesus nagahandum sa pagpakamaayo ni Jehova, dapat naton kangil-aran ang kalautan, ang imoralidad, ang kasingki, kag ang kakagod sang bugalon nga kalibutan ni Satanas. (Ipaanggid ang Hulubaton 6:16-19.) Dapat naton higugmaon ang ginahigugma ni Jehova kag dumtan ang iya ginadumtan. Dapat kita mahadlok sa paghimo sing bisan ano nga magapaakig kay Jehova. “Tungod sa kahadlok kay Jehova ang tawo nagatalikod sa malaut.”—Hulubaton 16:6.
14. Paano si Jesus nagahatag sa aton sing sulundan?
14 Nagbilin sa aton si Jesus sing sulundan nga dapat naton sundon ang iya mga tikang sing suod. “Sang ginpasipalahan sia, wala sia magbalos sa pagpasipala. Sang nag-antos sia, wala sia magpamahog, kundi gintugyan niya ang iya kaugalingon sa nagahukom sing matarong.” (1 Pedro 2:21-23) Tungod sang kahadlok kay Jehova, sarang man naton mabatas ang mga pagpakahuya, ang mga pagyaguta, ang mga paghingabot, nga ginadat-ol sa aton sang kalibutan ni Satanas.
15. Ngaa dapat naton kahadlukan si Jehova sa baylo sang mga makapatay sang lawas?
15 Sa Mateo 10:28, si Jesus nagalaygay sa aton: “Dili kamo mahadlok sa mga nagapatay sang lawas apang indi makapatay sang kalag; kundi hinunuo kahadlukan ninyo ang makalaglag sang kalag kag lawas sa Gehenna.” Bisan pa kon ang isa nga nagakahadlok kay Jehova mapatay sang kaaway, ang sudlot sang kamatayon umalagi lamang. (Oseas 13:14) Sa pagkabanhaw, ang isa nga banhawon makasiling: “Kamatayon, diin bala ang imo pagdaug? Kamatayon, diin bala ang imo sudlot?”—1 Corinto 15:55.
16. Paano si Jesus nagpakita sing kahadlok kay Jehova kag naghimaya sa iya?
16 Si Jesus mismo nagahatag sing dalayawon nga huwaran para sa tanan nga nagahigugma sa pagkamatarong ni Jehova kag nagadumot sa malaut. Ang iya kahadlok kay Jehova ginpabanaag sa iya hingapusan nga ginpamulong sa iya mga disipulo, subong sang makita sa Juan 16:33: “Ini napamulong ko sa inyo agod nga kamo may paghidait sa akon. Sa kalibutan may kapipit-an kamo, apang magpakaisog kamo! nadaug ko ang kalibutan.” Ang rekord ni Juan nagapadayon: “Sang nasiling ni Jesus ining mga pulong, ginbayaw niya ang iya mga mata sa langit, kag nagsiling: ‘Amay, nag-abot na ang oras; himayaa ang imo anak, agod nga himayaon ka sang anak . . . Ginpahayag ko ang imo ngalan sa mga tawo nga ginhatag mo sa akon gikan sa kalibutan.’ ”—Juan 17:1-6.
Kahadluki si Jehova kag Dayawa Sia
17. Sa anong mga paagi sarang naton mailog ang huwaran ni Jesus?
17 Mailog bala naton karon ang maisugon nga huwaran ni Jesus? Sa pagkamatuod mailog naton tungod sang kahadlok kay Jehova! Ginpakilala sa aton ni Jesus ang kilala nga ngalan kag mga kinaiya ni Jehova. Ginakahadlukan si Jehova subong aton Soberanong Ginuo, ginabayaw naton sia labaw sa tanan nga iban nga mga dios, lakip ang wala sing ngalan, mistiko nga Trinidad sang Cristiandad. Nag-alagad si Jesus kay Jehova nga may mapuslanon nga kahadlok, nagdumili nga masiod sang kahadlok sa mamalatyon nga tawo. “Sa mga adlaw sang iya pagkaunod si Cristo nagpangamuyo kag nag-ampo, nga may mabaskog nga pagsinggit kag mga luha, sa Isa nga makaluwas sa iya sa kamatayon kag ginpamatian sia tungod sang iya kahadlok nga diosnon.” Kaangay ni Jesus, kabay nga magkahadlok man kita kay Jehova samtang nagapadayon kita sa pagtuon sing pagkamatinumanon gikan sa mga butang nga aton ginaantos—nga ang tulumuron naton pirme amo ang walay katapusan nga kaluwasan.—Hebreo 5:7-9.
18. Paano kita makahalad sa Dios sing balaan nga pag-alagad nga may diosnon nga kahadlok?
18 Sang ulihi sa sadto nga sulat sa Hebreong mga Cristiano, ginlaygayan ni Pablo ang hinaplas nga mga Cristiano: “Bangod magabaton kita sing ginharian nga indi matay-ug, magpadayon kita sa pag-agom sing dibagay nga kaluoy, nga paagi sa sini mahimo kita makahatag sa Dios sing balaan nga pag-alagad nga kalahamut-an nga may diosnon nga kahadlok kag pagkapunaw.” Sa karon, ang “dakung kadam-an” nagaambit sa sinang balaan nga pag-alagad. Kag ano ang nadalahig sa sini? Sa tapos mapaathag ang dibagay nga kaluoy ni Jehova sa pag-aman sing halad sang Iya Anak, nga si Jesucristo, si Pablo nagsiling: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.” (Hebreo 12:28; 13:12, 15) Bilang apresasyon sa dibagay nga kaluoy ni Jehova, dapat naton handumon nga ihugod ang tagsa ka oras nga posible sa balaan nga pag-alagad sa iya. Subong matutom nga mga kaupod sang nagkalabilin sang hinaplas nga mga Cristiano, ang dakung kadam-an karon nagahimo sang daku nga bahin sina nga pag-alagad. Ginapadungog nila sini ang kaluwasan sa Dios kag kay Cristo, samtang sila malaragwayon nga nagatindog sa atubangan sang trono sang Dios, nga “nagahalad sa iya sing balaan nga pag-alagad sa adlaw kag gab-i.”—Bugna 7:9, 10, 15.
Himayaa si Jehova sing Dayon
19, 20. Anong duha ka sahi sang kahadlok ang mangin dayag sa “adlaw ni Jehova”?
19 Ang mahimayaon nga adlaw sa pagbindikar kay Jehova madasig nga nagahilapit! “‘Yari karon! nagaabot ang adlaw nga nagadabdab subong sang hurno, kag ang tanan nga bugalon kag ang tanan nga nagahimo sing pagkamalaut mangin ginalaban. Kag ang adlaw nga nagaabot magasunog sa ila,’ siling ni Jehova sang kasuldadusan.” Inang malaglagon nga tion amo “ang daku kag makakulugmat nga adlaw ni Jehova.” (Malaquias 4:1, 5) Magatuga ini sing “kahadlok” sa tagipusuon sang mga malaut, kag sila “indi nga mas-a makalikaw.”—Jeremias 8:15; 1 Tesalonica 5:3.
20 Apang, ang katawhan ni Jehova, ginapahulag sang lain nga sahi sang kahadlok. Ang anghel nga gintugyanan sing “walay katapusan nga maayong balita” nagatawag sa ila paagi sa mabaskog nga tingog, nga nagasiling: “Kahadluki ang Dios kag hatagi sia sing himaya, kay nag-abot na ang oras sang iya paghukom.” (Bugna 14:6, 7) Magatindog kita nga may kapunaw sa sina nga paghukom samtang ginasunog sang makapalaso nga kainiton sang Har–Magedon ang kalibutan ni Satanas. Ang mapuslanon nga kahadlok kay Jehova indi mapanas nga masulat sa aton tagipusuon. Kabay nga mahamut-an kita sa amo nga tion nga masapwan naton ang aton kaugalingon sa tunga sang ‘mga ginluwas nga nagtawag sa ngalan ni Jehova’!—Joel 2:31, 32; Roma 10:13.
21. Sa ano magadul-ong ang kahadlok kay Jehova?
21 Matahom nga mga pagpakamaayo ang magasunod, lakip ang “mga tuig sang kabuhi” tubtob sa walay katubtuban! (Hulubaton 9:11; Salmo 37:9-11, 29) Busa, bisan pa ang aton paglaum amo ang pagpanubli sang Ginharian ukon ang pag-alagad sa duog nga sakop sini sa duta, magpadayon kita karon sa paghalad sa Dios sing balaan nga pag-alagad nga may diosnon nga kahadlok kag pagkapunaw. Magpadayon kita sa paghimaya sang iya balaan nga ngalan. Kag ano ang ginpakamaayo nga resulta? Amo ang dayon nga pagpasalamat nga ginsunod naton sing tinagipusuon ang maalamon nga laygay nga pirme kahadlukan si Jehova!
Paano Mo Sabton?
◻ Ano ang kahulugan sang “kahadlok kay Jehova”?
◻ Paano ang kahadlok sa Dios nakahatag sing benepisyo sa iya dumaan nga katawhan?
◻ Anong sulundan sang diosnon nga kahadlok ang ginbilin para sa aton ni Jesus?
◻ Paano naton mahuptan ang integridad tungod sa kahadlok kay Jehova?
[Laragway sa pahina 18]
Sa tulun-an sang Bugna, ang kauturan ni Jesus makita nga nagaamba sing “ambahanon ni Moises,” isa ka ambahanon nga nagadayaw kay Jehova
[Laragway sa pahina 20]
Ang hangaway ni Josafat nagdaug tungod sa kahadlok kay Jehova
[Laragway sa pahina 23]
Ang mga tuig sang kabuhi tubtob sa walay katubtuban mangin amo ang padya para sa mga nagakahadlok kay Jehova