Report sang mga Manugbantala sang Ginharian

Ang mga Saksi ni Jehova Nagabantala sing Di-pormal nga May Maayong mga Resulta

MADAMO nga tawo ang una nga ginpakilala sa kamatuoran sang Biblia sang ang isa sang mga Saksi ni Jehova nagbantala sa ila sing di-pormal. Sa sini ginasunod sang mga Saksi ang huwaran ni Jesucristo, nga nagbantala sing di-pormal sa isa ka Samariahanon nga babayi sa isa ka bubon sang magkari sia agod magsag-ub sing tubig. (Juan, kapitulo 4) Sa Sidlangan nga Aprika, ang isa sang mga Saksi ni Jehova nagbantala sing di-pormal sa isa ka Katoliko nga madre. Ang sanga talatapan sang Watch Tower Society nagsaysay sang resulta:

◻ Sang temprano sang isa ka aga samtang nagapadulong sia sa banwa, nakilala sang Saksi ang isa ka Katoliko nga madre. Ginhimuslan niya ang kahigayunan nga pamangkuton ang madre: “Sa diin ka makadto sa sini nga oras sang adlaw?” Ang sabat amo: “Mangamuyo ako sa akon Dios.” Ginpamangkot niya dayon ang madre: “Kilala mo bala ang ngalan sang imo Dios?” “Indi bala Dios ang ngalan niya?” sabat sang madre. Nagtanyag ang Saksi nga duawon sia sa iya balay sadto nga hapon agod hambalan ang ngalan sang Dios. Sa tapos sang paghambalanay nagkadto ang madre sa simbahan nila kag ginpamangkot ang isa sang mga pari kon nahibaluan niya kon ano ang kahulugan sang “Jehova.” Ang sabat amo, “Ngalan ini sang Dios.” Nakibot gid ang madre sa pagkabati nga nahibaluan ini sang pari apang wala gid niya gintudlo ini sa iya.

Ginduaw sang Saksi ang babayi sa siam ka paagisod nga adlaw kag gintudluan sia sing kamatuoran nahanungod sa Trinidad, kalag, kalayuhon nga impierno, kag sang paglaum sang mga patay. Ginpamatian sang babayi ang tanan kag dayon ginpangabay niya ang Saksi nga hatagan sia sing pila ka tion sa pagpamalandong sa sining tanan nga bag-ong mga panudlo. Pagligad sang duha ka semana ginkontak niya liwat ang Saksi kag nangabay nga maghambalanay sila sing dugang pa. Sini nga tion nagdesisyon na ang madre nga biyaan ang simbahan kag ginguba na niya ang iya mga imahen, mga rosaryo, kag ang krus. Gintinguhaan sang pari nga hayluhon sia sa pagbalik, apang determinado sia nga padayunon ang kamatuoran. Sang ulihi ginbawtismuhan sia kag nag-alagad subong regular nga auxiliary payunir sa madamo nga bulan walay sapayan sang iya maluya nga lawas kag katigulangon.

Sanglit daku ang iya balay, gintanyag niya sa kongregasyon nga gamiton ini subong Kingdom Hall. Gin-islan sang mga utod ang daan nga atop, ginguba ang mga dingding sa sulod, kag ginhimo ang isa ka daku nga bahin sang balay nga mangin isa ka matahom nga tilipunan. Ining isa ka Katoliko nga madre anay nagapuyo sa isa ka hulot sa likod sang hall. Malipayon gid sia nga nakahimo sia sini nga amot sa pagsimba kay Jehova.

◻ Ang isa pa ka eksperiensia nga nagapakita sang kaalam sang di-pormal nga pagpanaksi naghalin sa Kampala, Uganda. Sang nagapakadto sa isa ka opisina sang gobierno, ang isa ka Saksi nga misyonero nakighambal sing di-pormal sa mga kaupod niya sa elebetor. Ang isa ka tawo, si G.L—, nagpabutyag sing handum nga batunon ang literatura nga ginatanyag apang indi niya mabaton sadto nga tinion. Gani ginhatag niya sa misyonero ang iya ngalan kag direksion sang iya opisina. Sang ulihi nagkadto didto ang misyonero kag ginpangita si G. L—. Gintawag sia apang sa kakibot sang misyonero, lain nga tawo ang nagguwa. May duha gali ka tao nga pareho ang ngalan nga nagatrabaho sa sadto nga opisina. Isa ka malip-ot nga panaksi ang ginhatag sa ikaduha nga G. L—, kag nagpakita sia sing tumalagsahon nga interes. Samtang ang una nga G. L—, nadulaan sing interes, ang pagtuon sa Biblia nasugdan sa ikaduha nga G. L—, Sia karon isa na ka bawtismado nga saksi, kag ang iya asawa kag anak nga lalaki nagahimo sing maayong pag-uswag padulong sa bawtismo.

Si Jesucristo amo ang Maayong Manugbantay kag kilala niya ang mga katulad-karnero nga ang ila tagipusuon may huyog sa pagkamatarong. Ining mga eksperiensia nagailustrar nga ginatuytuyan niya ang iya mga sumulunod sa sini nga mga tawo. Ang di-pormal nga pagbantala mahimo mangin mabungahon!—Juan 10:14.