Mga Pamangkot Gikan sa mga Bumalasa

Ngaa ginpadala ni Noe halin sa arka ang uwak kag nian ang pating?

Ang Biblia wala naghatag sing detalyado nga paathag. Apang, may rason sa ginhimo ni Noe.

Sa 40 ka adlaw kag 40 ka gab-i, ang duta nakaagom sing mabunok nga ulan, nagtuga sing anaw nga nagtabon bisan sang putukputukan sang mga bukid sa lima ka bulan. Nian “ang arka nagtungtung sa kabukiran sang Ararat.” (Genesis 7:6–8:4) Mga binulan sang ulihi, pagkatapos “nakita ang mga putukputukan sang mga bukid,” “ginpadala [ni Noe] ang uwak, kag nagpakadto-pakari ini.”—Genesis 8:5,7.

Ngaa uwak? Ini nga pispis maayo maglupad, kag ginakaon sini ang bisan ano lang, lakip ang patay nga lawas. Mahimo nga ginpadala ni Noe ang uwak agod pat-uron kon bala magabalik ini ukon magapalayo sa arka, ayhan nagakaon sang mga bangkay paghubas sang tubig kag pag-ulhot sang duta. Apang, ang uwak wala nagpalayo. Ang Biblia nagasiling nga nagbalik ini, apang wala ini nagasiling nga nagbalik ini kay Noe. Ayhan nagbalik ini agod maghulon sa arka samtang nagalupadlupad sa pagpangita sing pagkaon nga nagalutaw sa tubig.

Sang ulihi, ginpakamaayo ni Noe nga ipadala ang pating. Aton mabasa: “Ang pating wala sing nakita nga mahapunan sang dapadapa sang iya tiil, kag nagbalik sia sa iya sa arka.” (Genesis 8:9) Nagapakita ini nga sa iya kaugalingon nga paagi, ang pating nakabulig sa paghibalo kon bala naghubas ang tubig. Ang pating nagpakita sing nagakaigo nga pagsalig sa mga tawo. Makapaabot si Noe nga ang pating magabalik, indi lamang agod maghulon sa arka, kundi kay Noe mismo.

Ginasiling nga ang mga pating nagahulon lamang sa mamala nga duta, kilala nga nagalupad sing manubo sa mga nalupyakan, kag nagakaon sing mga hilamon. (Ezequiel 7:16) Ang Grzimek’s Animal Life Encyclopedia nagasiling: “Kaangay sang tanan nga mga salampati kag mga pating nga nagakaon sing mga binhi kag mga liso, mabudlay ang pagkaon kon ang yelo [ukon tubig] nagatabon sing sobra sa isa ka adlaw, ang kalabanan sang ila kalan-on yara sa kadaygan sang duta.” Gani ang pating mahimo nga nagdala pabalik kay Noe sing pila ka pamatuod nga may nakita ini nga mamala nga duta ukon nagausbong nga tanum. Sa una nga tion nga pagpadala ni Noe sa sini, ang pating nagbalik lamang sa iya sa arka. Sa ikaduha nga tion, ang pating nagbalik nga may lab-as nga dahon sang olibo. Sa ikatlo nga tion, wala ini nagbalik, nagpamatuod nga posible kag wala na sing peligro para kay Noe ang maghalin sa arka.—Genesis 8:8-12.

Bisan pa ginakabig sang iban ini nga natabuan lang nga mga detalye, ang katunayan nga ang kasaysayan tuman ka espisipiko, nga wala nagtinguha sa paghatag sang bug-os nga paathag, nagapakita sang pagkamasaligan sang Biblia. Nagahatag ini sa aton sing dugang nga rason sa pagbaton sa kasaysayan nga, indi gin-imbento ukon ginhimuhimo lamang, kundi eksakto gid. Ang indi kompleto nga detalye kag paathag nagapakita man kon anong makawiwili nga mga butang ang mahimo mapaabot sang matutom nga mga Cristiano nga ipamangkot kay Noe kon banhawon sia kag magpaathag sang mga detalye sang ginhimo niya.—Hebreo 11:7, 39.