Sin-o ang Makapalagyo sa “Tion sang Kasisit-an”?

“Ang bisan sin-o nga magatawag sa ngalan ni Jehova maluwas.”—JOEL 2:32.

1. Suno kay Daniel kag Malaquias, ano ang nagapakilala sa sadtong nagalinya sa kaluwasan sa pag-abot sang “tion sang kasisit-an”?

NAGATULOK sa aton adlaw, si manalagna Daniel nagsulat: “Kag may tion sang kagamo, subong sang wala pa mahanabo kutob sang may pungsod tubtob sa amo nga tion. Kag sa sadto nga tion luwason ang imo katawhan, ang tagsatagsa nga nasulat sa imo tulun-an.” (Daniel 12:1) Makapaumpaw nga mga pulong sa pagkamatuod! Dumdumon ni Jehova ang iya nahamut-an nga katawhan, subong ginasiling man sang Malaquias 3:16: “Nian ang mga nagakahadlok kay Jehova nagsinilingay, kag si Jehova nagdungog kag nagpamati. Kag ang tulun-an nga handumanan ginsulat sa atubangan niya tungod sa mga nagakahadlok kay Jehova kag nagpainuino sa iya ngalan.”

2. Nagaresulta sa ano ang pagpainuino sa ngalan ni Jehova?

² Ang pagpainuino sa ngalan ni Jehova nagadul-ong sa sibu nga ihibalo tuhoy sa iya, sa iya Cristo, kag sa tanan dalagku niya nga katuyuan sa Ginharian. Sa amo, matun-an sang iya katawhan nga tahuron sia, nga magsulod sa isa ka suod nadedikar nga kaangtanan sa iya, kag higugmaon sia sa ‘bug-os nila nga tagipusuon kag sa bug-os nila nga paghangop kag bug-os nila nga kusog.’ (Marcos 12:33; Bugna 4:11) Agod nga matigayon sang mga mapainubuson sang duta ang kabuhi nga walay katapusan, ginhatag ni Jehova ang maalwan nga probisyon paagi sa halad ni Jesucristo. Sa amo, mapalanog nila sini sing may pagsalig ang mga pulong sang langitnon nga kasuldadusan nga nagdayaw sa Dios sa tion sang pagkabun-ag ni Jesus, nga nagasiling: “Himaya sa Dios sa kahitaasan, kag paghidait sa duta sa tunga sang mga tawo nga iya nahamut-an.”—Lucas 2:14.

3. Antes mag-abot ang paghidait sa sining duta, anong buhat ni Jehova ang mahanabo?

³ Ina nga paghidait malapit na sang sa ginahunahuna sang kalabanan nga tawo. Apang dapat nga magaabot anay ang paghukom ni Jehova sa malaut nga kalibutan. Ang iya manalagna nga si Sofonias nagsiling: “Malapit na ang dakung adlaw ni Jehova. Malapit na ini kag nagadalidali sing tama.” Ano nga sahi sang adlaw ina? Ang tagna nagapadayon: “Ang tingog sang adlaw ni Jehova mapait. Ang gamhanan nga lalaki nagasinggit didto. Yadtong adlaw amo ang adlaw sang kasingkal, adlaw sang kagamo kag kalisod, adlaw sang kalaglagan kag kamingaw, adlaw sang kadudulman kag kaguom, adlaw sang mga gal-um kag pitipit nga kadudulman, adlaw sang budyong kag paandam batok sa mga siudad nga napamakuran kag batok sa mataas nga mga torre. Dalhon ko ang kalisod sa mga tawo, agod magalakat sila kaangay sang mga tawong bulag; bangod nakasala sila batok kay Jehova.”—Sofonias 1:14-17; tan-awa man ang Habacuc 2:3; 3:1-6, 16-19.

4. Sin-o karon ang nagasabat sa pangagda nga magkilala kag mag-alagad sa Dios?

⁴ Sing makalilipay, minilyon sa karon ang nagasabat sa pangagda nga kilalahon kag alagaron ang Dios. Sa hinaplas nga mga Cristiano, nga ginpasulod sa bag-ong katipan, gintagna ang subong sini: “‘Makakilala sila tanan sa akon, kutob sa labing magamay sa ila tubtob sa labing daku,’ nagasiling si Jehova.” (Jeremias 31:34) Amo ini sila ang nagpanguna sa modernong adlaw nga hilikuton sang pagpanaksi. Kag karon samtang nagadugang ang kadamuon sang mga hinaplas nga nagkalabilin nga nakatapos sang ila dutan-on nga hilikuton, ang “dakung kadam-an” sang “iban nga karnero” nag-abot agod ‘maghatag sing balaan nga pag-alagad sa Dios sa adlaw kag gab-i sa iya tulad-templo nga kahimusan. (Bugna 7:9, 15; Juan 10:16) Isa ka bala nga nakatigayon sining walay tupong nga pribilehiyo?

Kon Paano Magasulod ang “Bilidhon nga mga Butang”

5, 6. Antes uyugon sa kalaglagan ang tanan nga pungsod, anong nagaluwas nga hilikuton ang mahanabo?

⁵ Maliton kita karon sa Hageo 2:7, sa diin si Jehova nagtagna tuhoy sa iya espirituwal nga balay sang pagsimba. Sia nagsiling: “Kag uyugon ko ang tanan nga pungsod, agod ang bilidhon nga mga butang sang tanan nga pungsod magasulod; kag pun-on ko ining balay sang himaya.” Ginapakita sang mga tagna sang Biblia nga ang ‘pag-uyog sa mga pungsod’ ginapatuhoy sa paghukom ni Jehova sa mga pungsod. (Nahum 1:5, 6; Bugna 6:12-17) Busa, ang talipuspusan sang himuon ni Jehova nga gintagna sa Hageo 2:7 amo ang pag-uyog sa mga pungsod sa ila kalaglagan—sa ila kahapayan. Apang ano tuhoy sa “bilidhon nga mga butang sang tanan nga pungsod”? Hulaton bala nila inang hingapusan nga malaglagon nga pag-uyog nga amo ang magapasulod sa ila? Indi.

⁶ Ang Joel 2:32 nagasiling nga “ang bisan sin-o nga magtawag sa ngalan ni Jehova maluwas; kay sa Bukid nga Sion kag sa Jerusalem may yara nga makalikaw, suno sa ginsiling ni Jehova, kag sa tunga sang mga nabilin, ang mga ginatawag ni Jehova.” Ginapaguwa sila ni Jehova, kag nagatawag sila sa iya ngalan upod ang pagtuo sa halad ni Jesus antes ang talipuspusan nga pag-uyog sang dakung kasisit-an. (Ipaanggid ang Juan 6:44; Binuhatan 2:38,39.) Sing makalilipay, ang hamili nga dakung kadam-an, nga karon nagadamo sing sobra sa apat ka milyon, ‘nagsulod’ sa balay sang pagsimba ni Jehova sa pagpaabot sang iya ‘pag-uyog sa tanan nga pungsod’ sa Armagedon.—Bugna 7:9, 10, 14.

7. Ano ang nalakip sa ‘pagtawag sa ngalan ni Jehova’?

⁷ Paano makatawag sa ngalan ni Jehova ining mga makalampuwas? Ginapakita sa aton sang Santiago 4:8 nga nagasiling: “Magpalapit sa Dios kag sia magapalapit sa inyo. Tinlui ang inyo mga kamot, kamo nga makasasala, kag putlia ang inyo tagipusuon, kamo nga duha sing hunahuna.” Tuhoy sa mga hinaplas nga nagkalabilin nga nagpanguna sa dalanon, yadtong nagalaum nga mangin kaupod sang dakung kadam-an nga makalampuwas sa Armagedon dapat nga maghikot sing positibo. Kon nagalaum ka nga makalampuwas, dapat nga mag-inum ka sing nagakaigo gikan sa nagaputli nga Pulong ni Jehova kag iaplikar ang iya matarong nga mga talaksan sa imo kabuhi. Kinahanglan nga disidido ka sa paghalad sang imo kabuhi kay Jehova, nagasimbulo sini paagi sa pagpabawtismo sa tubig. Ang imo pagtawag kay Jehova sa pagtuo nagalakip man sang pagpanaksi para sa iya. Gani, sa Roma kapitulo 10, bersikulo 9 kag 10, si Pablo nagsulat: “Bangod nga kon ‘ituad mo sang imo baba,’ nga si Jesus Ginuo, kag magtuo sa imo tagipusuon nga ang Dios nagbanhaw sa iya, maluwas ka. Kay sa tagipusuon ang tawo nagatuo nga sa pagkamatarong, kag sa baba ang pagtuad ginahimo nga sa kaluwasan.” Nian, sa bersikulo 13, ginkutlo sang apostol ang tagna ni Joel, nga nagapadaku nga ang “bisan sin-o nga magtawag sa ngalan ni Jehova maluwas.”

‘Pangitaa, Pangitaa, Pangitaa’

8. (a) Suno kay manalagna Sofonias, ano ang ginapangayo ni Jehova para sa kaluwasan? (b) Anong paandam ang ginapahibalo sa aton sang tinaga nga “ayhan” sa Sofonias 2:3?

⁸ Sa pagliton sa libro ni Sofonias sa Biblia, kapitulo 2, bersikulo 2 kag 3, mabasa naton kon ano ang ginapangayo ni Jehova para sa kaluwasan: “Sa wala pa mag-abot sa inyo ang mapintas nga kaakig ni Jehova, sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mahagop sang duta, nga nagabantay sang Iya hudisyal nga desisyon. Pangitaa ang pagkamatarong, pangitaa ang pagkamahagop. Ayhan malipdan kamo sa adlaw sang kaakig ni Jehova.” Talupangda ang tinaga nga “ayhan.” Indi ini isa ka kaso sang kis-a maluwas, pirme luwas. Ang aton kaluwasan sa sina nga adlaw nasandig sa aton padayon nga paghimo sinang tatlo ka butang. Dapat naton pangitaon si Jehova, pangitaon ang pagkamatarong, kag pangitaon ang pagkamahagop.

9. Paano padyaan yadtong nagapangita sang pagkamahagop?

⁹ Makadalayaw, sa pagkamatuod, ang padya sa pagpangita sang pagkamahagop! Sa Salmo 37, bersikulo 9 tubtob 11, aton mabasa: “Apang ang mga nagahulat kay Jehova magapanubli sang duta. Kay sa diutay pa nga tion, kag ang mga malauton wala na . . . Apang ang mga mahagop magapanubli sang duta, kag magakalipay sila sa kabuganaan sang paghidait.” Kag ano tuhoy sa pagpangita sang pagkamatarong? Ang bersikulo 29 nagasiling: “Ang mga matarong magapanubli sang duta, kag magapuyo diri sa walay katubtuban.” Kag tuhoy sa pagpangita kay Jehova, ang bersikulo 39 kag 40 nagasugid sa aton: “Ang kaluwasan sang matarong nagagikan kay Jehova; sia pamakod nila sa tion sang kalisdanan. Si Jehova magatabang sa ila kag magasagop sa ila. Ginasagop niya sila sa mga malauton kag ginaluwas sila, bangod nga nagdangop sila sa iya.”

10. Sin-o ang talalupangdon sa ila pagbalibad sa pagpangita kay Jehova kag sa pagkamahagop?

¹⁰ Ang mga sekta sang Cristiandad napaslawan sa pagpangita kay Jehova. Ginasikway pa gani sang mga klero sini ang iya hamili nga ngalan, makahas nga nagdula sini sa ila mga badbad sang Biblia. Ginpasulabi nila nga simbahon ang wala sing ngalan nga Ginuo ukon Dios kag nagsimba sa pagano nga Trinidad. Dugang pa, ang Cristiandad wala nagpangita sa pagkamatarong. Madamo sang iya mga sumulunod ang nagsunod ukon nagsakdag sang patuyang nga estilo sang kabuhi. Sa baylo nga pangitaon ang pagkamahagop kaangay ni Jesus, ginhimo nila ang pakitakita, halimbawa sa telebisyon, sang maluho kag sa masami imoral nga pagkabuhi. Ginpamanggad sang mga klerigo ang ila kaugalingon paagi sa ila mga panong. Suno sa mga pulong sang Santiago 5:5, “nagpangabuhi sila sa duta sa pagpatuyang kag kasadya.” Samtang nagahilapit ang adlaw ni Jehova, pat-od nga masapwan nila ang inspirado nga mga pulong nga naaplikar sa ila: “Ang manggad wala sing pulos sa adlaw sang kasingkal.”—Hulubaton 11:4.

11. Sin-o ang tawo sang pagkamalinapason, kag paano sia nagtumpok sing daku nga kasal-anan sa dugo?

¹¹ Sang unang siglo C.E., subong sang ginsiling ni apostol Pablo sa iya ikaduha nga sulat sa mga taga-Tesalonica, nakunyag ang pila ka mga Cristiano, nagahunahuna nga ang adlaw ni Jehova magaabot sadto sa ila. Apang nagpaandam si Pablo nga magaabot anay ang dakung apostasya, kag “ang tawo sang pagkamalinapason” dapat anay nga ipadayag. (2 Tesalonica 2:1-3) Karon, sa sining ika-20 nga siglo, makita naton ang daku nga kasangkaron sang amo nga apostasya kag kon daw ano ka malinapason ang mga klero sang Cristiandad sa panulok sang Dios. Sa sulod sining katapusan nga mga adlaw sugod sang 1914, ang mga klero nagtumpok sing daku nga kasal-anan sa dugo paagi sa ‘pagsakdag sa inaway.’ (Joel 3:10) Padayon man sila nga nagtudlo sang butig nga mga panudlo, subong sang ginsubli nga pagkadimamalatyon sang tawhanon nga kalag, purgatoryo, pagpaantos sa impierno, pagbunyag sa mga lapsag, ang Trinidad, kag kaangay nga mga butang. Diin sila magatindog kon ipadapat ni Jehova ang iya hudisyal nga desisyon? Ang Hulubaton 19:5 nagasiling: “Ang nagamitlang sing kabutigan indi makapalagyo.”

12. (a) Ano ang tawhanon nga “mga langit” kag “duta” nga laglagon sa dili madugay? (b) Ano ang aton natun-an gikan sa nagapakari nga kalaglagan sining malauton nga kalibutan?

¹² Sa 2 Pedro 3:10, aton mabasa: “Ang adlaw ni Jehova magaabot subong sang makawat kag nian ang mga langit magataliwan sa dakung kagahod, kag ang mga kasangkapan matunaw sa kalayo, kag masunog ang duta kag ang mga binuhatan nga yari sa sini.” Ang dunot nga mga kagamhanan nga napasilungan kaangay sang mga langit sa ibabaw sang katawhan, upod ang tanan nga kasangkapan nga nagahuman karon sang manubo sang moral nga katilingban sang tawo, pagapapason gikan sa duta nga iya sang Dios. Ang mga manughimo kag manugpatikang sang mga armas sang kalaglagan, ang mga manugtonto, ang salimpapaw nga mga relihionista kag ang ila klero, ang mga sumalakdag sang kahigkuan, kasingki, kag krimen,—ining tanan madula. Tunawon sila sang kaakig ni Jehova. Apang sa bersikulo 11 kag 12, ginadugang ni Pedro ining paandam sa mga Cristiano: “Sanglit ini tanan nga butang tunawon sa among bagay, ano bala nga sahi sang tawo dapat mangin amo kamo sa balaan nga paggawi kag mga buhat sang diosnon nga debosyon, nga nagahulat kag nagapadali sang pag-abot sang adlaw ni Jehova.”

Nagasugod sa Pagpanghikot si Miguel!

13, 14. Sin-o ang dakung Manugbindikar sang paggahom ni Jehova, kag paano sia nangin aktibo kutob sang 1914?

¹³ Paano makapalagyo ang isa sa “tion sang kasisit-an” ni Jehova? Ang Ahente sang Dios sa pag-aman sang kaluwasan amo si Miguel arkanghel, nga ang iya ngalan nagakahulugan “Sin-o ang Kaangay sa Dios?” Sing nagakaigo, nian, sia ang Isa nga nagabindikar sang pagkasoberano ni Jehova, nga nagasakdag kay Jehova subong amo lamang ang matuod nga Dios kag ang matarong nga Soberanong Ginuo sang bug-os nga uniberso.

¹⁴ Talalupangdon gid ang mga hitabo nga ginalaragway sang Bugna kapitulo 12, bersikulo 7 tubtob 17, tuhoy sa “adlaw sang Ginuo” sugod sang 1914! (Bugna 1:10) Ginhulog ni Miguel arkanghel ang rebelde nga si Satanas sa duta gikan sa langit. Sang ulihi, subong ginlaragway sa Bugna kapitulo 19, bersikulo 11 tubtob 16, ang isa nga gintawag “Matutom kag Matuod” ‘nagalinas sa linasan sang kaakig sang Dios nga Labing Gamhanan.’ Ining gamhanan langitnon nga hangaway ginahingalanan nga “Hari sang mga hari kag Ginuo sang mga ginuo.” Bilang katapusan, ang Bugna kapitulo 20, bersikulo 1 kag 2, nagasugid sang isa ka dakung anghel nga nagtagbong kay Satanas sa kadadalman kag nagbilanggo sa iya didto sa isa ka libo ka tuig. Sing maathag, ginatudlo sining tanan nga kasulatan ang isa nga Manugbindikar sang pagkasoberano ni Jehova, si Ginuong Jesucristo, nga amo ang ginpalingkod ni Jehova sa iya mahimayaon langitnon nga trono sang 1914.

15. Sa anong pinasahi nga paagi “magatindog” si Miguel sa dili madugay?

¹⁵ “Subong sang ginsiling sa Daniel 12:1, si Miguel “nagatindog,” para sa katawhan ni Jehova sugod sang ginpalingkod sia nga Hari sang 1914. Apang sa dili madugay si Miguel “magatindog” sa isa ka pinasahi nga kahulugan​—⁠subong Ahente ni Jehova sa pagdula sang tanan nga kalautan sa duta kag subong ang Manluluwas sang bug-os globo nga katilingban sang katawhan sang Dios. Kon daw mangin ano kadaku inang “adlaw sang kasisit-an” ginapakita sa mga pulong ni Jesus sa Mateo 24:21, 22: “Kay nian magaabot ang dakung kangitngitan nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo. Kag kon wala mapalip-ot yadtong mga adlaw, wala kuntani sing tawo nga maluwas; apang bangod sang mga pinili palip-uton yadtong mga adlaw.”

16. Ano nga unod ang maluwas sa tion sang dakung kasisit-an?

¹⁶ Malipayon gid kita nga may pila ka unod nga maluwas sa sinang tion! Indi, indi kaangay sang rebelyuso nga mga Judiyo nga nakibon sa Jerusalem sang 70 C.E., nga ang iban sa ila gindala nga mga bihag sa Roma. Sa baylo, yadtong makapalagyo sa “tion sang katapusan” mangin kaangay sang Cristianong kongregasyon nga nakaguwa na sa Jerusalem sang magsugod ang hingapusan nga paglikop. Sila ang mangin katawhan sang Dios, ang minilyon sang dakung kadam-an upod ang iban sa mga hinaplas nga mahimo nabilin pa sa duta. (Daniel 12:4) Ang dakung kadam-an magaguwa gikan sa “dakung kasisit-an.” Ngaa? Bangod “ginlabhan nila ang ila bayo kag ginpaputi ini sa dugo sang kordero.” Nagtuo sila sa nagagawad nga gahom sang ginpatulo nga dugo ni Jesus kag nagpasundayag sinang pagtuo paagi sa matutom nga pag-alagad sa Dios. Bisan sa karon, si Jehova, “ang Isa nga nagalingkod sa trono,” naghumlad sang iya nagaamlig nga kayangkayang sa ila, samtang ang Kordero, si Cristo Jesus, nagatatap kag nagatuytoy sa ila sa mga tuburan sang mga tubig sang kabuhi.—Bugna 7:14, 15.

17. Paano pinasahi nga ginapalig-on ang dakung kadam-an nga maghulag agod malipdan sa tion sang nagapakari nga adlaw sang kasisit-an?

¹⁷ Sa pagpangita kay Jehova, sa pagkamatarong, kag pagkamahagop, indi gid dapat pagtugutan sang minilyon sang dakung kadam-an nga magbugnaw ang ila una nga gugma sa kamatuoran! Kon isa ikaw sa sining tulad-karnero nga mga tawo, ano ang dapat mo himuon? Subong ginasiling sa Colosas kapitulo 3, bersikulo 5 tubtob 14, dapat nga “ubahon mo sing bug-os ang daan nga personalidad kag ang iya mga buhat.” Sa pagpangita sing diosnon nga bulig, tinguhai nga ‘panaptan ang imo kaugalingon sing bag-o nga personalidad, pasad sa sibu nga ihibalo.’ Sa pagkamahagop, magtukod kag maghupot sing kakugi sa pagdayaw kay Jehova kag sa pagpahibalo sang iya dakung mga katuyuan sa iban. Sa amo, ayhan malipdan ka sa “tion sang kasisit-an,” ang adlaw sang “masingkal nga kaakig ni Jehova.”

18, 19. Sa anong paagi ang pagbatas importante para sa kaluwasan?

¹⁸ Ina nga adlaw malapit na! Nagadalidali ini pakadto sa aton. Ang pagtipon sang mga indibiduwal sang dakung kadam-an nagapadayon tubtob karon sa sulod sang 57 ka tuig. Ang pila sa ila patay na kag nagahulat sang ila pagkabanhaw. Apang ginapasalig kita sang tagna sa Bugna nga subong isa ka grupo ang dakung kadam-an magaguwa gikan sa dakung kapipit-an subong panugod sang katilingban sang “bag-ong duta.” (Bugna 21:1) Mangin didto ka bala? Posible ina, kay si Jesus nagsiling sa Mateo 24:13: “Ang nagapadayon tubtob sa katapusan maluwas.”

¹⁹ Ang mga kabudlayan nga ginaantos sang katawhan ni Jehova sa sining daan nga sistema magadugang. Kag kon ang makapasubo nga dakung kapipit-an magaabot, mahimo magaantos ka sing mga kabudlayan. Apang magpabilin nga malapit kay Jehova kag sa iya organisasyon. Magpabilin nga nagamata! “‘Busa hulata ninyo ako,’ nagasiling si Jehova, ‘tubtob sa adlaw nga magtindog ako sa inagaw, kay ang akon hudisyal nga desisyon amo ang pagtipon sang mga pungsod, agod nga matingob ko ang mga ginharian, sa pag-ula sa ila sang akon kaalipungot, ang bug-os kong mapintas nga kaakig; kay ang bug-os nga duta lamunon sang kalayo sang akon kaimon.’”—Sofonias 3:8.

20. Samtang nagahilapit ang “tion sang kasisit-an,” ano ang dapat naton nga himuon?

²⁰ Para sa aton proteksion kag kalig-unan, maalwan nga nag-aman si Jehova sa iya katawhan sing isa ka “putli nga hambal,” nga nagalakip sang daku nga mensahe sang iya nagapakari nga Ginharian, “agod nga makatawag sila tanan sa ngalan ni Jehova, agod nga makaalagad sila sa iya nga magkatuwang.” (Sofonias 3:9) Samtang ang nagahingapos nga “tion sang kasisit-an” madasig nga nagahilapit, kabay nga mag-alagad kita sing may kakugi, nagabulig sa iban nga mga mahagop nga ‘magtawag sa ngalan ni Jehova’ para sa kaluwasan.

Madumduman Mo Bala?

◻ Anong buhat ni Jehova ang magauna sa pagdala sang paghidait sa duta?

◻ Suno kay Joel, ano ang himuon sang isa agod maluwas?

◻ Suno kay Sofonias, paano ang mga mahagop mahimo nga makasapo sing proteksion gikan sa masingkal nga kaakig ni Jehova?

◻ Sin-o ang “tawo sang pagkamalinapason,” kag paano sia nagtumpok sing kasal-anan sa dugo?

◻ Daw ano ka importante ang pagbatas kon tuhoy sa kaluwasan?