Pablo Kontra Plato Tuhoy sa Pagkabanhaw

SI Apostol Pablo nagsulat tuhoy sa pagkabanhaw sa 1 Corinto 15:35-58 kag 2 Corinto 5:1-10. Gani, ginsunod bala niya ang dimamalatyon nga kalag nga mga panghunahuna ni Plato kag sang Griegong mga pilosopo, ukon nagahisanto bala sia sa panudlo ni Jesus kag sang iban nga Kasulatan?

Ang bukleta nga Immortality of the Soul or Resurrection of the Individual: St. Paul’s View with Special Reference to Plato, nga ginsulat sang 1974 kag gin-aprobahan sang arsobispo sang Greek Orthodox Church sang Aminhan kag Bagatnan nga Amerika, nagahatag sing maathag nga sabat. Sa tapos hambalan ang kinaugali sang pagkabanhaw sa ginsambit sa ibabaw nga mga kasulatan kag ang Hellenistiko nga mga impluwensia sang panahon, ang awtor nakahimo sing masunod nga konklusion:

“Si Plato nagatudlo nga ang kalag nagapadayon sa walay katapusan kag dayon nga pagkabuhi, nga nahamulag sa lawas. Ang kalag para kay Plato duna kag natural nga dimamalatyon . . . Si San Pablo wala nagatudlo sina ukon nagaangkon sing amo sina . . .

“Si Apostol Pablo wala mabalaka sa pagkadimamalatyon sang psyche ukon espiritu subong nahamulag kag tuhay nga mga bahin kundi sa pagbanhaw sa bug-os nga kalag-espiritu sang lawas sang tawo subong resulta sang pagbanhaw kay Cristo. Ang ideya ni Pablo tuhoy sa ginbanhaw nga lawas wala sing labot sa pagbanhaw sa mga patay gikan sa lulubngan.

“Ang iya ideya tuhoy sa ginbanhaw nga lawas mahimo mapabutyag sing maayo subong pagbaylo, pagtuga liwat, kag pag-uli liwat, paagi sa gahom sang Dios, sa kabug-usan sang bug-os nga tawo, sina man nga tawo, sa personalidad, sa siko-somatiko nga organismo, sa matuod nga mga kinaiya sa hunahuna kag pisikal sang isa. Ang aton palaabuton nga pagkabanhaw mahanabo indi subong kinaugali naton nga pagkabutang, kundi subong dulot sang Dios.”

Huo, ang pagkadimamalatyon indi isa ka duna nga pagkabutang sang tawo. Sa baylo, isa ini ka bilidhon kag mainawaon nga dulot halin kay Jehova paagi sa aton Ginuong Jesucristo sa mga nagahuman sang hinaplas nga Cristianong kongregasyon.—1 Corinto 15:20, 57; Filipos 3:14.

[Laragway sa pahina 9]

Ang Griegong pilosopo nga si Plato

[Kapsion]

Retrato sang Vatican Museum