‘Ipakita ang Imo Pag-uswag’

“Apang karon nga hamtong na ako, ginsikway ko ang mga kinaiya sang bata.”—1 CORINTO 13:11.

1. Paano ang pagtubo isa ka pamatuod sang pagkamakatilingala sang pagpanuga?

GIKAN sa tama ka diutay nga itlog nga sarang lamang makita sa idalom sang mikroskopyo, ang balyena mahimo magdaku nga mangin isa ka tinuga nga sobra sa treinta metros kalaba kag sobra sa 80 toneladas kabug-at. Sa kaanggid, gikan sa isa sang pinakadiutay nga mga liso, ang higante nga sequoia mahimo magtubo sing sobra sa 90 metros kataas. Sa pagkamatuod, ang pagtubo isa sang mga katingalahan sa kabuhi. Subong sang ginsiling ni apostol Pablo, kita ang nagatanum kag nagabunyag, apang ‘Dios lamang ang nagapatubo.’—1 Corinto 3:7.

2. Anong sahi sang pagtubo ukon pag-uswag ang gintagna sa Biblia?

² Apang, may isa pa ka sahi sang pagtubo ukon pag-uswag nga makatilingala man. Gintagna ini ni manalagna Isaias: “Ang diutay mangin isa ka libo, kag ang diutay mangin mabakud nga pungsod. Ako amo si Jehova, magapadali ako sini sa iya tion.” (Isaias 60:22) May kaangtanan ini nga tagna sa pag-uswag sang katawhan sang Dios, kag may daku ini nga katumanan sa aton adlaw.

3. Paano ginapakita sang report sang 1991 nga tuig sa pag-alagad nga ginapadali ni Jehova ang hilikuton sang iya katawhan?

³ Ang report sang 1991 nga tuig sa pag-alagad tuhoy sa bug-os kalibutan nga hilikuton sang mga Saksi ni Jehova nagapakita nga ang kadamuon sang mga manugbantala sang Ginharian naglab-ot sa bag-ong kataason nga 4,278,820, kag may kabug-osan nga 300,945 ka tawo ang ginbawtismuhan sadto nga tuig. Bangod sang pagdugok sang tuman kadamo nga bag-uhan, 3,191 ka bag-ong kongregasyon ang natukod, upod ang katumbas nga kadamuon sang bag-ong mga sirkito kag mga distrito. Kapin ina sa walo ka bag-ong kongregasyon sa isa ka adlaw, halos isa ka bag-ong sirkito sa kada duha ka adlaw. Daw ano ka makatilingala nga pag-uswag! Sing maathag, ginapadali ni Jehova ang mga butang, kag ginapakamaayo niya ang mga panikasog sang iya katawhan.—Salmo 127:1.

Tion Para sa Pag-usisa sa Kaugalingon

4. Anong mga pamangkot ang pagabinagbinagon samtang nagatan-aw kita sa palaabuton?

⁴ Bisan makalilipay tan-awon, ining pagpakamaayo nagadala man sing pila ka responsabilidad. May bastante bala nga hamtong kag kinabubut-on nga mga indibiduwal sa pagtatap sa espirituwal nga mga kinahanglanon sining tanan nga bag-uhan? Samtang nagatan-aw kita sa unahan, mabudlay hunahunaon ang tuhoy sa kadamuon sang mga payunir, mga ministeryal nga suluguon, mga gulang, kag mga nagalakbay nga manugtatap nga kinahanglan sa pagtatap sa pagtubo kag pag-uswag, subong man ang tuhoy sa kadamuon sang boluntaryo nga mga manugpangabudlay nga kinahanglan sa mga sanga talatapan kag mga Puluy-an Bethel sa bug-os nga kalibutan sa pagsupurta sa sinang hilikuton. Diin magahalin ining daku nga kadamuon sang mga tawo? Walay duhaduha nga daku ang alanyon. Apang sin-o sa karon ang yara sa posisyon sa pagtatap sa tanan nga mga manugpangabudlay nga kinahanglan sa pag-ani sina nga alanyon?—Mateo 9:37, 38.

5. Anong mga kahimtangan ang nagaluntad sa iban nga mga lugar bangod sang madasig nga pag-uswag?

⁵ Halimbawa, ginareport nga sa iban nga mga bahin sang kalibutan, may mga kongregasyon nga may isa ka gatos ka manugbantala sang Ginharian ang ginaalagaran sang isa lamang ka gulang kaupod sang isa ukon duha ka ministeryal nga alagad. Kon kaisa ang isa ka gulang nagaalagad sa duha ka kongregasyon. Sa iban nga mga lugar daku gid katama ang pagkinahanglan sa sangkol nga Cristianong mga ministro sa pagdumala sing mga pagtuon sa Biblia sa puluy-an sa bagay nga ginalista kag ginapahulat ang mga bag-uhan tubtob nga sa ulihi may isa nga magatuon upod sa ila. Sa iban pa nga mga lugar, madasig katama ang pagtukod sa bag-ong mga kongregasyon sa bagay nga tatlo, apat, ukon lima pa ka kongregasyon ang nagagamit sa isa ka Kingdom Hall. Ayhan nakita mo ang kaanggid sini nga pag-uswag sa inyo lugar.

6. Ngaa nagakaigo gid sa tion para usisaon naton ang aton kaugalingon?

⁶ Ano ang ginasugid sa aton sang nasambit na? Nga bangod sang panahon, dapat naton tanan usisaon ang aton kahimtangan agod tan-awon kon bala ginagamit naton sing labing maayo ang aton tion kag mga kinaiya agod makabulig sa kinahanglanon. (Efeso 5:15-17) Si apostol Pablo nagsulat sa Hebreo nga mga Cristiano sang unang siglo: “Kay dapat na kamo kuntani magmanunudlo sa sining tion, apang nagakinahanglan kamo sing isa nga magtudlo sa inyo liwat sang nahauna nga mga pagtulun-an sang pulong sang Dios; kag nagakinahanglan kamo sang gatas, indi sang mabaskug nga pagkaon.” (Hebreo 5:12) Subong sang ginapakita sina nga mga pulong, ang indibiduwal nga mga Cristiano dapat man magtubo. Kay daku gid ang katalagman nga ang isa mahimo nga magpabilin nga bata sa espirituwal sang sa mag-uswag padulong sa Cristianong pagkahamtong. Nahisuno sa sini, si Pablo nagalaygay sa aton: “Usisaa ninyo ang inyo kaugalingon, kon yara kamo sa pagtuo.” (2 Corinto 13:5) Nausisa mo na bala ang imo kaugalingon agod tan-awon kon bala nag-uswag ka sa espirituwal sugod sang tion nga ginbawtismuhan ka? Ukon wala ka bala nagauswag? Apang, paano ini mahibaluan sang isa?

“Mga kinaiya sang Bata”

7. Para makita ang espirituwal nga pag-uswag, ano ang dapat naton himuon?

⁷“Sang ako bata pa, naghambal ako subong sang bata, naghunahuna ako subong sang bata, nagbais ako subong sang bata; apang karon nga hamtong na ako, ginsikway ko ang mga kinaiya sang bata,” siling ni apostol Pablo. (1 Corinto 13:11) Sa espirituwal nga pag-uswag, kita tanan kaangay anay sang mga bata sa aton panghunahuna kag mga buhat. Apang, agod makita ang pag-uswag, dapat naton isikway ang “mga kinaiya sang bata,” subong sang ginsiling ni Pablo. Ano ang pila sining mga kinaiya?

8. Suno sa mga pinamulong ni Pablo sa Hebreo 5:​13, 14, ano ang isa ka kinaiya sang espirituwal nga bata?

⁸ Una, talupangda ang ginsiling ni Pablo sa Hebreo 5:13, 14: “Ang tagsatagsa nga nagakabuhi sa gatas disampaton sa pulong sang pagkamatarong, kay bata sia. Apang ang pagkaon nga mabaskug naigo sa mga hamtong, sa mga nahanas sa ila painoino sa pagpain sang maayo gikan sa malaut.” ‘Sampaton [ka bala] sa pulong sang pagkamatarong’? Lantip ka gid bala sa Pulong sang Dios, ang Biblia, nga sarang mo ini magamit sa “pagpain sang maayo gikan sa malaut”? Nagsiling si Pablo nga ang mga hamtong makahimo sini bangod pirme sila nagakaon sing “mabaskug nga pagkaon.” Busa, ang handum ukon gana sang isa para sa mabaskug nga espirituwal nga pagkaon isa ka maayo nga pagpakita sa kon bala ang isa nagtubo sa espirituwal ukon nagapabilin gihapon nga isa ka espirituwal nga bata.

9. Paano nga ang espirituwal nga gana sang isa pagpakita sang iya espirituwal nga pag-uswag?

⁹ Kamusta, nian, ang imo espirituwal nga gana? Paano mo ginatamod ang bugana nga suplay sang espirituwal nga pagkaon nga tayuyon nga ginaaman ni Jehova paagi sa napasad sa Biblia nga mga publikasyon kag Cristianong mga miting kag mga asambleya? (Isaias 65:13) Walay duhaduha nga nalipay gid ikaw sing daku kon ginapaguwa ang bag-ong mga publikasyon sa tuigan nga distrito nga mga kombension. Apang ano ang ginahimo mo sa sini pag-abot mo sa balay? Ano ang ginahimo mo kon mag-abot ang bag-ong guwa sang Ang Lalantawan ukon Magmata!? Nagahinguyang ka bala sing tion agod mabasa ining mga publikasyon, ukon ginabuklat mo lang ini agod tan-awon ang talalupangdon nga mga bahin kag nian ginadugang ini sa imo talaguan sing libro? Ang kaanggid nga mga pamangkot sarang mapautwas nahanungod sa Cristianong mga miting. Tayuyon mo bala nga ginatambungan ang tanan nga mga miting? Nagahanda kag nagapakigbahin ka bala sa sini? Maathag nga ang iban nahulog sa mapigaw nga batasan sang espirituwal nga pagkaon, nagabasa sing pakulahaw kag nagakaon sing dalidali, kon sa aton pa. Tuhay gid sa salmista, nga nagsiling: “O daw ano ang paghigugma ko sang imo kasuguan! Pamalandungan ko ini sa bug-os nga adlaw.” Sing dugang, si Hari David nagsiling: “Magapasalamat ako sa imo sa daku nga katilingban; magadayaw ako sa imo sa tunga sang madamo nga katawhan.” (Salmo 35:18; 119:97) Sing maathag, ang kadakuon sang aton apresasyon sa espirituwal nga mga aman isa ka pagpakita sang aton espirituwal nga pag-uswag.

10. Anong kinaiya sang espirituwal nga bata ang ginapakita sa Efeso 4:​14?

¹⁰ Ginhatag ni Pablo ang isa pa ka kinaiya sang espirituwal nga bata sang nagpaandam sia: “Indi na kita magmangin bata, nga ginabolabola kag ginapalidpalid sang tagsa ka hangin sang pagtulun-an paagi sa pagkaabtik sang mga tawo, sa ila pagkadaya sa mga limbong sang sayop.” (Efeso 4:14) Subong sang nahibaluan gid sang mga ginikanan, ang mga bata interesado sa tanan nga butang. Sa isa ka paagi isa ini ka positibo nga kinaiya bangod magausisa sila kag magatuon kag amat-amat nga magatubo tubtob mangin hamtong nga mga tawo. Apang, may katalagman nga madali sila matublag sang lainlain nga butang. Ang malain pa, bangod kulang sing eksperiensia, ining interes masunson nagadul-ong sa ila sa daku nga problema, nagabutang pa gani sa katalagman sang ila kaugalingon kag sang iban. Matuod man ini sa espirituwal nga mga bata.

11. (a) Ano ang ginahunahuna ni Pablo sang gingamit niya ang ekspresyon nga “tagsa ka hangin sang pagtulun-an”? (b) Anong ‘mga hangin’ ang ginaatubang naton karon?

¹¹ Apang, ano ang ginahunahuna ni Pablo sang nagsiling sia nga ang espirituwal nga mga bata ginabolabola sang “tagsa ka hangin sang pagtulun-an”? Diri, ang “hangin” ginbadbad gikan sa Griegong tinaga nga aʹne·mos, nga nahanungod sini ang International Critical Commentary nagasiling nga mahimo ini “ginpili subong nagakabagay sa ideya sang pagbulubag-o.” Gin-ilustrar ini sing maayo sa masunod nga pinamulong ni Pablo, “paagi sa pagkaabtik sang mga tawo.” Ang tinaga nga “pagkaabtik” sa orihinal nga lengwahe nagakahulugan sing “dais” ukon “paghampang sing dais,” nga kon sayuron, isa ka pa­suwertehan nga hampang.” Ang punto amo nga pirme kita nagaatubang sing bag-ong mga ideya kag mga paghimud-os nga daw dimakahalalit, makasululay, maayo pa gani. Ang mga pulong ni Pablo naaplikar sing una sa mga butang nga may kaangtanan sa aton pagtuo—sa mga hublag ekumeniko, sa sosyal kag politikal nga mga kausa, kag sa kaanggid nga mga butang. (Ipaanggid ang 1 Juan 4:1.) Apang ang prinsipio nagapabilin man nga matuod kon tuhoy sa pirme nagabalhin nga mga uso sang kalibutan—mga estilo, mga kalingawan, mga kalan-on, kapagros ukon pisikal nga ehersisyo, kag iban pa. Bangod sang kakulang sing eksperiensia kag maayo nga desisyon, ang espirituwal nga bata mahimo nga maupangan sing daku sinang mga butang kag busa indi makahimo sing espirituwal nga pag-uswag kag pagtuman sang iya mas importante nga Cristianong mga obligasyon.—Mateo 6:22-25.

12. Paano nga ang mga bata tuhay sa mga hamtong kon tuhoy sa responsabilidad?

¹² Ang isa pa ka kinaiya sang bata amo ang pirme nila nga pagkinahanglan sing bulig kag igtalupangod. Wala sila makahibalo ukon mabalaka sa mga responsabilidad; ang pagkabata amo ang tion sa kabuhi nga halos tanan nga butang huluhampang lamang. Subong sang ginsiling ni Pablo, ‘nagahambal [sila] subong sang bata, nagahunahuna subong sang bata, nagapangatarungan subong sang bata.’ Ginahunahuna nila nga ang iban magaatipan sa ila. Amo man sini ang masiling tuhoy sa espirituwal nga bata. Kon ang bag-uhan nagahatag sang iya nahaunang pamulongpulong sa Biblia ukon nahaunang pagguwa sa latagon, ang espirituwal nga ginikanan nalipay sa paghimo sang tanan agod makabulig. Ano ang matabo kon ang bag-uhan padayon nga nagasalig sa sina nga bulig kag nagapamatuod nga indi makasarang sang responsabilidad nga pag-atipan sa iya kaugalingon? Maathag nga pagpakita ina sang kakulang sing pag-aplikar sa kaugalingon.

13. Ngaa ang kada isa dapat magtuon sa pagdala sang iya kaugalingon nga lulan?

¹³ Nahanungod sini dumduma ang laygay ni apostol Pablo nga bisan pa dapat kita ‘magdinalhanay sang aton mga lulan,’ sa gihapon “ang tagsa ka tawo magdala sang iya kaugalingon nga lulan.” (Galacia 6:2, 5) Sa pagkamatuod, nagakinahanglan sing tion kag panikasog para ang isa makatuon sa pag-abaga sang iya Cristianong mga responsabilidad, kag mahimo ini magakahulugan sang paghimo sing mga sakripisyo sa pila ka bahin. Apang, daku gid nga sayop ang pagtugot sa kaugalingon nga madalahig sa kalipayan kag kinasadya sang kabuhi, sa kalingawan man, sa mga paglakbay, sa bag-o nga mga kasangkapan, ukon sa dikinahanglanon nga paghingamo sa sekular nga palamugnan, nga ang isa nagatindog lamang sa higad, kon hambalon pa, nga wala sing handum sa pagdugang sang iya bahin sa paghimo sing disipulo nga hilikuton ukon sa paglab-ot sa espirituwal nga pag-uswag kag responsabilidad. “Magmanugtuman kamo sang pulong, kag dili manugpalamati lamang, nga nagadaya sang inyo kaugalingon paagi sa sayop nga pangatarungan,” laygay ni disipulo Santiago.—Santiago 1:22; 1 Corinto 16:13.

14. Ngaa indi kita dapat mangin kontento sa pagpakita sang mga kinaiya sang espirituwal nga bata?

¹⁴ Huo, madamong mahapos makilala nga mga batasan ang nagapakilala sa isa ka bata gikan sa isa ka hamtong. Apang, ang importante nga butang, subong sang ginsiling ni Pablo, amo nga kita amat-amat nga nagasikway sang mga kinaiya sang bata kag nagatubo. (1 Corinto 13:11; 14:20) Kay kon indi, mangin kulangkulang kita sa espirituwal nga kahulugan. Apang paano ang isa nagauswag? Ano ang nadalahig sa paghupot sang espirituwal nga pag-uswag padulong sa pagkahamtong?

Kon Paano Makita ang Pag-uswag

15. Ano ang sadsaran nga mga tikang sa proseso sang pagtubo?

¹⁵ Ti, paano bala ang pagtubo sa kinaugali nga kalibutan? “Ang tagsa ka indibiduwal nagasugod sa pagkabuhi subong isa ka selula,” paathag sang The World Book Encyclopedia. “Ang selula nagakuha sing mga materyal kag nagahimo sini nga mga elemento nga kinahanglanon sa pagtubo. Busa, ang isa ka selula nagatubo sa sulod. Ining selula sarang magmuad kag magbahinbahin sa paghuman sing iban nga mga selula. Ang proseso sang paghimo, pagmuad, kag pagbahinbahin amo ang pagtubo.” Ang talalupangdon nga punto diri amo nga ang pagtubo nagakatabo halin sa sulod. Kon ang nagakaigo nga kalan-on ginakaon, ginatunaw, kag ginagamit, nagaresulta ang pagtubo. Makita ini sing maathag sa kaso sang bag-ong bun-ag nga bata. Subong sang nahibaluan naton, ang isa ka bag-ong bun-ag nagakaon sang dalayon nga suplay sang ginhimo sing espesyal nga kalan-on, gatas, nga bugana sa tambok kag protina, ang mga materyal nga kinahanglanon sa pagtubo. Ang resulta? Ang pagtubo sa kabug-aton kag kataason nga matigayon sang isa ka lapsag sa nahaunang tuig indi gid maparehuan sa bisan anong iban nga tuig sang normal nga pagtubo sa bug-os niya nga kabuhi.

16. Anong sahi sang pag-uswag ang nakita sa kalabanan nga bag-ong mga estudyante sa Biblia, kag paano ina ginpaposible?

¹⁶ Madamo kita sing matun-an gikan sining kinaugali nga proseso sang pagtubo nga sarang naton maaplikar sa aton espirituwal nga pag-uswag gikan sa sadsaran nga pagtulun-an padulong sa pagkahamtong. Una sa tanan, kinahanglan ang programa sang dalayon nga pagkaon. Hunahunaa anay ang tion nga nagtuon ka primero sa Biblia. Kon kaangay ka sang madamo, ayhan wala ka halos sing nahibaluan tuhoy sa Pulong sang Dios. Apang sa sulusemana nga paghanda mo sang imo mga leksion kag pagtuon sa Biblia, kag sa pila lamang ka tion, nahangpan mo ang tanan nga sadsaran nga mga panudlo sang Kasulatan. Dapat mo batunon nga, isa ina ka dikinaandan nga pagtubo, kag ang tanan subong resulta sang tayuyon nga pagkaon sa Pulong sang Dios!

17. Ngaa kinahanglan gid ang programa sang tayuyon nga espirituwal nga pagkaon?

¹⁷ Apang, kamusta karon? Ginasunod mo bala gihapon ang programa sang regular nga pagkaon? Indi gid dapat maghunahuna ang isa nga bangod nabawtismuhan na sia, indi na kinahanglan ang regular kag sistematiko nga pagtuon sa pagkuha sing masustansia nga espirituwal nga pagkaon. Bisan pa si Timoteo isa ka hamtong nga Cristianong manugtatap, si Pablo naglaygay sa iya: “Himua ining mga katungdanan; ukuri ini sila, agod nga ang imo pag-uswag makita sang tanan.” (1 Timoteo 4:15) Labi pa gid nga himuon ini sang tagsa sa aton! Kon interesado ka sa pagpakita sang imo espirituwal nga pag-uswag, inang mga panikasog kinahanglanon gid.

18. Paano makita ang espirituwal nga pag-uswag sang isa?

¹⁸ Ang pagpakita sang pag-uswag sang isa wala nagakahulugan sang paghimo sing pinasahi nga panikasog agod ipadayaw kon ano ang iya nahibaluan ukon tinguhaan nga pakitaan ang iban. Si Jesus nagsiling: “Kamo ang suga sang kalibutan. Ang banwa nga nahamtang sa ibabaw sang bakolod indi sarang malipdan” kag, “sa kabuganaan sang tagipusuon nagapamulong ang baba.” (Mateo 5:14; 12:34) Kon ang aton mga tagipusuon kag mga hunahuna puno sang maayong mga butang tuhoy sa Pulong sang Dios, mapakita gid naton ini sa kon ano ang aton ginahimo kag ginahambal.

19. Ano dapat ang determinado nga himuon naton nahanungod sa aton espirituwal nga pag-uswag, kag upod ang anong ginatan-aw nga resulta?

¹⁹ Busa, ang pamangkot amo: Ikaw bala tayuyon nga nagatuon sang Biblia kag nagatambong sa Cristianong mga miting agod makakuha sing makapabakud nga materyal nga nagapapagsik sang imo nasulod kag espirituwal nga pagtubo? Indi magmakontento nga mangin isa ka diaktibo nga tagpanilag kon tuhoy sa espirituwal nga paglambo. Maghimo sing positibo nga mga tikang agod pat-uron nga ginahimuslan mo sing bug-os ang buganang espirituwal nga pagkaon nga ginaaman ni Jehova. Kon isa ikaw nga ‘ang kawilihan yara sa kasuguan ni Jehova, kag ang iya kasuguan ginapamalandungan mo sa adlaw kag gab-i,’ nian masiling man ini sa imo: “Mangin kaangay sia sang kahoy nga natanum sa ubay sang mga kasulgan sang tubig, nga nagapamunga sa iya panag-on kag ang iya dahon man indi malaya, kag ang bisan ano nga ginahimo niya nagamadinalag-on.” (Salmo 1:2, 3) Apang, ano ang himuon agod pat-uron nga padayon ka nga nagahimo sing espirituwal nga pag-uswag? Hambalan ini sa masunod nga artikulo.

Masabat Mo Bala?

◻ Ngaa nagakaigo gid sa tion nga usisaon ang aton espirituwal nga pag-uswag?

◻ Paano ang espirituwal nga pag-uswag may kaangtanan sa espirituwal nga gana?

◻ Ano ang kahulugan sang “tagsa ka hangin sang pagtulun-an”?

◻ Ngaa ang kada isa dapat magdala sang iya kaugalingon nga lulan?

◻ Paano matigayon ang espirituwal nga pag-uswag?

[Laragway sa pahina 10]

Nagahinguyang ka bala sing tion sa pagbasa sang mga publikasyon pasad sa Biblia?