Mga Pamangkot Gikan sa mga Bumalasa

Dapat bala naton hangpon ang Job 1:8 nga sa panag-on nga nagkabuhi si Job, sia lamang ang tawo nga matutom kay Jehova?

Indi. Ina nga paghinakop wala ginasakdag sang Job 1:8, nga nagasiling:

“Kag si Jehova nagsiling kay Satanas: ‘Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarong, nga mahadlukon sa Dios kag nagalikaw sa malaut?’ ” Ang Dios nag-aman sing kaanggid nga pagtamod sa Job 2:3, nga nagapamangkot kay Satanas: “Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarong, nga mahadlukon sa Dios kag nagalikaw sa malaut?”

Ang tulun-an sang Job mismo nagapakita nga indi lamang si Job ang tawo nga buhi nga ginbaton sang Dios nga matutom. Sugod sa kapitulo 32, mabasa naton ang nahanungod kay Elihu. Bisan pa mas bataon, gintadlong ni Elihu ang sayop nga pagtamod ni Job kag nagpadaku sa matuod nga Dios.—Job 32:6–33:6, 31-33; 35:1–36:2.

Sa amo, ang ginsiling sang Dios nga ‘wala sing kaangay kay Job sa duta’ nagakahulugan nga talalupangdon gid si Job bilang matarong nga tawo. Mahimo nga nagkabuhi si Job sa ulot sang tion sang pagkapatay ni Jose sa Egipto kag sang pagsugod sa pag-alagad ni Moises bilang manalagna sang Dios. Sa sulod sina nga tion madamo sang mga Israelinhon ang nagpuyo sa Egipto. Indi makatarunganon nga hunahunaon nga sila tanan indi matutom kag indi kalahamut-an sa Dios; ayhan madamo ang nagsalig kay Jehova. (Exodo 2:1-10; Hebreo 11:23) Apang, wala sing isa sa ila ang nangin prominente, katulad kay Jose, ukon nangin talalupangdon yadtong mga sumilimba kon tuhoy sa matuod nga pagsimba, katulad kay Moises sa iya pagpanguna sa pungsod sang Israel paguwa sa Egipto.

Apang, may isa ka tawo nga may talalupangdon nga integridad, nga nagakabuhi sa lain nga lugar. “May isa ka tawo sa duta sang Uz nga ginhingalanan Job; kag yadto nga tawo himpit kag matarong, isa nga mahadlukon sa Dios kag nagalikaw sa malaut.”—Job 1:1.

Mahinambit man ni Jehova si Job bilang isa ka kitaon ukon talalupangdon nga halimbawa sang pagtuo kag debosyon. Sing kaanggid, ang mga manunulat sang Biblia nga sanday Ezequiel kag Santiago makatudlo pabalik kay Job subong nga amo ang nagpahamtang sing sulundan sang pagkamatarong kag pagbatas.—Ezequiel 14:14; Santiago 5:11.