Mga Gulang—Magtangdo!

ISA sia ka mapainumuron, mapainubuson nga tawo, nga may daku nga pagkilala sa katarungan nga gintimbangan sang iya mga eksperiensia sa kabuhi. Gani, kapin sa tatlo ka milyon ka lalaki, babayi, kag kabataan ang may pagsalig nga nagpangayo sa iya sing laygay. Wala niya sila ginpaslaw. Halin sa aga tubtob sa gab-i, ginpamatian niya ang ila mga problema kag mabinatason nga ginbuligan sila nga makita kon paano naaplikar sa ila kahimtangan ang mga kasuguan sang Dios. Huo, sa malip-ot nga tion, mga 3,500 ka tuig na ang nagligad, ang 12 ka tribo sang Israel isahanon lamang nga ginhukman sang isa ka tawo—si Moises.

Apang, nabalaka si Jetro, ang ugangan nga lalaki ni Moises. Paano matatapan ni Moises ang subong sina nga kasakuon? Gani nagsiling si Jetro: “Ang ginahimo mo indi maayo. Magaas-as kamo, ikaw kag ang katawhan upod sa imo, kay ang butang tama kabug-at sa imo. Indi ka makasarang sa paghimo sini nga ikaw lamang.” (Exodo 18:17, 18) Ang solusyon? Ginlaygayan ni Jetro si Moises nga itangdo ang pila niya ka mga responsabilidad sa iban. (Exodo 18:19-23) Maayo nga panugda!

Sa sulod sang Cristianong kongregasyon sa karon, may madamo nga gulang nga, kaangay ni Moises, nagatinguha sa pagtatap sang sobra sa ila masarangan nga isahanon. Sila ang nagaorganisar sang mga miting kag nagahanda man kag nagahatag sang mga bahin sa mahim-ong, epektibo nga paagi. (1 Corinto 14:26, 33,40; 1 Timoteo 4:13) Ang mga gulang nagaatipan man sang mga kinahanglanon sang mga indibiduwal nga katapo sang kongregasyon. (Galacia 6:1; 1 Tesalonica 5:14; Santiago 5:14) Sila ang nagapanguna sa labing-importante nga hilikuton sang pagbantala sang maayong balita sang Ginharian. (Mateo 24:14; Hebreo 13:7) Sila man ang nagahimos sang mga suplay sang literatura nga kinahanglan matigayon sang kongregasyon agod ipahamtang sa publiko.

Dugang pa, ang iban nga mga gulang ginahatagan sing mga bahin sa mga programa sa sirkito nga asambleya kag distrito nga kombension. Nagaalagad sila sa mga organisasyon sang asambleya kag nagaalagad man sa mga hospital liaison committee. Ang iban nagabulig sa pagpatindog sang Kingdom Hall. Kag ini tanan bilang dugang sa ila responsabilidad sa ila pamilya kag sa kinahanglanon nga pakaunon ang ila kaugalingon sa espirituwal. (Ipaanggid ang Josue 1:8; Salmo 110:3; 1 Timoteo 3:4, 5; 4:15; 16.) Paano masarangan sining Cristianong mga lalaki nga himuon ining tanan? Kaangay ni Moises kinahanglan nila ang bulig. Kinahanglan nga matun-an nila ang magtangdo. Ang matuod, ang isa nga indi makahibalo magtangdo isa ka mapigaw nga organisador.

Ang Kabilihanan sang Paghanas sa Iban

May dugang pa nga mga rason sa pagtangdo sang responsabilidad. Sa ilustrasyon ni Jesus tuhoy sa mga talanton, antes maglakat sa malayo nga duog, gintipon sang agalon ang iya mga ulipon kag gintangduan sila sang nanuhaytuhay nga kadakuon sang responsabilidad. (Mateo 25:14, 15) Sa paghimo sadto, natigayon sang agalon ang pila ka mga tulumuron. Una, samtang didto sia sa malayo, ginbuslan sia sang iya mga ulipon kag ang importante nga hilikuton wala maghinay kag magdulog samtang wala sia. Ikaduha, sanglit ang binuhatan nagapahayag labaw sang sa mga tinaga, mapanilagan karon sang agalon ang mga ikasarang kag katutom sang iya mga ulipon. Ikatlo, ginhatagan sang agalon ang iya mga ulipon sang kahigayunan nga makatigayon sang labing-kinahanglanon nga eksperiensia.

May kahulugan ini nga ilustrasyon para sa aton karon. Sang ginbiyaan ni Jesus ang duta, ginhatagan niya sang responsabilidad ang iya hinaplas nga mga gintutun-an. Ang mga nagkalabilin sini padayon gihapon nga amo ang responsable sa bug-os kalibutan nga intereses sang Ginharian. (Lucas 12:42) Sa modernong-adlaw nga pag-alagad sang mga hinaplas, nangin maathag ang pagpakamaayo ni Jehova sa iya organisasyon. Subong resulta, nag-uswag ini sing makadalayaw. Ti, sang nagligad lamang nga lima ka tuig, kapin sa isa ka milyon nga bag-uhan ang nagsimbulo sang ila dedikasyon paagi sa pagpabawtismo sa tubig! Nagresulta ini sa linibo ka bag-o nga mga kongregasyon kag ginatos ka bag-o nga mga sirkito.

Subong nga si Jesucristo nagtangdo sing mga responsabilidad sa “matutom kag mainandamon nga ulipon,” sila man nagtangdo sang kongregasyonal nga mga responsabilidad sa mga gulang kag ministeryal nga mga alagad sang “iban nga karnero.” (Mateo 24:45-47; Juan 10:⁠16) Walay sapayan, madamo pa nga dedikado nga mga tawo ang ginakinahanglan agod magtatap sa daku nga pag-uswag. Diin sila magahalin? Kinahanglan nga hanason sila sang mga gulang. Apang paano mahanas sang mga gulang ina nga mga tawo kon wala nila ginatangdo ang nagakaigo nga mga responsabilidad sa mga indibiduwal nga nagapakita sang ikasarang? Paano matigayon sang mga gulang ang kahigayunan nga mapanilagan ang mga ikasarang kag katutom sang lamharon nga mga lalaki?

Ano ang Kahulugan sang Magtangdo?

Para sa iban, ang “pagtangdo” nagakahulugan sang pagdiskarga, paglikaw, pagpatumbaya, ukon pagbiya sang ila mga responsabilidad. Apang, kon ginagamit sing nagakaigo, ang “pagtangdo” isa gid ka paagi sa pagtuman sang mga responsabilidad. Ang Ingles nga berbo nga “sa pagtangdo” nagakahulugan subong, “pagsalig sa iban; pagtangdo subong tiglawas sang isa; pagtangdo sang responsabilidad ukon awtoridad.” Walay sapayan sini, ang nagtangdo nagapabilin nga amo ang lubos nga responsable sa nahimuan.

Ang iban nagalikaw sa pagtangdo bangod nahadlok sila nga basi madula nila ang pagkontrol. Apang, ang pagtangdo wala nagakahulugan sing pagkadula sang kontrol. Bisan indi makita kag nagagahom sa mga langit, si Cristo Jesus amo gid ang nagakontrol sa Cristianong kongregasyon. Ginsalig man niya ang kongregasyon sa pagtatap sang eksperiensiado nga mga lalaki.—Efeso 5:23-27; Colosas 1:13.

Ang iban wala sing huyog sa pagtangdo bangod nagabatyag sila nga mahimo nila sing mas madasig ang trabaho sa ila kaugalingon. Apang, nakita ni Jesus ang kabilihanan sang paghanas sa iban. Wala sang isa sa duta ang epektibo nga nagtudlo labaw kay Jesus. (Juan 7:46) Apang, pagkatapos hatagan sing mga instruksion ang 70 niya ka disipulo, ginpadala niya sila sa pagbantala nga hilikuton. Bisan wala makatupong kay Jesus sa ikasarang sa pagpanudlo, nagbalik sila nga malipayon bangod sang ila mga kadalag-an. Nagkalipay upod sa ila si Jesus kag ginhatagan niya sila sing komendasyon, kay nahibaluan niya nga sila ang magapadayon sang hilikuton kon wala na sia kag sa ulihi magahimo sang labaw sang sa masarangan niya nga himuon sing isahanon.—Lucas 10:1-24; Juan 14:12.

Ang pagtangdo nagakahulugan man sang pagtigayon sing bulig sa kinahanglanon nga mga detalye. Sang adlaw antes sang kamatayon ni Jesus, iya gintangdo sanday Pedro kag Juan nga maghimo sing kinahanglanon nga kahimusan para sa iya katapusan nga panihapon sang Paskuwa. (Lucas 22:7-13) Indi na kinahanglan nga magkabalaka si Jesus nahanungod sa pagbakal sang isa ka kordero, alak, tinapay nga walay lebadura, kag mapait nga lamigas; ukon kinahanglan nga mangita pa sia sang mga lulutuan, inuggatong nga kahoy, kag kaanggid nga mga butang. Sanday Pedro kag Juan ang nag-atipan sadto nga mga butang.

Sarang man matigayon sang mga gulang sa karon ang kaangay nga mga benepisyo kon sundon nila ang halimbawa ni Jesus. Halimbawa, ang isa nga nagatatap sang literatura mahimo pangabayon nga magtigayon sing dugang nga suplay para sa nagahilapit nga kampanya. Mahimo sia hatagan sing instruksion nga usisaon ang iya mga rekord agod hibaluon kon paano gingamit ang kaanggid nga mga publikasyon sang nagligad nga mga kampanya. Mahimo man niya binagbinagon ang kahimtangan sang teritoryo sang kongregasyon antes ihanda ang nagakaigo nga porma sa pag-order. Ihatag niya dayon ang porma sa sekretaryo sang kongregasyon para usisaon. Sa tion nga makahibalo na ang alagad sa literatura sang iya trabaho, indi na kinahanglan nga usisaon pa liwat sang sekretaryo ang nagligad nga mga rekord kon ang mga kabilugan sa porma sang pag-order rasonable man lang. Sing maathag, ining simple nga buhat sang pagtangdo magahimo sang pag-order sang literatura nga mas mahapos kag mas madali para sa tanan nga nahilabtan.

Bangod sinang daku nga mga benepisyo, paano ang isa makatangdo sing epektibo?

Kon Paano Magtangdo

Ipaathag ang trabaho. Una sa tanan, ipaathag kon ano nga resulta ang ginapaabot. “Patikanga ninyo ini tubtob nga mag-abot ako” amo ang ginsiling sang “isa ka tawo nga dungganon” sa iya napulo ka ulipon sa ilustrasyon ni Jesus tuhoy sa mga mina. (Lucas 19:12, 13) Ginpaabot sang agalon nga patikangon sang mga ulipon ang ila mina kag nian ireport ang ila naganansia sa iya pagbalik. Nakahibalo sila sang dapat nila nga himuon. Paano naaplikar ini nga prinsipio sa moderno nga proyekto sang pagpatindog sang Kingdom Hall? Subong halimbawa, ang utod nga lalaki nga gintangduan sa pagkaayo sang atop natural lang nga tudluan sa kon ano nga materyalis ang dapat gamiton, kon diin ini matigayon, kag kon san-o sugdan ang trabaho, kon ginatugot sang panahon. Inang ispisipiko nga mga panuytoy nagaresulta sa maayo nga organisasyon.

Importante nga ipaathag indi lamang kon ano ang nadalahig sa trabaho kundi kon ano nga mga desisyon ang ginatugot sa iya nga himuon kag kon ano nga mga butang ang dapat nga ikonsulta sa iban. Ginsilingan ni Moises ang iya mga tinangdo nga sila ang magahukom sa magamay nga mga kasaba, apang ang dalagku nga mga kasaba dapat nga dalhon sa iya.—Exodo 18:22.

Kon nagatangdo sing mga responsabilidad, likawi ang maghatag sing pareho nga responsabilidad sa duha ka tawo. Kon sobra sa isa ka tawo ang ginatangdo sa pareho nga trabaho, nagautwas ang kagumon. Hunahunaa kon ano ang matabo kon sa isa ka daku nga kombension sang mga Saksi ni Jehova, ang Cleaning Department kag ang Food Service Department pareho nga ginhatagan sing responsabilidad sa pagtinlo sang mga bulutangan sing pagkaon, ukon ang Attendant Department kag ang Immersion Department pareho nga gintangdo nga magtuytoy sa mga tumalan-aw sa bawtismo.

Pilia ang sangkol nga mga lalaki. Ginlaygayan ni Jetro si Moises: “Magpangita ka sing mga tawo nga sangkol, mahinadlukon sa Dios sa tunga sang katawhan, bunayag kag maminatud-on, kag itangdo sila sa katawhan.” (Exodo 18:21, The New English Bible) Sing maathag, kinahanglan anay nga malab-ot sang isa ka tawo ang espirituwal nga mga kalipikasyon. Agod pat-uron kon “sangkol” ang isa sa pagbaton sang trabaho, dapat binagbinagon ang mga bagay subong sang mga kinaiya, eksperiensia, paghanas, kag mga abilidad. Gani, ang isa ka Cristiano nga may mainabyanon, maayo, mabuligon nga panimuot mahimo mangin maayo nga manugtatap sang magasin ukon isa ka attendant. Sa kaanggid nga paagi, kon nagapili sang isa nga magabulig sa sekretaryo sang kongregasyon, mahimo binagbinagon kon daw ano sia kahim-ong. Ginahatagan bala niya sing igtalupangod ang mga detalye, kag makatago bala sia sang isa ka sekreto? (Lucas 16:10) Ang pagbinagbinag sa sina nga mga butang subong dugang sa kinahanglanon nga espirituwal nga mga kalipikasyon makabulig sa pagbutang sang husto nga tawo sa trabaho.

Ihatag ang nagakaigo nga galastuhon. Ang isa nga nagaalagad kinahanglan nga may magamit nga galastuhon agod mahimo ang gintangdo nga trabaho. Ayhan kinahanglan niya ang mga kagamitan, kuwarta, ukon kabulig. Ihatag ang bastante nga galastuhon. Halimbawa, mahimo nga pangabayon ang isa ka utod nga lalaki sa paghimo sang pila ka kinahanglanon nga pagkaayo sa Kingdom Hall. Sing maathag, mahimo nga hambalon sia kon ano ang dapat himuon, apang mahimo nga kinahanglan man niya ang pila ka kantidad agod mabakal ang magagmay nga materyalis. Ayhan kinahanglan niya ang kabulig. Gani mahimo nga pangabayon sang mga gulang ang iban nga buligan sia ukon ipahibalo sa kongregasyon nga ‘Si Utod Kuwan magahimo sang pila ka ulubrahon, kag mahimo nga pangabayon niya ang iban sa inyo nga buligan sia.’ Inang pagkamahinantupon magapugong sa isa sa pagtangdo sang isa ka buluhaton nga wala ginaaman ang nagakaigo nga galastuhon. “Indi magtangdo sing alang-alang” amo ang paagi sang isa ka management consultant sa pagsiling sini.

Kon nagatangdo sing mga responsabilidad, pahibalua ang iban nga ini nga tawo amo ang magabulos sa imo. Ang awtoridad nga magpanghikot nga tal-us sa imo kinahanglanon man. Si Josue gintangdo subong bag-o nga lider sang Israel sa atubangan sang “bug-os nga kadam-an.” Ginsugo si Moises nga ‘butangan sia sang [iya] kadungganan.’ (Numeros 27:18-23) Sa kongregasyon, sarang man ini mahimo paagi sa simple nga pagpatapik sa information board sang isa ka listahan sadtong gintangduan sa mga hilikuton.

Sakdaga ang ila mga desisyon. Karon sarang na masugdan sang isa ka gintangdo ang trabaho nga ginhatag sa iya. Apang, dumduma, mangin isa ikaw ka tunay nga tuburan sing pagpalig-on sa iya kon ginasakdag mo ang maayo nga mga desisyon nga iya ginahimo. Halimbawa, subong isa ka gulang mahimo nga may kaugalingon ikaw nga luyag kon paano ipahamtang ang mga mikropono kag mga muwebles sa plataporma sang Kingdom Hall, ayhan daw tuhay sa ginhimo sang gintangdo nga utod. Apang, kon ang utod nga nagatatap sang plataporma ginahatagan sing kahilwayan sa iya trabaho, pat-od nga makatigayon sia sang kompiansa kag eksperiensia. Dugang pa, mahimo nga mapauswag pa niya ini. Isa ka consultant sa negosyo ang nagsiling: “Itangdo ang trabaho, indi ang kon paano ini himuon. . . . Sa masami, nagaguwa ang maimbentuhon nga abilidad.”

Dugang pa, ang utod nga aktuwal nga nagahimo sang trabaho masami nga sunado sa isa ka partikular nga sitwasyon kag mahimo nakahangop sing mas maayo sa mga problema may kaangtanan sini. Mahimo niya atubangon ang mga problema upod ang epektibo nga mga solusyon. Mahimo man nga nagapanghikot sia sa mga bagay nga indi maathag sa mga nagaobserbar. Gani, ang isa ka Cristianong manugtatap nagsiling tuhoy sa isa ka eksperiensiado nga kabulig: “Kon magsiling sia nga may pila ka problema, nagapati ako sa ginasiling niya.”

Huo, ang pinakamapuslanon nga bulig nga matigayon sang Cristianong mga gulang amo ang dedikado nga mga lalaki kag babayi nga handa sa pagbulig sa bisan ano nga paagi nga tangduan sila. Mga gulang, tigayuna ninyo ining ekselente nga bulig! Ang pagtangdo isa ka tanda sang kaugdang kag sarang makapahaganhagan sang kahuol kag kabang-awan. Busa indi lamang nga mas madamo pa ang inyo mahimo kundi ginahatagan ninyo ang iban sing kahigayunan nga makatigayon sang kinahanglanon nga eksperiensia.