Mga Pamangkot Gikan sa mga Bumalasa

Sa Hebreo 11:26, si Moises bala ang ginapatuhuyan subong ang “Cristo,” ukon tipo lamang bala sia ni Jesucristo?

Sang nagahinun-anon sang pagtuo ni Moises, si apostol Pablo nagsulat nga “ginkabig [ni Moises] ang pagtamay nga gin-antos tungod sa Cristo nga daku pa nga manggad sang sa mga bahandi sa Egipto kay nagtan-aw sia sa balos.” (Hebreo 11:26) Daw ginpatuhuyan ni Pablo si Moises subong ang “Cristo,” ukon isa nga hinaplas, sa pila ka kahulugan.

Matuod, sa lainlain nga paagi si Moises nagpahamtang sing sulundan para sa nagapakari nga Mesias. Bisan si Moises mismo isa ka manalagna, nagtagna sia sing isa ka nagapakari nga daku pa nga manalagna ‘kaangay niya.’ Madamo nga mga Judiyo ang naghangop nga si Jesus amo “Ang Manalagna,” nga ginpamatud-an sang iya mga sumulunod. (Deuteronomio 18:15-19; Juan 1:21; 5:46; 6:14; 7:40; Binuhatan 3:22, 23; 7:37) Si Moises amo man ang manugpatunga sang katipan sang Kasuguan, apang si Jesus nakabaton sing “isa ka pag-alagdan nga labing maayo pa” subong “nga ang katipan nga sia amo ang manugpatunga maayo pa,” ang mahimayaon nga bag-ong katipan. (Hebreo 8:6; 9:15; 12:24; Galacia 3:19; 1 Timoteo 2:5) Gani sa pila ka bahin si Moises mahimo masiling nga isa ka tipo sang nagapakari nga Mesias.

Apang, indi ina ang pangunang kahulugan sang Hebreo 11:26. Wala ginapakita nga si Moises nakahibalo sang mga detalye nahanungod sa Mesias, nagakabig nga ang gin-agihan niya sa Egipto para sa Mesias ukon subong tiglawas Niya.

Ang pila nagpahangop nga ang mga pinamulong ni Pablo sa Hebreo 11:26 may kahulugan nga kaanggid sa iya komento nga ang mga Cristiano nakaagi sing “mga pag-antos ni Cristo.” (2 Corinto 1:5) Ang hinaplas nga mga Cristiano nakahibalo nga si Jesucristo nag-antos kag kon sila ‘nag-antos kaupod niya paghimayaon man sila sing magkaupod’ sa langit. Apang si Moises wala makahibalo kon ano ang antuson sang nagapakari nga Mesias, kag ang paglaum ni Moises indi langitnon.—Roma 8:17; Colosas 1:24.

May mas simple nga paghangop kon paano ‘ginkabig [ni Moises] ang pagtamay tungod sa Cristo nga manggad.’

Sang ginsulat ni Pablo ang “Cristo” sa Hebreo 11:26, gingamit niya ang Griegong tinaga nga Khri·stouʹ, nga katumbas sa Hebreong Ma·shiʹach, ukon Mesias. Ang “Mesias” kag “Cristo” nagakahulugan sing “isa nga hinaplas.” Gani ginsulat ni Pablo ang tuhoy sa ‘pagkabig [ni Moises] sang pagtamay sang isa nga hinaplas.’ Matawag bala mismo si Moises nga “isa nga hinaplas”?

Huo. Sang panahon sang Biblia ang isa ka tawo mahimo makompirmar sa pinasahi nga katungdanan paagi sa pagbubo sing lana sa iya ulo. “Nian si Samuel nagkuha sing suludlan sang lana kag ginbubo ini sa ulo [ni Saul].” “Ginkuha ni Samuel ang sungay nga may lana kag ginhaplas [si David] sa tunga sang iya mga utod; kag ang espiritu ni Jehova nag-abot sing gamhanan kay David.” (1 Samuel 10:1; 16:13; ipaanggid ang Exodo 30:25, 30; Levitico 8:12; 2 Samuel 22:51; Salmo 133:2.) Apang, ang pila, subong ni manalagna Eliseo kag sang hari sang Siria nga si Hazael, ginpatuhuyan subong “ginhaplas” bisan nga wala sing pamatuod nga ginbubo sa ila ang literal nga lana. (1 Hari 19:15, 16; Salmo 105:14, 15; Isaias 45:1) Gani, ang indibiduwal mahimo mangin “isa nga hinaplas” bangod kay ginpili ukon pinasahi nga ginsugo.

Sa sining kahulugan si Moises mismo isa nga hinaplas sang Dios, kag bisan ang iban nga mga Biblia naghatag sing mga badbad subong sang “Hinaplas sang Dios” ukon “ang Isa nga Hinaplas” sa Hebreo 11:26. Si Moises ginsugo subong tiglawas ni Jehova kag ang isa nga magapanguna sa Israel paguwa sa Egipto. (Exodo 3:2-12, 15-17) Bisan si Moises ginpadaku sa tunga sang manggad kag himaya sang Egipto, ginpakabahandi niya sing labi ang sugo sa iya, nga ginbaton kag gintuman niya. Sing nahisuno, si Pablo makasulat nga si Moises ‘nagkabig sang pagtamay nga gin-antos niya tungod sa Cristo nga daku pa nga manggad sang sa mga bahandi sa Egipto.’