Ang Dios Indi Malipat “sang Gugma nga Ginapakita Ninyo Para sa Iya Ngalan”

ANG Dios indi dimatarong nga malipat sang inyo binuhatan kag sang gugma nga ginpakita ninyo para sa iya ngalan nga nag-alagad kamo sa mga balaan kag nagaalagad pa.” (Hebreo 6:10) Ining mga pinamulong ni apostol Pablo matuod gid para sa mga Saksi ni Jehova sa Sidlangan nga Europa. Nagaalagad sing matutom tungod sa ngalan sang Dios, sa sulod sang mga dekada nangabudlay sila sing madugay kag sing lakas sa idalom sang mga pagdumili nga ginpatuman sang kontrolado anay sang Sobyet nga mga gobierno. Ginadumdom ni Jehova ang ila maayong binuhatan kag ginapaulanan sila sing mga pagpakamaayo sang Ginharian. Halimbawa, tan-awon naton ang report sang nagligad nga tuig sang pag-alagad gikan sa tatlo lamang sina nga mga duog.

Mga Teritoryo sang Anay Unyon Sobyet

Ang mga teritoryo sang anay Unyon Sobyet nagareport nga sadtong 1992 nga tuig sang pag-alagad, ang mataas nga kadamuon sang mga manugbantala sang Ginharian nag-uswag sing 35 porsiento​—⁠halin sa 49,171 tubtob sa 66,211! Apang indi lamang amo sina, kay ang mga manugbantala aktibo gid, subong sang makita sa maayong pag-uswag sa mga napahamtang nga literatura sa Biblia, lakip ang mga magasin. Gingamit man nila sing maayo ang mga brosyur kag mga pulyeto, nakapahamtang sing 1,654,559. Kapin ina sa triple nga kadamuon sang nagligad nga tuig nga 477,235! Ano ang reaksion sa sining tanan nga napahamtang? Pagdoble sang kadamuon sang mga pagtuon sa Biblia sa puluy-an. Karon 38,484 ka pagtuon sa Biblia ang ginahiwat.

Subong man, ang pagpakigbahin sa aux­il­iary payunir nga pag-alagad nagdugang sing 94 porsiento. Maathag ini nga nag-amot sa tumalagsahon nga kadamuon sang bag-ong bawtismado nga mga disipulo, 18,087, kon ipaanggid sa kadamuon nga 6,570 sang nagligad nga tuig, isa ka tumalagsahon nga 311-porsiento nga pag-uswag!

Paano ang iban sang bag-ong mga bawtismado nangin interesado primero sa maayong balita? Kon kaisa ang tudok nga pag-ulikid sang Saksi nga nagahiwat sing pagtuon amo ang rason. Ang nagadumala nga manugtatap halin sa Moldova nagasugid:

“Ginduaw namon sang akon asawa ang isa ka babayi nga nagpakita anay sing interes sa kamatuoran sang Biblia. Isa ka pagtuon sa Biblia ang nasugdan sa iya. Apang, ang iya bana wala gid magpakita sing interes. Isa ka adlaw sang manugpakadto kami sa pagduaw sa iya agod padayunon ang pagtuon, naglain ang tiempo kag nagyelo. Halos wala sing tawo sa mga dalan, apang nag-abot kami sa iya balay sing eksakto gid sa gintalana nga tion. Ginsilingan niya ang iya bana: ‘Nakita mo kon daw ano ang pag-ulikid nila sa aton? Maaga sila walay sapayan sang yelo.’ Ini nga hitabo nagpahunahuna sa iya bana. Nagbag-o ang iya hunahuna kag nagbuylog sa pagtuon, kag karon sia kag ang iya asawa bawtismado na nga mga Saksi.”

Kon kaisa ang pagkamatinahuron sang mga Saksi nagapukaw sing interes sa maayong balita. Ang isa ka gulang, halin man sa Moldova, may amo sini nga eksperiensia:

“Ang lalaki nga ginduaw ko sa akon teritoryo nga ginabantalaan indi interesado sa mga Saksi ni Jehova. Nagsiling sia nga Ortodokso sia, kaangay sang iya amay kag lolo. Gani ginpangabay niya ako nga maghalin sa ila lugar. Apang, antes ako maglakat, ginhatagan niya ako sing kahigayunan sa pagsugid sa iya sang rason sang akon pagduaw. Ginpakita ko ang Mateo 28:​19, nga nagasiling: ‘Busa lakat kamo kag maghimo sing disipulo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu.’ Nian ginhatag ko sa iya ang direksion sang amon duog tilipunan kag naglakat. Sa kakibot ko, pagligad sang isa ka semana ini nga tawo nagkari sa amon miting! Nagpabilin sia tubtob natapos ang programa. Nagpaathag sia nga sa bug-os nga semana, indi sia mapahamtang bangod nangin dimainabyanon sia sa akon. Gilayon nga nasugdan ang isa ka pagtuon sa Biblia, kag karon isa na sia sang amon mga kauturan.”

Ang isa ka tumalagsahon nga bahin sang tuig sang pag-alagad amo ang daku nga paghulag sa mga kinahanglanon sang amon mga kauturan sa sina nga lugar. Sadtong tigtulugnaw sang 1991/92, mga 400 ka tonelada nga pagkaon kag madamo nga panapton para sa kalalakin-an, kababayin-an, kag kabataan ang ginpadala sa mga nagakinahanglan. Ining mga aman ginpanagtag sa halos tanan nga bahin sang teritoryo sang anay Unyon Sobyet, bisan tubtob sa Irkutsk sa Siberia kag Khabarovsk, malapit sa Japan. Isa gid ka tumalagsahon nga pagpakita nga si Jehova wala malipat sa gugma nga ginpakita sang amon mga kauturan tungod sa iya ngalan! Ining pamatuod sang utudnon nga gugma nga ginpukaw sang espiritu ni Jehova nagpahiusa man sa ila upod sa ila bug-os kalibutan nga panimalay. Halimbawa, ang isa ka utod nga babayi sa ­Ukraine nagsulat sa sanga talatapan:

“Ang bulig nga ginhatag ninyo sa amon nagtandog gid sa amon tubtob sa alibutod sang amon tagipusuon. Napahulag kami sa paghibi kag sa pagpasalamat kay Jehova nga Dios tungod sang indi pagkalipat sa amon. Matuod, may kabudlayan kami karon sa materyal, apang bangod sang bulig nga nag-abot halin sa amon mga kauturan sa Katundan, naulian kami sa materyal nga paagi. Karon, bangod sang inyo bulig, ang amon pamilya makahinguyang na sing mas madamo nga tion sa pag-alagad kay Jehova. Kon kabubut-on ni Jehova, kami sang akon anak nga babayi magaaux­il­iary payunir sa mga binulan sang tig-ilinit.”

Dugang pa, ang panikasog sa pagbulig naghatag sing panaksi sa mga tagaguwa bangod nakita sang mga tumalan-aw nga ang mga Saksi nagapakita sing gugma paagi sa ila mga buhat. Ang isa ka pamilya halin sa lain nga kongregasyon nagsulat: “Nabaton namon ang materyal nga bulig nga nagalakip sing pagkaon kag panapton. Sobra ini katama! Ang inyo pagsakdag kag pagpalig-on isa ka leksion para sa amon nga kami man dapat maghimo sing maayo sa iban. Ini nga buhat sang gugma natalupangdan man sang mga ditumuluo, kag subong man sang mga interesado kag sang ila mga pamilya; isa ini ka daku nga panaksi nahanungod sa matuod nga paghiliutod.”

Ang lima ka distrito nga kombension kag isa ka internasyonal nga kombension nga ginhiwat sining nagligad nga Hunyo kag Hulyo, nga may tema nga “Mga Manugdala sing Kapawa,” isa pa ka pamatuod sang pagpakamaayo ni Jehova sa lakas nga pagpangabudlay sang iya mga Saksi kag sa gugma nga ginpakita nila sa pagpakilala sang iya ngalan. Ang mga kombension gintambungan sang 91,673 ka tawo, kag 8,562 ang nabawtismuhan. Ang pinakadaku nga tumalambong amo ang sa St. Petersburg, ang lugar sang internasyonal nga kombension, diin 46,214​—⁠lakip ang mga delegado halin sa mga 30 ka pungsod sa palibot sang kalibutan⁠—​ang nagtipon sa Kirov Stadium.

Sa Siberia isa ka lalaki nga mga 60 anyos ang nagkadto sa ginahiwatan sing kombension sa Irkutsk agod maningadtingad lamang. Nagsiling sia: “Ang tanan nga tumalambong nagapanapot sing maayo, nga may nagayuhum nga nawong, kag malulo sa isa kag isa. Ini nga mga tawo kaangay sang isa ka nahiusa nga pamilya. Mabatyagan sang isa nga mag-abyan sila indi lamang sa istadyum kundi sa adlaw-adlaw man nga pagkabuhi. Nakabaton ako sing maayong literatura sa Biblia kag nakatuon sing maayo pa kon ano nga sahi ini sang organisasyon. Luyag ko makig-angot sa mga Saksi ni Jehova kag magtuon sa Biblia upod sa ila.”

Sa sina man nga kombension sa Irkutsk, diin 5,051 ang nagtambong, isa ka interesado nga babayi halin sa Yakut Republic, Siberia, ang nagkomento: “Ginatan-aw ko ang mga tawo, kag daw mahibi ako sa kalipay. Nagapasalamat gid ako kay Jehova nga ginbuligan niya ako nga makilala sila. Diri sa kombension, nakabaton ako sing literatura, kag luyag ko ini isugid sa iban. Luyag ko gid nga mangin sumilimba ni Jehova.”

Ang direktor sang Central Stadium sa Alma Ata, Kazakhstan, diin 6,605 ang nagtambong sa kombension, nagsiling sing masunod: “Nalipay ako sa inyo panimuot. Kombinsido ako karon nga kamo tanan, bata kag tigulang, mga talahuron nga katawhan. Indi ko masiling nga nagapati ako sa Dios, apang nagapati ako sa balaan nga mga butang nga ginpaalinton sang inyo paghiliutod, sa inyo panimuot tuhoy sa espirituwal kag materyal nga mga kabilihanan.”

Isa ka pulis sa kombension sa Alma Ata ang nagsiling: “Makaduha na ako nakapakig-angot sa inyo, sa kada tion sa kombension. Makalilipay gid ang mangabudlay upod sa mga Saksi ni Jehova.”

Romania

Si Jehova wala man malipat sa gugma nga ginpakita sang mga kauturan sa Romania tungod sa iya ngalan. Madamong makalilipay nga hitabo para sa mga Saksi ang natabo sining nagligad nga tuig sang pag-alagad. Una, ang sanga talatapan natukod liwat sa Bucharest. Ang katapusan nga legal nga hilikuton nag-untat sang 1949. Ang talatapan may mga 20 ka utod nga lalaki kag babayi nga nagapangabudlay sa bag-ong mga pasilidad. Ang sanga talatapan nagaalagad sa 24,752 ka manugbantala​—⁠ang pinakamataas nga nagarepresentar sing 21-porsiento nga pag-uswag sang sa promedyo sang nagligad nga tuig.

Pagkatapos sang mga tinuig nga pag-alagad sing patago, ang mga manugbantala nakapasibu na sing maayo sa dayag nga pamalaybalay nga pagbantala nga hilikuton. Ang isa ka eksperiensia gikan sa Mureş County nagapakita kon paano ginahimuslan sang iban nga mga Saksi ang bisan anong kahigayunan nga makabantala sa iban, bisan pa kon nagalakbay sila. Ang sanga talatapan nagsulat:

“Isa ka manugbantala ang namat-od sa pagbantala sa mga bagon sang tren. Sa kabilugan ang reaksion sang mga tawo maayo, apang sa katapusan nga bagon, nag-utwas ang pila ka problema. Wala sa mga nagalakbay ang luyag magbaton sing kopya sang amon mga magasin. Sang ulihi, isa ka lalaki, nga akig gid, ang nagtindog kag nagsinggit: ‘Ihaboy ko ang tanan mo nga magasin sa bintana! Ngaa ginatublag ninyo kami sang inyo relihion?’ Ang manugbantala malulo nga nagsabat nga bisan pa ihaboy niya ang mga magasin, may isa nga makabenepisyo gikan sa pagahimuon niya​—⁠yadtong makapudyot sang mga magasin. Nakita ang kakalma sang manugbantala, nagdayaw gid ang tawo nga ginkuha niya ang mga magasin kag ginpanagtag mismo ini sa iban nga mga nagalakbay sa bagon. Sing makakilibot, tanan sila nagkuha sing magasin. Sang napanagtag na ini, wala na sing nabilin nga mga kopya para sa iya. Gani, ginpamangkot sia sang manugbantala: ‘Ginuo, indi mo bala luyag nga may kopya ka man?’ Bangod sina ginsabnit niya ang isa ka magasin gikan sa isa ka manuglakbay nga may duha ka kopya kag nagsiling: ‘Karon may isa ka kopya nga nakalab-ot sa akon!’ ”

Sa madamong kapungsuran ang pagbantala nga hilikuton sang mga Saksi ni Jehova nagpukaw kon kaisa sing pagpamatok sa klero sang Cristiandad. Sa Romania, ang mga pari sang Ortodokso nga Iglesia masami nga nagakaakig sa mga Saksi. Apang wala ini magpugong kay Jehova nga pakamaayuhon ang iya katawhan tungod sang gugma nga ginpakita nila para sa iya ngalan. Ang isa ka manugtatap sa sirkito nagsulat:

“Upod sa lokal nga kongregasyon, nagguwa kami sa kaumhan. Isa ka gatos ang kauturan. Nag-arkila kami sing bus nga nagdala sa amon mga 50 kilometros sa probinsia, sa isa ka diutay nga banwa. Madamo ang gin-agda namon sa miting publiko nga pagahiwaton sa Cul­tural ­Home. Pagsugod gid sang miting, ang Ortodokso nga pari nag-abot sa pagtublag sang amon miting. Ang mga opisyales sang pulis nagtinguha sa pagpugong sa pari. Apang, indi sia magpapugong. Napauntat niya ang miting sang ginbuka niya ang kristal sa mayor nga ganhaan. Apang, madamo sang lokal nga mga pumuluyo ang wala mag-ugyon sa ginhimo sang pari. Nian isa ka maid-id nga panaksi ang ginhatag sa tanan nga nagtambong, kag madamo nga literatura ang napanagtag.”

Sing masubo, sa iban nga mga bahin sang pungsod, diutay lang ang mga Saksi. Sang nag-abot primero ang isa ka regular payunir sa lugar sang Olt, nasalapuan niya ang siam lamang ka utod sa bug-os nga lugar kag ang daku nga teritoryo nga pagabantalaan. Pagligad sang isa ka tuig ang kadamuon sang mga Saksi nagdugang sa 27, lima sa ila ginpaaktibo liwat nga mga manugbantala. Nakakita sing dalayunan ang payunir sa siudad sang Corabia, diin wala sing Saksi. Pagligad lamang sang 45 ka adlaw nga didto ang mga Saksi, ang lokal nga rektor nagprotesta sa radyo sang Craiova batok sa ila hilikuton. Nagsiling sia nga “ginsalakay” nila ang siudad sang Corabia sang ila mga panudlo, nagatinguha nga islan sang mga tawo ang ila relihion. Ang atake nagpadayon, sa tuyo nga pauntaton ang hilikuton kag gub-on ang reputasyon sang mga Saksi sa sinang lugar. Nakadangat ini tanan sa talipuspusan sang ang lokal nga mga kauturan nagkadto sa Bucharest para sa distrito nga kombension. Ang Ortodokso nga rektor sa Corabia naghimo sing matigdas nga pahibalo pagkatapos sang iya serbisyo sa simbahan: “Kita tanan dapat maghimo sing demonstrasyon sa dalan agod pahulagon ang mga pulis sa paghimo sing mga tikang batok sa mga Saksi, nga nagpalain sang bug-os nga duog paagi sa ila mga publikasyon kag naghilo sa katawhan.” Apang sang gab-i gid antes hiwaton kuntani ang miting, natabo ang isa ka di-kinaandan nga butang. Ginguba sang isa ka grupo sang mga hurong ang katedral kag ang City Cul­tural ­Home. Gani, ang miting sa protesta wala gid madayon!

Mga Teritoryo sang Anay Yugoslavia

Ang 1992 nga tuig sang pag-alagad amo ang pinakamabudlay nga tuig para sa mga kauturan sa lugar sang Yugoslavia. Apang, sa amo man nga tion, may makalilipay sila nga mga eksperiensia. Sing mapasalamaton, wala malipat si Jehova sa ila binuhatan kag sa gugma nga ila ginpakita para sa iya ngalan.

Ang inaway nagsugod primero sa Slovenia, nian sa Croatia, kag sang ulihi sa Bosnia kag Herzegovina. Sa sulod sang isa ka tuig, gikan sa isa ka republika, lima ka bag-ong Estado ang nagapanikasog sa pagtukod sang ila kaugalingon nga mga dulunan, mga kasuguan, kag mga kuwarta. Ginatos ka Saksi ang nagbiya sang ila puluy-an kag nagdayon sa ila mga kauturan sa iban nga mga lugar. Kaanggid sa iban nga mga pungsod sa Sidlangan nga Europa, gintangdo ang mga komite sa emerhensia sa dalagku nga mga siudad, nga nagaatipan sang mga dalayunan, pagkaon, kag panapton para sa aton imol nga mga kauturan. Sa sulod sang tuig sang pag-alagad, mga 55 ka tonelada sang pagkaon ang ginpanagtag sa mga kauturan sa mga kongregasyon sa sulod sang magamo nga mga lugar. Madamong sulat sang pasalamat ang nabaton.

Ang mga kauturan sa Dubrovnik nagsugid sang ila daku nga pasalamat tungod sa bulig nga nabaton. Sang nagpauli ang isa ka utod nga babayi nga dala ang iya pinutos nga pagkaon, ang isa ka kaingod namangkot kon diin sia nagbakal sing itlog. Ginsugiran sia sang utod nga ginpadala ini sang iya espirituwal nga mga kauturan sa iban nga duog. Nakibot ang kaingod. Sa isa pa ka hitabo isa ka wala makilal-i nga lalaki halin sa Slovenia ang nagduaw sa isa ka gulang kag nagsiling: “Nabalitaan ko nga ang mga Saksi ni Jehova nagapanagtag sing pagkaon nga nabaton halin sa ila mga kauturan sa nagakaigo nga paagi. Nagpadala ako sing pila ka putos sa mga tawo; apang, wala ini mag-abot. Mahimo ko bala ipadala ina nga bulig sa inyo, kag mahimo ninyo ini mapanagtag?” Subong man, ang mga pamantalaan kag radyo nagbalita sing maayo nahanungod sa aton hilikuton sa pagbulig.

Ang isa ka utod nga lalaki nga ginbawtismuhan sa internasyonal nga kombension sa Zagreb sang 1991 nakahibalo sang nagadugang nga mga kabudlayan kag ginbakal ang bug-os nga balaligyaan sang pagkaon. Gindala niya ang pagkaon sa iya balay malapit sa lugar nga may inaway. Sang ang kakulang sing pagkaon labi nga naglain, ini nga suplay isa gid ka pagpakamaayo sa mga kauturan.

Mahimo makakuha sing permiso para ang isa ka daku nga trak makadala sing pangunang pagkaon para sa nalikupan nga mga kauturan sa Sarajevo. Nalipay kami sa pagbalita nga nadul-ong ini sing madinalag-on.

Ang inaway nagpatay sa mga sibilyan. Sing masubo, sadtong katapusan sang tuig sang pag-alagad, anum sang amon kauturan nga lalaki kag babayi kag duha ka interesado ang napatay, kag ang iban napilasan.

Apang, madamong eksperiensia ang nagapakita nga sa masami isa ka pangamlig ang mangin isa ka Saksi ni Jehova. Sa isa ka hitabo ang mga kauturan nagalakbay pakadto sa distrito nga kombension sa Belgrade sang ang bus ginpadulog sang mga soldado, namangkot kon bala may mga katapo sang isa ka relihion sa tunga nila. Ang mga kauturan nagsabat nga wala. Dapat nila ipakita ang ila mga identipikasyon kard, kag ang iban sa ila may mga ngalan nga nagpakita nga katapo sila sina nga relihion. Ginsumbong sila sang mga soldado sing pagbinutig, apang dala sang mga kauturan ang ila pahibalo sang paghalin gikan sa relihion; bisan pa natawo sila sa sinang relihion, nagsiling sila nga sila sa karon mga Saksi ni Jehova na, nga nagalakbay pakadto sa ila nga kombension. Bangod sini ang mga soldado nagtugot sa ila sa paglakbay.

Ang mga payunir nagapadayon sang ila pag-alagad upod ang bug-os nga kakugi, kag isa gid ini ka pangpapagsik sa hilikuton. Ang Lalantawan, nga may makalilipay nga de-kolor nga mga panghapin, ginabadbad sing dungan sa tanan nga pangunang pamulong sa rehiyon. Tayuyon ini nga nagaaman sa mga mahigugmaon sang kamatuoran kag pagkamatarong sang ila espirituwal nga “pagkaon sa nagakaigo nga tion.” (Lucas 12:42) Sadtong 1992 nga tuig sang pag-alagad, 674 ka bag-ong utod nga lalaki kag babayi ang nabawtismuhan.

Sing pat-od, ang Dios wala malipat sa binuhatan sang mga kauturan sa Sidlangan nga Europa kag sa gugma nga ila ginpakita para sa iya ngalan. Dugang pa, luyag niya nga ang tanan niya nga sumilimba, bisan diin man sila nagapuyo, magatuman sang maayong laygay nga masunod nga ginhatag ni Pablo sa Hebreo 6:​11, nga nagasiling: “Ginahandum namon nga ang tagsa sa inyo magpakita sing amo man nga kaukod sa pagtigayon sing kabug-usan sang paglaum tubtob sa katapusan.”