Ang Katahom sang Ubanon nga Ulo

MAKALILIPAY gid nga masugilanon ang matutom nga mga lalaki kag mga babayi sang nagligad! Hunahunaa lamang nga masugilanon ang mga lalaki kaangay nanday Noe, Abraham, Moises, kag Juan Bautista, subong man ang mga babayi kaangay nanday Sara, Rahab, Rut, kag Debora! Indi ka bala maganyat sa pagpamati sa ila nga nagasaysay sang ila nasaksihan nga mga kasaysayan tuhoy sa tumalagsahon nga mga hitabo sang nagligad na nga panahon?

Bisan sa karon, indi ka bala malipay sa pagpamati sa matutom nga mga tigulang nga nagasugid sing mga eksperiensia kon paano sila kag ang iban pa nakahupot sing integridad sa Dios sa idalom sang mga pagtilaw, lakip ang mga pagdumili, mga pagsakit, kag pagkabilanggo tungod sa pagkamatarong? Pat-od gid! Ang aton gugma sa Dios kag ang aton pagtahod sa ila magadugang pa samtang ginasugid nila sa aton ang nahanungod sa ila mga balatyagon kag ilabi na ang ila tinagipusuon nga apresasyon sa mahigugmaon nga pag-atipan ni Jehova.

Sa tunga sang katawhan sang Dios, ang matutom nga mga tigulang nga lalaki kag babayi pirme ginatahod bangod sang ila eksperiensia, ihibalo, kag kaalam. Sa katunayan, ang masunod nga laygay ginlakip sa Kasuguan nga ginhatag sang Dios sa mga Israelinhon: “Magtindog ka sa atubangan sang ulo nga ubanon, kag tahura ang nawong sang tigulang nga tawo, kag magkahadlok ka sa imo Dios. Ako amo si Jehova.” (Levitico 19:32) Ang Hebreong tinaga para sa edad ukon katigulangon nagahalin sa gamut nga nagakahulugan sing “pagkaubanon” kag ginabadbad man nga “ulo nga ubanon.” Gani ang mga Israelinhon ginpaabot nga magtindog subong tanda sang pagtahod sa tawo nga tigulang, nagahimo sini nga may matinahuron nga kahadlok sa Dios.

Nagaluntad bala karon inang matinahuron nga panimuot? Halimbawa, mainayuhon bala nga ginabuksan sang mga pamatan-on ang ganhaan para sa mga tigulang? Masami bala nga ginahatag sang mga hoben ukon mga lamharon sa isa ka tigulang ang ila lugar sa gutok nga elebeytor? Ukon ginahatag bala sa kabilugan sang lamharon nga mga indibiduwal sa mga tigulang ang ila pulungkuan sa isa ka gutok nga bus ukon tren? Ang indi paghimo sini natalupangdan bisan sa tunga sang mga Cristiano.

Apang, agod pahamut-an si Jehova, ang mga Cristiano dapat magpanghikot nahisuno sa iya punto-de-vista kag maglikaw sang panghunahuna, panghambal, kag buhat sang ‘mga mahigugmaon sang kaugalingon, dimasinulundon sa mga ginikanan, dimapinasalamaton, kag wala sing gugma sa kaayuhan.’ (2 Timoteo 3:​1-5) Ano, nian, ang ginasiling sang Pulong sang Dios nahanungod sa pagkapamatan-on may kaangtanan sa pagkaubanon sing ulo?

Ang Kusog sang Pamatan-on

Ginakilala sang Biblia ang batan-on nga kusog kag ang mga bentaha sini, nga nagasiling: “Ang katahom sang mga pamatan-on nga lalaki amo ang ila kusog.” (Hulubaton 20:29) Sadto anay sa dumaan nga Israel ang kusog sang mga pamatan-on nga Levinhon gingamit sa templo, sing masami para sa madamong mas mabug-at nga mga hilikuton. Sa karon, ang kalabanan nga trabaho sa mga pabrika, sa mga puluy-an, kag sa mga proyekto sa konstruksion sang ­Watch Tow­er So­cie­ty ginahimo sang mga pamatan-on nga lalaki kag babayi nga naghatag sang ila kusog kag ikasarang sa pagpauswag sang mga interes sang Ginharian. (Mateo 6:33) Busa naagom nila ang maayong pribilehiyo sang pag-alagad sa Dios.

Ang hulubaton nga ginbalikwat bag-o lang nagahinakop sa mga pinamulong, “kag ang katahom sang mga tigulang amo ang ila ubanon nga ulo.” Kon ang batan-on nga kusog ginatingob sa eksperiensia kag kaalam sang mga tinuig, ang tuman ka kusog nga kombinasyon ginahuman.

Sa pag-ilustrar: Ang lamharon nga bag-uhan nga panday nga ginpangabay sa pagtakod sang pila ka entrepanyo nagapanikasog sa paghimo sang asaynment upod ang lamharon nga kusog. Ang mas gulang, mas eksperiensiado nga panday makatalupangod nga walay sapayan sang iya kusog, ang lamharon nga timbang pila ka beses nga nagamartilyo sang lansang antes ini magsalop. Ang mas gulang nga trabahador magapanugda nga uyatan sang lamharon nga lalaki ang martilyo sa punta sang uluyatan, sa baylo nga malapit sa metal nga ulo sini. Sa sini maigo sang lamharon nga lalaki ang mga lansang sing mas makusog, nagakinot sing tion kag enerhiya.

Sa kaanggid, ang lamharon kag mapagsik nga babayi mahimo makatuon paagi sa pagtilawtilaw nga ang iban nga mga panapton mahimo nga mapierde kon indi ini malabhan suno sa mga instruksion. Apang, ang eksperiensiado nga babayi nakahibalo sang kabilihanan sang paghinguyang sing tion nga painpainon ang mga panapton kag labhan ang iban nga mga panapton sing tuhay. Natun-an man niya nga malikawan niya ang pagpamalantsa paagi sa pagpiod sang mga panapton pagpunpon niya sa halayan ukon pagguwa sa dryer.

Ang pagtuon gikan sa eks­periensiado nga mga tawo nagapahapos sang kabuhi. Apang, may tion nga bisan ang mas eksperiensiado nga tawo indi gilayon makahimo sang pila ka trabaho nga mahapos niya anay nga nahimo sang nagligad nga pila ka tuig. Ang isa ka manunulat nagakaigo nga nagsiling: “Daw ano kaayo kuntani kon ang mga pamatan-on may ihibalo kag ang mga may edad may kusog.” Apang daw ano kaayo kon ginaapresyar sang mga may edad ang kusog sang mga pamatan-on kag mapailubon nga ginapaambit sa ila ang eksperiensia nga natigayon sa mga tinuig​—⁠kag ang mga pamatan-on mapainubuson nga ­nagabaton sing mga panugda! Sa sining paagi, lunsay sila magabenepisyo.

Pagtigayon sing Katahom

Indi lamang bastante ang edad. “Indi ang kadalagkuan ang maalam, ukon ang mga tigulang ang nakahangop sing katarungan,” siling sang pamatan-on nga si Elihu. (Job 32:9; Manugwali 4:13) Agod tunay nga pakabahandion bangod sang pagkaubanon nga ulo, ang tigulang nga tawo dapat maghimo sa iya kabuhi sing labi pa sangsa tinamad nga pagpaligad sang iya mga inadlaw nga nagatan-aw sing telebisyon, nagatan-aw sing hampang, ukon indi gani nagalipaylipay lamang. Kag bisan sa tion sang kati­gulangon, ang tigulang dapat magpadayon sa ­pagtuon.

Ang iban nga mga tawo nagatikal nahanungod sa paghimo sing mga butang sa luyag nila, ukon nagasiling sila: “Ang eksperiensia amo ang pinakamaayo nga manunudlo.” Apang, ang Pulong sang Dios nagalaygay: “Ang maalam nga tawo magapamati kag magakuha sing dugang nga tinun-an, kag ang tawo nga may paghangop amo ang isa nga nagatigayon sing malantipon nga panuytoy.” (Hulubaton 1:⁠5; ipaanggid ang 1 Corinto 10:11.) Ang eksperiensia indi pirme ang pinakamaayo nga manunudlo, kay makatuon kita gikan sa mga kasaypanan sang iban nga wala mismo nagahimo sing amo gihapon nga sayop. Isa pa, luyag sang isa ka Cristiano nga huptan sa hunahuna nga ang “ubanon nga ulo amo ang purongpurong sang katahom kon makita ini sa dalanon sang pagkamatarong.” (Hulubaton 16:31) Ang kabuhi nga ginhinguyang sa matutom nga pag-alagad kay Jehova matahom gikan sa iya pagtamod kag nagakabagay sang pagtahod sang iban pa subong maayong halimbawa. Sa pagkamatuod, ang pagtuon nahanungod sa Dios kag ang pagtigayon sing eksperiensia sa “dalanon sang pagkamatarong” sarang masugdan sing maaga sa kabuhi kag dapat nga isa ka walay katapusan nga proseso.​—⁠Roma 11:​33, 34.

Sarang ini mailustrar paagi sa isa ka eksperiensia sang siete-anyos nga bata nga lalaki sa Sweden. Ginpamangkot niya ang manugtatap sang kongregasyon sa Teokratikong Eskwelahan sa Pagministro kon mahimo sia makabuylog sa eskwelahan. Ang manugtatap namangkot, “Ngaa?” Sa sina, ang bata nagsabat: “Indi mahimo pag-usikan sang isa ang iya bug-os nga kabuhi!” (Manugwali 12:⁠1) Daw ano ka positibo nga halimbawa para sa mga pamatan-on kag mga tigulang!

Pagtahod sa Ubanon nga Ulo

Ang makatulublag nga huyog sa modernong katilingban amo ang paghatag sing daku nga kabilihanan sa pisikal nga ikasarang kag atletiko nga abilidad kag ang pagpaubos sa mga tigulang. Ano ang dapat nga panimuot sang Cristiano sa mga ubanon sing ulo sa kongregasyon?

Sa baylo nga pasipakpakan ang mga tigulang nga Cristiano, dapat kita magpatugsiling kag maghinguyang sing tion upod sa ila. Halimbawa, sa semanal nga mga miting sang mga Saksi ni Jehova sa Kingdom Hall, ginapanikasugan mo bala nga tamyawon ang mga tigulang? Ginaapresyar gid nila ang panamyaw sang mga bata kag sang iban pa. Kag malipayon gid ang mga tigulang sa pagbuylog sa sosyal nga mga pagtinipon sang mga masigkatumuluo nga lainlain sing edad! Bisan pa ang lamharon nga mga mag-asawa may palareho nga luyag sa iban pa nga mga minyo nga pareho sing pang-edaron nila, makalilipay nga ilakip ang mga tigulang sa sinang masadya nga mga pagtilipon.​—⁠1 Tesalonica 3:12; 5:⁠15.

Daw ano ka importante ang mangin mapatugsilingon kon nagapakigsugilanon sa mga tigulang! Sang ang tigulang nga utod nga lalaki nga may 40 ka tuig sang pag-alagad kay Jehova nakigsugilanon anay sa isa pa ka gulang kon paano sia magamit sa kongregasyon, ang lamharon nga utod nga lalaki nagsiling: “Diutay katama lamang ang imo mahimo.” Isa gid ka dimaluluy-on nga komento! Ang tigulang nga utod nga lalaki may mas diutay nga enerhiya sangsa nagligad, ang iya pagpakigbahin sa pag-alagad sa latagon nagbuhin, kag ang pila ka pribilehiyo sa pagdumala mahimo nga tuman kabudlay para sa iya karon nga mga ikasarang; apang, madamo sia sing mahimo. May mga tinuig sia sang natipon nga kaalam kag eksperiensia sa dalanon sang pagkamatarong. Bangod inang mga tigulang nangabudlay sing lakas subong mga manugbantala sang Ginharian, nagbatas sing paghingabot, nag-abaga sing mabug-at nga mga lulan sang Cristianong responsabilidad, kag naghanas sa iban pa, ang katawhan sang Dios karon may yara mabakod nga organisasyon nga ginasakdag sang iya espiritu. Kabay, nian, nga pakitaan naton ining mga tigulang sing pagtahod subong maalam nga mga manuglaygay, mahigugmaon nga mga manugbantay, kag epektibo nga mga manunudlo.

May maayo man nga rason nga binagbinagon sing serioso ang mga panugda nga ginahatag sang mga tigulang. Halimbawa, ang isa ka eksperiensiado nga utod nga lalaki nagpanugda nga ang ganhaan sang isa ka Kingdom Hall indi pag-ibutang sa nakatundan nga bahin sang tinukod. Ang batan-on nga mga kauturan nga lalaki nga mas nabalaka sa katahom sang tinukod wala magsunod sang iya panugda. Apang, pagligad sang pila ka tuig, ang ganhaan dapat isaylo liwat bangod ang dalayon nga hangin kag ulan gikan sa nakatundan nagaguba sini. Ang praktikal nga kaalam sang eksperiensia nagalabaw sa mga butang may kaangtanan sa katahom. Kon ginatahod sang mga batan-on nga indibiduwal ang mga tigulang paagi sa pagpamati sa ila mga opinyon kag praktikal nga kaalam, mahimo ini nga makakinot sa tion kag kuwarta. Bisan kon ang panugda sang tigulang wala masunod, sarang sia matahod paagi sa pagpahibalo sa iya nga ginbinagbinag ini, apang ang iban pa nga mga butang nagdul-ong sa lain nga desisyon.​—⁠Ipaanggid ang Hulubaton 1:⁠8.

Magtan-aw sa Unahan, Indi sa Likuran

Ang iban nga mga tigulang may amo sini nga pagtamod: “Wala na sing tion nga kaangay sang nagligad sang ikaw kag ako bata pa.” Apang, sa baylo nga maghunahuna sang mga tion nga nakaligad na, inang mga tigulang sarang mapalig-on sa pagtan-aw sa unahan sa adlaw nga matigayon nila ang ila langitnon nga padya ukon matigayon liwat ang pamatan-on nga kusog sa idalom sang pagginahom sang Ginharian sang Dios. Samtang, dapat nila marealisar ang ila mga limitasyon tungod sa edad. Ini nga pagka­realisar kag ikasarang sa pagpakadlaw importante kon ang tigulang mahimo nga daw ginlaktawan sa mga pribilehiyo sang pag-alagad.

Halimbawa, ang tigulang nga utod nga lalaki mahimo nga tayuyon nga gingamit sa mga programa sa distrito nga kombension sang mga tinuig nga nagligad. Madamo na karon sing sangkol nga mga gulang kag mas masangkad na ang mapilian nga mga lalaki nga may ikasarang sa pagpanudlo. Bisan nga bata pa, ang iban sining mga gulang nagpakita sing kakugi kag mga ikasarang, makatudlo sing maayo kag makahatag sing malulo nga laygay, kag makapalig-on sa iban. (1 Tesalonica 5:​12, 13; 1 Timoteo 5:17) Subong resulta, ang isa ka tigulang nga utod nga lalaki nga wala sa programa sang kombension mahimo magbatyag nga ginlaktawan kag mahimo nga magkasubo nga ang mga pribilehiyo ginhatag sa batan-on nga mga gulang. Apang, inang negatibo nga balatyagon nga tuga sang tawhanon nga pagkadihimpit sarang malandas. Sa katunayan, ang tanan sa kongregasyon sarang makabulig paagi sa pagpahibalo sa mga tigulang nga sila ginakinahanglan, nga sila ginahigugma tungod sang ila katutom, kag nga ginapabilihan ang ila mga opinyon.

Sa pagkamatuod, dapat dumdumon sang tigulang nga ang mga masigkasumilimba dapat tahuron subong nga luyag man niya nga tahuron. (Mateo 7:12; Roma 12:10) Sa baylo nga magbatyag nga ginpilit sila nga magretiro bangod sang ila edad kag mag-antos bangod sang negatibo nga pagtamod, ang mga tigulang dapat magkasadya tungod sang ila mga tinuig sang matutom nga pag-alagad. Kag pat-od gid, kita tanan dapat magpasalamat nga subong resulta sang pagpakamaayo ni Jehova, nagadugang pa nga kadamuon sang kalipikado nga mga kauturan nga lalaki ang nagapakigbahin sa lulan sang trabaho kag nagabaton sang mga responsabilidad sa kongregasyon samtang ang kadam-an sang “iban nga mga karnero” nagadugok sa Cristianong organisasyon.​—⁠Juan 10:16; Isaias 60:​8, 22; 2 Timoteo 2:⁠2.

Bangod sang kasakit, nagaluya nga panglawason, ukon iban pa nga mga rason, ang ubanon nga ulo kon kaisa nagaburingot. Nagakinahanglan ini sing paghangop kag kahanuklog sa bahin sang iban pa nga mga katapo sang pamilya ukon kongregasyon. Nagakinahanglan man ini nga ang mga tigulang magapangabudlay sing lakas nga huptan ang positibo nga panimuot, nga magpabilin nga lamharon sa tagipusuon kag hunahuna. Sang ang mas bata nga kaupod sa kuwarto sang isa ka katapo sang Nagadumala nga Hubon manughalin sa Bethel mga pila ka tuig na ang nagligad, ang mas may edad nga katapo nangabay sa iya nga manugda sing maayo nga tal-us kag nagsiling nga luyag niya ang mas bata, hamtong nga utod sa pagbulig sa iya nga magpabilin nga lamharon kag aktibo. Ang tigulang nga hinaplas nga utod wala sing tuyo nga magretiro ukon maghinay, kay may hilikuton pa nga hilimuon. Daw ano kaayo nga halimbawa sang pagtan-aw sa unahan kag paghupot sing positibo nga panimuot!

Sa walay duhaduha, “ang katahom sang mga pamatan-on nga lalaki amo ang ila kusog, kag ang ubanon nga ulo amo ang purongpurong sang katahom.” Daw ano katahom kon ginagamit sang mga batan-on ang ila mga enerhiya kag ginagamit sang mga tigulang ang ila kaalam sa paglakat sa dalanon sang pagkamatarong! Ang tigulang kag lamharon nga mga Cristiano lunsay makatigayon sing daku nga kalipay samtang nahiusa nila nga ginapauswag ang matuod nga pagsimba kay Jehova nga Dios, “ang Dumaan sang mga Adlaw.”​—⁠Daniel 7:⁠13.

[Piktyur sa pahina 28]

Ang ubanon sing ulo nga mga Cristiano madamo sing mahatag para sa kaayuhan sang iban