Report sang mga Manugbantala sang Ginharian
Ang Pagkabunayag Nagarekomendar sang Amon Ministeryo
ANG pagkabunayag isa ka importante nga kinahanglanon para sa mga Cristiano. Si apostol Pablo nagsulat sa Hebreo 13:18: “Nagasalig kami nga may bunayag kami nga konsiensia, kay ginahandum namon nga maggawi sing bunayag sa tanan nga butang.” Ang amon pagkabunayag ‘nagapuni sang panudlo sang amon Manluluwas, ang Dios, sa tanan nga butang.’ (Tito 2:10) Ang pagkabunayag, subong man ang pagbantala sang Ginharian, sang duha ka Cristiano sa ginharian sang Tonga sa Bagatnan nga Pasipiko naghatag sing epektibo nga panaksi. Ang sanga talatapan sang Watch Tower Society sa Western Samoa nagsulat:
“Mga tinuig na nga ginbantala sang mag-asawa nga Saksi ang Ginharian sang Dios sa mga tawo sa apat ka minuro sa ila pulo apang wala sing kitaon nga mga bunga. Nian, sang magmasakit ang iya bana, ang asawa amo ang nagtatap sang ila plantasyon kag nag-ani kag nagbulad sang kopra, ang ila lamang nga palangabuhian. Sang mag-abot ang tion nga inspeksionon na ang kopra sang mga bumalakal, may isa ka sako nga nagsimpon sa iya lima ka sako. Ginpanugda sang mga tagaminuro nga iyahon na lang niya ang sako kag tamdon ini subong pagpakamaayo halin sa Dios. Apang, wala magpasugot ang utod nga babayi kag, bisan sang bayaran sia para sa anom ka sako, ang kantidad lamang nga para sa iya ang ginbaton niya. Ang iya pagkabunayag natalupangdan.
“Sang ulihi, sang ang bana manugkadto sa iban nga pulo, ang tag-iya sang tiendahan naglihug nga magpabakal sing pila ka butang sa iya. Ginhimo sang Saksi ang ginlihug kag gin-uli ang sensilyo sa tawo. Nakibot ang tawo. Nagsiling sia nga amo ini ang nahaunang tion nga may nag-uli sang sensilyo. Ang iban nga ginpabakal niya wala nagauli sang sensilyo. Isa pa gid ka bes, sang may kinahanglan ang Saksi sa tiendahan sang tawo, ginhatag sang tawo sa iya ang yabi sang tiendahan, kag ginsilingan sia nga kuhaon lang kon ano ang kinahanglan niya kag ibilin ang bayad sa tiendahan. Ang iban nga nakabati namangkot sa tag-iya kon ngaa ginahatag niya ang yabi sang tiendahan sa Saksi kag indi sa ila. Ginpaathag sang tag-iya nga ang Saksi amo lamang ang masaligan niya sa minuro.
“Ang maayo nga paggawi sining mag-asawa ginahambalan sang mga tagaminuro. Ang mga Saksi nakilal-an tungod sang ila pagkabunayag, sang ila walay nadampigan nga tindog sa politika, kag sang ila pagpanaksi nahanungod sa Ginharian sang Dios, nga nagapakita sang kinatuhayan sa tunga sang pagtuluuhan sang mga tagaminuro kag sang mga panudlo sang Biblia. Karon kon may mga pamangkot sa Biblia, ang mga tawo masami nga nagapamangkot sa mga Saksi para sa mga sabat. Ang bana nagabangon pa gani kon gab-i, nagakadto sa miting sang minuro, kag nagasabat sang mga pamangkot sa isa ka tema sa Biblia. Kon nagakumpanyar sa lubong sa minuro, masunson sia ginapangabay nga ipakita kon ano ang ginasiling sang Biblia nahanungod sa kamatayon, kag ang iya mga komento ginabaton.”
Gani ang pagkabunayag sining mag-asawa nga Saksi kag ang ila pagbantala sang Ginharian nagahatag sing maayong panaksi sa sining matahom nga pulo sa Bagatnan nga Pasipiko. Nagalaum sila nga ang iban magatuon sa Biblia kag magatindog sa kamatuoran. Kon himuon nila ini, si Jehova nga Dios magapakamaayo gid sa ila.—Juan 8:32.