Pagpangita sing Masaligan nga mga Tagna
“SIA nga makatagna sang mga hitabo sing tatlo ka adlaw antes magamanggaranon sa linibo ka tuig.” Amo ini ang ginasiling sang isa ka Intsik nga hulubaton.
Luyag mahibaluan sang katawhan kon ano ang palaabuton, kag madamo ang nalipay magbayad sing daku nga kantidad para sa amo sina ka masaligan nga impormasyon. Nagapangita sila sing masaligan nga mga tagna. Ang pagkalapnag sang mga tagna subong sang paghibalo sang paniempo kag sang mga pulupakot sa ekonomiya nagapakita nga interesado kita sa mga hitabo sa palaabuton. Dugang pa, ang masaligan nga ihibalo sa palaabuton nagabulig sa aton sa pagplano kag sa paghimos sang aton kabuhi.
Ang handum nga mahibaluan kon ano ang matabo sa palaabuton nagatiklod sa madamo sa pagkonsulta sa mga babaylan, mga guru, mga astrologo, kag mga arbularyo. Ang mga balaligyaan sing libro kag magasin bugana sing dumaan kag modernong mga sinulatan sang mga tawo nga nagaangkon nga makapakot sang palaabuton. Apang ining mga sahi sang pagtagna ginapangduhaduhaan. Ang Romanong manghimanwa nga si Cato ginreport nga nagsiling: ‘Natingala ako nga ang isa ka babaylan wala nagakadlaw kon makakita sia sing isa pa ka babaylan.’
Matuod, ang mga tagna madamo sing sahi. Sang 1972 ang internasyonal nga grupo sang mga akademiko kag mga negosyante nga nakilal-an subong ang Club of Rome nagbalhag sing isa ka pagtuon nga nagapakot nga ang kalibutan maubusan sa ulihi sang indi na maislan nga mga manggad. Maubusan ini sing bulawan sa 1981, sing merkuryo sa 1985, sing zinc sa 1990, sing petrolyo sa 1992, kag iban pa. Nakita naton karon nga ining mga pakot indi matuod.
Madamong tagna ang ginpasad sa relihiosong mga pagtamod. Halimbawa: Ang Saxon nga obispo nga si Wulfstan nagpati nga ang paglikop sang Olandes sa Inglaterra sang maaga nga bahin sang ika-11 nga siglo isa ka tanda nga ang katapusan sang kalibutan malapit na. Sang 1525, si Thomas Münzer nanguna sa pag-alsa sang Aleman nga mga mangunguma bangod nakita niya sa isa ka palanan-awon ang mga anghel nga nagabaid sing mga galab para sa ginhunahuna niya nga daku nga ani. Sing maathag, ining mga tagna indi eksakto.
Subong sang mahimo nga nahibaluan na ninyo, ang Biblia nagaunod sing mga tagna. Isa pa, ang mga manunulat sang Biblia nagasiling nga gin-inspirar sila sang Dios. Ang Cristianong si apostol Pedro nagsiling: “Walay tagna sang Kasulatan nga maggikan sa kaugalingon nga pagpatpat. Kay wala gid sing tagna nga nag-abot bangod sa kabubut-on sang tawo, kundi ang mga tawo nga gintandog sang balaan nga espiritu nagpamulong gikan sa Dios.”—2 Pedro 1:20, 21.
Lakip sa iban nga mga butang, ang Biblia nagatagna sing lainlain nga mga hitabo nga nagapakilala sa kaliwatan nga magaeksperiensia sang presensia ni Jesucristo nga may gahom sa langitnon nga Ginharian. Ang dimatupungan nga inaway, gutom, linog, kag ang pagkalusod sang tawhanon nga moral nga kusog mangin tanda sang ginatawag sa Biblia nga “katapusan nga mga adlaw.” (2 Timoteo 3:1-5; Mateo 24:3-14, 34) Suno sa Biblia, ang pagdula sa karon nga sistema sang mga butang magahatag sing dalan para sa kalipay sang katawhan sa bag-ong kalibutan sang walay katapusan nga mga pagpakamaayo.—2 Pedro 3:13; Bugna 21:1-4.
Paano ninyo ginatamod inang mga tagna sa Biblia? Kaangay sang madamong iban pa nga mga tagna, mga bulubanta lamang bala ini? Matilawan naton ang pagkamasaligan sang wala pa matuman nga mga tagna sang Biblia paagi sa paghibalo kon bala ang mga tagna sang Biblia nahanungod sa nagligad nga mga hitabo masaligan. Sa masunod nga artikulo, binagbinagon naton ang pila sini.
[Credit Line]
Sa maayong kabubut-on sang National Weather Service