Pag-alagad kay Jehova Upod ang Nagasakripisyo sang Kaugalingon nga Espiritu

“Kon ang bisan sin-o luyag magsunod sa akon, dapat niya sikwayon ang iya kaugalingon kag pas-anon ang iya usok sang pag-antos kag padayon nga magsunod sa akon.”​—⁠MATEO 16:⁠24.

1. Paano ginpahibalo ni Jesus ang iya mga disipulo nahanungod sa iya nagahilapit nga kamatayon?

SA NAGAYELO nga palibot nga putukputukan sang Bukid sang Hermon, nalab-ot ni Jesucristo ang isa ka daku nga tikang sa iya kabuhi. Kubos sa isa ka tuig na lang ang iya ikabuhi. Nahibaluan niya ini; apang walay hinalung-ong ang iya mga disipulo. Nag-abot na karon ang tion nga dapat mahibaluan nila ini. Matuod, nasambit na anay ni Jesus ang iya nagapakari nga kamatayon, apang amo ini ang una nga tion nga ginpaathag niya ini. (Mateo 9:15; 12:40) Ang rekord ni Mateo mabasa: “Kutob sadtong tion nagsugod si Jesus sa pagpahayag sa iya mga disipulo nga dapat sia magkadto sa Juerusalem kag mag-antos sing madamong butang sa mga gulang kag sa puno nga mga saserdote kag mga escriba, kag nga pagpatyon, kag pagbanhawon sa ikatlong adlaw.”​—⁠Mateo 16:21; Marcos 8:​31, 32.

2. Ano ang reaksion ni Pedro sa ginsiling ni Jesus nahanungod sa Iya palaabuton nga pag-antos, kag paano nagsabat si Jesus?

² Ilisipon na lang ang mga inadlaw ni Jesus. Apang, naakig si Pedro sa sadtong daw makahaladlok nga panghunahuna. Indi niya mabaton nga pagapatyon ang Mesias. Busa, nangahas si Pedro nga sabdungon ang iya Agalon. Bangod sang maayo gid nga katuyuan, pahinali nga naglaygay sia: “Magmaluluy-on sa imo kaugalingon, Ginuo; indi gid ini mahanabo sa imo.” Apang ginsikway sa gilayon ni Jesus ang sayop nga kaluoy ni Pedro, subong ka positibo sang isa nga pat-od nga magadugmok sa ulo sang isa ka dalitan nga man-ug. “Halin ka sa atubangan ko, Satanas! Kasandaran ka sa akon, kay wala ka nagapanghunahuna sang mga butang nga iya sang Dios, kundi sang iya sang tawo.”​—⁠Mateo 16:​22, 23.

3. (a) Paano sing dihungod ginhimo ni Pedro ang iya kaugalingon nga isa ka ahente ni Satanas? (b) Paano si Pedro isa ka kasandaran sa nagasakripisyo sang kaugalingon nga dalanon?

³ Indi hungod nga ginhimo ni Pedro ang iya kaugalingon nga isa ka ahente ni Satanas. Ang sabat ni Jesus subong ka determinado sang ginsabat niya si Satanas sa kahanayakan. Didto gintinguhaan sang Yawa nga sulayon si Jesus sing isa ka mahapos nga pagkabuhi, isa ka pagkahari nga indi na niya pag-antusan. (Mateo 4:​1-10) Karon ginapalig-on sia ni Pedro nga magmaluluy-on sa iya kaugalingon. Nahibaluan ni Jesus nga indi ini ang kabubut-on sang iya Amay. Ang iya kabuhi dapat may pagsakripisyo sang kaugalingon, indi pagpaayaw sa kaugalingon. (Mateo 20:28) Si Pedro nangin kasandaran sa sina nga dalanon; ang iya maayo sing katuyuan nga simpatiya nangin isa ka siod.⁠a Apang, maathag nga nahangpan ni Jesus nga kon binagbinagon niya ang bisan anong ideya tuhoy sa kabuhi nga wala sing pagsakripisyo, madula niya ang kahamuot sang Dios kay mahulog sia sa makamamatay nga siod ni Satanas.

4. Ngaa ang kabuhi sa patuyang nga kasulhay indi para kay Jesus kag sa iya mga sumulunod?

⁴ Busa, kinahanglan nga pasibuon ang panghunahuna ni Pedro. Ang iya ginhambal kay Jesus ideya sang tawo, indi sang Dios. Ang kabuhi sang patuyang nga kasulhay, nga isa ka mahapos nga dalan gikan sa pag-antos, indi para kay Jesus; kag indi man para sa iya mga sumulunod, kay si Jesus masunod nga nagsiling kay Pedro kag sa nabilin sang mga disipulo: “Kon ang bisan sin-o luyag magsunod sa akon, dapat niya sikwayon ang iya kaugalingon kag pas-anon ang iya usok sang pag-antos kag padayon nga magsunod sa akon.”​—⁠Mateo 16:⁠24.

5. (a) Ano ang hangkat sa Cristianong pagkabuhi? (b) Para sa anong tatlo ka kinahanglanon nga mga butang dapat mangin handa ang isa ka Cristiano?

⁵ Sa liwat kag liwat, ginsulit ni Jesus ining yabi nga tema: ang hangkat sang Cristianong pagkabuhi. Agod mangin mga sumulunod ni Jesus, ang mga Cristiano, kaangay sang ila Lider, dapat mag-alagad kay Jehova nga may nagasakripisyo sang kaugalingon nga espiritu. (Mateo 10:​37-39) Sa amo, ginlista niya ang tatlo ka kinahanglanon nga butang nga dapat handaan sang mga Cristiano nga himuon: (1) sikwayon ang kaugalingon, (2) pas-anon ang iya usok sang pag-antos, kag (3) padayon nga sundon Sia.

“Kon ang Bisan Sin-o Luyag Magsunod sa Akon”

6. (a) Paano ginasikway sang isa ka tawo ang iya kaugalingon? (b) Sin-o ang dapat naton pahamut-an labaw sa aton kaugalingon?

⁶ Ano ang kahulugan sang pagsikway sa kaugalingon? Nagakahulugan ini nga dapat dingutan sang isa ka tawo ang iya kaugalingon sing bug-os, isa ka sahi sang kamatayon sa iya kaugalingon. Ang sadsaran nga kahulugan sang Griegong tinaga nga ginbadbad “pagsikway” amo ang “pagsiling sing indi”; nagakahulugan ini sing “pagdingot sing bug-os.” Busa, kon ginabaton mo ang hangkat sang Cristianong pagkabuhi, kinabubut-on nga ginaampo mo ang imo kaugalingon nga mga ambisyon, kasulhayan, mga handum, kalipay, kasadya. Buot silingon, ginahatag mo ang imo bug-os nga kabuhi kag ang tanan nga nadalahig sa sini kay Jehova nga Dios sa tanan nga tion. Ang pagdumili sa kaugalingon nagakahulugan sing kapin pa sa pagdingot sa kaugalingon sing pila ka kalalipayan sa tion kag tion. Sa baylo, nagakahulugan ini nga dapat itugyan sang isa ka tawo ang pagpanag-iya sa iya kaugalingon kay Jehova. (1 Corinto 6:​19, 20) Ang isa ka tawo nga nagsikway sang iya kaugalingon nagakabuhi sa pagpahamuot sa Dios, indi sa iya kaugalingon. (Roma 14:8; 15:⁠3) Nagakahulugan ini nga sa tagsa ka tion sang iya kabuhi, nagasiling sia sing indi sa makagod nga mga kailigbon kag sing huo kay Jehova.

7. Ano ang usok sang pag-antos sang Cristiano, kag paano niya ini ginapas-an?

⁷ Busa, ang pagpas-an sa imo usok sang pag-antos nagakahulugan sing serioso nga mga butang. Ang pagpas-an sing usok isa ka lulan kag simbulo sang kamatayon. Ang Cristiano handa sa pag-antos kon kinahanglanon, ukon pakahuy-an ukon paantuson ukon patyon pa gani bangod sumulunod sia ni Jesucristo. Si Jesus nagsiling: “Ang bisan sin-o nga wala nagapas-an sang iya usok sang pag-antos kag nagasunod sa akon indi takus sa akon.” (Mateo 10:38) Indi tanan sang nagaantos nagapas-an sing usok sang pag-antos. Ang malauton may madamo nga “kalisod” apang wala sing usok sang pag-antos. (Salmo 32:10) Apang, ang kabuhi sang Cristiano isa ka kabuhi sang pagpas-an sa usok sang pag-antos sang mahalaron nga pag-alagad kay Jehova.

8. Anong pagkabuhi ang ginpahamtang ni Jesus para sa iya mga sumulunod?

⁸ Ang katapusan nga kondisyon nga ginsambit ni Jesus amo nga dapat padayon kita nga magsunod sa iya. Ginapatuman ni Jesus nga indi lamang batunon naton kag patihan ang iya gintudlo kundi, nga sa aton bug-os nga kabuhi, padayon nga sundon naton ang sulundan nga iya ginpahamtang. Kag ano ang pila sang talalupangdon nga mga bahin sang iya sulundon nga kabuhi? Sang ginhatag niya sa iya mga sumulunod ang ila katapusan nga hilimuon, sia nagsiling: “Busa lakat kamo kag himuon nga mga disipulo . . . , nga nagapanudlo sa ila sa pagtuman sang tanan nga ginsugo ko sa inyo.” (Mateo 28:​19, 20) Ginbantala kag gintudlo ni Jesus ang maayong balita sang Ginharian. Subong man sang iya ginbuligan nga mga disipulo kag, sa pagkamatuod, sang bug-os nga unang Cristianong kongregasyon. Ining makugi nga pagpanghikot, dugang sa ila indi pagpakigbahin sa kalibutan amo ang nagdala sa ila sang dumot kag pagpamatok sang kalibutan, nga nagpabug-at pa sang usok sang pag-antos nga ila ginpas-an.​—⁠Juan 15:​19, 20; Binuhatan 8:⁠4.

9. Paano gintratar ni Jesus ang iban nga mga tawo?

⁹ Ang isa pa ka talalupangdon nga sulundon sa kabuhi ni Jesus amo ang iya pagtratar sa iban nga mga tawo. Maluluy-on sia kag “malum-ok sing panghunahuna kag mapainubuson sing tagipusuon.” Sa amo, ang iya mga tagpalamati napapagsik kag napalig-on sang iya presensia. (Mateo 11:29) Wala niya pagpilita sila nga sundon sia ukon naghatag sing madamo nga pagsulundan kon paano sila dapat maghikot; ukon ginpabatyag sila nga nakasala agod piliton sila nga mangin iya mga disipulo. Walay sapayan sang ila nagasakripisyo sang kaugalingon nga kabuhi, nangin malipayon gid sila. Daw ano ka tuhay sa mga may kalibutanon nga espiritu sang pagpatuyang sa kaugalingon nga nagatanda sang “katapusan nga mga adlaw”!​—⁠2 Timoteo 3:​1-4.

Palambua kag Hupti ang Nagasakripisyo sang Kaugalingon nga Espiritu ni Jesus

10. (a) Suno sa Filipos 2:​5-8, paano ginsikway ni Cristo ang iya kaugalingon? (b) Kon mga sumulunod kita ni Cristo, anong panghunahuna ang dapat naton ipasundayag?

¹⁰ Si Jesus mismo nagpahamtang sing halimbawa sa pagsikway sa kaugalingon. Ginpas-an niya ang iya usok sang pag-antos kag padayon nga ginpas-an ini paagi sa paghimo sang kabubut-on sang iya Amay. Si Pablo nagsulat sa mga Cristiano sa Filipos: “Hupti ninyo ini nga hunahuna nga yara man kay Cristo Jesus, nga, bisan sa dagway sang Dios, wala niya pagbilanga ang pagpakigtupong sa Dios nga butang nga pag-agawon. Wala, kundi gin-ula niya ang iya kaugalingon kag nangin sa dagway sang ulipon kag natawo sa kaanggid sang mga tawo. Kapin pa sa sina, sang nakita ang iya kaugalingon sa bayhon sang tawo, nagpaubos sia sang iya kaugalingon kag nangin masinulundon tubtob sa kamatayon, huo, kamatayon sa usok sang pag-antos.” (Filipos 2:​5-8) Sin-o ang makasikway sang iya kaugalingon sing kapin pa ka bug-os sangsa sina? Kon ikaw iya ni Cristo Jesus kag isa ikaw sa iya mga sumulunod, dapat mo man huptan ini nga panghunahuna.

11. Ang nagasakripisyo sang kaugalingon nga pagkabuhi nagakahulugan sing pagkabuhi para kay sin-o kabubut-⁠on?

¹¹ Ang isa pa ka apostol, nga si Pedro, nagasugid sa aton nga sanglit si Jesus nag-antos kag napatay tungod sa aton, dapat armasan sang mga Cristiano ang ila kaugalingon, kaangay sang nakapangaman sing maayo nga mga soldado, nga may panghunahuna ni Cristo. Sia nagsulat: “Nian sanglit nga nag-antos si Cristo sa unod, sangkapi ang inyo kaugalingon sing amo man nga panghunahuna; kay ang tawo nga nakaantos sa unod nakauntat sa sala, agod nga indi na niya pag-ikabuhi ang iya nabilin nga tion sa unod sa mga kailigbon sang mga tawo kundi sa kabubut-on sang Dios.” (1 Pedro 3:18; 4:​1, 2) Ang nagasakripisyo sang kaugalingon nga dalanon ni Jesus maathag nga nagpakita kon ano ang iya ginbatyag nahanungod sa kabubut-on sang Dios. Determinado sia sa iya debosyon, pirme ginauna ang kabubut-on sang iya Amay sangsa iya kaugalingon, bisan tubtob sa punto sang isa ka makahuluya nga kamatayon.​—⁠Mateo 6:10; Lucas 22:⁠42.

12. Ginkangil-aran bala ni Jesus ang nagasakripisyo sang kaugalingon nga pagkabuhi? Ipaathag.

¹² Bisan pa ang nagasakripisyo sang kaugalingon nga pagkabuhi ni Jesus mabudlay kag makahalangkat nga banas para sa iya, wala niya ini pagkangil-ari. Sa baylo, nagbatyag si Jesus sing kalipay sa pagpasakop sa kabubut-on sang Dios. Para sa iya, ang paghimo sang kabubut-on sang iya Amay subong sang pagkaon. Nakabatyag sia sing matuod nga kaayawan gikan sa sini, subong sang mabatyagan sang isa gikan sa manamit nga pagkaon. (Mateo 4:4; Juan 4:34) Sa amo, kon luyag mo mangin malipayon kag maayawan sa kabuhi, ang lamang nga himuon mo amo nga sundon ang halimbawa ni Jesus paagi sa pagpalambo sang iya panghunahuna.

13. Paano ang gugma amo ang nagapahulag nga puwersa sa likod sang nagasakripisyo sang kaugalingon nga espiritu?

¹³ Sa pagkamatuod, ano ang nagapahulag nga puwersa sa likod sang nagasakripisyo sang kaugalingon nga espiritu? Sa isa ka tinaga, amo ang gugma. Si Jesus nagsiling: “ ‘Dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Ini amo ang daku kag nahaunang sugo. Ang ikaduha, kaangay sini, amo ini, ‘Dapat mo higugmaon ang imo isigkatawo subong sang imo kaugalingon.’ ” (Mateo 22:​37-39) Indi mahimo nga ang isa ka Cristiano magatinguha sa pagpahamuot sa iya kaugalingon kag, sa amo man nga tion, nagatuman sinang mga pulong. Labaw sa bisan anong butang, ang iya gugma kay Jehova kag dayon ang iya gugma sa isigkatawo amo dapat ang iya kalipay kag interes. Amo sina ang pagkabuhi ni Jesus, kag amo man sina ang ginapaabot niya sa iya mga sumulunod.

14. (a) Anong mga salabton ang ginapaathag sa Hebreo 13:​15, 16? (b) Ano ang nagatiklod sa aton sa pagbantala sing maayong balita nga may kakugi?

¹⁴ Nahangpan ni apostol Pablo ining kasuguan sang gugma. Sia nagsulat: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan. Dugang pa, dili malimot sa paghimo sing maayo kag sa pagpanagtag sang yara sa imo, kay sa amo nga mga halad nahamuot ang Dios.” (Hebreo 13:15, 16) Ang mga Cristiano wala nagahalad kay Jehova sing halad nga mga sapat ukon kaangay sini; busa, wala sila nagakinahanglan sing tawhanon nga mga saserdote sa isa ka materyal nga templo nga magdumala sa ila pagsimba. Ang aton halad sang pagdayaw ginahalad paagi kay Cristo Jesus. Kag ginapakita naton ang aton gugma sa Dios paagi labi na sa sinang halad sang pagdayaw, inang dayag nga pagtu-ad sang iya ngalan. Ang aton dimakagod nga espiritu nga nanggamot sa gugma ilabi na nagapalig-on sa aton nga ibantala ang maayong balita sing makugi, nagatinguha nga mangin handa pirme sa paghalad sa Dios sing bunga sang aton mga bibig. Sa sining paagi ginapakita man naton ang aton gugma sa isigkatawo.

Ang Pagsakripisyo sang Kaugalingon Nagadala sing Bugana nga mga Pagpakamaayo

15. Anong nagapangusisa nga mga pamangkot tuhoy sa pagsakripisyo sang kaugalingon ang mapamangkot naton sa aton kaugalingon?

¹⁵ Magdulog sa makadali kag binagbinaga ang masunod nga mga pamangkot: Ang akon bala pagkabuhi karon nagapakita sing nagasakripisyo sang kaugalingon nga dalanon? Ang akon bala mga tulumuron nagatudlo sa sina nga kabuhi? Nagaani bala sing espirituwal nga mga kaayuhan ang mga katapo sang akon pamilya gikan sa akon halimbawa? (Ipaanggid ang 1 Timoteo 5:⁠8.) Kamusta ang mga ilo kag ang balo nga mga babayi? Nagabenepisyo man bala sila gikan sa akon nagasakripisyo sang kaugalingon nga espiritu? (Santiago 1:27) Madugangan ko bala ang tion nga ginahinguyang ko sa akon dayag nga paghalad sing pagdayaw? Masarangan ko bala ang pribilehiyo sang pagpayunir, pag-alagad sa Bethel, ukon pagmisyonero, ukon makasaylo bala ako sa isa ka duog diin mas daku ang kinahanglanon para sa mga manugbantala sang Ginharian?

16. Paano ang pagkamaideyahon makabulig sa aton sa pagsakripisyo sang kaugalingon?

¹⁶ Kon kaisa diutay lamang nga pagkamaideyahon ang kinahanglan agod malab-ot ang aton bug-os nga ikasarang sa pag-alagad kay Jehova upod ang nagasakripisyo sang kaugalingon nga espiritu. Halimbawa, si Janet, isa ka regular payunir sa Ec­ua­dor, bug-os tion nga nagatrabaho. Wala magdugay, nabudlayan na sia sa iya iskedyul sa paglab-ot sang oras nga kinahanglanon para sa mga regular payunir upod ang malipayon nga espiritu. Namat-od sia nga ipaathag ang iya problema sa iya amo kag nangabay nga buhinan ang iya oras sa pagtrabaho. Sanglit wala magsugot ang iya amo, ginpaupod niya si Maria, nga nagapangita sing part-time nga trabaho agod makapayunir sia. Nanugda sila nga tungaon nila ang bug-os adlaw nga pagtrabaho. Nagsugot ang amo. Karon ining duha ka utod nga babayi mga regular payunir. Sang makita ining maayong resulta, ginpaupod ni Kaffa, nga nakapoy na sa pagtrabaho sing bug-os tion sa amo man nga kompanya kag nabudlayan sa paglab-ot sang iya oras subong payunir, si Magali kag nagpanugda man sini. Ginbaton man ini. Sa amo, apat ka utod nga babayi ang nakapayunir, sa baylo sang duha nga malapit na kuntani mag-untat sa bug-os tion nga pag-alagad. Ang pagkamaideyahon kag inisyatibo nagbunga sing mapuslanon nga mga resulta.

17-21. Paano ginbinagbinag liwat sang isa ka mag-asawa ang ila katuyuan sa kabuhi, kag ano ang resulta?

¹⁷ Dugang pa, binagbinaga ang nagasakripisyo sang kaugalingon nga dalanon ni Evonne sa sulod sang nagligad nga napulo ka tuig. Ginsulat niya ang masunod sa Watch Tower Society sang Mayo 1991:

¹⁸ “Sang Oktubre 1982, nag-tour ang amon pamilya sa Brook­lyn Bethel. Naluyagan ko ang pagboluntaryo didto sang makita ko ini. Ginbasa ko ang aplikasyon, kag may isa ka talalupangdon nga pamangkot, ‘Pila ang imo promedyo nga oras sa pag-alagad sa latagon sa nagligad nga anom ka bulan? Kon ang promedyo nga oras kubos sa napulo, ipaathag kon ngaa.’ Wala ako sing mahunahuna nga makatarunganon nga rason sa akon manubo nga oras, gani nagpahamtang ako sing tulumuron kag ginlab-ot ko ini sa lima ka bulan.

¹⁹ “Bisan may pila ako ka rason nga mahunahuna sa akon indi pagpayunir, sang mabasa ko ang 1983 Yearbook of Jehovah’s Witnesses, nakombinsi ako nga ang iban nakalandas sing mas daku nga mga balagbag sangsa akon. Gani, sang Abril 1, 1983, gin-untatan ko ang akon mataas sing suweldo nga trabaho kag nangin auxiliary payunir, kag nagsulod sa hubon sang mga regular payunir sang Septiembre 1, 1983.

²⁰ “Nalipay ako nga mapamana ang isa ka maayo nga ministeryal nga alagad sang Abril 1985. Tatlo ka tuig sang ulihi, ang isa ka pamulongpulong sa distrito nga kombension tuhoy sa pagpayunir nagpahulag sa akon bana nga maghutik sa akon kag mamangkot, ‘May nahibaluan ka bala nga rason kon ngaa indi ako dapat magsugod sa pagpayunir sa Septiembre 1?’ Nagbuylog sia sa akon sa sining hilikuton sa nagsunod nga duha ka tuig.

²¹ “Nagboluntaryo man ang akon bana sa konstruksion sa Brooklyn Bethel sa duha ka semana kag nag-aplay para sa Internasyonal nga Programa. Gani sang Mayo 1989 nagkadto kami sa Nigeria sa isa ka bulan agod magbulig sa pagpatindog sang sanga didto. Buwas malakbay kami padulong sa Alemanya, diin himuson ang amon visa pasulod sa Poland. Nalipay gid kami nga makapakigbahin sa sining importante kag dulumdumon nga proyekto sa pagpatindog sa Poland kag mangin bahin sining bag-o nga sahi sang bug-os tion nga pag-alagad.”

22. (a) Paano kita, kaangay ni Pedro, dihungod nga mangin isa ka kasandaran? (b) Ang pag-alagad kay Jehova upod ang nagasakripisyo sang kaugalingon nga espiritu wala nasandig sa ano?

²² Kon indi ikaw makapayunir, mapalig-on mo bala sila nga yara sa bug-os tion nga pag-alagad nga magpabilin sa ila pribilehiyo kag ayhan buligan sila sa paghimo sini? Ukon mangin kaangay ka bala sang pila ka maayo sing katuyuan nga mga katapo sang pamilya ukon mga abyan nga, kaangay ni Pedro, mahimo magsiling sa isa ka bug-os tion nga alagad nga maghinayhinay lang, magmaluluy-on sa iya kaugalingon, nga wala makarealisar nga ina mahimo nga isa ka kasandaran? Matuod, kon delikado ang panglawason sang isa ka payunir ukon kon ginapatumbayaan niya ang Cristianong mga obligasyon, mahimo nga dapat sia anay mag-untat sa bug-os tion nga pag-alagad sa makadali. Ang pag-alagad kay Jehova upod ang nagasakripisyo sang kaugalingon nga espiritu wala nasandig sa etiketa, subong sang payunir, Bethelite, ukon iban pa. Sa baylo, nasandig ini sa kon ano kita subong mga tawo​—⁠kon paano kita nagapanghunahuna, kon ano ang aton ginahimo, kon paano naton gina­tratar ang iban, kag kon paano kita nagakabuhi.

23. (a) Paano kita padayon nga makatigayon sing kalipay nga kita masigkamanugpangabudlay sang Dios? (b) Anong pasalig ang masapwan naton sa Hebreo 6:​10-12?

²³ Kon may yara gid kita sing nagasakripisyo sang kaugalingon nga espiritu, malipayon kita nga mangin mga masigkamanugpangabudlay sang Dios. (1 Corinto 3:⁠9) Makatigayon kita sing kaayawan sa paghibalo nga ginapahalipay naton ang tagipusuon ni Jehova. (Hulubaton 27:11) Kag makasalig kita nga indi gid kita pagkalipatan ni Jehova ukon biyaan kita tubtob nagapabilin kita nga matutom sa iya.​—⁠Hebreo 6:​10-12.

[Footnote]

Ano ang Imo mga Panghunahuna?

◻ Paano si Pedro dihungod nga nangin isa ka kasandaran sa nagasakripisyo sang kabuhi nga dalanon?

◻ Ano ang kahulugan sang pagsikway sa kaugalingon?

◻ Paano ginapas-an sang isa ka Cristiano ang iya usok sang pag-antos?

◻ Paano naton ginapalambo kag ginahuptan ang nagasakripisyo sang kaugalingon nga espiritu?

◻ Ano ang nagapahulag nga puwersa sa likod sang nagasakripisyo sang kaugalingon nga espiritu?

[Piktyur sa pahina 10]

Handa ka bala nga sikwayon ang imo kaugalingon, pas-anon ang imo usok sang pag-antos, kag padayon nga sundon si Jesus?