Indi Pagtuguti ang Bisan Sin-o nga Palainon ang Imo Maayo nga Pamatasan

“Indi magtalang. Ang malain nga mga pagpakig-upod nagapalain sang maayo nga pamatasan.”​—⁠1 CORINTO 15:⁠33.

1, 2. (a) Ano ang ginbatyag ni apostol Pablo sa taga-Corinto nga mga Cristiano, kag ngaa? (b) Anong partikular nga laygay ang binagbinagon naton?

DAW ano kabaskog nga emosyon ang gugma sang ginikanan! Nagapahulag ini sa mga ginikanan nga magsakripisyo para sa ila mga anak, tudluan kag laygayan sila. Si apostol Pablo mahimo nga indi isa ka kinaugali nga amay, apang nagsulat sia sa mga Cristiano sa Corinto: “Kay bisan may napulo ka libo kamo nga mga manugtuytoy kay Cristo, wala kamo sing madamo nga amay; kay ako nangin amay ninyo kay Cristo Jesus paagi sa maayong balita.”​—⁠1 Corinto 4:⁠15.

² Antes pa sini, nagkadto si Pablo sa Corinto, diin nagbantala sia sa mga Judiyo kag mga Griego. Nagbulig sia sa pagtukod sing kongregasyon sa Corinto. Sa isa pa ka sulat ginpaanggid ni Pablo ang iya pag-atipan nga subong sang nagabatiti nga iloy, apang para sa mga taga-Corinto nangin subong sia sang isa ka amay. (1 Tesalonica 2:⁠7) Subong sang ginahimo sang isa ka mahigugmaon nga kinaugali nga amay, ginlaygayan ni Pablo ang iya espirituwal nga mga anak. Mahimo nga makabenepisyo ikaw gikan sa iya amaynon nga laygay sa mga Cristiano sa Corinto: “Indi magtalang. Ang malain nga mga pagpakig-upod nagapalain sang maayo nga pamatasan.” (1 Corinto 15:33) Ngaa nagsulat sina si Pablo sa mga taga-Corinto? Paano naton maaplikar ang laygay?

Laygay Para sa Ila kag Para sa Aton

3, 4. Ano ang nahibaluan naton tuhoy sa unang-siglo nga Corinto kag sa populasyon sini?

³ Sang unang siglo, ang Griegong geograpo nga si Strabo nagsulat: “Gintawag nga ‘manggaranon’ ang Corinto bangod sang komersio sini, kay nahamtang ini sa Isthmus kag agalon sang duha ka pantalan, ang isa padulong sa Asia, kag ang isa pa gid padulong sa Italya; kag ginapahapos sini ang pagbaklanay sa ulot sang duha ka pungsod.” Kada duha ka tuig daku nga kadam-an ang nagadugok sa Corinto bangod sang bantog nga Isth­mian ­Games.

⁴ Kamusta ang mga tawo sa sining siudad nga isa anay ka sentro sang gobierno kag sang malaw-ay nga pagsimba kay Aphrodite? Si Propesor T. S. Evans nagpaathag: “Ang populasyon mahimo nga mga 400,000. Isa [anay] ka katilingban nga may mataas nga kultura, apang lugak sa moral, kag makangilil-ad pa gani. . . . Ang Griegong mga pumuluyo sang Achaïa kilala nga walay kaayawan sa kinaalam kag mahuyugon maghibalo sing bag-o nga mga butang. . . . Ang ila pagkamaiyaiyahon daw subong sang gatong nga nahanda para sa sulu sang sektaryanismo.”

5. Anong katalagman ang gin-atubang sang taga-Corinto nga kauturan?

⁵ Sang ulihi bisan gani ang kongregasyon nabahinbahin bangod sang iban nga may huyog gihapon sa matinaastaason nga paghaumhaum. (1 Corinto 1:​10-31; 3:​2-9) Ang isa ka daku nga problema amo nga ang iban nagsiling: “Wala sing pagkabanhaw sang mga patay.” (1 Corinto 15:12; 2 Timoteo 2:​16-18) Kon ano man ang ila ginapatihan gid (ukon wala ginapatihan), dapat sila tadlungon ni Pablo paagi sa maathag nga pamatuod nga si Cristo ‘ginbanhaw gikan sa minatay.’ Sa amo, makasalig ang mga Cristiano nga ihatag sang Dios sa ila ang “kadalag-an paagi sa aton Ginuong Jesucristo.” (1 Corinto 15:​20, 51-57) Kon didto ka ayhan, may katalagman ka man bala kuntani?

6. Sa kay sin-o ilabi na ginapatuhoy ang laygay ni Pablo sa 1 Corinto 15:⁠33?

⁶ Samtang nagatinguha sa paghatag sing mabakod nga ebidensia nga ang mga patay pagabanhawon, ginsilingan sila ni Pablo: “Indi magtalang. Ang malain nga mga pagpakig-upod nagapalain sang maayo nga pamatasan.” Ang punto sini nga laygay ginapatuhoy sa mga nagapakig-upod sa kongregasyon nga wala nagaugyon sa doktrina sang pagkabanhaw. Wala lamang bala sila makapat-od sa isa ka punto nga wala nila mahangpi? (Ipaanggid ang Lucas 24:38.) Indi. Si Pablo nagsulat nga “ang iban sa inyo nagasiling nga wala sing pagkabanhaw,” gani ang mga nadalahig nagapabutyag sing indi pag-ugyon, may huyog sa apostasya. Nahibaluan gid ni Pablo nga sarang nila mapalain ang maayo nga pamatasan kag panghunahuna sang iban.​—⁠Binuhatan 20:30; 2 Pedro 2:⁠1.

7. Ano ang isa ka danyag nga sarang naton maaplikar ang 1 Corinto 15:⁠33?

⁷ Paano naton maaplikar ang paandam ni Pablo tuhoy sa pagpakig-upod? Indi niya buot silingon nga indi naton dapat buligan ang isa sa kongregasyon nga nabudlayan sa paghangop sang isa ka bersikulo ukon panudlo sa Biblia. Sa pagkamatuod, ang Judas 22, 23 nagapalig-on sa aton nga hatagan sing maluluy-on nga bulig ang sinsero nga mga utod nga may subong sina nga pangduhaduha. (Santiago 5:​19, 20) Apang, ang amaynon nga laygay ni Pablo, dapat iaplikar kon ang isa pirme lang nagapamatok sa nahibaluan naton nga kamatuoran sa Biblia ukon pirme lang nagapabutyag sing maduhaduhaon ukon negatibo nga mga komento. Dapat kita magbantay batok sa pagpakig-upod sa subong sina nga sahi sang tawo. Sa pagkamatuod, kon ang isa maathag nga mangin apostata, ang espirituwal nga mga manugbantay dapat maghulag sa pag-amlig sa panong.​—⁠2 Timoteo 2:​16-18; Tito 3:​10, 11.

8. Paano kita makapanghikot sing mahinantupon sa isa nga wala nagaugyon sa isa ka panudlo sang Biblia?

⁸ Sarang man naton maaplikar ang amaynon nga mga pulong ni Pablo sa 1 Corinto 15:33 kon tuhoy sa mga tawo sa guwa sang kongregasyon nga nagapalapnag sing butig nga mga panudlo. Paano kita mahimo mabuyo sa pagpakig-upod sa ila? Sarang ini matabo kon indi naton mapatuhay ang mga tawo nga mahimo mabuligan sa pagtuon sing kamatuoran kag ang mga tawo nga nagapautwas lamang sing balaisan agod sakdagon ang isa ka butig nga panudlo. Halimbawa, sa aton pagpanaksi nga hilikuton, mahimo masumalang naton ang isa ka tawo nga wala nagaugyon sa isa ka punto apang handa sia nga hambalan ini sing dugang pa. (Binuhatan 17:​32-34) Indi dapat magpautwas sing problema ini nga kahimtangan, kay nalipay kita nga ipaathag ang kamatuoran sang Biblia sa bisan sin-o nga luyag gid makahibalo sini, kag nagabalik pa gani kita agod magpakita sing makakombinsi nga ebidensia. (1 Pedro 3:15) Apang, ang iban mahimo nga indi gid interesado sa paghibalo sang kamatuoran sa Biblia.

9. Ano dapat ang himuon naton sa mga panghangkat sa aton mga pagtuluuhan?

⁹ Madamo nga tawo ang maluyag magdebate sing mga inoras, sa kada semana, apang indi bangod nagapangita sila sing kamatuoran. Luyag lamang nila paluyahon ang pagtuo sang iban samtang ginapabugal ang ila kuno tinun-an sa Hebreo, Griego, ukon ebolusyonaryo nga siensia. Kon masugata sila, ginbatyag sang iban nga mga Saksi nga ginahangkat sila kag nagresulta ini sa malawig nga pagpakig-upod nga nasentro sa butig nga relihioso nga pagtuluuhan, pilosopiya, ukon sientipiko nga sayop. Talalupangdon nga wala pagtuguti ni Jesus nga matabo ina sa iya, bisan pa mahimo nga nagdaug sia kuntani sa mga pagpakigbais sa relihioso nga mga lider nga may tinun-an sa Hebreo ukon Griego. Sang ginhangkat, nagsabat si Jesus sa malip-ot lamang kag dayon ginliso niya liwat ang iya igtalupangod sa mga mapainubuson, ang matuod nga mga karnero.​—⁠Mateo 22:​41-46; 1 Corinto 1:23–2:⁠2.

10. Ngaa nagakaigo nga maghalong ang mga Cristiano nga may mga kompyuter kag makasulod sa elektroniko nga mga pisara?

¹⁰ Ang modernong mga kompyuter nagbukas sing iban pa nga mga paagi padulong sa malain nga pagpakig-upod. Ang iban nga komersial nga mga kompanya nagatugot sa ila mga suskritor nga may kompyuter kag telepono sa pagpadala sing mensahe sa elektroniko nga pisara; sa amo ang isa ka tawo sarang makasulat sa pisara sing isa ka mensahe nga sarang mabasa sang tanan nga suskritor. Nagdul-ong ini sa ginatawag nga elektroniko nga mga debate sa relihion. Ang isa ka Cristiano mahimo nga maganyat sa sina nga mga debate kag mahimo nga maghinguyang sing madamo nga inoras upod sa isa ka apostata sing panghunahuna nga ginsikway sa kongregasyon. Ang tuytoy sa 2 Juan 9-11 nagapadaku sang amaynon nga laygay ni Pablo tuhoy sa paglikaw sa malain nga mga pagpakig-upod.⁠a

Likawi nga Mapatalang

11. Ang komersial nga kahimtangan sa Corinto naghatag sing anong kahigayunan?

¹¹ Subong napatalupangod na, ang Corinto isa anay ka sentro sang komersio, nga may madamo nga mga balaligyaan kag mga negosyo. (1 Corinto 10:25) Madamo sang nagkari agod magtan-aw sing Isth­mian ­Games ang nagaistar sa mga tolda, kag sa tion sina nga okasyon ang mga negosyante nagabaligya gikan sa ila ginpatindog nga mga tiangge-tiangge ukon nahandungan nga kyosko. (Ipaanggid ang Binuhatan 18:​1-3.) Amo kon ngaa nakakita didto si Pablo sing obra sa pagpatindog sing mga tolda. Kag nagamit niya ang iya ulubrahan sa pagpalapnag sing maayong balita. Si Propesor J. Murphy-O’Connor nagsulat: “Gikan sa isa ka ulubrahan sa isa ka masako nga merkado . . . nga nagaatubang sa isa ka magutok nga kalye si Pablo nakapakighambal, indi lamang sa iya mga kaupod sa obra kag mga kliyente, kundi sa mga tawo man sa guwa. Sa mga oras nga indi tanto kasako, sarang sia makatindog sa ganhaan kag hambalon ang mga tawo nga ginadumdom niya basi mamati . . . Mabudlay handurawon nga ang iya mapagsik nga personalidad kag bug-os nga pagtuo wala maghimo sa iya sa madali nga isa ka ‘talalupangdon nga tawo’ sa palibot, kag mahimo nga naganyat sa sini ang mga usisero, indi lamang ang mga wala sing ginahimo kundi man ang mga matuod nga nagapangita sing impormasyon. . . . Ang minyo nga mga babayi upod sa ila mga suluguon, nga nakabati sa iya, makaduaw sa balibad nga mabakal sila. Sa tion sang kabudlayan, kon may peligro nga hingabuton sia ukon gubaton, nagasumalangay sila sang mga tumuluo subong kliyente sa isa kag isa. Nakahambal man niya sa iya ulubrahan ang mga opisyal sang banwa.”

12, 13. Paano ang 1 Corinto 15:33 nagakaigo nga maaplikar sa ulubrahan?

¹² Apang, pat-od nga nakilala ni Pablo ang posibilidad sang “malain nga mga pagpakig-upod” sa ulubrahan. Dapat man naton kilalahon ini. Sing talalupangdon, ginsambit ni Pablo ang panimuot nga nangibabaw sa iban: “Magkaon kita kag mag-inom, kay buwas mapatay kita.” (1 Corinto 15:32) Ginsugpunan niya ini dayon sang iya amaynon nga laygay: “Indi magtalang. Ang malain nga mga pagpakig-upod nagapalain sang maayo nga pamatasan.” Paano ang ulubrahan kag ang pagpangita sing kalalipayan mahimo magdul-ong sa katalagman?

¹³ Luyag sang mga Cristiano nga mangin mainabyanon sa ila mga katrabaho, kag madamo nga eksperiensia ang nagapakita kon daw ano ini ka epektibo sa pagbukas sang dalan para sa pagpanaksi. Apang, mahimo nga masaypan sang isa ka katrabaho ang pagkamainabyanon subong isa ka pangagda agod maglipaylipay kamo. Mahimo nga mangagda sia nga manyaga, mag-inom-inom sa makadali sa tapos sang trabaho, ukon sa pila ka paglingawlingaw sa talipuspusan sang semana. Ini nga tawo mahimo nga mabuot kag desente kon tulukon, kag mahimo nga daw wala sing malain nga tuyo ang pangagda. Apang, si Pablo nagalaygay sa aton: “Indi magtalang.”

14. Paano ang iban nga mga Cristiano napatalang sang mga pagpakig-upod?

¹⁴ Ang iban nga mga Cristiano napatalang. Amat-amat sila nga nagpalambo sing wala nagabantay nga panimuot tuhoy sa pagpakig-upod sa mga katrabaho. Ayhan nagtubo ini gikan sa isa ka kumon nga interes sa isa ka hampang ukon kalingawan. Ukon ang isa ka di-Cristiano nga katrabaho mahimo nga tumalagsahon kabuot kag madinumdumon, nga nagdul-ong sa paghinguyang sing dugang nga tion upod sa sinang isa, kag ginapasulabi pa gani ang pagpakig-upod sa iya sangsa pila sa kongregasyon. Nian ini nga pagpakig-upod mahimo magdul-ong sa pagpal-at sa isa lamang ka miting. Mahimo ini magkahulugan sang pagpagab-i sa isa ka tion kag ginabungkag ang kinaandan nga iskedyul nga magpakigbahin sa pag-alagad sa latagon pagkaaga. Mahimo ini magresulta sa pagtan-aw sing isa ka sahi sang pelikula ukon video nga sa kinaandan pangindian sang Cristiano. ‘Indi gid ina matabo sa akon,’ mahimo hunahunaon naton. Apang ang kalabanan sang napatalang mahimo nagsiling sina sang primero. Dapat naton pamangkuton ang aton kaugalingon, ‘Daw ano gid ako ka determinado nga iaplikar ang laygay ni Pablo?’

15. Anong balanse nga panimuot ang dapat naton huptan sa mga kaingod?

¹⁵ Ang aton bag-o lang nabinagbinag tuhoy sa ulubrahan naaplikar man sa aton pagpakig-upod sa mga kaingod. Sa pagkamatuod, ang mga Cristiano sa dumaan nga Corinto may mga kaingod. Sa pila ka komunidad normal lamang nga mangin mainabyanon kag mabinuligon sa mga kaingod. Sa kaumhan ang mga magkaingod mahimo nga nagasandiganay bangod napain sila. Ang mga relasyon sang pamilya ilabi na nga mabakod sa pila ka kultura, amo kon ngaa masunson nga may pangagda sa pagkaon. Sing maathag, importante ang isa ka balanse nga pagtamod, subong sang ginpakita ni Jesus. (Lucas 8:​20, 21; Juan 2:12) Sa aton mga pagpakig-angot sa mga kaingod kag mga paryente, may huyog bala kita sa paghikot gihapon subong sang wala pa kita mangin Cristiano? Sa baylo, indi bala dapat nga repasuhon naton ina nga mga pagpakig-angot kag pat-uron sing mahunahunaon kon ano nga mga limite ang nagakaigo?

16. Paano dapat hangpon ang mga pulong ni Jesus sa Mateo 13:⁠3, 4?

¹⁶ Ginpaanggid isa ka bes ni Jesus ang pulong sang Ginharian sa mga binhi nga “nagtupa sa higad sang dalan, kag nagdapo ang mga pispis kag nagtuka sa ila.” (Mateo 13:​3, 4, 19) Sadto anay, ang duta sa higad sang dalan nagatig-a bangod sang madamo nga mga tiil nga nagapakadto-pakari sa sini. Amo man sina sa madamo nga tawo. Ang ila kabuhi puno sing mga kaingod, mga paryente, kag iban pa nga nagapakadto-pakari, nagahimo sa ila nga masako. Daw subong bala nga ini sila nagatasak sa duta sang ila tagipusuon, kag nagapatig-a sini amo kon ngaa indi makapanggamot ang mga binhi sang kamatuoran. Ang kaanggid nga dipagsapak mahimo nga magtubo sa isa nga isa na ka Cristiano.

17. Paano ang pagpakig-upod sa mga kaingod kag sa iban pa makaapektar sa aton?

¹⁷ Ang iban sang kalibutanon nga mga kaingod kag mga paryente mahimo nga mainabyanon kag mabinuligon, apang indi gid sila interesado sa espirituwal nga mga butang ukon nagahigugma sa pagkamatarong. (Marcos 10:​21, 22; 2 Corinto 6:14) Ang aton pagka-Cristiano wala nagakahulugan nga kita mangin dimainabyanon, dimapatugsilingon sa aton mga kaingod. Ginlaygayan kita ni Jesus nga magpakita sing matuod nga interes sa iban. (Lucas 10:​29-37) Apang ginbugna man kag kinahanglanon ang laygay ni Pablo nga mangin mahalungon sa aton mga pagpakig-upod. Samtang ginaaplikar naton ang una nga laygay, indi naton dapat kalipatan ang naulihi nga laygay. Kon indi naton pagdumdumon ining duha ka prinsipio, mahimo nga maapektuhan ang aton pamatasan. Kamusta ang imo pamatasan kon ipaanggid sa ila sang imo mga kaingod ukon mga paryente kon tuhoy sa pagkabunayag ukon pagtuman sa kasuguan ni Cesar? Halimbawa, sa tion sang pagbayad sing buhis, mahimo batyagon nila nga ang pagpanubo sang imo kita sa report ukon sang imo ganansia sa negosyo makatarunganon, kag kinahanglanon pa gani agod mabuhi ka. Mahimo nga maghambal sila sing mahayluhon nahanungod sa ila mga pagtamod samtang nagainum-inom kamo sing kape ukon sa tion sang malip-ot nga pagduaw. Paano ina makaapektar sa imo panghunahuna kag bunayag nga pamatasan? (Marcos 12:17; Roma 12:⁠2) “Indi magtalang. Ang malain nga mga pagpakig-upod nagapalain sang maayo nga pamatasan.”

Mga Pamatasan Man sang mga Pamatan-on

18. Ngaa ang 1 Corinto 15:33 naaplikar man sa mga pamatan-on?

¹⁸ Ang mga pamatan-on ilabi na nga madali maapektuhan sang ila makita kag mabatian. Wala bala kamo makatalupangod sing kabataan nga daw kaanggid sa ila mga ginikanan ukon mga utod kon mag-uluarte ukon manghulaghulag? Gani, indi kita dapat makibot kon ang kabataan mahimo maimpluwensiahan sing daku sang ila mga kahampang ukon mga kaeskwela. (Ipaanggid ang Mateo 11:​16, 17.) Kon ang imo anak nga lalaki ukon anak nga babayi nagaupod-upod sa mga pamatan-on nga nagahambal sing dimatinahuron sa ila mga ginikanan, ngaa mahunahuna mo nga indi ini magaapektar sa imo mga anak? Ano kon pirme nila mabatian nga nagapamuyayaw ang iban nga mga pamatan-on? Ano kon ang ila mga katubotubo sa eskwelahan ukon sa kaingod makunyag sa isa ka bag-o nga estilo sang sapatos ukon sang uso nga alahas? Dapat bala naton hunahunaon nga ang pamatan-on nga mga Cristiano indi madutlan sina nga impluwensia? Nagsiling bala si Pablo nga ang 1 Corinto 15:33 may limite sa edad?

19. Anong pagtamod ang dapat tinguhaan sang mga ginikanan nga ipasalop sa ila mga anak?

¹⁹ Kon ikaw isa ka ginikanan, ginatandaan mo bala ina nga laygay samtang nagapangatarungan ikaw kag nagahimo sing mga desisyon tuhoy sa imo mga anak? Mahimo nga mabuligan ikaw kon kilalahon mo nga wala ini nagakahulugan nga ang tanan nga iban pa nga mga pamatan-on nga kaupod sang imo mga anak sa kaingod ukon sa eskwelahan indi maayo. Ang iban sa ila mahimo nga maayo kag desente, subong sang pila sang imo mga kaingod, mga paryente, kag mga katrabaho. Buligi ang imo mga anak nga mahangpan ini kag mahantop nga balanse ikaw sa imo pag-aplikar sang kay Pablo maalamon, amaynon nga laygay sa mga taga-Corinto. Kon mahantop nila ang imo paagi sa pagbalanse sang mga butang, makabulig ini sa ila sa pag-ilog sa imo.​—⁠Lucas 6:40; 2 Timoteo 2:⁠22.

20. Mga pamatan-on, anong hangkat ang ginaatubang ninyo?

²⁰ Kamo nga mga bata pa, tinguhai nga hantupon kon paano iaplikar ang laygay ni Pablo, nakahibalo nga importante ini para sa tagsa ka Cristiano, bata ukon tigulang. Mangin makahalangkat ini, apang ngaa indi atubangon ang hangkat? Hibalua nga bangod lamang kilala mo na ang iban sina nga mga pamatan-on halin sang pagkabata wala nagakahulugan nga indi sila makaapektar sa imo pamatasan, indi makapalain sang pamatasan nga imo ginaporma subong isa ka Cristianong pamatan-on.​—⁠Hulubaton 2:​1, 10-15.

Positibo nga mga Tikang sa Pag-amlig sang Aton Pamatasan

21. (a) Ano ang kinahanglanon naton tuhoy sa pagpakig-upod? (b) Ngaa mapat-od naton nga mahimo makatalagam ang iban nga mga pagpakig-upod?

²¹ Kita tanan nagakinahanglan sing pagpakig-upod. Apang, dapat kita mangin alisto sa katunayan nga ang aton mga kaupod makaapektar sa aton, para sa kaayuhan ukon kalainan. Amo sina ang natabo kay Adan kag sa tanan sa sulod sang mga siglo kutob sadto. Halimbawa, naagom ni Josafat, isa ka maayong hari sang Juda, ang kahamuot kag pagpakamaayo ni Jehova. Apang sa tapos niya gintugutan ang iya anak nga lalaki nga mangasawa sa anak nga babayi ni Haring Ahab sang Israel, si Josafat nagsugod sa pagpakig-upod kay Ahab. Yadtong malain nga pagpakig-upod diutayan lang magbili sang kabuhi ni Josafat. (2 Hari 8:​16-18; 2 Cronica 18:​1-3, 29-31) Kon maghimo kita sing dimaalamon nga mga pagpili tuhoy sa aton mga pagpakig-upod, mangin subong man ini ka makatalagam.

22. Ano ang dapat naton binagbinagon, kag ngaa?

²² Gani, dapat naton binagbinagon ang mahigugmaon nga laygay ni Pablo sa aton sa 1 Corinto 15:33. Indi ini mga pulong lamang nga ayhan nabatian naton sing tuman kasunson sa bagay nga sarang naton ini masulit gikan sa memorya. Ginapabanaag sini ang amaynon nga gugma ni Pablo para sa iya taga-Corinto nga kauturan nga mga lalaki kag mga babayi, kag, kon pasangkaron, para sa aton man. Kag sa wala sing duhaduha nagaunod ini sing laygay nga ginahatag sang aton langitnon nga Amay bangod luyag niya nga magmadinalag-on ang aton mga panikasog.​—⁠1 Corinto 15:⁠58.

[Footnote]

Madumduman Mo Bala?

◻ Sa anong partikular nga rason ginsulat ni Pablo ang 1 Corinto 15:⁠33?

◻ Paano naton maaplikar ang laygay ni Pablo sa ulubrahan?

◻ Anong balanse nga pagtamod sa mga kaingod ang dapat naton huptan?

◻ Ngaa ang 1 Corinto 15:33 ilabi nga nagakaigo nga laygay para sa mga pamatan-on?

[Piktyur sa pahina 17]

Gingamit ni Pablo ang ulubrahan agod ipalapnag ang maayong balita

[Piktyur sa pahina 18]

Sarang mapalain sang iban nga mga pamatan-on ang imo Cristianong pamatasan