Tamda sing Husto ang Kaluoy sang Dios

ANG doktor maluluy-on kag nabalaka gid. Suno sa iya pinakamaayo nga paghukom, kinahanglan gid sang iya pasyente ang operasyon agod maluwas ang iya kabuhi. Sang mang-alag-ag sia kag ginpautwas ang hulusayon tuhoy sa pagpatayhon sing dugo, nakibot sia. Sang ginpaathag niya nga bangod sang relihioso nga mga rason indi sia magsugot sa isa ka operasyon nga nagadalahig sing pagtayhon sing dugo, nakibot gid sia. Namensar sia sing paagi nga mabuligan sia. Sang ulihi, pagdumdom niya may napensaran na sia. Nagsiling sia: “Abi mo, kon indi ka magpatayhon sing dugo, mapatay ka. Indi mo luyag mapatay, indi bala?”

“Siempre indi,” sabat sang iya pasyente.

“Apang, kon magpatayhon ka sing dugo, malapas mo ang imo relihioso nga mga pagtuluuhan, nga importante man sa imo. Ti, amo sini ang mapanugda ko. Ngaa indi ka na lang magpatayhon sing dugo agod maluwas mo ang imo kabuhi. Pagkatapos magtu-ad ka sa Dios nga nakasala ka, kag maghinulsol. Sa sina nga paagi, mapasag-uli ka man sa imo relihion.”

Ang maayo sing katuyuan nga doktor nagdumdom nga nakita na niya ang himpit nga sabat. Nahibaluan niya nga ang iya pasyente nagapati sa isa ka maluluy-on nga Dios. Sa pagkamatuod, isa ini ka nagakaigo nga okasyon sa paghimulos sa kaluoy sang Dios! Apang ang iya bala panugda subong ka makatarunganon kon pamatian?

Nangatarungan Na Bala Kita Kaangay Sini?

Kon kaisa mahimo masapwan naton ang aton kaugalingon nga nagapangatarungan subong sang doktor. Ayhan nahadlok kita nga basi hinali kita pamatukan sa eskwelahan ukon sa trabaho. Ukon mahimo masapwan naton ang aton kaugalingon sa isa ka makahuluya nga kahimtangan diin ginaipit kita sa paghimo sing isa ka butang nga batok sa aton konsiensia. Bangod sang kakibot, mahimo nga mahuyog kita sa pagpili sang pinakamahapos nga dalanon kag himuon ang nahibaluan naton sayop, nagaplano nga mangayo na lang sing kapatawaran sa ulihi.

Ukon ang mga indibiduwal mahimo nga ginasulay sang ila kaugalingon nga malain nga mga huyog. Halimbawa, mahimo masapwan sang isa ka pamatan-on nga lalaki ang iya kaugalingon sa isa ka kahimtangan diin mabaskog nga ginasulay sia sa paghimo sing imoralidad. Sa baylo nga awayon ang malain nga kailigbon, mahimo nga magapadaug sia, nagaplano nga makighusay sa Dios sa ulihi. Ang iban nakalab-ot pa gani tubtob sa punto nga maghimo sing isa ka mabug-at nga sala bisan pa nahibaluan nila nga mahimo sila sikwayon gikan sa Cristianong kongregasyon. Mahimo nangatarungan sila, ‘Magapaligad ako sing malip-ot nga tion. Pagkatapos mahinulsol ako kag mabalik liwat.’

Ining tanan nga kahimtangan may duha ka butang nga kinaandan. Una, ang mga indibiduwal nagapadaug sa baylo nga magpanikasog sa paghimo sing kon ano ang husto. Ikaduha, ginabatyag nila nga sa tapos sila makasala, patawaron sila dayon sang Dios kon mangabay lamang sila.

Ano ang Husto nga Pagtamod?

Nagapakita bala ini sing nagakaigo nga apresasyon sa kaluoy sang Dios? Ti, binagbinaga ina nga kaluoy sa makadali. Si Jesus nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Ginpaathag ni apostol Juan kon paano nagapanghikot ina nga kaluoy sang magsiling sia: “Nagasulat ako sa inyo sini agod nga indi kamo makasala. Apang kon ang bisan sin-o makasala, may mananabang kita upod sa Amay, si Jesucristo nga matarong.” (1 Juan 2:⁠1) Busa, kon bangod sang pagkadihimpit makasala kita, sarang kita makapalapit sa Dios sa pangamuyo kag mangayo sing kapatawaran pasad sa halad ni Jesus.

Apang, nagakahulugan bala ini nga indi importante kon nakasala kita ukon wala, basta mangayo lamang kita sing kapatawaran pagkatapos? Indi gid. Dumduma ang una nga mga pulong sadtong binalikwat: “Nagasulat ako sa inyo sini agod nga indi kamo makasala.” Ang dugang pa nga mga pulong ni Juan sa sadtong bersikulo nagapakita sang mahigugmaon nga kahimusan ni Jehova tuhoy sa aton dikahimpitan. Apang, dapat kita magpanikasog sing lakas suno sa masarangan naton nga likawan ang pagpakasala. Kay kon indi, nagapakita kita sing makapasubo nga dipagtahod sa gugma sang Dios, kaangay sang mga tawo nga ginsambit ni Judas nga naggamit sang dibagay nga kaluoy sang Dios subong balibad sa lugak nga pagginawi.​—⁠Judas 4.

Ang pagtamod sa kaluoy sang Dios subong isa ka sahi sang net nga pirme magasalo sa aton bisan ano man ang himuon naton nagapakadiutay sa kaluoy sang Dios kag daw nagapakita nga ang sala indi gid man subong sina kalain. Malayo ini sa kamatuoran. Ginsingganan ni apostol Pablo si Tito: “Ang dibagay nga kaluoy sang Dios nga nagadala sing kaluwasan sa tanan nga sahi sang mga tawo ginpahayag, nga nagatudlo sa aton nga sikwayon ang pagkadidiosnon kag kalibutanon nga mga kailigbon kag magkabuhi nga may maligdong nga panghunahuna kag pagkamatarong kag diosnon nga debosyon sa tunga sining karon nga sistema sang mga butang.”​—⁠Tito 2:​11, 12.

Ginpakita ni Pablo ang iya apresayon sa kaluoy sang Dios paagi sa iya pagpakig-away batok sa iya kaugalingon nga dikahimpitan. Sia nagsiling: “Ginasakit ko ang akon lawas kag ginaulipon ini, agod nga, sa tapos ako makabantala sa iban, ako mismo indi pagsikwayon.” (1 Corinto 9:27) Wala ginpasapayanan ni Pablo nga mahimo sia makasala sa tion kag tion. Dapat bala kita?

Ang Pagtamod ni Jesus

Sa isa ka okasyon, ginpakita ni Jesus kon paano niya gintamod ang ideya nga ikompromiso ang husto kag pilion ang mas mahapos nga dalanon agod malikawan ang pag-antos. Sang magsugod sia sa pagsugid sa iya mga disipulo tuhoy sa iya nagahilapit nga mahalaron nga kamatayon, gintinguhaan ni Pedro nga punggan sia, sa pagsiling: “Kaluy-i ang imo kaugalingon, Ginuo; indi gid ini mahanabo sa imo.” Ano ang reaksion ni Jesus? “Halin ka sa atubangan ko, Satanas! Kasandaran ka sa akon, kay wala ka nagapanghunahuna sang mga butang nga iya sang Dios, kundi sang iya sang mga tawo.”​—⁠Mateo 16:​22, 23.

Ang mabaskog nga pagsabdong ni Jesus kay Pedro nagpakita gid nga si Jesus nangindi sa pagpili sing mahapos nga dalanon nga batok sa kabubut-on sang Dios. Ginapakita sang rekord nga ginsunod niya sing malig-on ang matarong nga banas, nga nagabatas sang masunson nga paghingabot sa mga kamot ni Satanas. Sa katapusan ginyaguta sia, ginsakit sing todo, kag nag-antos sing masakit nga kamatayon. Walay sapayan, wala sia magkompromiso, kag bangod sini nahalad niya ang iya kabuhi subong gawad para sa aton. Sa pagkamatuod wala niya pagbatasa ini tanan agod nga kita iya mangin ‘maluluy-on sa aton kaugalingon’ kon mag-utwas ang mga kabudlayan ukon mga pagsulay!

Tuhoy kay Jesus ginsiling ini: “Ginhigugma mo ang pagkamatarong, kag gindumtan ang kalautan.” (Hebreo 1:⁠9) Ang pagpili sing mahapos nga dalanon masami nga nagadalahig sing pagkamalinapason. Busa, kon matuod gid nga ginadumtan naton ini​—⁠subong ni Jesus⁠—​magadumili kita pirme sa pagkompromiso. Sa tulun-an sang mga Hulubaton, si Jehova nagasiling: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagayaguta sa akon.” (Hulubaton 27:11) Ang balanse apang wala magkompromiso nga pagkamatarong ni Jesus nagdala sing daku nga kasadya sa tagipusuon ni Jehova. Mahatagan naton si Jehova sing kaanggid nga kalipay kon sundon naton ang dalanon sang integridad ni Jesus.​—⁠1 Pedro 2:⁠23.

Ginhanas sang Pagbatas

Si apostol Pedro nagsulat: “Sa sini nagakalipay kamo sing daku, bisan pa sa malip-ot nga tion karon, kon kinahanglanon, mag-antos kamo sing sarisari nga mga pagtilaw, agod nga ang natilawan nga kinaiya sang inyo pagtuo, nga hamili pa sa bulawan nga nagakawala walay sapayan nga natilawan na ini sa kalayo, mahimo masapwan nga isa ka kabangdanan sang kadayawan kag himaya kag kadungganan sa pagpahayag ni Jesucristo.” (1 Pedro 1:​6, 7) Bangod dihimpit kita kag nagakabuhi sa tunga sang kalibutan ni Satanas, masunson kita makasumalang sing mga pagtilaw kag mga pagsulay. Subong ginapakita ni Pedro, mahimo mangin maayo ang resulta sini. Ginatilawan sini ang aton pagtuo, kon bala maluya ini ukon mabakod.

Nagahanas man ini sa aton. Si Jesus “nakatuon sing pagkamasinulundon gikan sa mga butang nga iya gin-antos.” (Hebreo 5:⁠8) Kita man makatuon sing pagkamasinulundon, subong man sing pagsalig kay Jehova, kon magbatas kita sa idalom sang pagtilaw. Kag ining pagtuon magapadayon tubtob makompleto, kay si Pedro nagsiling: “Ang Dios . . . magatapos mismo sang inyo paghanas, palig-unon niya kamo, pabakuron niya kamo.”​—⁠1 Pedro 5:⁠10.

Apang, kon magkompromiso kita sa idalom sang pagtilaw, ginapakita naton ang aton kaugalingon subong talawan ukon maluya, kulang sing mabaskog nga gugma kay Jehova kag sa pagka­matarong ukon kulang sing pagpugong sa kaugalingon. Ang bisan ano sina nga kaluyahon ­makatalagam sa aton kaangtanan sa Dios. Sa ­pagkamatuod, ang paandam ni Pablo mahimo magmatuod sa aton bahin: “Kon magpakasala kita sing kinabubut-on sa tapos nga aton nabaton ang sibu nga ihibalo sa kamatuoran, wala na sing halad tungod sa mga sala.” (Hebreo 10:26) Daw ano kaayo pa nga indi gid magpakasala sa baylo nga magpadaug sa kaluyahon kag atubangon ang katalagman nga madula ang ginalauman nga kabuhi!

Wala sing Kondisyon nga Integridad

Sang mga adlaw ni manalagna Daniel, tatlo ka Hebreo ang yara sa katalagman nga sunugon kon indi nila pagsimbahon ang isa ka idolo. Ang ila sabat? “Kon amo ini, ang amon Dios nga ginaalagad namon makasarang magluwas sa amon. Gikan sa nagadabdab nga horno sang kalayo kag gikan sa imo kamot, O hari, luwason niya kami. Apang kon indi, makilala mo, O hari, nga ang imo mga dios indi ang amon ginaalagad, kag indi kami magsimba sa larawan nga bulawan nga imo ginpatindog.”​—⁠Daniel 3:​17, 18.

Nagtindog sila sing malig-on bangod luyag nila himuon kon ano ang matarong. Kon nagdul-ong ini sa ila kamatayon, nian nakahanda sila. Nagsalig sila sa pagkabanhaw. Apang, kon luwason sila sang Dios, mas maayo ina. Apang ang ila malig-on nga tindog wala sing kondisyon. Gani dapat amo sini pirme sa mga alagad sang Dios.

Sa aton adlaw ang iban nga nagdumili sa pagkompromiso ginbilanggo, ginpaantos, kag ginpatay pa gani. Ang iban naghimo sing materyal nga mga pagsakripisyo, nga nagapasulabi nga magpabilin nga imol sa baylo nga magmanggaranon kag isakripisyo ang matarong nga mga prinsipio. Ano ang natabo sa Cristianong babayi nga ginsambit sa pamuno sining artikulo? Gin-apresyar niya ang maluluy-on apang napatalang nga motibo sang doktor, apang wala niya ginkompromiso ang iya pagtuo. Sa baylo, ang iya pagtahod sa kasuguan ni Jehova nagdul-ong sa iya nga dumilian ang operasyon. Sing makalilipay, nag-ayo sia kag nagpadayon sa pag-alagad kay Jehova sing aktibo. Apang, sang malig-on nga ginpili niya ang iya tindog, wala sia makahibalo kon ano ang mangin resulta, walay sapayan nakahanda sia nga itugyan ang bug-os nga butang sa mga kamot ni Jehova.

Ano ang nakabulig sa iya nga magpabilin sing tuman kalig-on sa idalom sang pag-ipit? Wala sia magsalig sa iya kaugalingon nga kusog, kag dapat amo man ang bisan sin-o nga alagad sang Dios. Dumduma, “ang Dios aton dalangpan kag kusog, handa gid nga kabulig sa kalisod.” (Salmo 46:⁠1) Daw ano kaayo pa nga mangayo sing bulig sa Dios samtang yara sa idalom sang pagtilaw sangsa magpakasala kag dayon mangayo sa iya sing kaluoy!

Huo, indi gid naton dapat pasapayanan ang dakung kaluoy sang Dios. Sa baylo, palambuon naton ang matuod nga handum nga himuon kon ano ang matarong, walay sapayan sang mga kabudlayan. Magapabakod ini sang aton kaangtanan kay Jehova, magahatag sa aton sing paghanas nga kinahanglanon naton para sa kabuhi nga walay katapusan, kag magapakita sing nagakaigo nga pagtahod sa kaluoy sang Dios. Ina nga paggawi magadala sing kalipay sa tagipusuon sang aton langitnon nga Amay.

[Piktyur sa pahina 24]

Ang bug-os nga pagsalig sa pagkabanhaw nagbulig sa tatlo ka Hebreo nga huptan ang integridad