Prinsipio Ukon Popularidad—Diin ang Imo Tuytoy?
SI Norihito nga yara sa ikan-om nga grado nag-entra sa isport. Sa hinali, dapat sia magdesisyon. Ang tanan nga estudyante obligado nga makigbahin sa isa ka patriotiko nga seremonya. Dapat bala sia magbuylog sa iya mga masigkaestudyante sa sining daw rutina lamang nga seremonya?
Natun-an ni Norihito gikan sa Biblia nga malain ang magbuylog sa bisan ano nga buhat sang pagsimba sa isa ka diosdios luwas kay Jehova. (Exodo 20:4, 5; Mateo 4:10) Nahibaluan man niya nga ang mga Cristiano dapat magpabilin nga wala nadampigan sa tanan nga politikal nga hilikuton sang kalibutan. (Daniel 3:1-30; Juan 17:16) Gani bisan pa ginhaylo sia sang iya mga masigkaestudyante nga magbuylog, maisugon apang matinahuron nga gintindugan niya ang iya ginapatihan. Ano kuntani ang ginhimo mo sa kaanggid nga kahimtangan?
Ang Handum nga Kilalahon sa Isa ka Grupo
Ginapakita sang Kasulatan nga ang mga tawo gintuga sang Dios nga mangin mainabyanon, makigbagayon, kag magkalipay sa paghimo sing mga butang upod sa iban. Natural lamang ang maghandum nga mangin kaupod sang imo mga katubotubo, ang batunon ikaw, kag kilalahon. Ina nga mga balatyagon nagahimo sang kabuhi nga kapin ka makalilipay kag nagaamot sa paghidait kag harmoniya sa aton mga pagpakig-angot sa iban.—Genesis 2:18; Salmo 133:1; 1 Pedro 3:8.
Ang mabaskog nga pagpadaku sa pagpauyon nga makita sa pila ka kultura bisan karon nagapakita sang duna nga handum nga kilalahon ang isa. Ang Hapones nga kabataan, halimbawa, ginahanas halin sa pagkabata nga hibaluon kag magpauyon sa ginadikta sang kalabanan. Ang ila panublion nagatudlo sa ila nga ang isa sang ila labing daku nga mga katungdanan amo ang paghisanto sa komunidad. “Ang mga Hapones mas nahuyog magpangabudlay subong mga grupo sangsa mga taga-Nakatundan,” siling ni Edwin Reischauer, anay embahador sang Estados Unidos sa Hapon kag isa ka masusi nga tagpanilag sa mga batasan sang mga Hapones. Nagdugang pa sia: “Kon ang mga taga-Nakatundan sa dimagkubos nagapakitakita sing pagkaindependiente kag indibiduwalidad, ang kalabanan nga mga Hapones mangin kontento na nga magpauyon sang ila pagpamayo, paggawi, estilo sang pagkabuhi, kag panghunahuna pa gani suno sa mga talaksan sang ila grupo.” Apang, indi mga Hapones lamang ang may handum sa pagpauyon. Bug-os uniberso ini.
Mga Pag-ipit sa Pagpauyon
Bisan pa maayo nga himuon ang labing masarangan sa pagpakigbagay sa iban, may yara katalagman ang bulag nga pagpauyon sa kon ano ang popular. Ngaa? Amo sini bangod ang butang nga popular sa kadam-an masami nga nagasumpakil sa kon ano ang kahalamut-an sa Dios. “Ang bug-os nga kalibutan yara sa gahom sang isa nga malauton,” siling sa aton sang Biblia. (1 Juan 5:19) Malalangon nga ginagamit ni Satanas ang tanan nga paagi nga magamit niya—ang materyalismo, manubo nga moral, pag-ihig-ihig sa rasa, relihioso nga pagkapanatiko, nasyonalismo, kag iban pa—sa pag-impluwensia sa masa kag palisuon sila pahilayo sa Dios. Ang pagpauyon sa sina nga mga buhat mangin, sa epekto, pagpamatok kay Jehova nga Dios kag sa iya mga katuyuan. Amo kon ngaa ginalaygayan ang mga Cristiano: “Mag-untat sa pagpauyon sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kahalamut-an kag himpit nga kabubut-on sang Dios.”—Roma 12:2.
Bangod nagakabuhi sa sining sistema sang mga butang, ang mga Cristiano yara sa dalayon nga pag-ipit nga magpauyon sa kon ano ang popular. Ang mga pamatan-on ilabi na nga madali maimpluwensiahan sa sining bahin. Ang handum nga mangin pareho sa ila mga kabutho kon tulukon kag manghulaghulag mabaskog gid. Kinahanglan nila ang daku nga kaisog sa pagpaathag sa ila mga katubotubo kon ngaa wala sila nagapakigbahin sa pila ka hilikuton. Apang, ang indi maisugon nga pagsugid sang ila tindog mahimo magkahulugan sang ila espirituwal nga kapahamakan.—Hulubaton 24:1, 19, 20.
Ang mga adulto nagaatubang man sina nga mga pag-ipit sa ila trabaho. Mahimo ginapaabot sila nga mag-entra sa pila ka sosyal nga mga hilikuton sa tapos sang trabaho ukon sa pila ka selebrasyon. Ang indi pagsunod mahimo magahimo sa ila nga maila kag indi kooperatibo kon tulukon, nagatuga sing indi maayo nga atmospera sa trabaho. Ang iban mahimo mapilitan sa pag-overtime sing malawig nga inoras bangod lamang ang iban nagahimo sini kag ginapaabot ini sa ila. Ang pagpadaug sa sina nga mga butang mangin makahalalit sa ila espirituwalidad kag magapugong man sa ila sa pagtuman sang ila iban pa nga mga obligasyon.—1 Corinto 15:33; 1 Timoteo 6:6-8.
Ang mga pag-ipit nga magpauyon indi lamang sa eskwelahan ukon sa trabaho makita. Ang isa ka Cristianong iloy nanugid nga sang isa ka okasyon wala niya pagdisiplinaha ang iya anak, bisan pa kinahanglan gid tani sadto, bangod lamang ginbatyag niya nga ang iban nga mga iloy nga didto sadto indi pabor sa sini.—Hulubaton 29:15, 17.
Mahimo Mangin Sayop ang Kadam-an
Ang Biblia nagahatag sa aton sing madamo nga prangka nga laygay kon tuhoy sa pagsunod sa kadam-an. Halimbawa, ang pungsod sang Israel ginsugo: “Dili ka magsunod sa kadam-an sa paghimo sing malaut; kag dili ka magsaksi sa kasaba sa pagdampig sa kadam-an agod patikuon ang katarungan.” (Exodo 23:2; ipaanggid ang Roma 6:16.) Ini nga laygay wala pirme ginsunod. Isa ka bes, wala pa lang madugay nga nakaguwa sila sa Egipto, sang wala si Moises, gin-impluwensiahan sang pila ka indibiduwal si Aaron kag ang katawhan nga maghimo sing tinday nga bulawan kag simbahon ini sa “kapiestahan kay Jehova.” Ang katawhan nagkinaon kag nag-ininom kag nagkinasadya nga nagainambahan kag nagasinaot samtang nagahalad sa tinday nga bulawan. Bangod sining malaut kag idolatroso nga buhat, mga 3,000 ka liderlider ang ginpatay. Apang madamo pa ang ginsilutan man ni Jehova bangod sang ila pagsunodsunod lamang sa kadam-an.—Exodo 32:1-35.
Ang isa pa ka hitabo sang pagsunod sa katawhan sa malaut nga katuyuan natabo sang unang siglo may kaangtanan sa kamatayon ni Jesucristo. Nahaylo sang mahisaon nga relihiosong mga lider, madamo nga tawo ang nagbuylog sa pagpangabay sang kamatayon ni Jesus. (Marcos 15:11) Sang ginpatalupangod ni Pedro ang ila daku nga sayop sang Pentecostes sa tapos sang pagkabanhaw kag pagkayab ni Jesus, madamo ang “nasuntok sa ila tagipusuon” kag nakarealisar sang ila nahimo sa pagsunod sa kadam-an.—Binuhatan 2:36, 37.
Mas Maayo ang mga Prinsipio sang Biblia
Subong maathag nga ginapakita sining mga kasaysayan, ang bulag nga pagsunod sa kon ano ang popular makadul-ong sa makahalalit nga mga butang. Daw ano kaayo pa nga sundon ang Biblia kag tugutan ang mga prinsipio sini nga mangin isa ka tuytoy sa aton kabuhi! “Subong nga ang langit mataas pa sa duta, sa amo ang akon mga dalanon mataas pa sa inyo mga dalanon kag ang akon mga painuino sa inyo mga painuino,” siling ni Jehova. (Isaias 55:9) Tuhoy sa mga moral kag mga kaangtanan sa mga tawo—sa pagkamatuod, sa tanan nga dapat desisyunan sa kabuhi—makapila na ginpakita nga ang pagsunod sa mga dalanon ni Jehova mas maayo sangsa pagsunod sa kon ano ang popular. Amo ini ang yabi sa isa ka mas malipayon kag mas mapuslanon nga dalanon sang pagkabuhi.
Binagbinaga, halimbawa, ang eksperiensia ni Kazuya. Bisan pa natun-an niya ang Biblia sa sulod sang isa ka panahon, nagpadayon sia sa pagsunod sa popular nga dalanon—nagatinguha nga magmanggaranon kag magmadinalag-on. Ang iya mga panikasog nga pahamut-an ang iya mga superyor kag maluyagan sang iya mga masigkamamumugon masami nga nagdul-ong sa iya sa pagguwa agod mag-inom tubtob sa kaagahon. Nangin mabudlay sia pahamut-an, estrikto, kag buringot. Ang iya dikinaandan nga estilo sang pagkabuhi nagdul-ong wala madugay sa stroke, nga nagbilin sa iya nga paralisado ang iban nga bahin sang iya lawas. Samtang nagahigda sia sa katre sang ospital nga nagapaayo, ginbinagbinag niya ang iya natun-an sa Biblia kag ang iya pagkabuhi. Namat-od sia nga tion na nga sugdan iaplikar ang iya natun-an. Ginbiyaan niya ang iya katungdanan subong manedyer kag gin-islan ang iya mga kaupod. Nanikasog man sia sing maukod nga isul-ob ang Cristianong personalidad kag bag-uhon ang iya pagtamod sa materyal nga mga pagkabutang. Subong resulta, ang iya mga talaksan nagbag-o, kag nag-uswag ang iya panglawason. Sang ulihi, gindedikar niya ang iya kabuhi kay Jehova kag nagpabawtismo.
Agod magmadinalag-on sa pagsunod sa dipopular nga dalanon, dapat hibaluon sang isa ang mga prinsipio nga nadalahig kag makombinsi sing bug-os nga husto ini. Ginapamatud-an ini sang naeksperiensiahan ni Masaru. Sang yara sa ikan-om nga grado sa elementarya, ginrekomendar sia sang iya mga kabutho nga mangin kandidato para sa pagkapresidente sang konseho sang mga estudyante. Upod ang kahuya ginahinumdom niya nga bangod wala mahangpi sing bug-os ang mga prinsipio sa Biblia nga nadalahig, wala niya mapaathag sa iya mga kabutho kon ngaa indi sia mahimo magdalagan para sa isa ka politikal nga katungdanan. Ang iya kahadlok sa tawo nagpugong sa iya nga isugid nga sia isa ka Cristiano. Ang lamang nga nahimo niya amo nga iduko ang iya ulo kag suliton nga may pagluha, “Indi ko mahimo ini.”
Ining masakit nga eksperiensia nagpahulag sa iya nga usisaon kon ngaa ang isa ka Cristiano wala nagapakigbahin sa politikal nga mga hilikuton. (Ipaanggid ang Juan 6:15.) Sang ulihi, sang yara na sia sa junior hayskol, nag-utwas ang kaanggid nga kahimtangan. Apang, sini nga tion, nakahanda na sia nga ipaathag sing malig-on sa iya manunudlo ang iya tindog. Ginbaton sang manunudlo ang iya paathag, subong man sang pila sang iya mga kabutho nga namangkot sa iya nahanungod sa iya napasad sa Biblia nga mga pagtuluuhan.
Kon San-o ang Tanan Magahimo sing Kon Ano ang Husto
Sa nagapakari nga bag-ong kalibutan sa idalom sang paggahom ni Cristo, ang popular nga butang nga himuon mangin amo ang husto nga butang nga himuon. Samtang wala pa ina, dapat kita magbantay batok sa sugyot nga magpauyon sa kon ano ang popular. Makakuha kita sing pagpalig-on gikan sa laygay ni Pablo: “Sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang.”—Hebreo 12:1.
Kon mag-abot sa imo ang mga hulusayon kag mga hangkat, ano ang himuon mo? Magapadaug ka bala sa kahadlok sa mga tawo kag magsugot sa paghimo sang kon ano ang popular? Ukon magaliso ka bala sa Pulong sang Dios, ang Biblia, kag sundon ang mga prinsipio sini? Ang pagpili sang naulihi nga dalanon magahatag sa imo sing kaayuhan indi lamang karon kundi magahatag man ini sa imo sing paglaum nga malakip sa mga tawo nga ‘bangod sang pagtuo kag pagpailob magapanubli sang mga saad.’—Hebreo 6:12.