Mga Pamangkot Gikan sa mga Bumalasa
Sanglit ang saserdote anay nga nagahingalan kay Melquisedec isa ka tunay nga tawo, ngaa nagasiling ang Biblia nga sia “walay genealohiya”?
Ining pinamulong mabasa sa Hebreo 7:3. Talupangda ang bersikulo sa konteksto sini:
“Kay ining Melquisedec, hari sang Salem, saserdote sang Dios nga Labing Mataas, nagsugata kay Abraham nga nagapauli gikan sa pagpamatay sang mga hari kag nagpakamaayo sa iya kag sa iya si Abraham naghatag sing ikapulo nga bahin sang tanan nga butang, sia amo ang nahauna, kon sayuron ang iya ngalan, ‘Hari sang Pagkamatarong,’ kag nian hari man sang Salem, kon sayuron, ‘Hari sang Paghidait.’ Sia walay amay, walay iloy, walay genealohiya, walay pamuno sang mga adlaw ukon katapusan sang kabuhi, kundi kaangay sa Anak sang Dios, nagapadayon sia nga saserdote sa walay katubtuban.”—Hebreo 7:1-3.
Subong sang nasambit na, si Melquisedec isa ka tunay nga tawo, subong ka tunay kay Abraham, nga sa iya may direkta sia nga pagpakig-angot. (Genesis 14:17-20; Hebreo 7:4-10) Bangod sina, si Melquisedec mahimo nga may mga ginikanan, isa ka amay kag isa ka iloy, kag mahimo nga may mga anak sia. Gani, subong isa ka tawo may kaliwatan sia, ukon may listahan sang kaliwatan. Napatay man sia. Sa pila ka punto napatay si Melquisedec, nahisuno sa pinamulong ni apostol Pablo sa Roma 5:12, 14. Apang sanglit wala kita makahibalo kon san-o napatay si Melquisedec kag busa nag-untat sa pag-alagad subong saserdote, sa sina nga bahin nga nag-alagad sia nga wala mahibal-i ang katapusan.
Sa Hebreo, si Pablo nagkomento nahanungod kay Melquisedec sang nagahinun-anon sang papel ni Jesucristo subong superyor nga Mataas nga Saserdote. Nagapatuhoy kay Melquisedec subong tipo, ukon sulundan, ni Jesus sa sining saserdotenhon nga papel, si Pablo nagsiling: “Si Jesus . . . nangin mataas nga saserdote suno sa paagi ni Melquisedec.” (Hebreo 6:20) Sa anong kahulugan?
Mahimo nahibaluan ni Pablo nga ang rekord sang Biblia wala nagahatag sing mga detalye nahanungod sa kaliwatan ni Melquisedec—sa iya mga katigulangan ukon sa bisan sin-o nga posible nga mga kaliwat. Ina nga impormasyon indi lamang isa ka butang tuhoy sa Biblikanhon nga rekord. Busa, gikan sa punto-de-vista sang nahibaluan ni Pablo ukon sang aton nahibaluan, si Melquisedec masiling sing husto nga “walay genealohiya” (New World Translation of the Holy Scriptures; American Standard Version), “walay kaliwatan” (W. J. Conybeare, ukon “wala sing listahan sang kaliwatan.”—J. B. Phillips.
Sa anong paagi kaangay sing amo sina si Jesus? Huo, nahibaluan naton nga ang Amay ni Jesus amo si Jehova nga Dios kag ang iya tawhanon nga iloy amo si Maria sang tribo ni Juda. Sa gihapon, si Melquisedec kag si Jesus magkaanggid. Paano? Si Jesus wala natawo sa tribo ni Levi, ang tribo sang mga saserdote sa pungsod sang Israel. Indi, si Jesus wala mangin saserdote paagi sa tawhanon nga genealohiya. Si Melquisedec, nga wala nangin saserdote “suno sa kinahanglanon sang kasuguan nahanungod sa lawasnon nga kaliwatan,” kon sayuron, nga natawo sa isa ka saserdotenhon nga tribo kag panimalay. (Hebreo 7:15, 16) Sa baylo nga mangin isa ka saserdote paagi sa isa ka tawhanon nga amay nga isa man ka saserdote, si Jesus “gintangduan sang Dios nga mataas nga saserdote suno sa paagi ni Melquisedec.”—Hebreo 5:10.
Dugang pa, si Jesus wala sing kaliwat ukon tal-us sa iya pagkasaserdote. Sa sini man nga kahulugan, wala sia sing genealohiya. Matuman niya sing dayon ang iya saserdotenhon nga pag-alagad subong mabuligon nga instruktor. Si Pablo nagkomento sa sining walay katubtuban nga pag-alagad, nga nagasiling:
“[Si Jesus] nagapadayon sa iya pagkasaserdote nga wala sing mga tal-us bangod nga nagakabuhi sia sing dayon. Gani sarang sia sa tanan nga tion sa pagluwas sa ila nga nagapalapit sa Dios paagi sa iya, sanglit nagakabuhi sia sa gihapon sa pagpatunga nga nagatabang sa ila.”—Hebreo 7:24, 25.
Ang aton pagbinagbinag sa mga pinamulong ni Pablo sa Hebreo 7:3 dapat busa labi pa sa isa lamang ka ihibalo nga itago sa aton ulo. Dapat ini magadugang sang aton apresasyon tungod sa mahigugmaon nga aman nga ginhimo ni Jehova nga Dios para sa aton agod matigayon ang kapatawaran sang sala sa walay katapusan kag tungod sa paagi nga naghimos sia para sa aton nga makabaton sing bulig kag panuytoy sa walay katubtuban.