Mga Halimbawa sang Pagkamapainubuson nga Dapat Ilugon

“Ang imo pagkamapainubuson nagapadaku sa akon.”​—⁠SALMO 18:⁠35.

1. Ano nga pamatuod sang pagkamapainubuson ang makita sa anay presidente sang Watch Tower Society?

SI Joseph F. Rutherford tumalagsahon sing tindog, bangod nagataas sia sing kapin sa 180 sentimetros kag nagabug-at sing kapin sa 90 kilos. Mabaskog man ang iya tingog, nga gingamit niya indi lamang sa pagpakilala sa ngalan ni Jehova subong sang wala pa gid mahimo sang una kundi sa pagbuyagyag man sa pagpanglimbong sang relihiosong mga lider sang Cristiandad, nagatawag sang ila relihion nga “isa ka siod kag limbong.” Apang bisan pa may puwersa ang iya mga pamulongpulong, kon mangamuyo sia upod sa panimalay Bethel sa ulong-talatapan, kaangay lamang sia sang isa ka bata nga lalaki nga nagasugilanon sa iya tatay, busa nagahatag sing pamatuod tuhoy sa iya suod nga kaangtanan sa iya Magbubuhat kag sa iya pagkamapainubuson. Huo, mapainubuson sia kaangay sang isa ka bata.​—⁠Mateo 18:​3, 4.

2. Sa anong partikular nga bahin nga ang mga alagad ni Jehova tuhay gid sa mga indibiduwal sa kalibutan?

² Sa walay duhaduha, ang tanan nga matuod nga mga alagad ni Jehova nga Dios mapainubuson. Sa sining bahin tuhay gid sila sa katawhan sang kalibutan. Sa karon, labi pa sangsa nagligad, napuno ini sing bugalon nga mga indibiduwal. Ang mataas kag gamhanan, manggaranon kag mangin-alamon, kag bisan ang madamo sa mga imol kag mga wala tinun-an sa iban nga mga paagi mga bugalon.

3. Ano ang masiling nahanungod sa mga bunga sang bugal?

³ Ang bugal nagatuga sing daku nga kaawayon kag kalisod. Sa pagkamatuod, ang tanan nga kailo sa uniberso nagsugod bangod ang isa ka anghel nangin bugalon, nga buot simbahon sa paagi nga nagakaigo lamang sa Manunuga, nga si Jehova nga Dios. (Mateo 4:​9, 10) Dugang pa, sia, nga naghimo sang iya kaugalingon nga Yawa kag Satanas, nagmadinalag-on sa pagsulay sa unang babayi, nga si Eva, paagi sa pagganyat sa iya bugal. Ginsaaran niya sia nga kon kaunon niya ang ginadumilian nga bunga, mahimo sia mangin kaangay sang Dios, nga nakahibalo sang maayo kag malain. Kon mapainubuson sia, kuntani nagsiling sia, ‘Ngaa buot ko mangin kaangay sang Dios?’ (Genesis 3:​4, 5) Kon binagbinagon naton ang malisod nga kahimtangan sang katawhan, sa pisikal, mental, kag moral, indi gid mapasaylo ang pagkabugalon sang tawo! Indi katingalahan nga aton mabasa nga si Jehova nagadumot sang “bugal kag palabilabi”! (Manugwali 8:13) Kabaliskaran gid sa tanan nga mga bugalon amo ang halimbawa sang pagkamapainubuson nga masapwan sa Pulong sang Dios, ang Biblia.

Si Jehova nga Dios Mapainubuson

4. Anong mga kasulatan ang nagapakita nga si Jehova mapainubuson?

⁴ Si Jehova nga Dios​—⁠ang Labing Mataas, Soberano sa Uniberso, Hari sa walay katubtuban⁠—​mapainubuson. (Genesis 14:22) Posible bala ina? Huo! Si Hari David nagsiling, subong sang narekord sa Salmo 18:35: “Nahatagan mo ako sang taming sang imo kaluwasan, kag ang imo tuo nga kamot nagapatindog sa akon, kag ang imo pagkamapainubuson nagapadaku sa akon.” Gindayaw ni Hari David ang pagkamapainubuson ni Jehova paagi sa paghimo sa iya, si David, nga daku. Sa liwat, aton mabasa sa Salmo 113:6 nga si Jehova “nagapaubos sang iya kaugalingon sa pagtulok sa langit kag duta.” Ang iban nga mga badbad nagasiling, “nagaduko sa pagtulok,” (New International Version) “nagapaubos sa pagtulok.”​—⁠The New English Bible.

5. Anong mga hitabo ang nagapamatuod sang pagkamapainubuson ni Jehova?

⁵ Si Jehova nga Dios nagpaubos gid sang iya kaugalingon sang nakig-angot sia kay Abraham, nagtugot kay Abraham nga pamangkuton ang Iya pagkamatarong sa pagtuyo nga laglagon ang malaut nga mga siudad sang Sodoma kag Gomorra.⁠a (Genesis 18:​23-32) Kag sang ginpabutyag ni Jehova ang iya tuyo nga laglagon ang pungsod sang Israel​—⁠sang isa ka bes bangod sang idolatriya, sang isa pa bangod sang pagribok⁠—​si Moises sa tagsa ka okasyon nangatarungan kay Jehova subong nga daw nagapakigsugilanon sia sa isa ka tawo. Sa tagsa ka okasyon si Jehova nagpasugot. Pagpakita sing pagpaubos para sa Iya nga pasugtan ang pangabay ni Moises nahanungod sa Iya katawhan nga Israel. (Exodo 32:​9-14; Numeros 14:​11-20) Ang iban pa nga mga halimbawa sang mapainubuson nga pagpakig-angot ni Jehova sa mga tawo sing personal, kon sa aton pa, makita sa iya pagpakig-angot kanday Gideon kag Jonas, subong sang narekord sa Hukom 6:​36-40 kag Jonas 4:​9-11.

6. Anong kinaiya ni Jehova ang dugang nga nagapamatuod sang iya pagkamapainubuson?

⁶ Sa katunayan, sa magkubos siam ka bes, si Jehova ginasiling nga “makuli sa kaakig.”⁠b Ang pagkamabinatason kag kakuli sa kaakig ni Jehova sa pagpakig-angot sa dihimpit nga tawhanon nga mga tinuga sa mga milenyo isa ka dugang nga pamatuod sang iya pagkamapainubuson. Ang bugalon nga mga tawo dimapailubon, madali maakig, dimabinatason. Ang pagkamapainubuson ni Jehova nagahimo gid nga makahalam-ot sang bugal sang dihimpit nga mga tawo! Sanglit ginsugo kita nga ‘magmangin manug-ilog sang Dios subong mga anak nga hinigugma,’ dapat kita magpaubos subong nga sia mapainubuson.​—⁠Efeso 5:⁠1.

Ang Halimbawa sang Pagkamapainubuson ni Cristo

7, 8. Ano ang ginasiling sang Kasulatan nahanungod sa pagkamapainubuson ni Jesucristo?

⁷ Ang ikaduha sang labing talalupangdon nga halimbawa sang pagkamapainubuson nga dapat naton ilugon amo ang ginsambit sa 1 Pedro 2:21: “Sa katunayan, kay sa sini mga gintawag kamo, kay si Cristo man nag-antos tungod sa inyo, nga nagabilin sa inyo sing sulundan agod nga pagsundon ninyo sing maayo ang iya mga tikang.” Madugay pa antes sia nagkari sa duta subong isa ka tawo, ang Zacarias 9:9 nagtagna nahanungod sa iya: “Magsinggit sa kadalag-an, O babayi nga anak sang Jerusalem. Yari karon! Ang imo hari nagaabot sa imo. Matarong sia, huo, may kaluwasan; mapainubuson, kag nagasakay sa asno.” Kon si Jesucristo bugalon, ginbaton niya kuntani ang tanyag sang Yawa nga tanan nga ginharian sa kalibutan bilang baylo sang isa ka buhat sang pagsimba. (Mateo 4:​9, 10) Ginpakita man niya ang iya pagkamapainubuson paagi sa pagpatungod kay Jehova sang tanan nga kadayawan tungod sang iya panudlo, nga nagasiling: “Kon mabayaw ninyo ang Anak sang tawo, nian mahibaluan ninyo nga ako amo sia, kag nga ako wala nagahimo sing bisan ano sa akon kaugalingon nga pagbulut-an; kundi suno sa gintudlo sa akon sang Amay ginapamulong ko ining mga butang.”​—⁠Juan 8:​28.

⁸ Nagakaigo gid nga makasiling sia sa iya mga tagpalamati: “Itakod ang akon gota sa inyo kag magtuon kamo sa akon, kay ako malum-ok kag malulo sa tagipusuon, kag makakita kamo sing kapahuwayan sa inyo mga kalag.” (Mateo 11:29) Kag daw ano katahom nga halimbawa sang pagkamapainubuson ang ginhatag niya paagi sa paghugas sa tiil sang iya mga apostoles sadtong katapusan nga gab-i nga kaupod nila sia subong isa ka tawo! (Juan 13:​3-15) Sing labi ka nagakaigo, sa Filipos 2:​3-8, si apostol Pablo nagalaygay sa mga Cristiano nga ‘magpaubos sa hunahuna,’ naghinambit kay Jesucristo subong halimbawa: “Hupti ninyo ini nga hunahuna nga yara man kay Cristo Jesus, nga, bisan sa dagway sia sang Dios, wala niya pagbilanga ang pagpakigtupong sa Dios nga butang nga pag-agawon. Indi, kundi gin-ula niya ang iya kaugalingon kag nangin dagway sang ulipon kag natawo sa kaanggid sang mga tawo. Kag sang nakita sa bayhon sang tawo, nagpaubos sia sang iya kaugalingon kag nangin masinulundon tubtob sa kamatayon, huo, bisan sa kamatayon sa usok sang pag-antos.” Sang nag-atubang sing pinakadaku nga krisis sa iya kabuhi, mapainubuson sia nga nangamuyo sa iya Amay: “Indi sa buot ko, kundi sa buot mo.” (Mateo 26:39) Sing pat-od, agod mailog naton si Jesucristo, nga nagasunod sing maayo sang iya mga tikang, dapat kita magpaubos.

Si Apostol Pablo, Maayo nga Halimbawa sang Pagkamapainubuson

9-12. Sa anong mga paagi si apostol Pablo nagpahamtang sing maayo nga halimbawa sang pagkamapainubuson?

⁹ Si apostol Pablo nagsulat: “Magmanug-ilog kamo sa akon, subong nga ako manug-ilog ni Cristo.” (1 Corinto 11:⁠1) Gin-ilog bala ni apostol Pablo si Jesucristo paagi sa pagpaubos sa hunahuna, busa nagahatag sa aton sing isa pa ka halimbawa sang pagkamapainubuson nga dapat ilugon? Huo. Sa pamuno, mapainubuson nga ginkilala niya nga ulipon sia ni Jesucristo. (Filipos 1:⁠1) Ginsugiran niya ang mga gulang sa Efeso tuhoy sa iya ‘pag-alagad sa Ginuo nga may bug-os nga pagpaubos sa hunahuna kag may mga luha kag mga pagtilaw nga nag-abot sa iya bangod sa mga pagpuhon sang mga Judiyo.’ (Binuhatan 20:​17-19) Kon wala sia magpaubos, wala niya kuntani masulat ang mga pinamulong nga mabasa sa Roma 7:​18, 19: “Nakahibalo ako nga sa akon, kon sayuron, sa akon unod, walay nagapuyo nga maayo . . . Kay ang maayo nga luyag ko wala ko ginahimo, apang ang malaut nga indi ko luyag amo ang ginahimo ko.”

¹⁰ Nagapakita man sang pagkamapainubuson ni Pablo amo ang ginsulat niya sa mga Cristiano sa Corinto, subong sang narekord sa 1 Corinto 2:3: “Nagkari ako sa inyo sa kaluyahon kag sa kahadlok kag sa dakung pagkurog.” Mapainubuson nga ginapatuhuyan ang iya nagligad nga pagkabuhi antes mangin Cristiano, sia nagsulat: “Ako mapasipalahon anay kag manughingabot kag manugtampalas. . . . Si Cristo Jesus nag-abot sa kalibutan sa pagluwas sang mga makasasala. Kag ako amo ang labing makasasala.”​—⁠1 Timoteo 1:​13, 15.

¹¹ Dugang nga nagapakita sang iya pagkamapainubuson amo ang pagpadungog niya kay Jehova nga Dios sa tanan nga kadalag-an sang iya mga panikasog. Nagsulat sia nahanungod sa iya ministeryo: “Ako nagtanom, si Apolos nagbunyag, apang ang Dios nagpatubo; gani ang nagatanom ukon ang nagabunyag indi sia bisan ano, kundi ang Dios lamang nga nagapatubo.” (1 Corinto 3:​6, 7) Nangabay man sia sa iya mga kauturan nga ipangamuyo sia agod makahatag sia sing maayo nga panaksi, subong sang mabasa naton sa Efeso 6:​18-20: “Padayon nga magpangamuyo . . . tungod sa akon, nga mahatag sa akon ang ikasarang sa paghambal . . . nga mamitlang ko ang may kaangtanan sa [balaan nga tinago sang maayong balita] nga may kasidla subong sang nagakadapat.”

¹² Nagpakita man si Pablo sang iya pagkamapainubuson sa kon paano sia nakigkooperar sa iban nga mga apostoles: “Si Santiago kag si Cefas kag si Juan . . . naghatag sa akon kag kay Bernabe sang tuo nga kamot sang pagpakig-ambit, agod nga magkadto kami sa mga pungsod, kag sila sa mga sirkunsidado.” (Galacia 2:⁠9) Dugang niya nga ginpakita ang iya kahanda sa pagkooperar sa mga gulang sa kongregasyon sa Jerusalem paagi sa pag-upod sa apat ka tawo sa templo kag pagbayad sa ila mga galastuhan samtang ginatuman nila ang panaad.​—⁠Binuhatan 21:​23-26.

13. Ano ang naghimo nga tuman ka talalupangdon sang pagkamapainubuson ni Pablo?

¹³ Ang pagkamapainubuson ni Pablo labi pa ka talalupangdon kon makita naton kon paano sia gingamit sing daku ni Jehova nga Dios. Halimbawa, aton mabasa nga “ginhimo sang Dios ang pinasahi nga mga kalatingalahan paagi sa mga kamot ni Pablo.” (Binuhatan 19:​11, 12) Labi pa sa sina, ginhatagan sia sing labaw sa kinaugali nga mga palanan-awon kag mga bugna. (2 Corinto 12:​1-7) Indi man naton dapat kalimtan nga gingamit sia sa pagsulat sang 14 sa 27 ka tulun-an (sa katunayan mga sulat) sang Cristianong Griegong Kasulatan. Ina tanan wala maghimo sa iya nga matinaastaason. Nagpabilin sia nga mapainubuson.

Modernong-Adlaw nga mga Halimbawa

14-16. (a) Paano ang unang presidente sang Watch Tower Society isa ka maayo nga halimbawa sang pagkamapainubuson? (b) Ang iya halimbawa tuhay gid sa iya ni sin-o?

¹⁴ Sa Hebreo 13:​7, aton mabasa ang laygay ni apostol Pablo: “Dumduma yadtong mga nagapanguna sa inyo, nga naghambal sa inyo sang pulong sang Dios, kag samtang inyo ginapamalandungan kon ano ang resulta sang ila pagginawi iluga ang ila pagtuo.” Nahisanto sa sining prinsipio, mabinagbinag naton subong modernong-adlaw nga halimbawa ang unang presidente sang Watch Tower Bible and Tract Society, si ­Charles Taze Rus­sell, nga ang pagtuo mahimo naton ilugon. Mapainubuson bala sia nga tawo? Huo! Subong sang napanilagan, sa kaundan sang iya Studies in the Scriptures, anom ka tomo nga may mga 3,000 ka pahina, bisan kis-a wala niya paghinambiti ang iya kaugalingon. Ginasunod karon sang mga publikasyon sang Watch Tower Bible and Tract Society ini nga prinsipio sa indi paghatag sing igtalupangod sa mga tawo paagi sa pagpakilala sa mga manunulat.

¹⁵ Sa Watch Tower, si Russell nagsulat anay nga wala sia sing nahibaluan tuhoy sa mga butang subong sang “Russellismo” kag “Russellista,” mga tinaga nga gingamit sang mga nagapamatok sa iya apang maathag niya nga ginsikway. Sia nagsulat: “Ang amon hilikuton . . . amo ang paghugpong sang madugay na nalapta nga mga bahin sang kamatuoran kag ihatag ini sa katawhan sang Ginuo​—⁠indi subong bag-o, indi subong amon, kundi subong iya sang Ginuo. . . . Ang hilikuton nga sa sini ang Ginuo nalipay sa paggamit sang amon kubos nga kinaadman indi isa ka hilikuton nga orihinal kundi isa ka hilikuton sang pagtipon liwat, pagpasibu, kag pagpahisanto.” Sa pagkamatuod, ginpabutyag niya ang mga balatyagon ni apostol Pablo, subong sang mabasa sa 1 Corinto 3:​5-7.

¹⁶ Kabaliskaran gid ang iya panimuot sa kay ­Charles Darwin. Sa iya unang edisyon sang The Origin of Species sang 1859, sulit-sulit nga ginsambit ni Darwin ang “akon” teoriya, nga wala magsapak sa ginsiling sang iban nga nauna sa iya nahanungod sa ebolusyon. Isa ka kilala nga manunulat sadto nga siglo, nga si Samuel Butler, ang nagmulay kay Darwin, nagpakita nga madamo na ang nakapatalupangod anay sang teoriya sang ebolusyon; wala ini mag-umpisa kay Darwin.

17. Ano ang dugang pa nga mga halimbawa sang pagkamapainubuson ni Utod Rutherford?

¹⁷ Ang isa pa ka matutom nga alagad sa modernong tion nga gingamit sing daku ni Jehova nga Dios amo si Joseph F. Rutherford, nga ginhinambitan sa pamuno. Sia isa ka masidla nga tagsakdag sang kamatuoran sang Biblia kag ilabi na sang ngalan ni Jehova. Bisan pa kilala sing lapnag subong si Judge Rutherford, isa sia ka tawo nga mapainubuson sa tagipusuon. Halimbawa, nakapamulong sia anay sing dogmatiko tuhoy sa kon ano ang mapaabot sang mga Cristiano sang 1925. Sang ang mga hitabo wala magsakdag sang iya mga ginpaabot, mapainubuson niya nga ginsilingan ang panimalay Bethel sa Brook­lyn nga nagpakita sia sing kakulang sing maayo nga paghukom. Ang isa ka hinaplas nga Cristiano nga nakig-upod anay sing suod sa iya nagpamatuod nga madamong bes niya nabatian si Utod Rutherford nga nangayo sing pasaylo sa espiritu sang Mateo 5:​23, 24, sa publiko kag sa pribado, bangod nasaklaw niya ang isa ka masigka-Cristiano bangod sang masakit nga hambal. Nagakinahanglan sing pagpaubos para sa isa sa posisyon nga may awtoridad ang mangayo sing pasaylo sa mga napaidalom sa iya. Si Utod Rutherford nagpahamtang sing maayo nga halimbawa para sa tanan nga mga manug­tatap, sa kongregasyon man, sa hilikuton sa pag­lakbay, ukon sa isa sang mga sanga sang Sosiedad.

18. Anong ekspresyon nga nagapakita sing mapainubuson nga panghunahuna ang ginsiling sang ikatlo nga presidente sang Sosiedad?

¹⁸ Ang ikatlo nga presidente sang Watch Tower Bible and Tract Society, nga si Nathan H. Knorr, nagpakita man nga, bisan pa kilala sia sa tunga sang katawhan ni Jehova, wala sia magbatyag nga mataas bangod sang iya posisyon. Bisan pa may maayo sia nga ikasarang sa pag-organisar kag sa pagpamulongpulong publiko, may daku sia nga pagtahod sa ginahimo sang iban. Busa, ginduaw niya kis-a ang isa ka katapo sang Writ­ing Depart­ment sa iya opisina kag nagsiling: “Yari diri ang pinakaimportante kag pinakamabudlay man nga hilikuton. Amo ina kon ngaa diutay lang ang nahimo ko tuhoy sini.” Huo, mapainubuson nga ginaaplikar niya ang laygay sa Filipos 2:​3, nga ‘sa pagpaubos dapat bilangon sang isa ang iban nga maayo pa sa iya.’ Nakahibalo sia nga bisan pa ang pag-alagad subong presidente sang Sosiedad importante, ang iban nga mga hilikuton importante man. Nagkinahanglan sing pagpaubos sa bahin niya ang magbatyag sing amo sina kag ipabutyag ini sing maathag. Sia isa pa ka maayong halimbawa nga dapat ilugon sang tanan, ilabi na sadtong may prominente nga posisyon sang pagdumala.

19, 20. (a) Anong halimbawa sang pagkamapainubuson ang ginpahamtang sang ikap-at nga presidente sang Sosiedad? (b) Anong bulig ang mahatag sang masunod nga artikulo tuhoy sa pagpakita naton sing pagkamapainubuson?

¹⁹ Ang ikap-at nga presidente sang Sosiedad, nga si Fred W. Franz, isa man ka maayong halimbawa sang pagkamapainubuson. Subong bise-presidente sang Sosiedad sa mga 32 ka tuig, madamo sia sing nasulat para sa mga magasin kag para sa mga programa sa kombension; apang tuhoy sa sini nagpabilin sia pirme sa likod kag gintugutan ang iban nga amo ang talupangdon. Ang kaanggid nga halimbawa sang una mahimo mahinambitan. Sang nalutos ni Joab ang mga Amonhon sa Raba, ginsiguro niya nga mabaton ni Hari David ang kadayawan tungod sang kadalag-an.​—⁠2 Samuel 12:​26-28.

²⁰ Sa pagkamatuod, may madamo gid nga maayong halimbawa, sang nagligad kag karon, ang nagahatag sa aton sing daku nga rason agod magpaubos. Apang, may madamo pa nga rason agod magpaubos kita, kag ini subong man ang mga bulig sa aton pagpaubos pagabinagbinagon sa masunod nga artikulo.

[Mga footnote]

Madumduman Mo Bala?

◻ Ano ang mga bunga sang bugal?

◻ Sin-o ang nagpahamtang sing pinakamaayo nga halimbawa sang pagkamapainubuson?

◻ Ano ang nagapakita kon sin-o ang ikaduhang pinakadaku nga halimbawa sang pagkamapainubuson?

◻ Anong maayo nga halimbawa sang pagkamapainubuson ang ginpahamtang ni apostol Pablo?

◻ Ano ang aton prominente nga modernong-adlaw nga mga halimbawa sang pagkamapainubuson?

[Piktyur sa pahina 15]

Si Jesus nagpakita sing maayo nga halimbawa sang pagkamapainubuson

[Piktyur sa pahina 16]

Si Pablo nagpahamtang sing maayo nga halimbawa sang pagkamapainubuson

[Piktyur sa pahina 17]

Wala ginkuha ni Utod Russell ang kadungganan sa mga butang nga ginsulat niya