Gilead nga Paghanas sa Labing Balaan nga Pagtuo
“ANG amon mga estudyante ginhanas sing maayo sa labing balaan nga pagtuo.” Amo ini ang nagabukas nga mga pinamulong sa programa sa gradwasyon sang ika-95 nga klase sang Watchtower Bible School of Gilead, nga ginhiwat sang Domingo, Septiembre 12, 1993. Sadto nga aga ang 4,614 ka imbitado nga mga bisita kag mga katapo sang panimalay Bethel nga nagtipon sa Jersey City Assembly Hall ginpangunahan sa nagabukas nga pangamuyo ni George Gangas. Si Brother Gangas 65 ka tuig na nga katapo sang panimalay Bethel kag sa edad nga 97, sia ang pinakatigulang nga katapo sang Nagadumala nga Hubon.
Si Albert Schroeder, katapo man sang Nagadumala nga Hubon kag tsirman sang programa, nagsiling: “Sa lima ka bulan ang kurso sa Gilead ginpasad sa labing balaan nga pagtuo.” Apang ano bala ang “labing balaan nga pagtuo”? Ginpaathag niya nga ining “labing balaan nga pagtuo,” nga ginsambit sa Judas 20, amo ang kabug-usan sang kamatuoran sa Biblia. Gani ang kurso sa Gilead ginpasad sa Pulong ni Jehova, ang Biblia, nga amo ang iya pangunang libro nga tulun-an.
Ang mga Estudyante Nagabaton sing Dugang Pa nga Panudlo
Ang nahaunang humalambal amo si John Stuefloten sang Watchtower Farms Committee, nga nagpamulongpulong sa tema nga “Pagtuon Gikan sa Impluwensia sang Maalam nga mga Tawo.” Ang Biblia nagasiling nga yadtong ‘nagalakat upod sa maalamon nga mga tawo mangin maalam.’ (Hulubaton 13:20) Sa kurso sang Gilead, ang mga estudyante naghinguyang sing kapin sa 900 ka oras sa pagtuon sang Biblia. Pinamangkot ni Brother Stuefloten ang mga estudyante: “Paano kamo maapektuhan sang impluwensia ni Jehova sa palaabuton? Magakadto kamo sa 18 ka pungsod nga may kabilugan nga populasyon nga mga 170 milyones ka tawo. Gani paano ninyo impluwensiahan yadto nga mga tawo?” Paagi sa pagpamalandong sa kaalam ni Jehova, ang bag-ong mga misyonero makasarang sa pagbulig sa iban nga mangin mga sumilimba ni Jehova, ang Ginhalinan sang walay latid nga kaalam.
“Mangin Tanan nga Butang sa Tanan nga Tawo” amo ang tema sang masunod nga pamulongpulong, nga ginhatag ni Lloyd Barry sang Nagadumala nga Hubon. (1 Corinto 9:22, King James Version) Sang nagligad nga 45 ka tuig, si Brother Barry mismo estudyante sang ika-11 nga klase sang Gilead. Ang ika-95 nga klase nagapasalamat karon nga makabaton sing praktikal nga laygay gikan sa isa anay ka misyonero nga may mga tinuig nga inagihan sa dumuluong nga pungsod. Ginpalig-on niya ang mga estudyante nga magpauyon gilayon upod sa mga tawo sa ila bag-ong dumuluong nga teritoryo paagi sa paghibalo sang lokal nga kultura kag sa pagtuon sang tumandok nga hambal. Nagsiling sia nga mahimo ini sing labing maayo paagi sa pagpakig-upod kag pagpangabudlay upod sa lokal nga mga tawo subong man paagi sa pagtuon sang ila mga kinabatasan kag sa pagsunod sa sini kon nagakaigo.
Masunod, si Dean Songer sang Factory Committee nagpamulongpulong sa makawiwili nga tema nga “Hilway sa Iban nga Pag-alagdan.” Pagkatapos sang kapin sa 35 ka tuig sang bug-os tion nga pag-alagad, nahangpan ni Brother Songer ang kahulugan sang pagkabuhi sing nasentro, simple nga kabuhi, nga nagakonsentrar sa hilikuton nga dapat himuon, nga hilway sa materyal nga mga kabalaka. Kag amo ina ang kahulugan sang iya laygay sa mga estudyante. Ang mga manug-amba sa templo ni Jehova ginhilway sa iban nga pag-alagdan nga kinaandan sa iban pa nga mga Levinhon agod makonsentrar nila sing bug-os ang ila kaugalingon sa ila pinasahi nga katungdanan. (1 Cronica 9:33) Sa kaanggid, ang mga misyonero sang Gilead ginhilway gikan sa ordinaryo nga mga hilikuton subong sang sekular nga palamugnan agod makakonsentrar sila sa ila pinasahi nga pag-alagad. Si Brother Songer naghingapos paagi sa sining laygay: “Hupti ang inyo pagtamod sa kabuhi nga nasentro kag ang inyo kabuhi nga simple. Ang inyo katungdanan subong sadtong ginhilway sa iban nga pag-alagdan amo ang pagpangabudlay sa adlaw kag sa gab-i, nga nagadayaw kay Jehova.”
Ang katapo sang Nagadumala nga Hubon nga si Daniel Sydlik ang nagsunod sa tema nga “Pagtudlo sa Iban Kon Paano Matigayon ang Pinakamaayo sa Kabuhi.” Ginpalig-on niya ang mga estudyante nga “indi lamang magtudlo sang doktrina kundi mangin masidla nga ipakita sa mga tawo kon ano ang dapat nila himuon agod ipahisuno ang ila kabuhi sa kabubut-on sang Dios.” Ang maayong mga manunudlo dapat magpukaw kag magpahulag. “Magmahunahunaon sa pagpalambo sang Cristianong mga kabilihanan sa baylo sang pagtudlo lamang sang mga kasuguan kag mga regulasyon,” siling niya kag nagdugang sa paghingapos: “Labaw sa tanan, mahal ko nga mga kauturan, tudlui ang inyo kaugalingon kag tudlui ang iban kon paano maghigugma, kay amo ini ang himpit nga higot sang paghiusa.”—1 Corinto 13:1-3; Colosas 3:14.
Pagkatapos sang lima ka bulan nga paghanas, nagsuod gid ang mga estudyante sa ila duha ka instruktor sa Gilead. Si Jack Redford, nga misyonero man anay, ang namulongpulong sing una, sa tema nga “Husto ang Inyo Desisyon.” Sa dumaan nga Judiyong kalibutan, antes mangin isa ka Cristianong apostol, si Pablo may posisyon, kabantugan, impluwensia, kag pinansial nga kalig-unan. Apang sa Filipos 3:8, ginlaragway ni Pablo ini tanan subong “mga sagbot,” ukon “basura,” suno sa Phillips nga badbad. Nabalaka gid sia sa ministeryo, kag husto ang iya desisyon. Sa kabaliskaran, ginapakita karon sang kalabanan nga mga tawo paagi sa ila desisyon sa kabuhi nga ginakabig nila ang materyal nga mga pagkabutang nga may daku pa nga balor sangsa kabuhi nga walay katapusan. Ang mga misyonero sa Gilead nakahimo sing husto nga desisyon. Si Jack Redford naghingapos paagi sa pagsiling: “Wala sing butang nga matanyag ang kalibutan sang Yawa nga mapaanggid sa misyonero nga pag-alagad. Tipigi inang dimabanta nga pribilehiyo, kag pabay-i ang kalibutan sa paghimos sang iya basura!”
Sa sulod sang nagligad nga 32 ka tuig, si Ulysses Glass instruktor sa Gilead. Ginhatagan niya ang mga estudyante sing nagapaalam nga laygay sa tema nga “Dios Lamang ang Makahimo sing Kahoy,” nagapasad sang iya pamulongpulong sa Salmo 1:3. Indi gid mailog sang modernong teknolohiya ang paghimo sa kahoy, nga gindesinyo sang Dios. Sa kahulugan, ang matuod nga mga Cristiano kaangay sang mga kahoy, nga gintanom kag ginbunyagan ni Jehova. Si Brother Glass nagsiling nga sa lima ka bulan, ang mga estudyante “tayuyon nga ginbunyagan gikan sa tuburan sang nagahatag-kabuhi nga mga tubig sang Pulong sang Dios,” kaangay sang mga kahoy sa espirituwal nga kakahuyan ukon paraiso. Apang, subong mga misyonero, dapat nila bantayan ang ila “espirituwal nga gamot batok sa pagkadunot.” Ginlaygayan sila nga ‘padayon nga mag-inom sang tubig sang kabuhi halin kay Jehova bangod Dios lamang ang makahimo sing kahoy.’
Ang katapusan nga pamulongpulong ginhatag ni Carey Barber, nga katapo sang Nagadumala nga Hubon. Pagkatapos sang 70 ka tuig sang bug-os tion nga pag-alagad, si Brother Barber masinaligon nga makapamulongpulong sa tema nga “Hatagi si Jehova sing Eksklusibo nga Debosyon.” Wala paghatagi sang kalabanan nga mga tawo sing eksklusibo nga debosyon si Jehova. (Deuteronomio 5:9) Apang, subong sang ginpakita ni Brother Barber, walay sapayan sang aton pagkadihimpit, “posible ang mangin matutom sing bug-os sa Dios.” Nagdugang sia: “Wala gid sing isa ang makasiling: ‘Ginpahimo ini sa akon sang Yawa.’ ” Apang mahimo kita malutos sang Yawa kon indi naton sia pagsumpungon. (Santiago 4:7) Ang pagpabilin nga masako sa hilikuton ni Jehova amo ang panguna nga paagi sa pagsumpong kay Satanas kag sa iya kalibutan kag nagahatag sing eksklusibo nga debosyon kay Jehova.
Gintangdo Subong mga Misyonero
Ang programa sa aga naghinakop paagi sa opisyal nga pagtangdo sa 46 tanan nga mga estudyante subong mga misyonero. Ang 23 ka mag-asawa nakabaton sing mga diploma nga nagasiling sing bahin nga ang mga gradwado “kalipikado sing pinasahi sa paghimo sing hilikuton sa pagtudlo, nagapasanyog sang maayong kabubut-on kag nagapangabudlay para sa permanente nga paghidait kag sa kasuguan sang himpit nga kahim-ong kag pagkamatarong sa tunga sang tanan nga katawhan.” Ang ika-95 nga klase sang Gilead pat-od gid nga magapanikasog sa pagtuman sining halangdon nga hilikuton sa 18 ka pungsod nga gintangduan sa ila. Ang mga asaynment nagalikop sa kalibutan kag nagalakip sang mga pungsod sa Asia, Aprika, Europa, Latin Amerika, kag Caribbean.
Pagkahapon, pagkatapos sang ginpalip-ot nga Pagtinuon sa Lalantawan nga gindumalahan ni Charles Woody sang Service Department Committte, ang bag-ong mga gradwado sa Gilead nagpasundayag sang ila programa subong mga estudyante, nga may tema nga “Ginhanda Kami sang Gilead sa Pagtudlo Subong mga Misyonero.” Ang sesyon gintakpan sang drama nga “Ang Pagpili nga Nagaatubang sa Aton.”
Pagkatapos sining makapapagsik nga programa, ang bag-ong mga misyonero handa na karon nga ipadala sa apat ka pamusod sang duta agod ipaambit sa iban ang “labing balaan nga pagtuo.”
[Kahon sa pahina 26]
Mga Estadistika sang Klase
Kadamuon sang mga pungsod nga gintiglawas: 7
Kadamuon sang mga pungsod nga gintangduan: 18
Kadamuon sang mga estudyante: 46
Kadamuon sang mag-asawa: 23
Promedyo nga edad: 30.06
Promedyo nga mga tuig sa kamatuoran: 12.92
Promedyo nga mga tuig sa bug-os tion nga ministeryo: 9.4
[Piktyur sa pahina 26]
Ika-95 nga Naggradwar nga Klase sang Watchtower School of Gilead
Sa listahan sa ubos, ang mga raya ginnumeruhan halin sa una pa likod, kag ang mga ngalan nalista halin sa wala pa tuo sa tagsa ka raya.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.