Ang Manughatag sang “Tagsa ka Maayong Dulot”
“Isa ka bes gintawag ako sang isa ka ministro sang Reformed Church. Luyag niya mahibaluan kon paano ko ginapalakat ang akon iglesia. Siling ko sa iya: . . . ‘Wala kami sing ginaswelduhan; wala sing dapat awayan ang mga tawo. Wala kami nagapangolekta.’ ‘Paano kamo nagatipon sing kuwarta?’ pamangkot niya. Nagsabat ako, ‘Ti, Dr.——, kon isugid ko sa imo ang pinakasimple nga kamatuoran halos indi ka magapati sa sini. Kon ang mga tawo mangin interesado sa sini nga paagi, indi sila makakita sing pinggan nga ginalibot para sa amot. Apang makita nila nga may mga galastuhan. Magasiling sila sa ila kaugalingon, “Ining tilipunan may bili. . . . Paano ako makaamot sing kuwarta sa sining kausa?” ’ Gintulok niya ako nga daw nagahunahuna, ‘Ano ang hunahuna mo sa akon—bag-uhan?’ Nagsiling ako, ‘Ti, Dr.——, kamatuoran lamang ang ginasugid ko sa imo. . . . Kon ang isa ginapakamaayo kag may ikasarang, luyag niya ini gamiton para sa Ginuo. Kon wala, ngaa piliton naton sia?’ ”
—Charles T. Russell, nahaunang presidente sang Watch Tower Society, “The Watch Tower,” Hulyo 15, 1915.
NAGAHATAG kita bangod si Jehova amo ang una nga naghatag. Ang iya paghatag nagsugod sadtong malawig na nga tinuig nga nagligad paagi sa pagpanuga—ang iya una gid nga pagpanuga, ang iya “bugtong nga Anak.” (Juan 3:16) Bangod sang gugma, ginhatag niya ang dulot nga kabuhi sa iban.
Ang Anak sang Dios, nga si Jesucristo, amo ang pinakadaku nga dulot ni Jehova sa aton. Apang ang Anak sang Dios, sa iya kaugalingon, indi ang katapusan sang paghatag sang Dios. Ang “dimatupungan nga dibagay nga kaluoy sang Dios” amo ang ginatawag ni apostol Pablo nga “dimamitlang nga dulot” ni Jehova. (2 Corinto 9:14, 15) Ini nga dulot maathag nga nagalakip sang kabug-usan sang tanan nga pagkaayo kag mahigugmaon nga kalulo nga ginapakita sang Dios sa iya katawhan paagi kay Jesus. Inang dibagay nga kaluoy makadalayaw gid nga nagalabaw ini sa tawhanon nga ikasarang sa paglaragway ukon pagmitlang. Apang, may iban pa nga bahin ang paghatag sang Dios.
Sadto anay, maalamon kag mapainubuson nga ginbaton sang isa ka hari nga ang bisan anong maayo nga mga butang nga ginhatag niya subong mga dulot tunay nga iya ni Jehova. Sia nagsiling: “Ang tanan nga yara sa langit kag sa duta imo. Imo, O Jehova, ang ginharian, Ikaw ginbayaw subong nga pangulo labaw sa tanan. . . . Apang, sin-o bala ako kag ano ang akon katawhan, nga sarang kami sa paghalad sa sining bagay sing kinabubut-on gid? Kay ang tanan nga butang nagagikan sa imo, kag gikan sa imo kaugalingon naghatag kami sa imo.”—1 Cronica 29:11-14.
Halimbawa sang Dios
Si Santiago, nga disipulo ni Jesucristo, nakahibalo nga si Jehova nga Dios amo ang tuburan sang bisan ano nga maayo sa tanan nga bahin. Himpit nga dulot lamang ang nagahalin sa iya. Si Santiago nagsulat: “Ang tagsa ka maayong hatag kag ang tagsa ka dulot nga himpit nagagikan sa hitaas, halin sa Amay sang mga kapawa, kag nga sa iya walay pagliwanliwan ukon landong sang pagbalhin.”—Santiago 1:17.
Bisan nahanungod sa paghatag sing dulot, nakita ni Santiago kon daw ano ka tuhay ang Dios gikan sa mga tawo. Ang mga tawo sarang makahatag sing maayong dulot apang wala nila ini pirme ginahimo. Ining mga dulot mahimo nga bunga sang makagod nga motibo, ukon mahimo ini gamiton agod sulayon ang isa sa paghimo sing malain. Kay Jehova wala sing pagliwanliwan; wala sia nagabalhin. Gani, ang kinaugali sang iya mga dulot wala nagabalhin. Pirme ini putli. Pirme ini nagapauswag sang kaayuhan kag kalipay sang katawhan. Pirme ini malulo kag mabuligon, indi gid malaglagon.
Mga Motibo sang Paghatag sing mga Dulot
Sadtong panahon ni Santiago, ang popular nga relihiosong mga lider nagahatag sing dulot agod lamang makita sang mga tawo. Malain ang ila motibo sa paghatag. Nalangkag nga dayawon sang tawo, ginkompromiso nila ang ila matarong nga mga talaksan. Apang, tuhay ang mga Cristiano. Si Jesus naglaygay sa ila: “Kon ikaw magpanglimos, dili ka magpatunog sing budyong sa imo atubangan, subong sang ginahimo sang mga salimpapaw sa mga sinagoga kag sa mga dalan, agod pagdayawon sila sang mga tawo. Sa pagkamatuod ako nagasiling sa inyo, Nabaton na nila ang ila balos. Apang kon ikaw magpanglimos, dili pagpahibalua ang kamot mong wala sang ginahimo sang imo tuo, agod nga ang imo limos matago; kag ang imo Amay nga nagatan-aw sa tago magabalos sa imo.”—Mateo 6:2-4.
Ang rason sang isa ka Cristiano sa paghatag sing dulot amo ang pagbulig sa iban nga mapaayawan ang kinahanglanon ukon mapahalipay sila ukon mapauswag ang matuod nga pagsimba. Indi ini paghimaya sa kaugalingon. Ti, ang panulok ni Jehova sarang makalusot sa pinakaidadalman nga bahin sang aton tagipusuon. Sarang niya makita ang pinakasulod nga motibo sa likod sang aton mga dulot sang kaluoy.
Ang mga Saksi ni Jehova nagapanikasog nga ilugon ang halimbawa ni Jehova kag sang iya Anak sa paghatag sing dulot. Ginahatag nila kon ano ang yara sa ila. May yara sila maayong balita sang Ginharian, kag ginahatag nila ini sa kabulahanan sang iban. Nakahibalo sila nga ang Hulubaton 3:9 nagasiling: “Padunggi si Jehova sang imo hamili nga mga pagkabutang kag sang nahauna nga mga bunga sang tanan mo nga patubas.” Bangod ang tagsa ka sanga talatapan, kongregasyon, kag indibiduwal hanuot nga nagatinguha sa pag-amot sa kaayuhan sang tanan, ang bug-os nga paghiliutod ginapabakod kag ginabugana sa espirituwal. Ang materyal nga kabuganaan wala nagadul-ong sa espirituwal nga kabuganaan, apang ang espirituwal nga kabuganaan nagadala sing materyal nga kabuganaan nga nagakaigo para sa mga kinahanglanon sang hilikuton ni Jehova.
Mga Paagi sa Pagpakigbahin
Madamo sing paagi nga ang tagsatagsa makaamot sing personal sa pagsakdag sa maayong balita. Ang isa ka paagi amo ang nahanungod sa mga Kingdom Hall. Ang tanan nga katapo sang kongregasyon nagagamit sing Kingdom Hall. May pila nga naghatag sing pundo para mapatindog ini ukon maarkilahan, masugaan, maamanan sing kasangkapan sa pagpainit ukon air-condition, kag mamentinar. Sanglit ang pagsupurta sang tanan sa kongregasyon kinahanglanon, ang mga kahon-alamutan ginabutang sa Kingdom Hall, kag ang boluntaryo nga mga donasyon nga nabaton ginagamit sa pagbayad sa mga galastuhan sang kongregasyon. Gikan sa sobra, mahimo makahatag sing amot sa lokal nga sanga sang Watch Tower, suno sa desisyon sang kongregasyon.
Mahimo makaamot sa sanga sang Sosiedad mismo para sa paghanas kag sa pagsakdag sa mga misyonero kag mga espesyal payunir sa mga bahin sang kalibutan diin ang kabilugan nga populasyon wala pa mapalab-uti sing maayong balita. Ang iban nga mga galastuhan sa pagpalapnag sing maayong balita amo ang may kaangtanan sa hilikuton sang mga nagalakbay nga manugtatap. Si apostol Pablo, nga naghatag sing halimbawa sang nagalakbay nga hilikuton sang unang siglo, nagdayaw sa kongregasyon sang Filipos: “Ginpadalhan ninyo ako sing bulig sing labi pa sa makaisa.” (Filipos 4:14-16) Luwas sa galastuhan sa sining bahin sang bug-os tion nga pag-alagad, nga ang tanan nga sanga may amo sini, yara ang pagmentinar sa tagsa ka puluy-an Bethel kag sa mga nagapuyo kag nagapangabudlay didto. Ang pagsulat kag pag-imprinta sa literatura nga nagaunod sing matahom nga mensahe sang maayong balita mga pribilehiyo gid nga ginhatag sang Dios, apang ang pagpanagtag sing literatura kinahanglanon man, kag ini may galastuhan. Nian yara ang galastuhan sa mga asambleya kag mga kombension, indi na pagsambiton pa ang mga kaso sa hukmanan nga ginpakig-away agod ‘pangapinan kag palig-unon sing legal ang maayong balita.’—Filipos 1:7.
Ang tion nga ginhinguyang sa pagbantala sing maayong balita sang tagsa ka alagad ni Jehova boluntaryo, kag amo man ang paghatag niya sing materyal nga pundo. Ang regular nga pagpain sing kuwarta nga gamiton bilang pagsakdag sa pagpasangkad sang matuod nga pagsimba ginalaygay ni apostol Pablo: “Karon nahanungod sa amot nga sa mga balaan, . . . sa nahaunang adlaw sang tanan nga semana ang tagsatagsa sa inyo magpain nga supton niya suno sa iya pagkabugana.”—1 Corinto 16:1, 2.
Kon ang isa nagaamot, indi niya pirme mahibaluan kon paano gid ini gamiton, apang makita niya ang resulta sa pagsangkad sang pagbantala sa Ginharian. Ang report sa 1993 Yearbook of Jehovah’s Witnesses nagapakita nga ang maayong balita sang Ginharian ginabantala sa kapin sa 200 ka kadutaan kag kapuluan sang dagat sang kapin sa 4,500,000 ka Cristianong ministro. Ining mga report makalilipay. Kon amo ang bisan anong dulot, bisan ano man kadaku, nagabulig sa pagpalapnag sang maayong balita sa bug-os nga kalibutan.
Ini nga hilikuton ginagastuhan bangod sang tingob nga paghatag sang tanan. Ang iban nakahatag sing labi, nga nagabulig sa pagbantala nga hilikuton sa daku pa nga kasangkaron. Ang iban nakahatag sing kubos. Apang yadtong nagahatag sing diutay nga mga donasyon indi dapat magkahuya ukon magbatyag nga ang ila amot walay kabilinggan. Indi amo sina ang pagtamod ni Jehova. Gin-athag ini ni Jesus sang ginpakita niya kon daw ano ka daku ang apresasyon ni Jehova sa diutay nga amot sang balo. “Kag nakita niya ang imol nga babaying balo nga nagabutang didto sing duha ka lepta, kag nagsiling sia: ‘Matuod gid nagasiling ako sa inyo, Ining imol nga babaying balo nagbutang sing labi pa sa ila tanan. Kay sila tanan nag-amot gikan sa ila kabuganaan, apang sia sa iya kinawad-on nagbutang sang tanan nga inugpangabuhi niya.’ ”—Lucas 21:2-4.
Ano man ang aton pinansial nga kahimtangan, mahimo kita makahatag sa paagi nga nagapahamuot kay Jehova. Ginasumaryo sang salmista kon paano kita makahatag sing himaya sa aton Hari kag Hukom. Sia nagasiling: “Ipahanungod kay Jehova ang himaya nga naigo sa iya ngalan; magdala sing dulot kag magsulod sa iya mga luwang.” (Salmo 96:8) Busa, kabay nga ilugon naton ang mahigugmaon nga halimbawa sang aton langitnon nga Amay paagi sa aton malipayon nga paghatag bangod sia ang una nga naghatag sa aton.
[Kahon sa pahina 30]
KON PAANO ANG IBAN NAGAAMOT SA PAGBANTALA SANG GINHARIAN NGA HILIKUTON
◻ MGA AMOT SA BUG-OS KALIBUTAN NGA HILIKUTON: Madamo ang nagapain ukon nagabadyet sang kantidad nga ginahulog nila sa mga kahon-alamutan nga may ngalan: “Mga Amot Para sa Bug-os Kalibutan nga Hilikuton sang Sosiedad—Mateo 24:14.” Kada bulan ginapadala sang mga kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa pinakamalapit nga sanga talatapan.
◻ MGA REGALO: Ang boluntaryo nga mga amot nga kuwarta mahimo ipadala sing direkta sa Watch Tower Bible and Tract Society of the Philippines, Inc., P.O. Box 2044, 1099 Manila, ukon sa lokal nga sanga talatapan sang Sosiedad. Ang mga alahas ukon iban pa nga mga bahandi mahimo maamot. Ang isa ka malip-ot nga sulat nga nagasiling nga ini isa ka donasyon dapat ilakip sa sining mga amot.
◻ KAHIMUSAN SANG PAGDONAR NGA MAY KONDISYON: Mahimo ihatag ang kuwarta sa Watch Tower Society subong patago tubtob mapatay ang donador, upod ang kondisyon nga sa tion sang personal nga pagkinahanglan, ibalik ini sa donador.
◻ PASIGURO: Ang Watch Tower Society mahimo amo ang hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension. Dapat pahibaluon ang Sosiedad tuhoy sini nga kahimusan.
◻ MGA KWENTA SA BANGKO: Ang mga kwenta sa bangko, mga sertipiko sang deposito, ukon indibiduwal nga kwenta sa pagretiro mahimo ipatago subong butang nga ginapiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko. Dapat pahibaluon ang Sosiedad tuhoy sini nga mga kahimusan.
◻ STOCKS KAG BONDS: Mahimo idonar ang stocks kag bonds sa Watch Tower Society ayhan subong isa ka donasyon ukon sa idalom sang kahimusan diin ang kita padayon nga ihatag sa donador.
◻ REAL ESTATE: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa donador, nga padayon nga makaistar sa sini tubtob nga sia buhi. Dapat pakig-angutan sang isa ang Sosiedad antes himuan sing kasulatan ang bisan ano nga real estate sa Sosiedad.
◻ TESTAMENTO KAG MGA BUTANG NGA GINAPIYAR: Ang propiedad kag kuwarta mahimo ipapanubli sa Watch Tower Bible and Tract Society of Pennsylvania paagi sa ginhimo sing legal nga testamento, ukon ang Sosiedad mahimo hingadlan subong benepisyaryo sang isa ka kasugtanan sa mga butang nga ginapiyar. Ang isa ka butang nga ginapiyar nga nagabulig sa isa ka relihioso nga organisasyon mahimo hatagan sing mga bentaha sa buhis. Ang isa ka kopya sang testamento ukon sang kasugtanan sa butang nga ginapiyar dapat ipadala sa Sosiedad.
Para sa dugang nga kasayuran nahanungod sini, magsulat sa Watch Tower Bible and Tract Society of the Philippines, Inc., P.O. Box 2044, 1099 Manila, ukon sa lokal nga sanga talatapan sang Sosiedad.
[Mga piktyur sa pahina 31]
Kon paano ginagamit ang inyo mga donasyon:
1. Mga boluntaryo sa Bethel
2. Pagpatindog sing sanga talatapan
3. Pagbulig sa kalamidad
4. Mga Kingdom Hall
5. Mga misyonero