Magdangop Kay Jehova

“Sa imo, O Jehova, nagadangop ako.”​—⁠SALMO 31:⁠1.

1. Paano ginapabutyag sang Salmo 31 ang pagsalig sa ikasarang ni Jehova sa pag-aman sing dalangpan?

ANG matahom nga tingog nagaamba tuhoy sa isa ka tawo nga, bisan pa nakapoy sa hunahuna kag lawas, nagatugyan sang iya kaugalingon kay Jehova. Ang pagtuo nagamadinalag-on, siling sang liriko sina nga sagrado nga ambahanon. Sa masinapupuhon nga mga butkon sang Labing Gamhanan, ini nga tawo nakasapo sing palanaguan gikan sa nagalagas nga mga manughingabot. “Sa imo, O Jehova, nagadangop ako,” siling sang iya salmo. “O dili ako pagpakahuy-i. Luwasa ako sa imo pagkamatarong.”​—⁠Salmo 31:⁠1.

2. (a) Pasad sa anong duha ka haligi nga makasalig kita kay Jehova subong ang aton kuta? (b) Ano nga sahi sang Dios si Jehova?

² Ang salmista may isa ka dalangpan​—⁠isa nga pinakamaayo! Ang iban nga mga butang mahimo mapangduhaduhaan, apang ining katunayan nagapabilin: si Jehova amo ang iya kuta, ang iya pamakod. Ang iya pagsalig nahamtang sa duha ka malig-on nga haligi. Una, ang iya pagtuo, nga indi pagpakahuy-an ni Jehova, kag ikaduha, ang pagkamatarong ni Jehova, nga nagakahulugan nga indi gid Niya permanente nga bayaan ang Iya alagad. Si Jehova indi isa ka Dios nga nagapakahuya sa iya matutom nga mga alagad; wala sia nagaguba sang pangako. Sa baylo, sia isa ka Dios sang kamatuoran kag manugpadya sa sadtong hanuot nga nagasalig sa iya. Sa katapusan, ang pagtuo pagapadyaan! Magaabot ang kaluwasan!​—⁠Salmo 31:​5, 6.

3. Paano ginahimaya sang salmista si Jehova?

³ Nagakomposo sang iya musika sa nagabaludbalod nga tono nga nagataas halin sa daku nga kasubo kag kailo tubtob sa putukputukan sang pagsalig, ang salmista nakasapo sing nasulod nga kusog. Ginahimaya niya si Jehova tungod sang Iya maunungon nga gugma. “Pakamaayuhon si Jehova,” amba niya, “kay ginpahayag niya sa akon sing makatilingala ang iya mahigugmaon nga kalulo sa siudad nga malig-on.”​—⁠Salmo 31:⁠21.

Mabaskog nga Koro sang mga Manugbantala sang Ginharian

4, 5. (a) Anong mabaskog nga koro ang nagadayaw kay Jehova sa karon, kag paano nila ina ginhimo sining nagligad nga tuig sang pag-alagad? (Tan-awa ang tsart sa pahina 12-15.) (b) Sa anong paagi ginapakita sang tumalambong sa Memoryal nga madamo pa nga mga indibiduwal ang handa sa pagbuylog sa koro sang mga manugbantala sang Ginharian? (Tan-awa man ang tsart.) (c) Anong grupo sa inyo kongregasyon ang mahimo magabuylog sa koro?

⁴ Sa karon, ang mga tinaga sina nga salmo may dugang nga kahulugan. Ang mga ambahanon sang pagdayaw kay Jehova indi mapunggan sang bisan sin-o nga malauton nga manugpamatok, sang bisan anong kinaugali nga kalamidad, ukon sang bisan anong kabalaka sa pangabuhi; sa pagkamatuod, ang mahigugmaon nga kalulo ni Jehova nangin makadalayaw sa iya katawhan. Sa palibot sang kalibutan sang nagligad nga tuig sang pag-alagad, ang mabaskog nga koro, nga may kataason nga 4,709,889 sa 231 ka kadutaan, nag-amba sang mensahe sang Ginharian sang Dios. Ang langitnon nga panguluhan ni Jehova paagi kay Cristo Jesus isa ka dalangpan nga indi magapaslaw sa ila. Sang nagligad nga tuig, ining mga manugbantala sang Ginharian halin sa 730,070 ka kongregasyon naghinguyang sing kabug-usan nga 1,057,341,972 ka oras sa ebanghelyo nga hilikuton. Nagresulta ini sa pagsimbulo sang 296,004 ka tawo sang ila dedikasyon sa Dios paagi sa bawtismo sa tubig. Kag daw ano katahom nga sorpresa ang natigayon sang tanan nga nagtambong sa Balaan nga Panudlo nga Internasyonal nga Kombension nga ginhiwat sa Kiev, Ukraine, sining nagligad nga Agosto. Nakita nila ang pinakaimportante nga hitabo sa maragtas sang mga Saksi ni Jehova, nasaksihan ang pinakadakung narekord nga tingob nga pagbawtismo sa matuod nga mga Cristiano! Subong sang gintagna sa Isaias 54:​2, 3, ang katawhan sang Dios nagadugang sa dimatupungan nga kadamuon.

⁵ Apang, ang dugang pa nga kinabubut-on nga mga sakop sang Ginharian sang Dios nagahulat sang ila turno sa pagbuylog sa koro. Sang nagligad nga tuig, ang Memoryal sang kamatayon ni Jesus gintambungan sang makapakibot nga kabilugan nga 11,865,765 ka tawo. Sing malaumon, madamo sa ila ang makalipikar sa pag-amba sang ambahanon sang Ginharian sa mga ganhaan sa sining tuig sang pag-alagad. Magapasingkal gid ina nga paglaum sa kaaway sang kamatuoran, nga si Satanas nga Yawa!​—⁠Bugna 12:​12, 17.

6, 7. Ipaathag kon paano nalandas sang isa ka interesado ang pagtublag sang demonyo paagi sa bulig ni Jehova.

⁶ Si Satanas magatinguha sa pagbalabag sa iban nga ibuylog ang ila mga tingog sa sinang mabaskog nga koro. Halimbawa, nasapwan sang mga manugbantala sa Thailand ang madamo pa nga katawhan nga ginatublag sang demonyo. Apang, madamong mga sinsero ang nahilway sa bulig ni Jehova. Sa tapos maduaw ang manughiwit bangod sang pagpangusyuso, ang isa ka tawo napaidalom sa gahom sang mga demonyo sa napulo ka tuig. Ginpanikasugan niya nga mahilway gikan sa ila gahom sa bulig sang isa ka klerigo, apang wala sia mag-ayo. Isa ka bug-os tion nga ministro sang mga Saksi ni Jehova ang nagsugod sa pagtuon sang Biblia upod sa iya kag nagtudlo sa iya gikan sa Biblia sang lamang nga paagi nga mahilway gikan sa gahom sang demonyo​—⁠magkuha sing sibu nga ihibalo sang kamatuoran, magtuo kay Jehova nga Dios, kag magpakiluoy sa iya sa pangamuyo.​—⁠1 Corinto 2:5; Filipos 4:​6, 7; 1 Timoteo 2:​3, 4.

⁷ Pagkagab-i pagkatapos sini nga paghambalanay, ang lalaki nagdamgo diin ang iya napatay nga amay nagpahog sa iya kon indi sia magbalik subong palaagyan sang espiritu. Ang iya pamilya nagsugod sa pag-antos. Dimationg, ang lalaki nagpadayon sang iya pagtuon sa Biblia kag nagsugod sa pagtambong sa mga miting. Sa isa sadtong mga pagtuon, ginpaathag sang payunir nga kon kaisa ang mga pagkabutang nga ginagamit sa espiritistiko nga mga ritwal mahimo makahatag sa mga demonyo sing paagi nga tublagon ang mga tawo nga nagapanikasog nga mahilway gikan sa ila gahom. Nadumduman sang lalaki nga may lana sia nga ginagamit subong anting-anting. Nahangpan niya karon nga dapat niya ini ihaboy. Sugod sang ginhaboy niya ini, wala na sia pagtublaga sang malauton nga mga espiritu. (Ipaanggid ang Efeso 6:13; Santiago 4:​7, 8.) Sia kag ang iya asawa nagauswag sing maayo sa ila pagtuon kag tayuyon nga nagatambong sa mga miting sa pagtuon sa Biblia.

8, 9. Anong iban pa nga mga sablag ang nalandas sang iban nga mga manugbantala sang Ginharian?

⁸ Ang iban pa nga mga sablag mahimo magasagang sa tunog sang maayong balita. Bangod sang mapiguson katama nga kahimtangan sa pangabuhi sa Ghana, ang mga trabahador ginpahalin sa trabaho. Ang bili sang balaklon nagsalaka, nga nagapabudlay gid nga matigayon bisan ang pangunang mga kinahanglanon sa kabuhi. Paano nakatibawas ang katawhan ni Jehova? Paagi sa pagsalig, indi sa ila kaugalingon, kundi kay Jehova. Halimbawa, isa ka adlaw ang isa ka tawo nagbilin sing selyado nga sobre sa re­ception desk sang sanga talatapan. Ang sobre may sulod nga $200, ukon tatlo ka bulan nga minimum nga suweldo. Ang sobre naghalin sa wala magpakilala nga manug-amot, apang sa putos nasulat ini: “Nadula ko ang akon trabaho, apang ginhatagan ako ni Jehova sing isa pa. Nagapasalamat ako sa iya kag sa iya Anak, nga si Cristo Jesus. Bilang bulig sa pagpalapnag sang maayong balita sang Ginharian sa wala pa mag-abot ang katapusan, ginalakip ko ang diutay nga amot.”​—⁠Ipaanggid ang 2 Corinto 9:⁠11.

⁹ Ang pagtambong sa mga miting nagabulig sa paghanas sa sadtong nagabuylog sa mabaskog nga koro sang pagdayaw kay Jehova. (Ipaanggid ang Salmo 22:22.) Busa, sa nabagatnan nga bahin sang Honduras, may yara isa ka kongregasyon nga ginatawag El Jordán. Ano gid ang pinasahi sa sining diutay nga grupo? Amo ang ila matutom nga pagtambong sa mga miting. Sa 19 ka manugbantala, 12 ang nagatabok sa malapad nga suba sa pagtambong sa mga miting kada semana. Indi ini daku nga problema kon tig-ilinit, kay sarang nila matabok ang suba paagi sa pagtapak sa mga bato. Apang, kon tingulan, nagabalhin ang kahimtangan. Ang sadto indi delikado nga suba nangin isa ka masulog nga tubig nga nagadaldal sang tanan nga maagihan sini. Agod malandas ini nga problema, ang mga kauturan nga lalaki kag mga kauturan nga babayi dapat mangin maayong mga manuglangoy. Antes magtabok, ginasulod nila ang ila mga panapton nga inugtambong sa miting sa tina (dram) kag nian ginaputos ini sing plastik nga bag. Ang pinakamaayo maglangoy nagagamit sang tina subong salbabida kag nagatuytoy sa grupo sa pagtabok. Kon makatabok na, ginapamala nila ang ila kaugalingon, nagailis bayo, kag nagaabot sa Kingdom Hall nga malipayon kag nagaidlak sa katinlo!​—⁠Salmo 40:⁠9.

Isa ka Pamakod Diin Mahimo Kita Makapuyo

10. Ngaa makaliso kita kay Jehova sa tion sang pag-ipit?

¹⁰ Ginasalakay ka man sang demonyo ukon ginaipit gikan sa iban nga mga ginhalinan, si Jehova mahimo nga mangin imo kuta. Panawag sa iya sa pangamuyo. Nagapamati sia bisan sa pinakamahinay nga mga ugayong sang iya katawhan. Nasapwan sang salmista ina nga matuod kag nagsulat: “Ilingig sa akon ang imo igdulungog. Luwasa ako sing madali. Magmabakod ka nga igang sa akon, balay sang kabakuran sa pagluwas sa akon. Kay ikaw amo ang akon igang kag akon kuta; kag tungod sa imo ngalan ubayi ako kag tuytuyi ako. Palusa ako sa pukot nga ginladlad nila sing tago nga sa akon, kay ikaw akon pamakod.”​—⁠Salmo 31:​2-4.

11. Ipaathag kon ngaa ang pamakod ni Jehova indi isa ka umalagi nga duog.

¹¹ Indi lamang umalagi nga dalangpan ang ginaaman ni Jehova kundi isa ka dimasalakay nga kuta diin makapuyo kita nga may kalig-unan. Ang iya panuytoy kag pag-ubay wala magpaslaw sang iya katawhan. Ang balaan nga gahom magapawalay pulos sang tanan nga malimbungon nga mga buhat ni Satanas kag sang iya kabon. (Efeso 6:​10, 11) Samtang bug-os tagipusuon kita nga nagasalig kay Jehova, ipahilayo niya kita gikan sa mga siod ni Satanas. (2 Pedro 2:⁠9) Sang nagligad nga apat ka tuig, ang pagbantala nga hilikuton sang mga Saksi ni Jehova nabuksan sa 35 ka mga pungsod. Subong man, sa mga lugar sa kalibutan diin ang sosyal, ekonomiko, ukon politikal nga mga kahimtangan nagaupang sang pagbantala sang maayong balita, ang pila ka katulad-karnero nga mga tawo nagsaylo sa kon diin mahimo sila malab-ot sing labi pa sing hilway. Ang Japan isa sang mga lugar nga ginsayluhan nila.

12. Paano ginhimo sang isa ka payunir sa Japan si Jehova nga iya kuta?

¹² Ang mga trabahador halin sa iban nga mga pungsod nagadugok sa Japan sa pagtrabaho sing umalagi sa sining industriyalisado nga pungsod, kag madamong dumuluong sing hambal nga mga kongregasyon ang natukod. Ang eksperiensia sang isa ka utod nga lalaki sa Hapones nga kongregasyon nagailustrar kon daw ano ka mapatubason ining dumuluong sing hambal nga latagon. Luyag niya mag-alagad kon diin daku pa ang kinahanglanon. Apang, napulo na ka pagtuon sa Biblia ang ginadumalahan niya sa iya kongregasyon. Ang isa sang iya mga abyan malinahugon nga nagsiling: “Kon magakadto ka sa lugar diin daku pa ang kinahanglanon, magahiwat ka didto sing 20 ka pagtuon sa Biblia!” Nakabaton sia sing asaynment kag nagkadto sia sa Hiroshima. Walay sapayan, pagligad sang apat ka bulan, isa lamang ang iya pagtuon sa Biblia. Isa ka adlaw nagduaw sia sa isa ka tawo nga taga-Brazil nga nagahambal lamang sing Portugues. Sanglit ang utod indi makapakigsugilanon sa iya, nagbakal sia sing libro sa pagtuon sing Portugues. Pagkatapos natun-an ang pila ka simple nga mga ekspresyon sa pagsugilanon, ginduaw niya liwat ang tawo. Sang gintamyaw sia sang utod sa Portugues nga hambal, nakibot ang tawo kag, nga may daku nga yuhum, nagbukas sang iya ganhaan kag nagpasulod sa iya. Isa ka pagtuon sa Biblia ang nasugdan. Sang ulihi ang utod nagdumala sing kabilugan nga 22 ka pagtuon, 14 sa Portugues, 6 sa Espanyol, kag 2 sa Hapones!

Pagbantala nga May Pagsalig

13. Ngaa wala sing isa ang makapilit sa aton sa pag-alagad kay Jehova bangod nahuya lamang kita?

¹³ Ang katawhan ni Jehova masinaligon nga nagaamba sang ambahanon sang Ginharian upod ang bug-os nga pagtuo nga si Jehova amo ang ila dalangpan. (Salmo 31:14) Indi sila mahuy-an​—⁠indi sila pagpahuy-an ni Jehova, kay tumanon niya ang iya pulong. (Salmo 31:17) Ang Yawa kag ang iya yawan-on nga kabon mahuy-an. Sanglit ang katawhan ni Jehova ginsugo sa pagbantala sang mensahe nga indi makahuluya, wala sila mapilit sang iban nga mga tawo nga magbantala bangod nahuya lamang sila. Indi amo sina ang paagi nga ginapukaw ni Jehova, ukon sang iya Anak, ang iya katawhan nga simbahon Sia. Kon ang tagipusuon sang mga tawo puno sing pagtuo kag apresasyon tungod sa kaayo kag mahigugmaon nga kalulo ni Jehova, ang maayong kahimtangan sang ila tagipusuon ang magatiklod sa ila mga baba sa paghambal. (Lucas 6:45) Busa, ang ano man nga tion nga ginahinguyang naton sa pag-alagad kada bulan, ilabi na kon ina nga tion nagarepresentar sang bug-os gid naton nga masarangan, maayo, indi makahuluya. Indi bala nga ang lepta sang balo gin-apresyar sing bug-os ni Jesus kag sang iya Amay?​—⁠Lucas 21:​1-4.

14. Ano ang imo komento nahanungod sa payunir nga hilikuton? (Tan-awa ang tsart.)

¹⁴ Para sa nagadugang nga kadamuon sang mga manugbantala, ang ila bug-os kalag nga pagsimba nagalakip sang pag-alagad subong mga payunir​—⁠890,231 ang pinakamataas sang nagligad nga tuig! Kon ang pag-uswag sadtong nagligad nga tuig mahuptan, ini nga kadamuon pat-od nga magasobra sa 1,000,000. Ang masunod nga eksperiensia nagapakita kon paano ang isa ka utod nga babayi sa Nigeria nagpayunir. Sia nagsulat: “Sang manugtapos ako sa hayskul, nagbulig ako sa pagluto para sa mga nagaeskwela sa pio­neer ­school sang mga Saksi ni Jehova. Nakilala ko didto ang duha ka utod nga babayi nga mas tigulang pa sangsa lola ko. Sang nahibal-an ko nga mga payunir gali sila nga nagaeskwela sa eskwelahan, nahunahuna ko sa akon kaugalingon, ‘Kon ining duha mahimo makapayunir, ngaa ako indi?’ Gani pagkagradwar ko, nagregular payunir man ako.”

15. Sa anong paagi ginapaposible sang impormal nga pagpanaksi nga ang iban makadangop kay Jehova?

¹⁵ Indi tanan mahimo makapayunir, apang mahimo sila makapanaksi. Sa Belgium ang 82-anyos nga utod nga babayi namalaklon sing karne. Natalupangdan niya nga ang asawa sang manugkarne natublag gid sa sining karon lang nga mga kinagamo sa politika. Gani gin-ipit sang utod upod sa kuwarta ang tract nga Ano ang Ginapatihan sang mga Saksi ni Jehova? sang nagbayad sia. Sang nagbalik ang utod sa balaligyaan, ang asawa sang manugkarne, nga wala gid sing pang-alag-ag, namangkot kon ano ang ginasiling sang Biblia nahanungod sa posible nga ikatlong inaway kalibutanon. Gindal-an sia sang utod sing libro nga True Peace and Security​—⁠How Can You Find It? Pagligad sang pila ka adlaw, pagsulod gid sang tigulang nga utod sa balaligyaan, ang asawa sang manugkarne namangkot sing madamo pa sa iya. Nahanuklog ang utod sa sining babayi; dapat niya sia tanyagan sing pagtuon sa Biblia, kag ginbaton niya ini. Sa karon, luyag na sang asawa sang manugkarne magpabawtismo. Kamusta ang manugkarne? Ginbasa niya ang tract kag nagatuon man karon sa Biblia.

‘Bahandi sang Pagkaayo’

16. Paano si Jehova nagtigana sing bahandi sang pagkaayo para sa iya katawhan?

¹⁶ Sa sining mahuol nga katapusan nga mga adlaw, indi bala nga si Jehova ‘nagpahayag sing makatilingala sang mahigugmaon nga kalulo’ sa mga nagdangop sa iya? Kaangay sang isa ka mahigugmaon, maamligon nga amay, si Jehova nagtigana sing isa ka bahandi sang pagkaayo para sa iya dutan-on nga mga anak. Ginhatagan niya sila sing kalipay sa atubangan sang tanan nga tumalan-aw, subong sang ginasiling sang salmista: “Daw ano ka daku sang imo pagkaayo, nga gintigana mo sa mga nagakahadlok sa imo! Nga ginhimo mo sa mga nagadangop sa imo, sa atubangan sang mga anak sang mga tawo.”—Salmo 31:​19, 21.

17-19. Sa Ghana, ano ang nangin maayo nga resulta sang pagpalegalisar sang tigulang nga tawo sang iya kasal?

¹⁷ Busa, ang kalibutanon nga mga tawo nangin mga saksi sang pagkabunayag sadtong nagasimba kay Jehova, kag nagakatingala sila. Halimbawa, sa Ghana ang isa ka 96-anyos nga lalaki nagkadto sa opisina sang manugrehistro sang kasal kag nangabay nga ang 70 ka tuig nga pagpuy-anay nila sang iya asawa irehistro na karon. Nakibot ang manugrehistro kag namangkot: “Sigurado ka bala nga amo sina ang luyag mo himuon? Sa edad mo?”

¹⁸ Ang tawo nagpaathag: “Luyag ko mangin isa sang mga Saksi ni Jehova kag makigbahin sa pinakaimportante nga hilikuton sa wala pa ang katapusan sang kalibutan​—⁠sa hilikuton nga pagbantala sang maayong balita sang Ginharian sang Dios. Ini nga hilikuton nagadul-ong sa kabuhi nga walay katapusan. Ang mga Saksi ni Jehova nagatuman sa sibil nga kasuguan, lakip ang kasuguan sa pagparehistro sang kasal. Gani palihug irehistro ako.” Wala makatingog ang opisyal. Ginrehistro niya ini, kag ang tigulang nga lalaki naglakat nga malipayon nga karon legal na ang iya kasal.​—⁠Ipaanggid ang Roma 12:⁠2.

¹⁹ Pagkatapos sadto, ginpamensar sang manugrehistro ang mga nabatian niya. “Mga Saksi ni Jehova . . . pinakaimportante nga hilikuton . . . katapusan sang kalibutan . . . Ginharian sang Dios . . . kabuhi nga walay katapusan.” Naligban sa kon ano ang buot silingon sini tanan sa kabuhi sang 96-anyos nga tawo, namat-od sia nga pangitaon ang mga Saksi agod makapangusisa sing dugang. Ginbaton niya ang isa ka pagtuon sa Biblia kag naghimo sing madasig nga pag-uswag. Sa karon, ining manugrehistro sang kasal isa na ka bawtismado nga Saksi. Gani, kon ginatuman naton si Jehova bisan sa ayhan ginakabig sang iban nga magagmay nga mga butang, mahimo ini magaresulta sa daku nga kaayuhan para sa aton kag para sa mga nakasaksi sang aton pagginawi.​—⁠Ipaanggid ang 1 Pedro 2:⁠12.

20. Sa Myanmar, paano ang pagkabunayag sang isa ka lamharon nga utod nga babayi nagdul-ong sa isa ka maayong panaksi?

²⁰ Ang mga may edad na nga nagatugot sa kamatuoran nga magdihon sa ila nga mangin bunayag nga mga tawo nagahatag sing maayong halimbawa sa mga pamatan-on sa sining dibunayag nga kalibutan. May amo sina nga lamharon nga utod nga babayi nga nagapuyo sa Myanmar. Naghalin sia sa isa ka imol kag kubos nga pamilya nga may napulo ka kabataan. Ang amay, nga isa ka pensionado, regular payunir. Isa ka adlaw sa eskwelahan, ang utod nga babayi nakakita sing singsing nga brilyante, nga gindala niya gilayon sa iya manunudlo. Sang magtipon ang klase pagkadason nga adlaw, ginsugid sang manunudlo sa klase kon paano nakita kag nauli ang singsing sa tag-iya. Nian ginpangabay niya ang lamharon nga utod sa pagtindog sa atubangan sang bug-os nga klase kag ginpasugid kon ngaa ginhimo niya ini, sa pagkahibalo nga ayhan mahimo mamat-od ang iban nga mga kabataan nga taguon na lang ini. Ginpaathag sang utod nga babayi nga sia isa ka Saksi ni Jehova kag nga ang iya Dios indi maluyag sang pagpangawat ukon sang bisan ano nga sahi sang pagkadibunayag. Ang bug-os nga eskwelahan nakabalita sini, nga naghatag sa aton lamharon nga utod sing maayong kahigayunan nga makapanaksi sa mga manunudlo kag sa mga estudyante man.

21. Samtang ang mga lamharon nagasalig ay Jehova, paano ang ila pagginawi nagapabanaag sa iya?

²¹ Sa Belgium ang isa ka manunudlo nagkomento sing talalupangdon sa klase nahanungod sa mga Saksi ni Jehova. Napanilagan niya ang paggawi sang isa sang iya mga estudyante, nga isa man ka lamharon nga utod nga babayi, kag nagsiling: “Karon may lain na ako nga opinyon tuhoy sa mga Saksi ni Jehova. Ang pagkamaynadampigan nagdul-ong sa akon sa paghunahuna nga dimahinuklugon sila nga mga tawo. Labing mahinuklugon gali sila, samtang wala nagakompromiso sang ila mga prinsipio.” Kada tuig ang mga manunudlo nagahatag sa ila pinakamaayo nga mga estudyante sing award. Lakip sa sini amo ang award para sa maayo nga pamatasan. Sa tatlo ka sunod-sunod nga tuig, ang award para sa tatlo ka pinakamataas nga grado ginhatag sining manunudlo sa mga anak sang mga Saksi ni Jehova. Gani pirme ini nagakatabo sa sadtong ang maunungon nga pagsalig yara kay Jehova.​—⁠Salmo 31:⁠23.

22. Ano ang madinalag-on nga konklusion sang Salmo 31, kag paano ina nagabulig sa aton sa katapusan nga mga adlaw sining sistema sang mga butang?

²² Ang Salmo 31 nagapalanog sang madinalag-on nga konklusion: “Magpakaisog, kag kabay nga magpakabakod ang inyo tagipusuon, tanan kamo nga nagalaum kay Jehova.” (Salmo 31:24) Busa, samtang ginaatubang naton ang katapusan nga mga adlaw sang malauton nga sistema ni Satanas, nga wala gid nagapahilayo sa aton, si Jehova magapalapit pa gid sa aton kag magahatag sang iya kusog sa aton. Si Jehova matutom kag wala nagakapaslawi. Sia ang aton dalangpan; sia ang aton torre.​—⁠Hulubaton 18:⁠10.

Madumduman Mo Bala?

◻ Ngaa masinaligon kita nga makahimo kay Jehova nga aton dalangpan?

◻ Ano ang pamatuod nga ang mabaskog nga koro nagaamba nga may kaisog sang pagdayaw sa Ginharian?

◻ Ngaa makasalig kita nga ang pukot ni Satanas indi makasiod sa katawhan ni Jehova?

◻ Anong bahandi ang gintigana ni Jehova para sa mga nagadangop sa iya?

[Tsart sa pahina 12-15]

REPORT SA 1993 NGA TUIG SANG PAG-ALAGAD SANG MGA SAKSI NI JEHOVA SA BUG-OS NGA KALIBUTAN

(See bound volume)

[Mga piktyur sa pahina 16, 17]

Yadtong nagadangop kay Jehova nagahimo sing mabaskog nga koro sang mga manugbantala sang Ginharian​—⁠4,709,889!

1. Senegal

2. Brazil

3. Chile

4. Bolivia