Ang mga Pamatan-on nga ‘Nagsalig kay Jehova’

ANG mga pamatan-on indi lamang ang nagapanag-iya sang katahom, ni ang mga tigulang amo lamang ang may kaalam. (Ipaanggid ang Hulubaton 11:22; Manugwali 10:⁠1.) Sa baylo, ang nagapanag-iya sing mapinadayunon nga katahom kag matuod nga kaalam amo ang mga nagasalig kay Jehova kag bug-os tagipusuon nga nagasiling tuhoy sa iya: “Ikaw amo ang akon Dios.”​—⁠Salmo 31:14; Hulubaton 9:10; 16:⁠31.

Sa bug-os nga kalibutan nagadamo nga kadam-an sang matahom nga mga tawo, bata kag tigulang, ang nagapakita sang ila kaalam paagi sa pag-alagad sa Dios kag sa pagbantala sang maayong balita sang Ginharian sang Dios. Halimbawa, binagbinaga ang otso-anyos nga si Sabrina.

Si Sabrina taga-Alemanya kag yara sa ikaduha nga grado. Sia ang una nga Saksi ni Jehova sa iya eskwelahan. Sing makasulubo, sia ang puntariya sang mga insulto sang iya mga kabutho tubtob sang adlaw nga ginpangabay sang manunudlo sa mga estudyante nga dal-on ang ila paborito nga libro sa klase. Namat-od si Sabrina nga dal-on Ang Akon Libro sang mga Sugilanon sa Biblia. Isa ka gab-i antes, bisan pa ginakulbaan, naghanda sia sing maayo para sa klase. Bangod may yara 26 ka estudyante sa iya klase, nahibaluan niya nga basi diutay lamang ang iya tion. Apang determinado sia nga indi pagtugutan ang bisan sin-o nga magatublag sang iya presentasyon kag nakapat-od nga buligan sia ni Jehova. Sa gintalana nga adlaw, namangkot ang manunudlo kon sin-o ang nakadala sing libro kag maluyag nga amo ang una nga magapakita sini. Sing makakilibot, si Sabrina lamang ang nakadala. Nagtindog sia sa atubangan sang klase kag nagsugod sa paghambal, nagabasa kag nagapakita sang mga laragway gikan sa libro kag nagapaathag nga ang tanan napasad sa Biblia. Sa paghinakop namangkot sia: “Sin-o ang interesado nga makatigayon sini nga libro?” Ginhatag niya ang isa ka kopya sa manunudlo, kag sa masunod nga pila ka adlaw, napulo pa ka libro ang nahatag niya sa iya pila ka kabutho. Ang lamang nga komento sang manunudlo sa iya presentasyon amo: “Wala pa gid ako makakita sing kaangay sini.” Ginhatagan niya si Sabrina sing pinakamataas nga marka tungod sang ginhimo niya.

Sa katunayan, madamong lamharon nga mga Saksi ang malipayon nga mga manugbantala sang maayong balita sa eskwelahan. Ang isa pa ka halimbawa amo si Erika, 11-anyos nga manugbantala sa Mexico. Gintudluan sia kutob sa pagkabata nga higugmaon si Jehova. Ang iya hinimuan sa klase tumalagsahon. Ang isa sang iya mga asaynment amo ang paghanda sing materyal tuhoy sa AIDS kag pagkagiyan sa tabako kag alkohol. Naghanda sia sing maayo, nga nagagamit sang Awake! nga magasin, kag nakabaton sing pinakamataas nga marka. Namangkot ang iya maestra kon diin niya ginkuha ang impormasyon kag ginhatagan sia sing mga magasin nga nagalakip sang mga artikulo tuhoy sadtong mga topiko. Sang ulihi, gingamit sang maestra ining mga magasin sa pagpaathag sang mga topiko sa bug-os nga klase. Bangod sang paggawi ni Erika, sang iya pagtahod sa iya mga manunudlo, kag sang iya mataas nga mga grado, nakalipikar sia para sa mga dulot, mga diploma, kag tunga sing balayran nga iskolarship. Apang, nagabatyag sia nga ang iya pinakadaku nga hinimuan amo nga napakilala niya ang iya kaugalingon subong isa sang mga Saksi ni Jehova, nakapahamtang sing literatura sa Biblia, kag nabayaw ang ngalan sang Dios.

Nian yara si Shannon, isa ka dies-anyos nga bata nga lalaki nga taga-New Zealand. Isa lamang ka mata niya ang makakita; ang pihak ginkuha bangod sang kanser sang lapsag pa sia. Sang siete-anyos si Shannon, ang iya iloy nagtuon sa Biblia upod sa mga Saksi ni Jehova. Apang, wala madugay nga nagsugod sia sa pagtuon sa Biblia, nagpuyopuyo sia upod sa isa ka lalaki nga wala sing kasal kag namat-od nga untaton ang iya pagtuon. Si Shannon nakiluoy nga padayunon ang iya pagtuon sa Biblia. Ginhatag ang iya luyag. Ang mga Saksi padayon nga nagduaw, kag sang ulihi ang tanan nga tatlo ka katapo sang panimalay nagtuon sa Biblia kag nag-uswag sa espirituwal. Sa tapos makasal sing legal, ang iloy kag tiyo ni Shannon ginbawtismuhan.

Isa ka adlaw si Shannon kag ang asawa sang manugtatap sa sirkito nag-updanay sa pagguwa sa latagon. Pinamangkot sang tagbalay si Shannon: “Ano ang natabo sa imo mata?” “Nakanser ini, kag dapat ini kuhaon,” sabat niya. “Sa dili madugay hatagan ako ni Jehova sing bag-o nga mata sa Paraiso, kag amo ina nga yari kami agod sugiran ka nahanungod sini.”