Report sang mga Manugbantala sang Ginharian
Ang Pagkadimationg Nagadala sing Bugana nga mga Padya
SI Jesus nagtagna nga ang iya mga sumulunod pagahingabuton, kag si apostol Pablo nagtagna man, subong sang ginasiling sa 2 Timoteo 3:12: “Sa pagkamatuod, ang tanan nga buot magkabuhi nga may diosnon nga debosyon kay Cristo Jesus pagahingabuton man.” Apang ang pagkadimationg sa pag-alagad kay Jehova nga Dios nagadala sing bugana nga mga padya.
◻ Matuod ini sa isa ka banwa sa naaminhan-nasidlangan nga baybayon sang Malaysia. Bisan pa isa sia ka matutom nga Budhista nga grabe magbadlong sa iya mga anak, wala mapunggi sang amay ang iya tatlo ka anak nga babayi kag tatlo ka anak nga lalaki gikan sa pagtuon sang Biblia upod sa mga Saksi ni Jehova. Bisan ang iya asawa nagpakita sing interes sa kamatuoran. Nian isa ka adlaw ginyaguta sia sang kaingod: “Paano nga indi mo mapunggan ang imo mga anak kag ginapabay-an sila nga mangin mga Saksi ni Jehova? Ang akon mga anak nagaupod sa akon kag sa Budhista nga relihion sang amon katigulangan. Makaluluoy ka!”
Dalidali nga nagpauli ang amay kag namahog nga sakiton ang utod nga babayi nga nagadumala sing mga pagtuon upod sa iya mga anak. Apang, ginpakalma sia sang iya mga anak kag nagpadayon sa pagtuon sa Biblia upod sa mga Saksi ni Jehova kag sa pagtambong sa mga miting upod ang pagsakdag sang ila iloy.
Apang, sang ulihi ginpatawag sang amay ang bug-os nga pamilya. “Mamili kamo,” siling niya, “ako kag magpabilin kamo sa balay ukon mangin mga Cristiano kamo kag maghalin sa balay.” Ang kamagulangan nga anak nga lalaki, isa ka malulo maghambal nga bata nga lalaki, gilayon nga nagsugod sa pagpamutos. “Indi!” singgit sang amay. “Bangod kamo tanan mabinatuon nga mga anak, maayo pa nga mapatay ako.” Dalidali sia nga naguwa sa balay, nga ginalagas sang pamilya, nga nakitluoy nga indi niya pagpatyon ang iya kaugalingon. Bangod sang ila pangabay, nagpauli sia.
Nagligad ang panahon. Namutikan sang amay ang maayo nga epekto sang kamatuoran sang Biblia sa pagginawi sang iya mga anak. Isa ka adlaw nasugilanon niya ang iya mayinagutaon nga abyan, nga karon isa ka masinulub-on nga tawo, nga nagsiling: “Napaslawan gid ako sa akon mga anak. Ginadayaan kag ginakawatan nila ako.” Apang ang amay nga ang mga anak nagatuon upod sa mga Saksi ni Jehova nagsiling: “A, tuhay ang akon mga anak! Mabuot gid sila sa akon kag ginbuligan pa gani nila ako sa pagbayad sa akon gin-utang nga salakyan sang wala ako sing trabaho.”
Karon, ang tatlo ka anak nga babayi kag ang iloy bawtismado na. Ang isa ka anak nga lalaki espesyal payunir. Kag ang anay matutom kag maakigon nga amay? Mainabyanon na sia karon kag nakatambong sa Memoryal.
Ginpadyaan ni Jehova ang anak nga lalaki kag ang iya tatlo ka utod nga babayi subong man ang ila iloy bangod sang ila pagkadimationg sa Iya. Sila karon makugi nga mga manugbantala sing Ginharian, nga nagapahalipay sa tagipusuon ni Jehova.—Hulubaton 27:11.