Nakita Ko ang Bahandi nga May Mataas nga Balor

PANUGIRON NI FLORENCE WIDDOWSON

Sa kasisidmon, namat-od kami nga magkampo malapit sa linaw. Indi gid maayo nga lugar para sa duha ka babayi, apang nahunahuna namon nga indi ini peligruso sa isa lang ka gab-i. Samtang masako ako nga nagapatindog sang tolda, si Marjorie ang naghanda sang amon panihapon.

BAG-O ko lang natapos mapasalop ang katapusan nga palpal sang may namutikan ako nga nagagiho malapit sa madulom patay nga tuod sang kahoy. “Nakita mo bala nga naghulag yadtong tuod?” singgit ko kay Marjorie.

“Wala,” sabat niya, nga daw kinulbaan.

“Ti, naggiho gid ini,” singgit ko. “Idaho sa akon ang takuri!”

Dala ini, nagapas-an sang wasay, nagpadulong ako sa linaw. Sang nagahinampot na ako sa tuod, isa ka lalaki ang nag-ulhot sa likod sini!

“Mahimo bala mainom ang tubig sa linaw?” maabtik ko nga nabungat.

“Indi,” pasung-ol nga sabat niya, “apang kon luyag ninyo ang ilimnon, kuhaan ko kamo.”

Gilayon ko nga ginpangindian ang tanyag, kag sa akon daku nga paumpaw, hinali sia nga nagtalikod kag naglakat palayo. Nagapalangurog, dalidali ako nga nagbalik kag ginsugiran si Marjorie sang natabo. Dalidali namon nga ginhimos ang tolda, namutos, kag naglakat. Ginsugiran kami sang ulihi nga ang tawo bag-o lang gali makaguwa sa bilangguan.

Walay sapayan nga ang mga nagapangita sing bulawan masunson nga nagakampo sa mga lugar nga madamo sing bulawan sa Australia sadtong 1937, tuhay ang amon ginapangita. Nagapangita kami sing mga tawo nga hamili sa Dios.

Ang Akon Ginhalinan nga Pamilya

Sang nagligad nga isa ka gatos ka tuig, ang akon amay isa ka panday sang salsalon sa diutay nga minuro sang Porepunkah sa estado sang Victoria. Didto ako natawo sang 1895, kag nagdaku ako upod sa akon apat ka magulang nga lalaki malapit sa Ovens Riv­er, sa tiilan sang ­Mount Buf­falo. Ang akon mga ginikanan regular nga nagasimba sa Union ­Church, kag nag-eskwela ako sa Sunday ­school, diin ang akon amay amo ang superintendente.

Sang 1909, gin-atake sa tagipusuon si Nanay samtang nagabagyo sing tuman kabaskog kag napatay sa mga butkon sang akon amay. Nian, sang maaga nga bahin sang 1914, ang isa sang akon mga utod nga lalaki naglakat, kag ginbalik sia sa amon pagligad sang pila ka oras​—⁠nga patay na. Naghikog sia. Nadugangan pa gid ang amon kasubo sang panudlo sang simbahan nga ang impierno nagahulat sa iya, kay ang paghikog isa kuno ka dimapatawad nga sala.

Sang ulihi sadto nga tuig nagdabdab ang Inaway Kalibutanon I, kag ang akon duha ka utod nga lalaki nagsoldado para makig-away sa iban nga pungsod. Ang makahaladlok nga mga balita tuhoy sa pagpatulo sang dugo kag pag-antos nagtiklod sa amon nga anom ka lamharon nga kababayin-an, upod sang akon amay, nga tun-an ang tulun-an ni Juan sa Biblia.

Pagsapo sa Matuod nga Bahandi

Si Ellen Hudson may kopya sang libro nga The Time Is at Hand, ni ­Charles ­Taze Rus­sell. Kami tanan sa grupo naimpluwensiahan sang iya kapagsik. Sang nakita niya nga ang libro isa lamang sang isa ka serye sang anom ka tomo nga natig-uluhan sing Studies in the Scriptures, nagsulat sia sa Inter­national Bi­ble Stu­dents Asso­ciation sa Mel­bourne kag nangabay sang iban nga nalakip sa serye. Ang amon grupo nag-ugyon nga gamiton ang nahaunang tomo, The Divine Plan of the Ages, sa amon semanal nga pagtuon.

Handurawa ang kalipay namon ni Tatay sang matukiban namon nga wala gali sing kalayuhon nga impierno. Ang kahadlok nga ang akon utod nga lalaki didto sa kalayuhon nga impierno nadula. Natun-an namon ang kamatuoran nga ang patay wala sing hinalung-ong, nga daw nagakatulog, kag wala nagakabuhi sa iban nga lugar nga nagaantos. (Manugwali 9:​5, 10; Juan 11:​11-14) Ang pila sa amon grupo sang pagtuon sa Biblia namat-od sa pagduaw sa amon mga kaingod agod ibantala ang mga kamatuoran nga amon natun-an. Naglakat kami sa kaingod nga mga kabalayan, apang gingamit namon ang bisikleta kag ang karo nga ginaguyod sang kabayo sa pagkadto sa mga uma.

Natilawan ko una ang pamalaybalay nga pagpanaksi sang Armistice Day, Nobiembre 11, 1918. Tatlo kami gikan sa amon grupo sang pagtuon ang naglakbay sing 80 kilometros pakadto sa banwa sang Wangaratta agod ipanagtag ang tract nga Peoples Pulpit. Mga tinuig sang ulihi, sang gintangdo nga magbantala sa isa sang mga kaumhan, naeksperiensiahan ko ang ginsambit sa umpisa.

Sang 1919, nagtambong ako sa kombension sang mga Estudyante sang Biblia sa Mel­bourne. Didto, sang Abril 22, 1919, ginsimbuluhan ko ang akon dedikasyon kay Jehova paagi sa bawtismo sa tubig. Ang espirituwal nga pandot nagpatudok sang akon apresasyon sa espirituwal nga bahandi sang Ginharian sa mga langit kag sa dutan-on nga organisasyon ni Jehova.​—⁠Mateo 13:⁠44.

Wala ako nagpauli pagkatapos sang kombension kundi ginbaton ang imbitasyon nga updan si Jane Nicholson, isa ka bug-os tion nga manugbantala, para sa isa ka bulan nga pagpanaksi. Ang amon asaynment amo ang mga komunidad sang panguma kag bakahan sa may King River ayon. Pila lamang ka tuig ang nakaligad, ining bulubukid nga duog amo ang danyag para sa sine nga The Man From Snowy River.

Sang 1921 nabaton namon ang matahom nga bulig sa pagtuon sa Biblia nga The Harp of God. Sang gingamit ini ni Tatay subong libro nga tulun-an para sa iya klase sa Sunday ­school, madamong mga ginikanan ang namatok kag nangabay nga maghalin sia. Naghalin sia dayon. Sang ulihi nabaton namon ang polyeto nga Hell, nga may makawiwili nga mga pamangkot sa panghapin, “Ano Ini? Sin-o ang Didto? Makaguwa Bala Sila?” Nalangkag gid si Tatay sa maathag nga pamatuod sa Biblia nga ginhatag sa topiko nga sa gilayon ginsugdan niya nga ipanagtag ang mga kopya sa pamalaybalay. Ginatos sini ang napahamtang niya sa amon minuro kag sa kaingod nga mga uma.

Mga Paglakbay sa Pagbantala Upod kay Tatay

Sang ulihi, nagbakal si Tatay sing salakyan agod mapalab-utan sang mensahe sang Ginharian ang mga tawo sa iban nga mga lugar. Subong isa ka panday sang salsalon, naanad sia sa mga kabayo, gani ako ang nangin tsuper. Sang umpisa, nagatulog kami sing isa ka gab-i sa mga otel. Bangod mahal ini katama, nagsugod kami sa pagkampo.

Ginkay-o ni Tatay ang pulungkuan sa atubangan agod mauntay ini kag makatulog ako sa salakyan. Nagpatindog kami sing diutay nga tolda para matulugan ni Tatay. Pagkatapos sang pila ka semana nga pagkampo, nagapauli kami sa Porepunkah, diin ginabuksan liwat ni Tatay ang iya pandayan sing salsalon. Natingala gid kami nga may yara pirme madamo nga mga suki nga nagabayad sang ila mga balayran nga magamit namon sa amon masunod nga paglakbay sa pagbantala.

Madamong matarong sing panimuot nga mga tawo ang naghulag sa amon mga pagduaw kag nagbaton sa ulihi sing mga pagtuon sa Biblia. May yara na karon pito ka kongregasyon nga may ila kaugalingon nga mga Kingdom Hall sa lugar nga gin-alagaran anay sang amon diutay nga grupo gikan sa Porepunkah. Sa pagkamatuod, sin-o ang makatamay sa “adlaw sang magagmay nga mga butang”?​—⁠Zacarias 4:⁠10.

Sang 1931, naglakbay kami ni Tatay sing halos 300 kilometros sa malaw-ay nga mga dalan sa pagtambong sa isa ka pinasahi nga miting, diin ginbaton namon ang amon bag-ong ngalan, “Mga Saksi ni Jehova.” Nalipay kami nga duha sa sining pinasahi, Makasulatanhon nga ngalan. (Isaias 43:​10-12) Nagpakilala ini sa amon sing mas maayo sangsa indi madali makilal-an nga ngalan nga “Inter­national Bi­ble Stu­dents,” nga tubtob sadto kilala kami sa sini.

Isa ka adlaw samtang nagapanaksi sa banwa sang Bethanga, nasugilanon ko ang lokal nga ministro sang ­Church of England. Naakig gid sia kag gin-usoy ang amon madamong napahamtang nga mga libro, nagsugo nga ihatag sang mga tawo sa iya ang ila mga libro. Pagkatapos sadto ginsunog niya sa publiko ang mga libro sa sentro sang banwa. Apang ang iya talamayon nga buhat nagbalandra.

Sang ginsugiran ko ang sanga talatapan sang Sosiedad nahanungod sa natabo, isa ka sulat nga gintuyo nga mabasa sang publiko ang gin-imprinta nga nagpakamalaut sa ginhimo sang klerigo. Ginhimo man ang mga kahimusan nga ang mga salakyan nga puno sang mga Saksi magapanagtag sang sulat sa bug-os nga distrito. Sang ginduaw namon liwat sang ulihi ni Tatay ang banwa, mas madamo pa nga mga libro ang amon napahamtang sangsa nagligad. Ang mga tawo interesado kon ano ang ginaunod sang “gindumilian” nga literatura!

Ang una nga tawo nga nagbaton sang kamatuoran sang Biblia sa aminhan-sidlangan nga Victoria subong resulta sang amon pagbantala amo si Milton Gibb. Sa ulot sang amon mga pagduaw, gintun-an niya sing maayo ang tanan nga mga publikasyon sang Sosiedad nga ginbilin namon sa iya. Sa isa sang amon mga pagduaw liwat, ginkibot niya kami paagi sa pagsiling: “Isa na ako karon sang imo mga disipulo.”

Bisan pa nga nalipay sa iya desisyon, nagpaathag ako: “Indi, Milton. Indi mahimo nga mangin isa ikaw sang akon mga disipulo.”

“Ti, kon amo, isa ako sang mga disipulo ni Rutherford [presidente sadto sang Watch Tower Society].”

Sa liwat nagpaathag ako: “Indi, indi man isa sang mga disipulo ni Rutherford, kundi ginalauman ko nga isa sang mga disipulo ni Cristo.”

Si Milton Gibb napamatud-an gid nga isa sang madamong hamili nga mga bahandi nga ginhinguyangan ko sing madamong tinuig nga pagpangita. Sia kag ang duha sang iya mga anak nga mga lalaki mga Cristianong gulang na, kag ang iban nga mga katapo sang iya pamilya mga aktibo sa kongregasyon.

Pag-atubang sing Madamo nga mga Pagtilaw

Walay sapayan nga gindumilian ang hilikuton sang mga Saksi ni Jehova sa Australia sang Enero 1941, nagpadayon kami sa pagbantala, nga nagagamit lamang sang Biblia. Nian ang akon pagpayunir, ukon bug-os tion nga pagministeryo, nauntat sang ginpapauli ako agod atipanon ang akon nagamasakit sing grabe nga amay. Sang ulihi, nagmasakit man ako kag nagkinahanglan nga operahan. Madugaydugay gawa ang akon pag-ayo, apang naeksperiensiahan ko ang kamatuoran sang saad sang Dios: “Indi ko ikaw nga mas-a pagpalugaw-an ukon pagpatumbayaan ko ikaw.” (Hebreo 13:⁠5) Ang isa ka utod nga babayi nagpalig-on sa akon, nga nagasiling: “Dumduma, Flo, wala ka nagaisahanon. Kag ikaw kag si Jehova pirme nagaapinay.”

Nian ang hingapusan nga pagmasakit sang akon pinalangga nga amay naglawig sing 13 ka semana. Sang ulihi sang Hulyo 26, 1946, ginpiyong niya ang iya mga mata sa kamatayon. Nagkabuhi sia sing malipayon, kag may langitnon sia nga paglaum. (Filipos 3:14) Gani sa edad nga 51, nag-isahanon ako, kay kaupod ko si Tatay sa kalabanan sang akon tinuig sang pagkabata. Nian nakilala ko ang akon palamanahon. Nagpakasal kami sang 1947 kag magkaupod nga nagpayunir. Apang ining makalilipay nga panag-on wala magdugay, kay naatake sia sa tagipusuon sang 1953 kag nangin inbalido.

Naapektuhan gid ang panghambal sang akon bana, kag halos nangin imposible ang makigsugilanon sa iya. Amo yadto ang pinakamabudlay nga bahin sang pag-atipan sa iya. Daku gid matuod ang kahuol sa pagtinguha nga hangpon ang ginapanikasugan niya nga isiling. Bisan pa nagaistar kami sa nabaw-ing nga lugar diin wala sing malapit nga kongregasyon, wala kami pagpatumbayai ni Jehova sadtong mabudlay nga mga tinuig. Padayon ako nga nakigdungan sa tanan nga pinakaulihi nga impormasyon sa organisasyon, subong man may dalayon nga suplay sang espirituwal nga pagkaon sa Ang Lalantawan kag Magmata! nga mga magasin. Sang Disiembre 29, 1957, ang akon pinalangga nga bana napatay.

Pagministeryo sa Adelaide

Nagaisahanon ako liwat. Ano ang himuon ko? Batunon pa bala ako liwat subong bug-os tion nga ministro pagkatapos sang halos lima ka tuig nga pag-untat? Ginbaton ako, gani ginbaligya ko ang akon balay kag nagsugod liwat sa pagpayunir sa Adelaide, ang kapital nga siudad sang South Australia. Kinahanglan sadto didto ang mga payunir, kag gintangdo ako sa Prospect Congregation.

Bangod nahangawa ako magmaneho sa trapiko sa siudad, ginbaligya ko ang akon salakyan kag nagsugod sa pagbisikleta liwat. Gingamit ko ini tubtob sang 86 anyos ako, nakilala sa lugar subong ang “katitiya nga babayi sa asul nga bisikleta.” Sang ulihi labi pa gid ako nga ginakulbaan sa trapiko; ang unahan nga rweda sang akon bisikleta daw pirme nagawalog. Nag-untat lamang ako sa pagbisikleta sang isa ka hapon nahulog ako sa mga kudal nga tanom. ‘Amo na ini ang katapusan,’ siling ko sa akon kaugalingon, kag gani nagbalik ako sa paglakat.

Sang nagligad nga pila ka tuig, samtang nagatambong sa distrito nga kombension, ang akon mga batiis nagsugod sa pagpalangluya, kag pagkatapos sadto makaduha ako nga gin-operahan sa akon mga lutalutahan sa balikawang. Maayo ang akon kahimtangan pagkatapos sang operasyon tubtob nga gindalasa ako sang isa ka daku nga ido. Nagkinahanglan ini sang dugang nga pagbulong, kag sugod sadto naggamit ako sing walk­er agod makalakatlakat ako. Aktibo gihapon ang akon hunahuna. Kaangay ini sang ginsiling sang isa ka abyan: “Ang imo nagatigulang nga lawas daw indi makalagas sa imo batan-on nga hunahuna.”

Sa mga tinuig, nakita ko ang mga kongregasyon sa Adelaide nga nagtubo, nagsangkad, kag natunga. Nian, sang 1983, sang 88 anyos ako, ginbayaan ko ang Adelaide agod magpuyo upod sa isa ka pamilya sa Kyabram sa estado sang Victoria, diin nahinguyang ko ang napulo ka makalilipay nga mga tuig. Nagaguwa gihapon ako sa latagon; ang mga abyan sa kongregasyon nagapasakay sa akon sa ila salakyan agod maduaw ko yadtong regular nga nagakuha sing mga magasin sa akon. Ini nga mga tawo malulo nga nagapalapit sa salakyan agod masugilanon ko sila.

Sa pagpamalandong sang akon kapin sa 98 ka tuig nga pagkabuhi, hamili ko nga madumduman ang madamong maunungon kag matutom nga mga kauturan nga nagdayaw kay Jehova upod sa akon, ilabi na ang akon pinalangga nga amay. Mas malawig ang akon kabuhi sangsa tanan nga mga matutom nga nakaupod ko sa pagpayunir. Apang daw ano nga kasadya ang nagahulat sa akon nga mahiusa liwat upod sadtong may paglaum sang padya nga kabuhi sa langitnon nga Ginharian sang Dios, nga sa pagkamatuod isa gid ka bahandi nga may mataas nga balor!

[Retrato sa pahina 28]

Ginbawtismuhan ako sang Abril 22, 1919

[Retrato sa pahina 31]

Malipayon gihapon nga nagaalagad kay Jehova samtang manug-100 anyos ako