Ang mga Saksi ni Jehova sa Bug-os nga Kalibutan—Ang Republika sang Pilipinas

ANG 7,083 ka batuhon nga tropikal nga mga kapuluan nga nagahuman sang Republika sang Pilipinas amo ang naibabaw nga bahin sang mga kabukiran nga nagasawsaw sa dagat.⁠a Kag ang 62,000,000 ka pumuluyo sang Pilipinas maluyag makigsugilanon sa halos bisan ano nga topiko. Ining mainabyanon nga espiritu nagaresulta sa isa ka matambok nga latagon para sa pagpanaksi sa Ginharian.

Pagpanaksi sa Eskwelahan

Sa isla sang Masbate, ang isa ka lamharon nga estudyante sa hayskul nakapanaksi sa iya manunudlo kag klase sa tion sang husto-sala nga pasinawan. Sia nagareport:

“Ang dinalan amo, ‘Kon palangga ako sang Dios, indi niya ako paghatagan sing problema ukon pagtugutan nga mag-antos.’ Sang gintsekan sang akon manunudlo ang amon mga papel, nasapwan niya nga ang tanan luwas sa akon nagsabat sing husto. Gintugutan ako sang akon manunudlo nga ipaathag sa klase kon ngaa sala ang akon ginsabat. Nagsiling ako nga indi ang Dios ang naghatag sa aton sing mga problema, walay sapayan nga ginatugutan niya ang mga pag-antos kag ginatugutan nga tilawan kita. Nagagamit sang akon Biblia, nga ginadala ko pirme sa eskwelahan, nangatarungan ako sa klase sa mga pulong sa 1 Juan 4:​8, ‘Ang Dios gugma.’ Pagkatapos sang akon paathag, ang akon manunudlo nakombinse, nagpatik sang iya lamesa, kag nagsiling: ‘Husto si Marilou.’ Ako lamang ang nakakuha sing husto nga sabat sa sining pamangkot kag nakabaton sing pinakamataas nga marka.”

Ang Mensahe sang Ginharian Yara Bisan Diin

Samtang nagapamalaybalay sa iban pa nga bahin sang Pilipinas, nasugilanon sang isa ka regular payunir (bug-os tion nga manugbantala sang maayong balita) ang iloy sang tatlo ka magagmay nga kabataan. Ang babayi nagpakita sing hanuot nga interes sa mensahe sang Ginharian, kag mahapos nga nasugdan ang isa ka pagtuon sa Biblia upod sa iya. Bisan pa wala mahamuot ang iya bana nga nagatuon sia sa Biblia, ilabi na gikan sa mga Saksi ni Jehova, ang pagtuon nagpadayon.

Ginsaylo sang lalaki ang iya pamilya sa lain nga siudad, sa paghunahuna nga magatapos ini sang pagpakig-upod sang iya asawa sa mga Saksi. Apang, wala magdugay kag nakita nila ining babayi, kag ginpadayon niya ang iya pagtuon sa Biblia. Siempre pa, naakig ang iya bana. Nagkadto sia sa iya obra nga akig gihapon, diin ginpautwas niya ang iya balatyagon sa isa ka kustomer nga ang salakyan ginakay-o niya. Wala sing hinalung-ong ang lalaki nga ini nga kustomer isa gali sang mga Saksi ni Jehova.

Ginpaathag sang Saksi nga maayo gid para sa bug-os nga pamilya kon padayunon sang iya asawa ang iya pagtuon sa Biblia. Masugdan niya nga iaplikar ang mga prinsipio sang Biblia sa puluy-an mismo. Ginpanugda man nga ang bana mismo makabenepisyo paagi sa pagtuon nahanungod sa Ginharian sang Dios.

Ano ang resulta sini nga paghambalanay? Ang asawa sang lalaki may daku na nga kahilwayan sa pagtuon sang Biblia, kag namat-od sia nga ibalik ang iya pamilya sa ila orihinal nga puluy-an. Didto ang babayi nag-uswag sa espirituwal tubtob sa punto nga nangin isa ka dibawtismado nga manugbantala sang Ginharian. Ang iya bana nagbaton man sing pagtuon sa Biblia, kag ang bug-os nga pamilya nagsugod sa pagtambong sa Cristianong mga miting.

[Footnote]

[Kahon sa pahina 8]

LARAWAN SANG PUNGSOD

1993 nga Tuig Sang Pag-alagad

KATAASON SANG KADAMUON NGA NAGAPANAKSI: 116,576

RATIO: 1 ka Saksi sa 549

TUMALAMBONG SA MEMORYAL: 357,388

PROMEDYO NGA PAYUNIR NGA MGA MANUGBANTALA: 22,705

PROMEDYO NGA PAGTUON SA BIBLIA: 94,370

KADAMUON NGA NABAWTISMUHAN: 7,559

KADAMUON SANG KONGREGASYON: 3,332

SANGA TALATAPAN: MANILA

[Piktyur sa pahina 9]

Ang pagpanaksi sa merkado nagadala sing maayong mga resulta

[Piktyur sa pahina 9]

Sanga talatapan sang Watchtower Society sa Manila