Ang Parlamento sang mga Relihion sang Kalibutan—Magamadinalag-on Ayhan Ini?

GINATOS ka relihioso nga mga lider ang nagsinapol sa ikaduha nga Parlamento sang mga Relihion sang Kalibutan sa Chi­cago, Il­linois, E.U.A., sang tig-ilinit sang 1993. May mga tiglawas tanan ang mga Budhismo, Cristiandad, Hinduismo, Judaismo, kag Islam. Nagtambong man ang mga manughiwit kag mga sumilimba sa mga diosa. Ginhambalan nila ang ila nga papel sa pagtapos sang inaway. Ginkilala sang tsirman sang parlamento nga “dos-tersia sang dalagku nga mga inaway sa kalibutan karon ang may relihioso nga mga kahilabtanan.”

Isa ka Gatos ka Tuig nga Nagligad

Nagmadinalag-on bala ang parlamento sang una? Tan-awa kon ano ang natabo sang nagligad nga isa ka gatos ka tuig sa una nga Parlamento sang mga Relihion sang Kalibutan. Ginhiwat man ini sa Chicago, sang tig-ilinit sang 1893, kag kapin sa 40 ka relihion ang gintiglawas. Ang Konsilyo para sa Parlamento sang mga Relihion sang Kalibutan nagbaton nga ang mga nagtambong sang 1893 “nagpati nga mangin una yadto sang isa ka serye sang internasyonal nga mga pagtinipon sang salakot nga pagtuluuhan nga magaamot sa paghangpanay, paghidait kag pag-uswag. Indi amo sina ang natabo. Ang relihioso nga pagkapanatiko kag kasingki nangin bahin sang mga inaway sang nagligad nga 100 ka tuig, kag amo man sa gihapon tubtob karon.” Ngaa napaslawan? Bangod ang bug-os nga ideya sang pagsakot sa mga pagtuluuhan wala ginakahamut-an sang Dios. Ang Biblia nagasiling “Indi magpaguta sing sampihakan upod sa mga ditumuluo.”​—⁠2 Corinto 6:​14-17.

Sing nagakaigo, ginpadaku sang Septiembre 1893 nga guwa sang Zion’s Watch Tower ang kakulang sing Makasulatanhon nga suporta para sa Parlamento sang mga Relihion sang Kalibutan sang magsiling ini, nga walay pagyaguta: “Nakakutkot sila sing madamo matahom nga daga nga mga silindro gikan sa mga kagulub-an sang Babilonia kag sang iban pa nga dumaan nga mga siudad, apang may iban nga wala pa makit-i. . . . Wala sila sing nasapwan nga bisan ano nga nagahambal nga si Moises kag si Josue nagpatawag sing isa ka ‘Parlamento sang mga Relihion,’ sang mga Moabnon kag mga Amonhon, kag mga Edomnon . . . Wala sila sing nasapwan nga bisan ano nga nagahambal nga ang mabakod nga tigulang na nga si Samuel nagpasugat sa Gat kag Ekron sing tiglawas nga mga saserdote ni Dagon agod magkari sa Silo kag maghiwat sing komperensia upod sa mga saserdote ni Jehova . . . Wala sila sing nasapwan nga bisan ano nga nagahambal nga ang tigulang na nga si Elias nga nagapamaha sing panit nagbuko sing ‘kongreso’ upod sa mga saserdote ni Baal kag ni Moloc para sa isa ka semana nga paghambalanay tuhoy sa mga panudlo sang ila tagsatagsa nga mga pagtuluuhan, sa tuyo nga pauswagon ang pagtahuray sa relihion sang kada isa saila.”

Ang Ginharian sang Dios—Ang Lamang nga Paglaum

Ang Parlamento sang mga Relihion sang Kalibutan indi magmadinalag-on. Ang mga pamantalaan kag mga delegado nagagamit sing mga termino subong sang “mga kinagubot,” “kinagamo,” kag “kinagumon” may kaangtanan sa parlamento. Suno sa isa ka report, bisan ang pulisiya nanghilabot pa sa pagpahipos sang duha ka ginamo nga gintuga sang politikanhon nga pagbinahinbahin. Sa isa ka dokumento sang 1952, ginlista sang parlamento ang isa sang iya mga katuyuan: “Pagtukod sing isa ka permanente nga Bug-os Kalibutan nga Parlamento sang mga Relihion nga magakooperar sa NASYONES UNIDAS sa pagtigayon sing bug-os kalibutan nga paghidait kag paghangpanay sa tunga sang tanan nga katawhan.” Sa kabaliskaran, si Jesus nagsiling nga ang iya Ginharian indi bahin sining kalibutan. Ginatudlo sang Biblia ang Ginharian sang Dios subong amo lamang ang solusyon sa mga problema sang katawhan.​—⁠Daniel 2:44; Juan 18:⁠36.