Report sang mga Manugbantala sang Ginharian

“Ang Dios Walay Ginapasulabi”

NAPULOG-SIAM ka gatos ka tuig ang nagligad, ang inspirado nga si apostol Pedro nagsiling: “Ang Dios walay ginapasulabi, kundi sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:​34, 35) Masapwan sa tunga sang mga Saksi ni Jehova ang katawhan gikan sa tanan nga rasa kag relihioso nga mga ginhalinan. Nagahandum sila sing pagkamatarong, kag nagakahadlok sila sa Dios. Ginaabiabi sila tanan ni Jehova sa bag-ong kalibutan nga katilingban, subong, halimbawa, sang ginhimo niya sa isa ka babayi sa Chad.

Ini nga babayi wala makontento sa iya relihion. Sang nagligad nga tinuig ginbaton niya ang isa ka kopya sang libro nga Your Youth​—⁠Getting the Best Out of It, nga ginbalhag sang mga Saksi ni Jehova, kag gin-apresyar niya ang maayo nga laygay sang libro. Nasugdan ang isa ka pagtuon sa Biblia, kag yara sia pirme sa pagtuon. Apang, sang ginpalig-on sia nga magtambong sa mga miting sa Kingdom Hall, wala sia magkadto. Ngaa? Bisan pa ang iya bana wala mamatok sa iya pagtuon, wala niya pagtuguti sia nga magtambong sa mga miting sa Kingdom Hall.

Sang luyag sang asawa nga magtambong sa sirkito nga asambleya, ginpakita sang Saksi nga nagadumala sang pagtuon sa bana ang programa, nga nagapadaku sang maayo nga laygay nga ipresentar. Nagsugot sia nga ang iya asawa magkadto sing “makaisa lang.” Nagtambong sia kag nakapanginpulos sing bug-os gikan sa programa. Sa tapos niya mapaathag sa iya bana ang iya natun-an, wala na sia mamatok sa iya pagtambong sa iban nga mga miting. Nahamuot sia sa katunayan nga ang kongregasyon ginahuman sang mga tawo gikan sa nanuhaytuhay nga etniko nga mga grupo nga nagaulikdanay sing tudok sa isa kag isa. Sang ulihi nagtambong sia sa distrito nga kombension kag nalipay gid sia sang makita niya ang iya kabataan nga nagapungko sa sabak sang mga Saksi gikan sa iban nga mga pungsod kag nagkabig sa ila kaangay sang pamilya. Amo ini ang nagpabag-o sa iya.

Apang nagsunod ang pagpamatok. Bisan pa mahuluy-on sia, nagsugod sia sa pagkomento sa mga miting kag sa pagtindog sing malig-on batok sa negatibo nga mga komento sang iya mga paryente kag mga kaingod. Bisan pa madamo nga tinuig na nga nagapuyo sia upod sa iya bana, ang ila pag-asawahay suno lamang sa tradisyunal nga pagsugtanay. Paano niya masambit ang topiko nga magpakasal sila sing legal? Sa tapos makapangamuyo sing sinsero kay Jehova, ginhambal niya ang iya bana, nga nagsiling nga usisaon niya ang posibilidad. Ginhimo niya ini sang ulihi, kag ang mag-asawa ginkasal sing legal.

Ang bayaw nga babayi nga nagalumon sa ila nagtuga sing madamo nga problema, apang nagtindog ang bana pabor sa iya asawa. Nian nagduaw ang amay sang bana. Ginmanduan niya ang iya anak nga diborsiohan ang iya asawa, kay gin-islan niya ang iya relihion. Ginsingganan sang amay ang iya anak nga sia ang mahatag sang pangregalo sa nobya para sa “mas maayo nga asawa.” Ang sabat sang anak amo: “Indi, indi ko paghimuon ina. Maayo sia nga asawa. Kon sia ang luyag maglakat, tuhay ina, apang indi ko sia pagpalakton.” Ang asawa tuman ka matinahuron sa iya ugangan nga lalaki, kag nahuya gid ang ugangan nga lalaki sa iya gingawi. Apang, sang magbalik sia sa iya minuro, ginsulatan niya ang iya anak, sini nga tion naghatag sia sing ultimatum. Nagsiling sia nga kon ang iya anak mangindi sa pagpalakat sa iya, indi na niya sia anak. Sa liwat gin-unungan sang anak ang iya asawa. Handurawa ang kalipay sang asawa sang makita niya ang iya bana nga nagahimo sina nga malig-on nga tindog.

Karon ang ila duha ka magagmay nga anak nga lalaki naluyag mag-upod sa ila iloy sa Kingdom Hall. Nangayo pa gani sila sa ila amay sing kurbata, kay nakita nila ang tanan nga utod nga lalaki nga nagapamulongpulong nga nagasuksok sini. Karon ini nga babayi isa ka bawtismado nga utod nga babayi.

Isa sia sa 345 ka malipayon nga Saksi sa Chad nga nagabantala sing maayong balita sang Ginharian ni Jehova kag nagaapresyar nga, sa pagkamatuod, “ang Dios walay ginapasulabi.”