Report sang mga Manugbantala sang Ginharian
Ginpahiusa sang Kamatuoran sang Biblia ang Isa ka Pamilya
SA KARON, sa madamo nga bahin sang kalibutan, ang paghiusa sang pamilya daw nadula na. Apang, ginapahayag sang Biblia kon ano ang kinahanglanon agod matigayon ang paghiusa sang pamilya. Binagbinaga ang mga pulong ni Jesus: “Ang tagsatagsa nga nagapamati sining mga pulong ko kag nagatuman sa ila ipaangay sa tawo nga mainandamon, nga nagtukod sang iya balay sa ibabaw sang igang.” (Mateo 7:24) Linibo ka pamilya sa tunga sang mga Saksi ni Jehova ang nakatigayon sing paghiusa paagi sa pag-aplikar sining mga pulong kag paggamit sa Biblia subong pundasyon sa pagtukod sing isa ka suod nga pamilya. Ang iban nagatigayon man sina nga paghiusa, subong ginapakita sang masunod nga eksperiensia.
Sang si Daniel isa ka soldado sa armada sang Pransia, ang kapelyan sang armada nanugda kay Daniel nga magbakal sia sing Biblia, nga ginhimo niya, kag ginsugdan niya ini nga basahon sing regular. Sang ulihi ginsaylo sia sa Tahiti. Ang iban sang kaupod nga mga soldado ni Daniel mga Adbentista, ang iban mga Mormon. Ang ila mga paghambalanay pirme nga nagakadto sa tema nga relihion. Isa ka adlaw ginpakilala sang hepe nga sarhento si Daniel sa iya asawa, nga isa sang mga Saksi ni Jehova. Bug-os nga hapon nga ginsabat niya ang madamo nga pamangkot ni Daniel kag gintugyan niya sia sa isa sang lokal nga mga kongregasyon sang mga Saksi ni Jehova sa Tahiti. Wala magdugay ginsugdan niya ang regular nga pagtuon sa Biblia.
Ang mga ginikanan ni Daniel sa Pransia sinsero gid nga mga Katoliko. Ang iya amay isa ka manuglaygay sa eskwelahan kag amo ang nagadumala sa relihioso nga pagtudlo sa isa ka Katoliko nga eskwelahan. Sa handum nga ipaambit sa iya mga ginikanan ang pila sang espirituwal nga mga butang nga iya ginatun-an, amat-amat nga ginlakipan ni Daniel sing pila ka Biblikanhon nga mga panghunahuna ang iya mga sulat sa ila.
Sang primero nalipay ang iloy ni Daniel, apang nakibot sia nga makita ang ngalan nga Jehova sa isa sang mga sulat sang iya anak. Pila ka adlaw sang ulihi, nabatian niya ang isa ka programa sa radyo nga nagatawag sa mga Saksi ni Jehova subong isa ka “makatalagam nga sekta.” Ginsulatan niya si Daniel nga ginapangabay sia nga bugtuon sa gilayon ang tanan niya nga pagpakig-angot sa mga Saksi. Apang, padayon nga nag-uswag si Daniel sa iya pagtuon sa Biblia kag wala magdugay naghimo sing mga kahimusan nga magguwa sa armada kag magbalik sa Pransia.
Sang nakapauli na sia, kada gab-i—kon kaisa tubtob sa tungang-gab-i, si Daniel kag ang iya iloy malawig nga nagahambalanay tuhoy sa Biblia. Sang ulihi nagsugot sia nga mag-upod kay Daniel sa Kingdom Hall. Sa una niya nga pagtambong sa miting, nahamuot gid sia amo kon ngaa sia man regular nga nagpatudlo sa Biblia. Madasig sia nga nag-uswag kag wala madugay nabawtismuhan.
Ang amay ni Daniel isa ka mahinangpanon nga tawo apang dedikado gid sia sa iya propesyonal nga relihioso nga mga hilikuton. Walay sapayan, isa ka bes gindul-ong niya ang iya asawa kag si Daniel sa isa ka distrito nga kombension. Hulyo 14 sadto, kag nagplano sia nga magtan-aw sing parada sa siudad sang Kaadlawan sang Bastille. Samtang nagahulat, namat-od sia nga maningadtingad sa sulod sang ginahiwatan sing kombension. Nagdayaw sia sa kahim-ong kag paghidait nga nakita niya sa tunga sang katawhan ni Jehova, kag samtang nagalabay sia sa nanuhaytuhay nga mga departamento sang kombension ang tagsatagsa nagatawag sa iya nga “utod.” Nalipatan niya ang parada sang Kaadlawan sang Bastille kag ginpatapos niya ang kombension. Nangabay sia sing pagtuon sa Biblia kag madasig nga nag-uswag sa pagtuon sing kamatuoran. Apang, sa dugang nga pagtuon niya, dugang pa nga ginahilasan sia sa iya trabaho, gani sa edad nga 58 anyos, ginbiyaan niya ang iya trabaho. Karon sila nga tatlo sa pamilya dedikado kag bawtismado kag nahiusa nga nagaalagad kay Jehova.
Ginhiusa sang kamatuoran sang Biblia ang pamilya ni Daniel. Makahiusa man ini sa iban nga mga pamilya kon tun-an nila ini kag iaplikar sing bug-os tagipusuon.