Determinado sa Pag-alagad kay Jehova!

“INDI ka magaguwa sa pagbantala!” “Indi pagpakadtua diri ang imo mga kaupdanan!” Ini kag ang kaanggid nga mga pinamulong nabatian sang madamong Cristianong kababayin-an gikan sa ila nagapamatok nga mga bana. Apang kon ining mga bana nagaalagad sa armed forces, ang ila mga asawa nagaatubang sing pinasahi nga mga hangkat sa ila pagtuo. (Isaias 2:4; Juan 17:16) Paano, nian, nahuptan sinang Cristianong mga asawa ang ila espirituwalidad nga malig-on kag aktibo sa pag-alagad sa Ginharian?

Ang katutom kay Jehova nga Dios lakip ang personal nga determinasyon nagabulig sa ila sa pagpadayon. “Ayhan bangod ini sa akon bug-os nga determinasyon,” paathag ni Yvonne, nga asawa sang isa ka soldado. “Nahibal-an ko nga may mga paagi agod matapna ang pagpamatok sang akon bana.” Matuod, may yara.

Ang isa pa ka Cristianong babayi, nga asawa sang isa ka opisyal sa army, nagasugid kon paano ang iya determinado nga tindog labi pa nga nagpahapos sang kabuhi para sa iya bana. “Nahibaluan niya ang akon iskedyul subong man ang iya, kag ginaapresyar ina sang mga militar,” paathag niya. Apang, ang iya dalayon nga pag-alagad kay Jehova indi mahapos nga dalanon.

Paglandas sa Kasubo

Ang mga asawa sang mga soldado masunson nga nagaatubang sang hangkat nga magsaylo sa sulod sang pila ka adlaw lamang nga pahibalo kon updan nila ang ila mga bana sa lugar nga malayo sa balay. Nian, nahamtang sa wala maandan nga mga palibot, mahapos magbatyag nga napain. Apang indi kinahanglan nga mangin amo sini. Ang mga nagaalagad kay Jehova may bentaha. Ano ina? Suno sa Cristianong si apostol Pedro, ini amo “ang bug-os nga paghiliupod sang mga kauturan.” Nagadamo karon sing minilyon, ang mga Saksi ni Jehova sa 231 ka kapungsuran nagapanghikot subong isa ka daku nga Cristianong panimalay, isa ka “paghiliutod.” Makita mo sila halos bisan diin.​—⁠1 Pedro 2:​17, foot­note.

Si Susan, hinali nga ginsaylo halin sa iya puluy-an, nag-abot agod magpuyo sa base sang air force diin gintangdo ang iya bana. Bangod bag-o pa lang sa pagtuo kag napaidalom sa pag-ipit sang iya ditumuluo nga bana nga mag-untat sa pagpakigbahin sa Cristianong ministeryo, sia nagapanaysayon: “Nagkadto ako gilayon sa lokal nga mga miting, kag didto nahimo ko ang maglingkod kag makigsugilanon sa iban nga mga kauturan nga babayi. Matinuuron nga masiling ko nga ini nga pagpakig-upod ang nakabulig sa akon sa pagpadayon.”

Kon kaisa ang kasubo ginatunaan sang kapung-aw. Bisan sa sina, ang maayong balita nagahatag sing kalipay. Si Glenys, isa ka Ingles nga utod nga babayi nga nag-upod sa iya bana sang gintangdo sia sa luwas sang pungsod, nagapanaysayon: “Sang ginpung-awan na gid ako, sa wala ginapaabot, ang isa nga nakilala ko sang nagligad nga mga tinuig sang yara pa ako sa army nagsulat kag nagsiling nga ginbawtismuhan sia sining karon lang subong isa sang mga Saksi ni Jehova. Naghatag ina sing pagpalig-on sa akon sa husto gid nga tion.”

Nasapwan ni Jane, nga naglakbay upod sa iya bana sa Kenya, ang Cristianong mga miting nga importante gid agod makapadayon, bisan pa ginahiwat ini sa mga pamulong nga wala niya mahangpi. “Nahibal-an ko nga luyag ni Jehova nga mangin diri ako,” paathag niya. “Kaupod ako sang akon mga kauturan, kag makapapagsik sila sa espirituwal. Gin-abiabi nila ako, kag pamatyag ko isa kami ka pamilya.”

Isa lamang si Jane sa madamo nga yara sa sining mga sirkunstansia ang nakatukib nga may yara sia espirituwal nga mga kaparyentehan nga wala niya anay mahibalui!​—⁠Marcos 10:​29, 30.

Dimationg sa Atubang sang Paghingabot

“Dili kamo maghunahuna nga nagkari ako sa pagdala sing paghidait sa duta,” paandam ni Jesus. “Nagkari ako, indi sa paghidait, kundi sa espada.” (Mateo 10:34) Ano ang buot niya silingon? Bisan sa sulod sang pamilya, diin gina­paabot ang paghidait, mahimo nga may “hinali nga pagbayaw sang espada,” komento ni A. T. Robert­son sa Word Pictures in the New Testament. “Sa pagkamatuod,” siling ni Jesus, “ang mga kaaway sang tawo amo ang yara sa iya panimalay.” (Mateo 10:36) Daw ano ka matuod ining mga pinamulong kon ang tiayon akig sa kamatuoran!

Sang nagsugod si Diane sa pagtuon sa Biblia upod sa mga Saksi ni Jehova, ang iya bana, nga isa ka opisyal sa air force, wala gid mahamuot. Ano ang epekto sini sa ila pag-asawahay? “Nangin subong ini sang isa ka bloke sang yelo sa ulot namon,” paathag ni Diane. “Malipayon ang amon pag-asawahay. Sa hinali nagaluntad na lamang kami sa isa ka panimalay.” Paano, nian, niya ini gin-atubang? “Ang personal nga pagtuo kag determinasyon amo ang importante, upod ang bulig halin kay Jehova kag sang iya espiritu.” Gindumdom gid ni Diane ang halimbawa sa Biblia ni manalagna Daniel.

Sang gintapok sa Babilonia kag gintanyagan sang pagkaon nga dikalahamut-an sa isa ka alagad sang Dios, si Daniel “determinado sa iya tagipusuon nga indi magpadagta sang iya kaugalingon sang manamit nga pagkaon sang hari.” Huo, si Daniel naghimo sing mahunahunaon nga pamat-od. Namat-od sia sa iya tagipusuon nga indi gid niya pagpadagtaan ang iya kaugalingon paagi sa pagkaon sadto nga kalan-on. Daw ano nga kalig-on nian ang ginpakita niya samtang “padayon sia nga nangabay sa pangunang opisyal sang korte nga indi sia magpadagta sang iya kaugalingon”! Ang resulta? Ginpakamaayo ni Jehova ang iya determinado nga tindog.​—⁠Daniel 1:​8, 9, 17.

Ang nagapamatok nga bana mahimo man karon magasugo sa iya asawa nga mag-untat sa pagtambong sa mga miting sang kongregasyon. Ano ang dapat nga mangin reaksion niya? Nasapwan ni Jane ang iya kaugalingon sa sini nga kahimtangan. Sia nagapaathag: “Indi gid ako magauntat sa idalom sang pag-ipit. Nahibaluan ko nga indi kinahanglan magkompromiso. Dapat ko ipakita kon daw ano ka importante sa akon ang mga miting.” Ginpakamaayo ni Jehova ang iya pamat-od samtang padayon sia nga nagatambong.

“Pirme ako ginapunggan sang akon bana sa pagtambong sa mga miting, apang wala yadto magdugay,” panaysayon ni Glenys. “Nagkadto ako gihapon. Sa pagpauli ko, ginasakit niya ako kon kaisa, kag kon kaisa wala niya ako ginabugno.” Apang, nalandas niya ini, nga pirme nagapangamuyo. Subong man, ang duha sa mga gulang sa kongregasyon tayuyon nga nangamuyo upod sa iya, nga nagpalig-on gid sa iya nga magpadayon sa pagtambong.​—⁠Santiago 5:​13-15; 1 Pedro 2:⁠23.

Kon kaisa ang mga superyor sang bana magaipit sa iya nga punggan ang iya asawa sa pagbantala sang maayong balita. Nasapwan ni Diane nga dapat niya ipaathag sa iya bana kon ano ang iya mga prioridad. “Nakahanda ako,” siling niya, “nga batunon ang mga resulta sang akon padayon nga pagbantala.” Subong gid sa iya sang mga apostoles ang iya tindog! (Binuhatan 4:​29, 31) Apang, mahalungon sia sa iya pagbantala. Sia nagapanaysayon: “Nagahiwat ako anay sing mga pagtinipon para mangape kag ginaregaluhan ko ang tanan sing Kamatuoran nga libro.”​—⁠Mateo 10:​16; 24:⁠14.

Pagpasakop nga Wala Nagakompromiso

Bisan ginalisdan bangod sang tension sa pag-asawahay, ang mga Cristianong asawa nagatan-aw sa palaabuton kag nagasalig kay Jehova. Nagabulig ini sa ila sa paghupot sing balanse nga pagtamod. Ginahatagan nila ang ila mga bana sing bisan ano nga suporta nga masarangan nila nga wala nagakompromiso sang ila pagtuo. Paagi sini, ginasunod nila ang inspirado nga laygay ni Pedro: “Kamo nga mga asawa, magpasakop kamo sa inyo mga bana.” (1 Pedro 3:⁠1) Sa The Amplified New Testament, ini nga panudlo sang apostol mabasa: “Magpasakop kamo subong segundaryo kag nagasandig sa ila, kag magpasibu sang inyo kaugalingon sa ila.” Talupangda kon paano ginsunod ni Jane ini nga laygay. “Ginsilingan ako sang akon bana nga ang luyag ko himuon indi dapat magahilabot sa iya karera,” paathag niya. “Gani gintinguhaan ko nga makakita sing mga paagi nga mabuligan ko sia.”

Busa ang pila ka Cristianong mga asawa nagpasugot sa pagtambong sa sosyal nga mga pagtilipon nga sa sini gin-agda ang ila mga bana. Apang nagapamat-od gihapon sila nga indi pag-ikompromiso ang ila pagtuo. Si Jane naghinguyang sing tion nga ipakigsugilanon ang tuhoy sini sa iya bana. Malulo niya nga ginpaathag nga handa sia sa pagtambong apang indi niya luyag nga ang pagtambong niya magapakahuya sa iya bana. “Nahibaluan ko nga sa pulupanag-on ang tanan nga nagatambong ginapaabot sa pagtindog kag sa pagpakigbahin sa pag-inom sa kadungganan sang isa ka tawo. Natun-an ko nga ang katutom nagakaigo lamang kay Jehova, kag ang pag-inom sa kadungganan sang isa ka tawo indi lamang pagpakita sing pagtahod. Nahangpan sang akon bana kon daw ano kabudlay ang kahimtangan, gani nagsiling na lamang sia: ‘Indi ka na lang magkadto!’ Nagtuman ako.”

Si Glenys, sa pihak nga bahin, nag-upod sa iya bana sa sina nga pagtililipon, apang ginbantayan niya ang mga opisyales sa kabisera sang lamesa. Kon nakita niya nga nagahanda sila sa pag-inom sa kadungganan sang isa ka tawo, mainandamon sia nga nagahalin pakadto sa kasilyas! Huo, ini nga mga kababayin-an nagpasibu apang wala gid magkompromiso.

“Madaug Sila sa Walay Pulong”

“Kon pauswagon ko ang akon ikasarang subong isa ka asawa, makita sang akon bana nga ang kamatuoran nagabalhin sa akon,” pangatarungan ni Yvonne. Gani ginbasa niya kag liwat nga ginbasa ang kapitulo sa Family Life nga libro nga natig-uluhan sing “A Wife Who Is Dear­ly ­Loved.”⁠a Ginhatagan ko labi na sing igtalupangod ang materyal sa ubos sang subtitulo nga ‘The Weep­ers, the Nag­gers’! Apang nasapwan ko nga sa labi nga gintinguhaan ko nga sugilanunon ang akon bana, labi nga nagalain ang kahimtangan.” Apang, sang ulihi, nagmadinalag-on sia sa pagbulig sa iya bana nga maalagad si Jehova. Paano? Paagi sa pag-aplikar sa prinsipio nga nabalay sa 1 Pedro 3:​1, nga ang mga bana mahimo ‘madaug sa walay pulong.’

Daku ang mahimo kon paano ginaatipan sang Cristianong mga kababayin-an ang ila mga pamilya sa pagrekomendar sang Cristianismo sa iban. “Gintinguhaan ko nga himuon ang kamatuoran nga makagalanyat kon mahimo,” panaysayon ni Diane. “Kon magkadto ako sa mga miting, ang akon bana magabatyag nga daw ginbayaan, gani ginatudluan ko ang mga kabataan nga labi nga magmangin mabuot pag-abot namon sa balay. Gintinguhaan ko man nga hatagan sia sing dugang nga igtalupangod pagpauli namon.” Amat-amat nga nagbag-o ang panimuot sang iya bana samtang nagahulag sia sa malulo nga igtalupangod sang iya pamilya.

Ang mga masigkaalagad ni Jehova makabulig man. Si Jane nagasugid nga ang iya bana nanamian makig-upod sa mga Saksi nga misyonero nga nakilala niya sa Kenya. “Nakig-abyan sila sa iya kag naghambalanay nahanungod sa foot­ball, kag maabiabihon gid sila. Sa pila ka okasyon, gin-agda nila kami nga magkaon sa lainlain nga mga puluy-an misyonero.” Ang iya bana nagpaathag sang ulihi: “Nasugdan ko nga mahangpan ang pagtuo ni Jane sa tuhay gid nga pagtamod. Ang iya mga abyan tuman gid ka intelihente nga sarang makapakigsugilanon sa nanuhaytuhay nga mga topiko.” Sa kaanggid, nagbag-o ang panimuot sang bana ni Diane sa kamatuoran. Sang ang salakyan nga ginadala niya naaberiya, ang isa ka pamatan-on nga Saksi nagbulig sa iya. “Nahamuot gid ako sadto,” siling niya.

Sa pagkamatuod, indi tanan nga mga tiayon madaug sa kamatuoran. Ano nian? Si Jehova nagahatag sing bulig agod makabatas ang mga matutom. (1 Corinto 10:13) Binagbinaga ang pagpalig-on ni Glenys sa mga may kahimtangan nga kaanggid sa iya: “Indi, indi gid pagpangduhaduhai nga si Jehova amo ang Isa nga nagpatok sang pag-asawahay kag nga luyag gid niya nga mag-updanay ang mga mag-asawa. Gani ano man ang mahimo nga himuon sang bana ukon ano man nga pagpamatok ang mabaton mo gikan sa mga nagapalibot sa imo, indi gid magatugot si Jehova nga malingkang ka.” Bisan wala pa nagasimba kay Jehova ang iya bana, ang iya panimuot sa iya kag sa kamatuoran naghumok.

‘Magsab-ug nga May Luha; Mag-ani nga May Kasadya’

Sa pagkamatuod, ining Cristianong mga kababayin-an determinado sa pag-alagad kay Jehova. Kon yara ikaw sa kaanggid nga mga kahimtangan, himua man ini nga imo pamat-od. Dumduma ang laygay: “Dapat mo kahadlukan si Jehova nga imo Dios. Dapat mo sia alagaron, kag sa iya magpabilin ka.”​—⁠Deuteronomio 10:⁠20.

“Ang isa nga wala sing duhaduha nagaguwa, bisan nagahibi, nga nagadala sing binhi nga inugsab-ug, sa wala sing duhaduha magabalik nga may kalipay, nga nagadala sang iya mga linaylay,” siling sang salmista. (Salmo 126:⁠6) “Matuod nga madamo gid nga luha ang ginapatulo mo samtang ginatinguhaan mo nga ipakita sa imo tiayon ang kamatuoran, sa hipos ukon sa hambal,” pagbaton sang isa ka Saksi. “Apang sa katapusan magakalipay ka bangod bisan wala niya pagbatuna ang kamatuoran, ginapakamaayo ni Jehova ang panikasog nga ginahimo mo.”

Ang tanan nga nagaalagad sing matutom kay Jehova walay sapayan sang pagpamatok sa puluy-an nakatigayon sing matuod nga komendasyon. Nagakabagay sila sa supurta kag gugma. Kabay nga huptan nila ang ila wala nagakompromiso nga tindog, determinado sa pag-alagad kay Jehova!

[Footnote]

[Piktyur sa pahina 28]

Ang mapangamuyuon nga pagtuon nagapabakod sang Cristianong determinasyon