Importante Bala kon Paano Kamo Nagasimba?

ANG diutay nga banwa sa Aprika ginabagang sa udtong-adlaw. Gikan sa isa ka nalupyakan sa malapit mabatian ang tunog sang mabaskog kag magaris nga pagbombo, pagkinanta, kag malipayon nga pagpamalakpak. Apang indi ini isa ka sosyal nga pagtinipon. Isa ini ka tradisyunal nga pagsimba sa Aprika. Apang, ang mga tunog nagakompetensia sa wala nagasilinanto nga mga tingog gikan sa simbahan sang mga charismatic sa malapit. Didto ang wala sa kaugalingon nga mga sumilimba nagahimo sing milagruso nga “pagpang-ayo” kag nagahambal sing iban nga mga hambal. Sa isa pa ka punta sang banwa may isa pa ka sahi sang pagsimba. Ang mabaskog apang manubo nga tingog sang isa ka mu­ez­zin nagapanawag sa masigka-Muslim nga mga sumilimba sa pagpangamuyo.

Huo, ang nanuhaytuhay nga sahi sang relihioso nga debosyon makit-an sa madamo nga siudad kag banwa sang Aprika. Sa sulod sang mga kaliwatan, kontento na ang mga Aprikano sa pagsunod sa ila kaugalingon nga relihioso nga mga tradisyon. Apang nian nag-abot ang mga misyonero sang Cristiandad, pagkatapos sang mga hangaway sang nanuhaytuhay nga pungsod sang Europa, kag mapintas nga nagtinguha nga himuon nga mga “Cristiano” ang tanan​—⁠lakip bisan ang ila mga ngalan.

Ang resulta? Amo ang isa ka sahi sang relihion nga nagsamo sang tradisyunal nga mga pagtuluuhan kag mga buhat sang Aprika sa relihioso nga mga pagtuluuhan sang iban nga mga pungsod. Tubtob karon madamo nga “Cristianong” mga sumilimba ang nagagamit sing tradisyunal nga mga panagang kag anting-anting. Sa gihapon, ginmisrepresentar sing daku sang mga misyonero sang Cristiandad ang matuod nga Cristianismo, kag nagbilin sila sing hinakit. Sa daku nga kasangkaron, sila ang may salabton sa sirado nga hunahuna sang pila ka Aprikano karon batok sa Biblia.

Walay sapayan, madamo nga porma sang “Cristianismo” ang ginabuhat gihapon sing lapnag. Sining karon nga tinuig ang charismatic nga mga grupo sang relihion nangin popular gid; nagdamo ang mga iglesia nga nagahimo sing pagpang-ayo pasad sa pagtuo. Ginpaathag sang isa ka kolumnista sa pamantalaan ang ganyat sining mga iglesia paagi sa pagsiling nga ‘ang pagkilala sang mga Aprikano sa relihion amo ang kon ano ang mapuslan nila. Sa hunahuna sang isa ka Aprikano, ang relihion dapat may ikasarang sa paghatag sing direkta nga materyal nga kaayuhan sa pagluntad sang tawo. Busa, sa Aprikano nga nagapati nga kinahanglan ang espirituwal nga manugpatunga sa halos tanan nga butang, ang modus operandi sang mga iglesia nga nagahimo sing pagpang-ayo pasad sa pagtuo nagahisanto sa ginapangita sang iya dalanon sang pagkabuhi.’ Apang, sing makapasubo, madamo nga charismatic nga iglesia ang maathag nga napamatud-an nga isa lamang ka negosyo.

Sa karon, kapin sa 6,000 ka relihioso nga sekta ang nagapanghikot sa Aprika. Ayhan ginbatyag mo nga ining tanan nga relihion kag mga sekta nagauyat sing yabi sa kaluwasan. Apang ang pamangkot gid amo, Ano ang ginabatyag sang Dios?

Makapahamuot Bala sa Dios ang Bisan Diin Lang nga Relihion?

Sa pagkamatuod, ang Manunuga sang uniberso indi magabilin lang sa aton nga wala sing panuytoy sa sining bahin. (Amos 3:7; Binuhatan 17:​26, 27) Kag madamo ang ebidensia nga ang diosnon nga panuytoy sarang masapwan sa Biblia. Indi, ang Biblia indi, subong sang pagtawag sang iban, libro sang mga puti. Sa kamatuoran, wala sing tawo​—⁠itom ukon puti​—⁠ang mapadunggan sa sini. “Ang bug-os nga kasulatan gin-inspirar sang Dios,” siling sang 2 Timoteo 3:16. Ang matuod, praktikal nga mga panudlo sang Biblia, ang kadugayon sini, ang paglampuwas sini walay sapayan sang mapintas nga mga pag-atake sa sini, ang sibu nga mga tagna sini kag ang indi matupungan nga sirkulasyon sini sa bug-os nga globo​—⁠maathag ini nga mga ebidensia nga ang awtor sini amo ang Dios.

Ano ang ginatudlo sa aton sang libro? Una, ginasugiran kita sini nga may isa lamang ka “matuod nga Dios.” (Juan 17:⁠3) Bangod amo sini, paano mangin may kamatuoran sa tanan nga relihion? Indi bala nagasumpakilay ang relihioso nga mga grupo kon tuhoy mismo sa identidad kag kinaugali sang Dios? Ang manunulat sang Biblia nga si Santiago nagpamulong tuhoy sa “putli kag matuod nga relihion.” (Santiago 1:​27, Today’s English Version) Kon kinahanglan nga kilalahon ang matuod nga relihion, dapat nga may butig man ukon huwad nga relihion. Magasumpakil ini sa ideya nga ang tanan nga relihion nanuhaytuhay lamang nga mga paagi sa pagpalapit sa Dios.

Ang mga Talaksan sang Manunuga Para sa Pagsimba

Ano ang nagakaigo nga paagi sa pagsimba sa Dios? Ginatudlo sa aton sang Biblia nga ang matuod nga pagsimba napasad sa sibu nga ihibalo. Ginsingganan anay sang dakung manalagna nga si Jesucristo ang isa ka Samariahanon nga babayi: “Kamo nagasimba sang wala ninyo mahibalui.” (Juan 4:22) Matuod man ayhan ini sa imo? Gintudluan ka bala nga ang Labing Gamhanan nga Dios may personal nga ngalan, Jehova? (Salmo 83:18) Nahibaluan mo bala kon ano ang iya mga katuyuan tuhoy sa tawo kag sa duta? (Mateo 6:​9, 10; Efeso 1:​9, 10; 3:11) Ang imo bala relihion nagahatag sa imo sing isa ka realistiko nga paglaum sa isa ka mas maayo nga palaabuton? Kag kon ginakabig mo ang imo kaugalingon nga isa ka Cristiano, mapaathag mo bala ang imo mga pagtuluuhan gikan sa Kasulatan, ukon napanubli mo lamang bala ini nga wala mo man lang gin-usisa?

Kon kulang ikaw sing sibu nga ihibalo, matigayon mo ini paagi sa pagtuon sa Pulong sang Dios, ang Biblia. Ginapaabot ni Jehova nga Dios nga mangin pamilyar ang iya matuod nga mga sumilimba sa kon ano ang ginatudlo sang Sagrado nga Libro. Kapin pa sa sina, ginapaabot niya nga iaplikar nila ini sa ila kabuhi. Ang aton panimuot dapat mangin kaangay sadtong salmista nga nagsiling: “Ang imo pulong suga sa akon mga tiil, kag kapawa sa akon banas.” (Salmo 119:105) Tubtob sa anong kasangkaron nabuligan ikaw sang imo relihion sa paghibalo kag sa paghangop sa Biblia?

Ang isa pa ka importante nga bahin sang matuod nga pagsimba amo ang pagtuo kay Jesucristo, indi lamang subong isa ka dakung manalagna kundi subong bugtong nga Anak sang Dios. Ang Kasulatan maathag nga nagasiling nga si Jesus amo “ang Pangulo nga Ahente sang kabuhi.” (Binuhatan 3:15; 4:12) Madamo ang nagapangangkon nga nagatuo sila kay Jesus, apang daw ano ka matuod ang ila pagtuo? Ang matuod nga pagtuo kay Cristo nagakinahanglan sing pagtuman sa iya mga instruksion. Ginpalig-on ini mismo sang Dios sang magsiling sia: “Ini ang akon Anak, ang hinigugma; pamati kamo sa iya.” (Marcos 9:⁠7) Sa amo, ang matuod nga mga sumilimba nagapanikasog tubtob sa ila masarangan sa paglakat suno sa mga tikang ni Jesus. (1 Pedro 2:21) Ang isa ka paagi nga ginahimo nila ini amo ang pagpakigbahin sa hilikuton sa pagbantala sa publiko nga ginsugdan niya. (Mateo 4:17; 10:​5-7) Ginapalig-on bala kamo sang inyo relihion nga personal nga magpakigbahin sa sining hilikuton?

Ang gugma isa pa ka kinahanglanon sang matuod nga pagsimba. Si Jehova nga Dios ginalaragway subong amo gid ang personipikasyon sang gugma, kag ginsingganan ni Jesus ang iya mga sumulunod nga makilal-an sila paagi sa gugma nga ginpakita nila sa tunga nila. (Juan 13:​34, 35; 1 Juan 4:⁠8) Bangod minilyon nga katawhan karon ang nagapangangkon nga Cristiano, indi bala dapat puno sing gugma ang kalibutan? Apang, sa kamatuoran, ang aton kalibutan isa gid ka duog nga wala sing gugma. Minilyon ka kabuhi ang ginkutol sang mga inaway sa sini nga siglo lamang. Ang krimen kag kasingki padayon nga nagadugang. Gani pamangkuta ang imo kaugalingon, ‘Kon ang tanan pareho ko sing relihion, mangin isa bala ka mas mahigugmaon nga duog ang kalibutan?’

Bilang katapusan, ginapakita sang Biblia nga ang matuod nga mga sumilimba dapat magpain gikan sa kalibutan nga wala makakilala sa Dios. Sang ginpain sang Dios ang dumaan nga pungsod sang Israel subong manugbantay sang matuod nga pagsimba, ginpaandaman niya ang iya katawhan nga maglikaw sa suod nga pagpakig-upod sa manubo sing moral nga mga pungsod sa palibot nila. (Deuteronomio 7:​1-6) Sa Juan 17:​16, nagsiling man si Cristo Jesus tuhoy sa iya mga sumulunod: “Indi sila bahin sang kalibutan, subong nga ako man indi bahin sang kalibutan.” Ang matuod nga mga sumilimba sang Dios wala sing bahin sa politika, imoralidad, makagod nga komersialismo, ukon sa bisan anong nagapakahuya sa Dios nga mga pilosopiya. (Juan 18:36; 1 Juan 2:​15-17) Ginatuman nila ang sugo nga narekord sa Roma 12:2: “Indi na kamo magpauyon sa sining sistema sang mga butang.” Amo bala sina ang ginapalig-on sang inyo relihion nga himuon mo?

Matigayon ang Bulig

Huo, importante gid sa Dios ang imo paagi sa pagsimba. Kon tuhoy sa iya, isa lamang ang matuod nga relihion. (Efeso 4:​4-6) Gintandog sang aton malip-ot nga pagbinagbinag ang pila sang importante nga mga punto sang panudlo sang Biblia. Ngaa indi tinguhaan nga tun-an ang dugang pa?

Walay sapayan kon ano nga relihion ang imo gindak-an, ang mga Saksi ni Jehova makabulig sa imo sa sining bahin. Kilala sila sa bug-os nga globo sa ila maid-id nga hilikuton sa pagtudlo sing Biblia. May obligasyon sila nga buligan ang mga tawo sang tanan nga rasa kag relihion nga makatigayon sing madalom nga paghangop sa Biblia. (Hulubaton 2:​1-6) Nagabalhag sila sing napanalawsawan sing maayo nga literatura sa Biblia.⁠a Sa kamatuoran, magakadto pa gani sila sa inyo puluy-an sa walay bayad agod tudluan ikaw mismo sing Biblia. Minilyon ka tawo sa bug-os nga kalibutan ang nagabenepisyo karon gikan sa sining programa sa pagtudlo sing Biblia. Ngaa indi man ini himuon sa imo kaugalingon? Sa pagkamatuod, importante nga himuon mo ini bangod importante gid kon paano ikaw nagasim⁠ba.

[Footnote]

[Piktyur sa pahina 5]

Ginmisrepresentar sing daku sang mga misyonero sang Cristiandad ang matuod nga Cristianismo

[Piktyur sa pahina 6]

Madamo nga charismatic nga mga iglesia ang negosyo lamang

[Piktyur sa pahina 5]

Ang pagtuo kay Jesus isa ka importante nga bahin sang matuod nga pagsimba

[Piktyur sa pahina 7]

Ang mga Saksi ni Jehova nagabulig sa minilyon sa pagtigayon sing sibu nga ihibalo paagi sa walay bayad nga pagtuon sa Biblia sa puluy-an