Mag-amba sing mga Pagdayaw kay Jehova
“Magaamba ako kay Jehova, kay ginhimaya sia sing mataas.”—EXODO 15:1.
1. Ano nga mga kinaiya kag mga kalidad ni Jehova ang nagahatag sa aton sing rason nga dayawon sia?
NAPULOG-TATLO ka beses nga ang Salmo 150 nagasugo nga dayawon si Jehova ukon Jah. Ang katapusan nga bersikulo nagasiling: “Ang tagsa ka butang nga may ginhawa—magdayaw kay Jah. Dayawa si Jah, ninyo nga katawhan!” Subong mga Saksi ni Jehova, nahibaluan naton nga si Jehova takus sang aton pagdayaw. Sia ang Bug-os Uniberso nga Soberano, ang Labing Mataas, ang Hari nga dayon, ang aton Manunuga, ang aton Manugpakamaayo. Sia wala sing tupong, tumalagsahon, wala sing kaanggid, wala sing katulad sa madamo nga paagi. Sia labing maalam, labing gamhanan, himpit sa hustisya, kag amo ang personipikasyon sang gugma. Sia labaw sa tanan maayo; matutom sia. (Lucas 18:19; Bugna 15:3, 4) Takus bala sia sang aton pagdayaw? Sa pagkamatuod gid!
2. Ano ang aton mga rason nga magpasalamat kita kay Jehova?
2 Takus si Jehova indi lamang sang aton pagsimba kag pagdayaw kundi sang aton man pagpasalamat sa tanan nga nahimo niya para sa aton. Sia ang Manughatag sing “tagsa ka maayong hatag kag tagsa ka himpit nga dulot.” (Santiago 1:17) Sia ang Tuburan, ang Ginahalinan, sang tanan nga kabuhi. (Salmo 36:9) Ang tanan nga butang nga aton ginaagom subong mga katapo sang tawhanon nga rasa gikan sa iya, kay sia ang aton Dungganon nga Manunuga. (Isaias 42:5) Sia man ang Manughatag sing tanan nga espirituwal nga pagpakamaayo nga nagaabot sa aton paagi sa iya espiritu, iya organisasyon, kag iya Pulong. Ginapatawad ang aton mga sala bangod gin-aman niya ang iya Anak subong gawad naton. (Juan 3:16) May paglaum kita sa Ginharian tuhoy sa ‘bag-ong mga langit kag isa ka bag-ong duta diin magapuyo ang pagkamatarong.’ (2 Pedro 3:13) May maayo kita nga pagpakig-upod sa mga masigka-Cristiano. (Roma 1:11, 12) May kadungganan kita kag mga pagpakamaayo subong mga Saksi niya. (Isaias 43:10-12) Kag may hamili kita nga pribilehiyo sa pagpangamuyo. (Mateo 6:9-13) Sa pagkamatuod, madamo kita sing rason sa pagpasalamat kay Jehova!
Mga Paagi nga Madayaw Naton si Jehova
3. Sa anong nanuhaytuhay nga mga paagi madayaw naton si Jehova kag mapasalamatan sia?
3 Paano kita, subong debotado nga mga alagad ni Jehova, makadayaw sa iya kag makapabutyag sang aton pasalamat? Mahimo naton ini paagi sa pagpakigbahin sa Cristianong ministeryo—pagpanaksi sa kabalayan, paghimo sing mga pagduaw liwat, pagdumala sing mga pagtuon sa Biblia, kag pagpakigbahin sa pagpanaksi sa mga kalye. Madayaw man naton sia paagi sa di-pormal nga pagpanaksi sa tagsa ka tion nga may kahigayunan. Nian sa liwat, madayaw naton si Jehova paagi sa aton matarong nga paggawi, bisan paagi sa mahipid kag maugdang nga pagpamiste naton kag pagpamustura. Ang mga Saksi ni Jehova masami nga gindayaw sa ila pagkahuwaran sa sini nga mga butang. Dugang pa, madayaw naton si Jehova kag mapasalamatan sia paagi sa pangamuyo.—Tan-awa ang 1 Cronica 29:10-13.
4. Ano ang isa sang labing matahom nga mga paagi nga madayaw naton ang aton mahigugmaon nga langitnon nga Amay?
4 Dugang pa, ang isa sang labing matahom nga mga paagi nga madayaw naton ang aton mahigugmaon nga langitnon nga Amay amo ang pagdayaw sa iya kag sa iya mga kinaiya paagi sa malulot nga mga ambahanon sang Ginharian. Madamo nga musikero kag kompositor ang nagaugyon nga ang pinakamatahom nga instrumento sa musika amo ang tingog sang tawo. Ang mga maestro sang klasikal nga musika nagtinguha sa pagsulat sing mga opera bangod matahom gid pamatian ang tingog sang tawo nga nagaamba.
5. Sa anong mga rason nga dapat naton tamdon sing serioso ang aton pag-amba sing mga ambahanon sang Ginharian?
5 Pat-od nga nagalipay gid si Jehova sa pagpamati sa mga tawo nga nagaambahan, ilabi na kon nagaamba sila sing mga ambahanon sang pagdayaw kag pasalamat! Sa pagkamatuod nian, dapat kita mangin serioso sa pag-amba sing mga ambahanon sang Ginharian sa aton nanuhaytuhay nga pagtinipon—mga miting sa kongregasyon, sirkito nga mga asambleya, espesyal nga mga adlaw nga asambleya, distrito nga mga kombension, kag internasyonal nga mga kombension. Madamo ang aton songbook sing makalilipay gid nga mga melodiya, ang katahom sini pirme gindayaw sang mga tagaguwa. Samtang ginaamba naton sing tinagipusuon ang mga ambahanon sang Ginharian, labi pa nga nagadala kita sing kalipay sa iban kag sing benepisyo sa aton mismo kaugalingon.
Pag-amba sing mga Pagdayaw kay Jehova sang Panahon sang Biblia
6. Paano ang mga Israelinhon nagpabutyag sing apresasyon sa pagluwas sa ila sa Dagat nga Mapula?
6 Ang Pulong sang Dios nagasugid sa aton nga si Moises kag ang nabilin sang mga Israelinhon madaugon nga nag-amba sang ginluwas sila gikan sa hangaway ni Paraon sa Dagat nga Mapula. Ang ila ambahanon nagsugod sa sining mga pulong: “Mag-amba ako kay Jehova, kay ginhimaya sia sing mataas. Gintagbong niya sa dagat ang kabayo kag ang iya manugsakay. Ang akon kusog kag gahom amo si Jah, kay kaluwasan ko sia. Ini ang akon Dios, kag dayawon ko sia.” (Exodo 15:1, 2) Mahanduraw gid naton ang kakunyag kag kalipay sang mga Israelinhon samtang ginaamba nila yadtong mga pulong sa tapos sang milagruso nga pagluwas sa ila!
7. Ano ang iban pa nga talalupangdon nga okasyon nga ginrekord sang Hebreong Kasulatan ang pagdayaw sang mga Israelinhon kay Jehova paagi sa ambahanon?
7 Sa 1 Cronica 16:1, 4-36, mabasa naton nga si Jehova gindayaw paagi sa pag-ambahan kag pagtokar sing mga instrumento sa musika sang gindala ni David ang Kaban sa Jerusalem. Isa gid yadto ka makalilipay nga okasyon. May pag-ambahan man sing pagdayaw kay Jehova nga ginaakumpanyaran sing musika sang instrumento sang tion nga gindedikar ni Hari Solomon ang templo sa Jerusalem. Aton mabasa sa 2 Cronica 5:13, 14: “Kag sang matabo nga ang mga manugbudyong kag mga manug-amba nagsinanto agod mapabati ang isa ka tingog sang pagdayaw kag pagpasalamat kay Jehova, kag sang ginbayaw nila ang ila tingog upod sa tunog sang mga budyong kag mga apiping kag mga instrumento sang ambahanon kag nagadayaw kay Jehova, ‘kay maayo sia, kay ang iya mahigugmaon nga kalulo tubtob sa walay katubtuban,’ ang balay gid napuno sing panganod, ang balay gid ni Jehova, kag ang mga saserdote indi makasarang magtindog sa pag-alagad bangod sang panganod; kay ang himaya ni Jehova nagpuno sang balay sang matuod nga Dios.” Ano ang ginapakita sina? Nga si Jehova nagapamati sa sining malulot nga pagdayaw kag nahamuot man sa sini, subong ginpakita sang indi kinaandan nga panganod. Sang ulihi pa, duha ka koro ang nag-ambahan sang gin-inagurahan ang mga pader sang Jerusalem sang mga adlaw ni Nehemias.—Nehemias 12:27-42.
8. Ano ang nagapakita nga gintamod sing serioso sang mga Israelinhon ang pag-amba?
8 Sa kamatuoran, ang pag-amba isa ka importante gid nga bahin sang pagsimba sa templo sa bagay nga 4,000 ka Levinhon ang ginpain para sa serbisyo sa musika. (1 Cronica 23:4, 5) Magaakumpanyar sila sa mga manug-amba. Ang musika, ilabi na ang mga manug-amba, may isa ka importante nga duog sa pagsimba, indi gid man agod ipasalop ang mabug-at nga mga butang sang Kasuguan, kundi agod maghatag sing husto nga espiritu para sa pagsimba. Nagbulig ini sa mga Israelinhon sa pagsimba kay Jehova sa mapagsik nga paagi. Talupangda ang paghanda kag ang igtalupangod sa detalye nga ginhugod sa sini nga bahin: “Ang kadamuon nila pati ang ila mga utod nga ginhanas sa pag-amba kay Jehova, ang tanan sampaton, duha ka gatos kag kawaluan kag walo.” (1 Cronica 25:7) Talupangda kon daw ano ka serioso nga ginhimo nila ang pag-amba sing pagdayaw kay Jehova. Ginhanas sila sa pag-amba kag mga sampaton sila!
9. Ano nga pagpadaku sa pag-amba ang ginahatag sa Cristianong Griegong Kasulatan?
9 Pag-abot sang una nga siglo sang aton komon nga dag-on, ano ang masapwan naton? Si Jesus, sang gab-i nga ginluiban sia, walay sapayan sang madamong mabug-at nga mga butang nga ginahunahuna niya, nagbatyag gihapon sang kinahanglanon nga hinakpan ang iya pagsaulog sing Paskuwa kag ang pagpatok sing Memoryal sang iya kamatayon paagi sa pag-amba sing mga pagdayaw kay Jehova. (Mateo 26:30) Subong man, mabasa naton nga sang “mga tungang-gab-i” si Pablo kag si Silas, sa tapos sila ginbunal kag ginbilanggo, “nagpangamuyo kag nagdayaw sa Dios paagi sa ambahanon; huo, ang mga binilanggo nagpamati sa ila.”—Binuhatan 16:25.
Pag-amba sing mga Pagdayaw—Isa ka Importante nga Bahin sang Aton Pagsimba
10. Ano nga mga sugo ang ginahatag sang Pulong sang Dios tuhoy sa pagdayaw sa iya sa ambahanon?
10 Ginabatyag mo ayhan nga ang pag-amba sing mga ambahanon sang Ginharian indi tanto ka importante nga hatagan mo ini sang imo tinagipusuon nga igtalupangod? Kon amo, indi bala dapat nga timbangtimbangon mo liwat ini nga butang, bangod ginhatagan ni Jehova nga Dios kag ni Jesucristo sing importansia ang pag-amba sing mga pagdayaw? Ti, ang Pulong sang Dios puno sing mga sugo nga dayawon si Jehova kag mag-amba sing mga pagdayaw sa iya! Halimbawa, sa Isaias 42:10, aton mabasa: “Ambahan kamo kay Jehova sing isa ka bag-o nga ambahanon, sang iya pagdayaw gikan sa ukbong sang duta, kamo nga mga tawo nga magadulhog sa dagat kag sa tanan nga yara sa iya, kamo nga kapuluan kag kamo nga nagapuyo sa ila.”—Tan-awa man ang Salmo 96:1; 98:1.
11. Ano ang laygay sa aton ni apostol Pablo tuhoy sa pag-amba?
11 Nahibaluan ni apostol Pablo nga ang pag-amba makapapagsik sang aton espiritu, gani makaduha niya kita ginlaygayan sa sini nga butang. Aton mabasa sa Efeso 5:18, 19: “Magmapuno kamo sing espiritu, nga nagahinambalanay sa inyo kaugalingon sing mga salmo kag mga pagdayaw sa Dios kag espirituwal nga mga ambahanon, nga nagaamba kag nagaakumpanyar sang inyo kaugalingon sing musika sa inyo tagipusuon kay Jehova.” Kag sa Colosas 3:16, aton mabasa: “Papuy-a ang pulong ni Cristo sa inyo sing mabuganaon sa tanan nga kaalam. Padayon nga magtudluanay kag maglinaygayay kamo sa isa kag isa sing mga salmo, mga pagdayaw sa Dios, espirituwal nga mga ambahanon nga may kaayo, nga nagaamba sa inyo tagipusuon kay Jehova.”
12. Ano ang aton mga halimbawa nga ang aton mga ambahanon nagabulig sa aton sa pagtudluanay kag sa paglinaygayay sa isa kag isa?
12 Talupangda nga sa tagsa sining higayon sulit-sulit nga ginpatuhuyan ni Pablo ang pag-amba, sang ginsambit niya ang ‘mga salmo, mga pagdayaw sa Dios, espirituwal nga mga ambahanon, nga nagaamba sing musika sa inyo tagipusuon.’ Subong man, ginsugdan niya ang iya pinamulong sa mga taga-Colosas sa pagsiling nga sa sining paagi mahimo kita ‘magtudluanay kag maglinaygayay sa isa kag isa.’ Kag ginahimo gid naton ina, subong sang makita sa mga tig-ulo mismo sang aton mga ambahanon—“All Creation, Praise Jehovah!” (numero 5), “Be Steadfast, Unmovable!” (numero 10), “Be Joyful for the Kingdom Hope!” (numero 16,) “Fear Them Not!” (numero 27) “Laud Jehovah Our God!” (numero 100), sa paghatag sing pila lamang ka halimbawa.
13. Paano ginpakita sang “matutom kag mainandamon nga ulipon” ang pagkaimportante sang pag-amba subong bahin sang aton pagsimba?
13 Nahisanto sa sining mga sugo, ginhimos sang “matutom kag mainandamon nga ulipon” nga ang aton mga pagtinipon—mga miting sang kongregasyon, mga sirkito nga asambleya, mga espesyal nga adlaw nga asambleya, mga distrito nga kombension, kag mga internasyonal nga kombension—magabukas kag magahinakop paagi sa pag-amba sing mga ambahanon sang Ginharian. (Mateo 24:45) Dugang pa, may ginaeskedyul nga mga ambahanon nga ambahon sa iban nga mga oras sa tion sining mga pagtinipon. Sanglit ang aton mga miting masami ginasugdan paagi sa pag-amba sing isa ka ambahanon sang Ginharian, indi bala nga dapat naton pat-uron nga makaabot kita sa husto nga tion, sing temprano pa agod makapakigbahin kita sa sina nga bahin sang aton pagsimba? Kag sanglit ang mga miting nagahinakop paagi sa pag-amba, indi bala nga dapat kita magpabilin tubtob sa nagatakop nga ambahanon kag sa pangamuyo nga nagasunod dayon sa sini?
14. Ano ang aton mga halimbawa nga nagakabagay nga mga ambahanon ang ginapili para sa aton mga programa?
14 Ang mga ambahanon sa aton mga miting mahalungon nga ginapili agod magbagay sa programa. Halimbawa, sa “Diosnon nga Panudlo” nga mga Distrito nga Kombension sang 1993, ang ambahanon numero 191, “Make the Truth Your Own,” nga nagapalig-on sa mga Cristiano sa pagpakig-away batok kay Satanas, sa kalibutan, kag sa makasasala nga unod, gilayon nga nagsunod sa tatlo ka pamulongpulong tuhoy sa sining mga kaaway. Subong man, ang ambahanon numero 164, “Children—Precious Gifts From God,” nga puno sing mga laygay sa mga ginikanan, nagsunod gilayon sa isa ka pamulongpulong nga nagapadaku sang mga obligasyon sang mga ginikanan sa paghanas sa ila mga anak. Ang ambahanon numero 70, “Be Like Jeremiah,” ginsundan sang isa ka serye sang mga pamulongpulong nga ginpasad sa mga tagna ni Jeremias. Kag sa tapos sang isa ka simposium tuhoy sa nanuhaytuhay nga mga bahin sang aton ministeryo sa Ginharian, gin-amba ang ambahanon numero 156, “I Want To,” isa ka ambahanon nga bagay gid sa pag-alagad. Pareho man nga paghalong ang ginahimo sa pagpili sing mga ambahanon para sa Pagtinuon sa Lalantawan, Miting sa Serbisyo, kag Teokratiko nga Eskwelahan sa Pagministeryo. Nagakahulugan ini nga kon ang mga gulang maghatag sing mga pamulongpulong publiko kag itudlo nila ang ambahanon nga gamiton sa pagbukas sa programa, dapat nila pilion ang isa ka ambahanon nga nagabagay sa tema sang ila pamulongpulong.
15. Paano mapadaku sang tsirman sang miting ang apresasyon para sa ambahanon nga pagaambahon?
15 Sa pagpahibalo sang ambahanon nga pagaambahon, mahimo mapadaku sang tsirman ang apresasyon sa ambahanon paagi sa paghatag sang tig-ulo ukon tema sini. Wala kita nagaamba sing mga numero kundi sing Makasulatanhon nga mga tema. Mabuligan man ang kongregasyon sa pag-apresyar sa ambahanon sing kapin pa kon ipatalupangod ang kasulatan nga ginapakita sa ubos sang tig-ulo. Nian sa liwat, mahimo nagakaigo ang pila ka komento, subong nga dapat ambahon sang tanan sing tinagipusuon ang ambahanon.
Magpakita sing Apresasyon sa Pagkaayo ni Jehova Paagi sa Pag-amba
16. Paano naton mabatyagan ang espiritu sang aton mga ambahanon?
16 Sanglit ang mga liriko sang aton mga ambahanon sa Ginharian puno sing kahulugan, dapat kita magkonsentrar sa mga tinaga samtang ginaamba naton ini. Luyag naton batyagon ang espiritu sang tagsa ka ambahanon. Ang iban, subong sang tuhoy sa gugma, nga isa ka bunga sang espiritu, tinagipusuon nga ginabatyag. (Galacia 5:22) Ginaamba naton ini sing may kapagsik kag kainit. Ang iban masadya, kag dapat naton ambahon ini sing malipayon. Ang iban pa gid mapagsik nga pangmartsa nga mga ambahanon, kag dapat ini ambahon sing may kapagsik kag malig-on nga kompiansa. Sa aton Teokratikong Eskwelahan sa Pagministeryo, ginalaygayan kita nga magpabutyag sing kainit kag balatyagon subong man sing kapagsik sa aton presentasyon. Kapin pa ka importante ang pagpakita sing kainit, balatyagon, kag kakunyag kon nagaamba kita sing aton mga ambahanon.
17. (a) Ano nga pagsabdong nga ginhimo sa dimatutom nga mga Israelinhon ang indi naton luyag nga iaplikar sa aton pag-amba? (b) Ano ang mangin resulta kon tamdon naton sing serioso ang laygay nga ginaunod sa aton mga ambahanon?
17 Kon ginaamba naton ang mga ambahanon sang Ginharian nga ang aton hunahuna yara sa iban nga mga butang, nga wala ginahangop ang kahulugan sang mga tinaga, indi bala kita mangin kaangay sang dimatutom nga mga Israelinhon nga ginsabdong bangod, samtang gindayaw nila ang Dios sa ila mga bibig, ang ila tagipusuon malayo sa iya? (Mateo 15:8) Indi naton luyag nga yadto nga pagsabdong iaplikar man sa aton paagi sang pag-amba sing mga ambahanon sang Ginharian, indi bala? Paagi sa nagakaigo nga pag-amba sing aton mga ambahanon sang Ginharian, mapukaw naton indi lamang ang aton kaugalingon kundi ang mga sa tupad man naton, lakip ang mga pamatan-on. Huo, kon tamdon sing serioso sang tanan nga nagaamba sa aton mga Kingdom Hall ang laygay nga ginaunod sining mga ambahanon, mangin isa ini ka mabaskog nga pagpalig-on nga mangin makugi sa ministeryo kag malikawan ang mga siod sang paghimo sing sala.
18. Ano ang nangin epekto sa isa ka babayi sang pag-amba sing mga ambahanon sang Ginharian?
18 Sa liwat kag liwat, nahamuot ang mga taga-guwa sa aton pag-amba sing mga ambahanon sang Ginharian. Ginbalhag anay sang Ang Lalantawan ini nga eksperiensia: “Nga ang [aton] pag-amba mahimo man makaganyat sa mga tawo sa pagkilala kay Jehova nga Dios ginpamatud-an sang isa ka eksperiensia sang isa ka babayi nga ginbawtismuhan sa ‘Kadalag-an sang Dios’ nga Asambleya, sa Yankee Stadium, New York City, sang 1973. Una sia nga nagduaw sa isa ka lokal nga Kingdom Hall sing isahanon kag ginpatapos niya ang duha ka miting. Samtang nagaamba ang kongregasyon . . . ‘Keep Your Eyes on the Prize!,’ nahamuot gid sia sa mga tinaga kag sa paagi sang pag-amba amo kon ngaa namat-od sia nga amo ini nga grupo ang luyag niya buylugan. Pagkatapos ginpalapitan niya ang isa sang mga Saksi kag nangabay sing isa ka pagtuon sa Biblia, kag madasig [sia] nga nag-uswag tubtob nangin isa ka Cristianong saksi ni Jehova.”
19. Anong hingapusan nga pagpalig-on ang ginahatag tuhoy sa aton bug-os tagipusuon nga pag-amba sing aton mga ambahanon sang Ginharian?
19 Sa kalabanan sang aton mga miting, diutay lamang ang mga kahigayunan nga mapabutyag sang tumalambong ang ila balatyagon kag apresasyon. Apang mapabutyag naton tanan ang aton ginabatyag sa kaayo ni Jehova paagi sa tinagipusuon nga pagbuylog sa pag-amba sing mga ambahanon sang Ginharian. Luwas pa, kon nagatipon kita, indi bala nga may mapagsik kita nga espiritu? Gani dapat kita may balatyagon sa pag-amba! (Santiago 5:13) Sa pagkamatuod, tubtob sa kasangkaron nga ginaapresyar naton ang pagkaayo ni Jehova kag ang iya dibagay nga kaluoy, ambahon naton ang aton bug-os-kalag nga mga pagdayaw sa iya.
Paano Mo Sabton?
◻ Ano ang duha ka sadsaran nga rason sa pagdayaw kay Jehova?
◻ Sa anong nanuhaytuhay nga mga paagi madayaw naton si Jehova?
◻ Ano ang isa sang labing matahom nga mga paagi nga madayaw naton si Jehova?
◻ Ano ang aton Makasulatanhon nga mga halimbawa sa pagdayaw kay Jehova paagi sa ambahanon?
◻ Paano naton maamba sing nagakaigo ang aton pag-amba sing mga ambahanon sang Ginharian?
[Kahon sa pahina 11]
Ambaha sing Malipayon Ina nga mga Ambahanon!
Ang iban nabudlayan sa pagtuon sing pila ka ambahanon. Apang, ang iban sang mga kongregasyon sa New York may daku nga problema sa pag-amba sing kalabanan sining mga ambahanon. Ayhan ang kinahanglanon lamang amo ang diutay pa nga panikasog nga tun-an ang sa primero daw indi pamilyar nga mga ambahanon. Sa tion nga mangin pamilyar na sa sining mga ambahanon, masami nga mas ginaapresyar ini sang kongregasyon sangsa mga ambahanon nga indi mabudlay tun-an. Nian ang tanan sa kongregasyon makaamba sini. Huo, maamba nila sing malipayon ining mga ambahanon!
[Kahon sa pahina 12]
Ambaha ang mga Ambahanon sang Ginharian sa Sosyal nga mga Pagtinipon
Indi lamang sa Kingdom Hall dapat naton ambahon ang mga ambahanon sang Ginharian. Si Pablo kag si Silas nag-amba sing mga pagdayaw kay Jehova samtang sa bilangguan. (Binuhatan 16:25) Kag si disipulo Santiago nagsiling: “May isa bala nga nagakalipay? Mag-amba sia sing mga pagdayaw sa Dios.” (Santiago 5:13, footnote) Ang tanan malipayon sa sosyal nga mga pagtinipon. Gani ngaa indi ambahon ang mga ambahanon sang Ginharian? Mangin labi ini nga makalilipay kon ang pag-amba akumpanihan sing piano ukon gitara. Kon wala sini, may yara gintokar sa piano nga mga tape sang aton mga ambahanon sang Ginharian; madamo nga Saksi nga pamilya ang may album sining mga tape. Indi lamang ini maayo sa pag-akumpanyar sa pag-amba kundi matahom man ini nga background music.
[Piktyur sa pahina 8, 9]
Sa tapos sila ginluwas sa Dagat nga Mapula, ginpabutyag sang Israel ang ila kalipay paagi sa ambahanon
[Piktyur sa pahina 10]
Ang makalilipay nga ambahanon isa ka bahin sang Cristianong pagsimba karon