Ang mga Saksi ni Jehova sa Palibot sang Kalibutan—Thailand

“ANG duta sang mga hilway.” Amo sina ang kahulugan sang ngalan nga Thai­land. Nanuhaytuhay nga relihiosong mga ideya ang ginapatihan sang iya kapin sa 57,000,000 ka mabuot, mapisan nga mga pumuluyo. Bisan nagapanguna ang Budhismo, ginabuhat man ang mga relihion sang Cristiandad sa sining pungsod sa bagatnan-sidlangan nga Asia. Ining tanan nga mga tawo dapat makabati sang maayong balita sang Ginharian.​—⁠Mateo 24:14.⁠a

Ang mga Refugee Nakabati sang Maayong Balita

Sa mga kampo nga nalapta sa mga kabungyuran sang Thailand sa dulunan nayon sang Myanmar, ang kamatuoran sa Biblia ginabaton sa tunga sang kapin sa 10,000 ka Karen nga mga refugee. Ang mga katapo sang isa ka Karen nga pamilya nga nagapuyo sa sina nga lugar mga Saksi ni Jehova. Ginbantala nila ang maayong balita sa mga refugee. Paano nagsugod ang ila pagpanghikot?

Sang nagligad nga mga pila ka tuig ginbugto sang isa ka pamatan-on ang iya kaangtanan sa Iglesia Anglikana kag nangin isa sa mga Saksi ni Jehova. Sa sugyot sang ila ministro, ang iya mga paryente namatok sa iya. Apang, mapailubon sia nga nagbatas, kag ­amat-amat nga nag-ugdaw ang pagpamatok sang iya pamilya. Ginpadayon sang mga klerigo sang Iglesia Anglikana ang ila pagyaguta tubtob nga ginpahalin sila sa ila katungdanan sang nagligad nga mga duha ka tuig bangod sang imoral nga paggawi. Sanglit ang iglesia wala na sadto sing manugbantay, ang malapit nga pamilya kag iban pa nga mga kaparyentehan sang Saksi nakibot kag nagdalangdalang. Napulog-isa sa ila ang naghalin sa iglesia kag nangabay sing pagtuon sa Biblia sa mga Sak⁠si.

Ini nga pagtuon nag-uswag sing maayo, kag ang iban nga nga refugee nakigbahin. Ang kamatuoran madasig nga naglapnag, nga nagresulta sa pagbawtismo sa 17 ka bag-ong mga Saksi sa suba nga nagailig sa kampo sang mga refugee. Daw ano ka makalilipay nga talan-awon sang ang 88-anyos nga lola gintum-oy upod sa ila!

Ang Video Nagapukaw sing Interes

Daku ang posibilidad sang pag-uswag sa mga refugee. Sang 1993 sang ginsaulog ang Memoryal, 57 ka tawo ang nagtambong. Sang nagduaw ang manugtatap sa sirkito sang Mayo sadto nga tuig, 67 ang nagtipon sa isa sang iya mga pamulongpulong. Kag mga 250 ang nagtipon agod magtan-aw sa video sang Watchtower Society nga Jehovah’s Witnesses​—⁠The Organization Behind the Name.

Ang asawa sang isa ka pastor sang Baptist sa kampo sang mga refugee nagtambong sa isa ka pamulongpulong publiko sa Biblia nga ginsakdag sang mga Saksi kag ginsulat ang mga teksto sa Biblia nga ginpaathag. Ginsugiran niya ang iya bana nga indi gid sia kontento sa sulit-sulit nga mga sermon nga nabatian niya sa ila simbahan. Namatok ang iya bana, nagasiling nga kon ang iya asawa magakadto sa mga miting sang mga Saksi ni Jehova, ang tanan nga iban pa nga mga parokyano magasunod sa iya. Sang nagtambong sia liwat sa mga miting, ginlagas sia sang iya bana sing kutsilyo kag gintutdan ang iya mga nota sa miting kag literatura sa Biblia. Walay sapayan sina, sang ginpaguwa ang vid­eo, nagkadto sia liwat. Sang ulihi ginsugiran sang babayi ang iya bana sa iya nakita. Upod ang nagbag-o nga panimuot, luyag niya makita ang video kag nagkasubo nga gintutdan niya ang mga nota kag literatura sa Biblia sang iya asawa.

Gani ang mga tawo nagapamati sang maayong balita sa Thailand. Busa nagatigayon sila sing espirituwal nga kahilwayan sa “duta sang mga hilway.”​—⁠Juan 8:⁠32.

[Footnote]

[Kahon sa pahina 24]

LARAWAN SANG PUNGSOD 1993 nga Tuig sang Pag-alagad

KATAASON SANG KADAMUON NGA NAGAPANAKSI: 1,434

RATIO: 1 ka Saksi sa 40,299

TUMALAMBONG SA MEMORYAL: 3,342

PROMEDYO NGA PAYUNIR NGA MGA MANUGBANTALA: 232

PROMEDYO NGA PAGTUON SA BIBLIA: 1,489

KADAMUON NGA NABAWTISMUHAN: 92

KADAMUON SANG KONGREGASYON: 39

SANGA TALATAPAN: BANGKOK

[Piktyur sa pahina 25]

Ang mga manugbantala sang Ginharian makugi nga nagabantala sang maayong balita

[Piktyur sa pahina 25]

Ang nahaunang sanga talatapan, 1947

[Piktyur sa pahina 25]

Ang panimalay Bethel sa atubangan sang bag-ong sanga talatapan sa Bangkok, nga gindedikar sang Pebrero 8, 1992