Indi Sia Tuman Na ka Tigulang sa Pag-alagad kay Jehova
MADAMO nga mga tigulang ang nagabatyag nga ang ila nabilin nga mga tinuig may diutay lamang nga paglaum sang kalipay. Isa ka kilala nga tigulang nga artista nga babayi ang nagsiling: “Ginguba ko ang akon kabuhi, kag ulihi na katama agod mabag-o ini . . . Kon nagalakat ako sing isahanon, ginabalikid ko ang akon kabuhi, kag wala ako nalipay sa ginhimo ko sa sini . . . Indi ako kontento kag wala sing pasingadtuan.”
Wala sing amo sina nga problema ang isa ka tigulang nga babayi nga nagkabuhi sing halos 2,000 ka tuig na ang nakaligad. Otsenta’y-kuwatro anyos sia nga balo, apang mapagsik, malipayon, kag makalilipay nga ginkahamut-an sia sang Dios. Ang iya ngalan amo si Ana, kag may pinasahi nga rason sia para magkasadya. Ano ini?
“Wala Gid Nagapalya sa Templo”
Ginapakilala sa aton ni Lucas, nga manunulat sang Ebanghelyo, si Ana. “Karon,” siling niya, “yara si Ana nga manalagna nga babayi, anak nga babayi ni Fanuel, sang tribo ni Aser” sa Israel. Subong isa ka manalagna nga babayi, may dulot sia sang balaan nga espiritu, ukon aktibo nga kusog, sang Dios sa pinasahi nga kahulugan. Kag si Ana may yara daku nga kahigayunan nga makapanagna sa isa ka talalupangdon nga okasyon.
Si Lucas nagasaysay: “Ini nga babayi tigulang na sa edad, kag nagkabuhi kaupod sang iya bana sing pito ka tuig kutob sang iya pagkaulay, kag balo sia tubtob sa kawaluan kag apat ka tuig.” (Lucas 2:36, 37) Mahimo nga bata pa si Ana nabalo. Nahibaluan sang nabalo nga Cristianong mga babayi sang bisan ano nga edad kon daw ano kasubo ang mamatyan sang isa ka hinigugma nga bana. Apang, kaangay sang madamong diosnon nga mga babayi sa aton adlaw, wala pagtuguti ni Ana ining masubo nga eksperiensia nga magpauntat sang iya pag-alagad sa Dios.
Si Lucas nagasugid sa aton nga si Ana “wala gid nagapalya sa templo” sa Jerusalem. (Lucas 2:37) Hanuot niya nga ginpasalamatan ang kabulahanan nga resulta sang pag-alagad sa balay sang Dios. Ang iya mga buhat nagapakita nga, kaangay sang salmista-hari sang Israel nga si David, isa lamang ka butang ang mapangabay niya kay Jehova. Kag ano ina? Si David nag-amba: “Isa ka butang ang ginpangayo ko kay Jehova—amo ini ang pangitaon ko, nga makapuyo ako sa balay ni Jehova sa tanan nga adlaw sang akon kabuhi, sa pagtan-aw sang katahuman ni Jehova kag sa pagpamalandong sa iya templo.” (Salmo 27:4) Sa sini man nga bahin, si Ana kaangay sang Cristianong mga babayi karon nga nagakalipay sa pagtambong sing tayuyon sa duog sang pagsimba ni Jehova.
Si Ana naghimo sing balaan nga pag-alagad kay Jehova sa gab-i kag adlaw. Ginhimo niya ini nga “may pagpuasa kag pagpangamuyo,” nga nagapakita sang paglalaw kag hanuot nga pagkahidlaw. (Lucas 2:37) Ang siniglo na kadugay nga pagpasakop sang Judiyo sa Gentil nga mga kagamhanan, upod ang nagausmod nga mga kahimtangan sa relihion nga naglab-ot bisan tubtob sa templo kag sa mga saserdote sini, ayhan amo ang kabangdanan sang mga pagpuasa kag mga pagpangamuyo ni Ana kay Jehova nga Dios. Apang may rason man sia nga mangin malipayon, ilabi na bangod sang dikinaandan nga butang nga natabo sa isa ka importante nga adlaw sang tuig 2 B.C.E.
Wala Ginapaabot nga Pagpakamaayo
Sa sining importante gid nga adlaw, ang lapsag nga si Jesus gindala sa templo sa Jerusalem sang iya iloy, nga si Maria, kag sang iya tiyo, nga si Jose. Nakita sang tigulang nga si Simeon ang lapsag kag nagpamulong sing matagnaon nga mga pinamulong sadto nga okasyon. (Lucas 2:25-35) Subong sang kinaandan didto si Ana sa templo. “Sa sadto gid nga takna,” report ni Lucas, “nagpalapit sia.” (Lucas 2:38) Daw ano gid ang kalipay ni Ana sang nakita sang iya tigulang nga mga mata ang palaabuton nga Mesias!
Kap-atan ka adlaw antes, nakibot ang mga manugbantay malapit sa Betleham sa mga pinamulong sang anghel sang Dios: “Yari karon! Ginatunda ko sa inyo ang maayong balita sang dakung kalipay nga mangin sa bug-os nga katawhan, kay natawo sa inyo karon nga adlaw ang Manluluwas, nga si Cristo nga Ginuo, sa banwa ni David.” Ang isa ka kadam-an sang panong sang langitnon nga kasuldadosan nagdayaw kay Jehova kag nagdugang: “Himaya sa Dios sa kahitaasan, kag paghidait sa duta sa tunga sang mga tawo nga may maayo nga kabubut-on.” (Lucas 2:8-14) Subong man, si Ana napahulag karon nga magpanaksi nahanungod sa Isa nga mangin Mesias!
Sang nakita ang lapsag nga si Jesus, si Ana ‘nagpasalamat [man] sa Dios kag naghambal nahanungod sa bata sa tanan nga nagahulat sang pagtubos sang Jerusalem.’ (Lucas 2:38) Kaangay sang tigulang nga si Simeon, nga may pribilehiyo man nga makita ang lapsag nga si Jesus sa templo, walay duhaduha nga ginkahidlawan, ginpangamuyo, kag ginhulat niya ang ginsaad nga Manluluwas. Ang maayong balita nga si Jesus amo inang Isa nga nagtiklod sa iya nga isugid ini sa iban.
Bisan wala ginpaabot ni Ana nga buhi pa sia pagdaku ni Jesus, ano ang ginhimo niya? Makalilipay nga ginpanaksihan niya ang iban nahanungod sa kahilwayan nga mahanabo paagi sa sining palaabuton nga Mesias.
Ang Maayo nga Halimbawa ni Ana
Pila ka relihioso nga mga tawo sa kalibutan ang magahatag sing amo sina nga panaksi ukon magasimba sa gihapon sa gab-i kag adlaw sa edad nga 84? Ayhan, mangayo sila sing pension mga tinuig antes. Tuhay si Ana kag si Simeon. Nagpahamtang sila sing maayo nga halimbawa para sa tanan nga mga tigulang nga alagad ni Jehova. Sa pagkamatuod, nahamuot sila sa balay ni Jehova sa pagsimba kag gindayaw sia sa ila bug-os nga tagipusuon.
Natigayon naton kay Ana ang matahom nga halimbawa sang isa ka diosnon nga balo. Sa katunayan, ang paglaragway ni Lucas sa sining mapainubuson nga tigulang nga babayi mapaanggid sa mga kalipikasyon sang isa ka maayo nga balo nga ginbalay sa 1 Timoteo 5:3-16. Didto si apostol Pablo nagasiling nga ang subong sina nga balo “nagapadayon sa mga pag-ampo kag mga pangamuyo sa adlaw kag gab-i,” “asawa sang isa ka bana,” kag ‘maukod nga nagahimo sang tagsa ka bagay.’ Amo sina nga sahi sang babayi si Ana.
Karon, makita naton ang matutom nga mga tigulang nga balo nga nagahimo sing balaan nga pag-alagad sa Dios gab-i kag adlaw sa linibo ka kongregasyon sang mga Saksi ni Jehova sa bug-os nga duta. Daku gid ang aton pag-apresyar sa sining modernong-adlaw nga “mga Ana” sa tunga naton!
Bisan tigulang na sa edad, ang mga lalaki kag mga babayi makadedikar sa Dios kag makasimbulo sini paagi sa bawtismo sa tubig. Ang mga tigulang indi tuman na ka tigulang agod mag-alagad kay Jehova kag magpanaksi nahanungod sa Mesianikong Ginharian nga natukod na karon sa mga langit kag nga sa dili madugay magadala sing bugana nga mga pagpakamaayo sa matinumanon nga katawhan. Ang tigulang nga mga tawo nga nagahimo karon sing balaan nga pag-alagad sa Dios makapamatuod sa pagpakamaayo ni Jehova sa ila, subong nga si Ana ginpakamaayo sing pinasahi sang nagligad nga mga siglo. Indi sia tuman na ka tigulang agod mag-alagad kay Jehova kag magdayaw sa iya balaan nga ngalan—kag amo man sila.