Ang Ila Pagpangita sa Husto nga Relihion

HALIN pa sa pagkabata nagapangita ang iban nga mga tawo sing makaalayaw nga mga sabat sa ila mga pamangkot nahanungod sa kabuhi. Sang bata pa sila, mahimo nga nakatambong sila sa relihioso nga mga serbisyo. Apang nasapwan sang madamo sa ila nga ang mga sabat nga ginhatag sa ila ukon ang rito sang simbahan wala gid makabulig sa ila nga malandas ang mga palaligban sang kabuhi.

Mahimo magasiling sila nga mga katapo gihapon sila sang relihion sang ila mga ginikanan, bisan pa malaka na lang sila nagatambong sa relihioso nga mga serbisyo. Suno sa isa ka obispo sang ­Church of Eng­land, ang ila nabilin nga diutay nga pagtuo may diutay nga impluwensia sa ila kabuhi. Indi na tanto ka importante sa ila ang relihion. Ang iban naman, bangod nadisgusto sa pagkasalimpapaw nga nakita nila sa mga relihion, ginsikway nila sing bug-os ang relihion. Apang, nagapabilin gihapon ang ila mga pamangkot nahanungod sa kabuhi.

Kon Ngaa ang Iban May Daku nga mga Duhaduha

Nahibaluan sang kalabanan nga mga tawo nga madamo nga iglesia ang may mga ahensia nga nagabulig sa mga wala sing puluy-an, nagapanagtag sing kalan-on sa mga imol, kag nagasakdag sa kultural nga mga okasyon. Apang mabatian man nila sa halos kada adlaw ang mga balita nahanungod sa kasingki kag pagpatyanay nga nanggamot sa relihion indi lamang sa tunga sang mga di-Cristiano kundi sa tunga man sang mga nagapangangkon nga mga Cristiano. Dapat bala kita makibot kon magduhaduha sila nga ang mga grupo nga nadalahig sa sina nga kasingki may husto nga relihion?

Madamo sang nagdaku sa relihioso nga mga pamilya ang nagahunahuna anay nga ang mga balay-alaypan nga ginasakdag sang mga iglesia isa ka maayong butang. Apang, sining karon nga mga tinuig, nakibot sila sang ang mga pari sa lainlain nga mga duog gin-akusar sing pang-abuso sa sekso sa kabataan nga gintugyan sa ila. Sang primero nagdumdom ang mga tawo nga pila lamang ka pari ang balasulon. Karon ang iban sa ila nagapalibog kon bala may sayop sa iglesia mismo.

Ang pila, subong ni Eugenia, masako gid anay sa ila relihion. Subong isa ka pamatan-on sa Argentina, isa sia sa nagalakbay nga mga peregrino agod magsimba sa Birhen sang Itatí. Sa 14 ka tuig nagpuyo sia sa kombento subong isa ka madre. Nian naghalin sia agod mangin katapo sang isa ka internasyonal nga relihioso-politikanhon nga grupo nga nagasakdag sang madasig, daku nga pagbag-o sang sosyal kag ekonomiko nga mga bahin sang katilingban paagi sa rebolusyon. Subong resulta sang iya nakita kag inagihan, nadulaan sia sing pagtuo kag pagsalig sa Dios. Indi relihion nga matuuhan niya ang ginapangita gid niya. Ang iya ginahandum amo ang paagi sa pagdala sing hustisya sa mga imol​—⁠huo, kag isa ka abyan nga iya masaligan.

Nakita sang iban ang nagakatabo sa mga iglesia kag nagapalayo sila sa sini. Ang isa ka ateista nga ang iya mga pagtamod ginbalhag sang 1991 sa magasin nga Sputnik prangka nga nagsiling: “Wala ako sing makita nga kinatuhayan sa ulot sang mga kinaiya sang pagano kag sang Cristianong mitolohiya.” Subong isa ka halimbawa, ginlaragway niya ang isa ka prosesyon nga sa diin ang mga pari nga nagasuksok sing naburdahan sing duag bulawan nga mga panapton nga malaba nga nagatuwang sing lungon nga may sulod nga mum­my sa mga kalye sang Mos­cow. Amo yadto ang bangkay sang isa ka “Ortodokso nga Cristianong Santo” nga ginsaylo gikan sa isa ka museo pakadto sa isa ka simbahan, kag ginpahanumdom sini sa manunulat ang mga pari kag mga mum­my anay sa dumaan nga Egipto. Ginhinumdom man niya nga samtang ang mga nagapakigbahin sa prosesyon sa Mos­cow nagatuo sa “Cristianong Trinidad,” ang mga Egiptohanon nagsimba man anay sa isa ka trinidad nga mga dios​—⁠sanday Osiris, Isis, kag Horus.

Ginpatuhuyan man sadto gihapon nga manunulat ang Cristianong ideya sa gugma​—⁠“Ang Dios gugma,” kag “higugmaa ang imo isigkatawo”​—⁠subong wala sing katumbas sa paganong Egipto. Apang nagsiling sia: “Ang utudnon nga gugma wala magmadinalag-on sa kalibutan, bisan sa duog sini nga nagatawag sang iya kaugalingon nga Cristianong kalibutan.” Kag ginsundan niya ini sing mga komento nahanungod sa malain nga mga bunga sang pagpamilit sang iglesia nga makigbahin sa hilikuton sang Estado. Ang iya nakita wala magpahulag sa iya sa pagbatyag nga ginatanyag sang mga iglesia sang Cristiandad ang iya ginapangita.

Sa pagpatuhay, ang iban nakasapo sing makaalayaw nga mga sabat apang indi sa mga iglesia sang Cristiandad.

Natun-an Niya ang Kamatuoran Nahanungod sa mga Patay

Si Magdalena, nga 37 anyos karon, nagapuyo sa Bulgaria. Sang mapatay ang iya ugangan nga lalaki sang 1991, nangalisod gid sia. Pirme niya ginapamangkot ang iya kaugalingon, ‘Sa diin nagakadto ang mga patay? Sa diin na ang akon ugangan nga lalaki?’ Nagkadto sia sa simbahan, kag nangamuyo sia sa atubangan sang isa ka imahen sa ila puluy-an, apang wala gihapon sia makatigayon sing mga sabat.

Nian isa ka adlaw nagtelepono ang isa ka kaingod agod agdahon sia sa iya puluy-an. Ang isa ka pamatan-on nga lalaki nga nagatuon upod sa mga Saksi ni Jehova nagaduaw sa sini nga kaingod. Namati sia samtang ini nga pamatan-on nagahambal nahanungod sa Ginharian sang Dios kag sa Iya katuyuan nga himuon ang duta nga isa ka paraiso diin ang katawhan makakabuhi sing dayon sa kalipay. May libro nga Mahimo Ka Mabuhi sing Dayon sa Paraiso sa Duta sa ibabaw sang lamesa. Paagi sa sini nga libro ginpatalupangod sa iya sang pamatan-on nga lalaki ang teksto sa Biblia sa Manugwali 9:​5, nga nagasiling: “Tuhoy sa mga patay, wala sila sing nahibaluan nga bisan ano.” Sadto nga gab-i nagbasa sia sing dugang pa. Natun-an niya nga ang mga patay wala magkadto sa pihak nga kinabuhi sa langit ukon sa impierno; wala sila sing nahibaluan nga bisan ano, nga subong bala nagatulog lamang sing hamuok. Malipayon nga ginbaton niya ang imbitasyon nga magtambong sa isa ka miting sang lokal nga kongregasyon sang mga Saksi ni Jehova. Pagkatapos sang miting nagsugot sia nga magtuon sa Biblia sing regular. Sang mapanilagan niya sa miting kon paano ginahalad ang mga pangamuyo kay Jehova, sia man nagsugod sa pagpangamuyo kay Jehova agod mangayo sing bulig sa paglandas sa isa ka tudok nga kaluyahon. Sang ginsabat ang iya pangamuyo, nahibaluan niya nga nakita na niya ang husto nga relihion.

Nakasapo Sila sing Mapuslanon nga Kabuhi

Nagdaku si André sa isa ka sirado Katoliko nga puluy-an sa Belgium kag nag-alagad subong sakristan sang isa ka lokal nga pari. Apang, sadto nga tion, may mga butang sia nga nakita nga nagpaluya sang iya pagtahod sa iglesia. Subong resulta, nangin Katoliko sia sa ngalan lamang.

Sa 15 ka tuig naghampang sia sing propesyonal nga soc­cer. Isa ka bes sang ang iya team naghampang sa isa ka turnamento sa Italya, gin-agda sila nga makigkita sa papa. Wala sing butang nga makapalig-on sa espirituwal sa sadto nga pagduaw, kag naglain lamang ang buot ni André sa kalibutanon nga manggad nga nagalibot sa papa. Nadugangan pa ang iya mga duhaduha sa iglesia. Ang iya pribado nga kabuhi indi makalilipay bangod sang duha ka nabungkag nga pag-asawahay. Nagbatyag sia sing kapaslawan sa kahimtangan sang kalibutan. Sang 1989 ginsulat niya sa iya lista-adlawan: ‘Ano ang kahulugan sang tanan nga binuang nga butang nga nagakatabo sa palibot naton?’ Wala sia sing nakita nga mga sabat gikan sa iya relihion.

Sang 1990, sang si André nagatrabaho bilang ­coach sang soccer sa Ice­land, nakita sia ni Iris nga isa ka misyonero sang mga Saksi ni Jehova. Ginbaton niya ang literatura kag gin-agda ang misyonero nga magbalik. Nagbalik sia upod sa iya bana, si ­Kjell. Sang magpungko sila kag makighambal kay André, athagon nga interesado gid sia nga mahangpan ang Biblia. Ang iya asawa, si Ásta, interesado man. Sa tunga-tunga sang adlaw, may tatlo ka oras sia nga bakante sa ulot sang iya mga sesyon sa pag-­coach, gani namat-od sila nga gamiton ina nga tion para sa pagtuon sa Biblia. “Mas nagapagsik ako kon magtuon sa Biblia sangsa kon magpahuway lamang,” siling niya. Amat-amat nga ginsabat sang Biblia ang iya mga pamangkot. Ang ila pagtuo kay Jehova kag sa iya Ginharian amat-amat nga nagtubo. Ang mahimayaon nga mga saad sang Biblia tuhoy sa isa ka mahidaiton nga bag-ong kalibutan, isa ka kalibutan nga hilway sa “tanan nga binuang nga butang nga nagakatabo,” nangin matuod sa ila. Sanday André kag Ásta lunsay nagapaambit karon sang ila bag-o masapwan nga pagtuo sa iban.

Masinaligon gid sanday Magdalena, André, kag Ásta nga nakita nila sang ulihi ang husto nga relihion. Si Eugenia man, sa tapos magtinguha nga lubaron ang mga palaligban sang kalibutan paagi sa politikanhon nga paagi, nakasapo sang ulihi sa tunga sang mga Saksi ni Jehova sing relihion nga para sa iya daw amo ang husto. Apang ano gid ang nagapat-od kon bala ang isa ka relihion amo ang husto? Basaha palihug ang masunod nga artikulo.

[Piktyur sa pahina 7]

Ang regular nga pagtuon sa Biblia upod sa mga Saksi ni Jehova nagabulig sa kapin sa lima ka milyon ka tawo sa ila pagpangita sing makaalayaw nga mga sabat